Bilif i Kasem Traem Be God i Stap Givhan

Vicky i wan naesfala bebi gel.​—Hem i gat gudfala bodi, fes blong hem i naes tumas mo hem i muvmuf plante. Hem i bon long 1993, long taem we ol tri oli putum flaoa. Long taem ya, mitufala i glad we i glad bigwan. Mifala i stap long wan smol taon long saot blong Swiden, mo laef blong mifala i gud.

BE TAEM Vicky i gat wan yia haf blong hem, olgeta samting long laef blong mifala oli jenis. Hem i bin sik longtaem lelebet, taswe mitufala i tekem hem i go long hospital. Mitufala i no save fogetem taem we dokta i talem long mitufala se gel blong mitufala i gat sik ya we oli kolem lymphoblastic leukemia. Hemia wan kaen kansa we i kasem ol pikinini, mo i stap spolem ol waet sel * blong blad.

Mitufala i no wantem bilif se smol gel blong mitufala i kasem wan bigfala sik olsem. Hem i jes stat blong luksave ol samting raonabaot long hem, be naoia maet bambae hem i ded. Dokta i traem mekem mitufala i harem gud lelebet taem hem i talem se i gat wan tritmen we, plante taem, i winim sik ya. Tritmen ya oli kolem chemotherapy mo wetem tritmen ya bambae smol gel blong mitufala i mas tekem blad. Hemia wan narafala samting we i mekem tingting blong mitufala i trabol tumas.

Wan Traem Long Bilif Blong Mitufala

Mitufala i rili lavem smol gel blong mitufala mo mitufala i wantem hem blong kasem beswan tritmen we i stap. Nating se i olsem, mitufala i no wantem nating se bambae oli putum blad long bodi blong hem. Mitufala i bilif strong long Tok blong God, Baebol, we i talem klia se olgeta Kristin oli no mas “yusum blad.” (Ol Wok 15:​28, 29, NW ) Mitufala i save tu se, i gat denja i stap taem man i tekem blad blong narafala man. Plante man oli bin kasem ol nogud sik mo oli ded from we oli bin tekem blad blong narafala man. Wan rod nomo i stap, hemia wan tritmen we i no nidim blad long hem. Blong faenem wan tritmen olsem, mitufala i mas faet strong blong holem bilif blong mitufala.

?Bambae mitufala i mekem wanem? Mitufala i askem help long Hospital Infomesen Sevis we i stap  long branj ofis blong ol Witnes blong Jeova long Swiden. * Kwiktaem nomo, ol brata oli sanem faks i go long ol defren hospital raonabaot long Yurop blong faenem wan hospital mo wan dokta we i rere blong givim tritmen blong chemotherapy be i no yusum blad. Strong tingting mo lav we ol Kristin brata blong mitufala oli soemaot taem oli traehad blong halpem mitufala, i mekem mitufala i kam strong moa. Mitufala i no stap mitufala nomo long faet blong mitufala blong holem bilif.

Sam aoa nomo biaen, ol brata ya oli faenem wan hospital mo wan dokta long Homburg/Saar, Jemani. Oli wokem plan blong mitrifala i tekem plen long nekis dei, i go kasem ples ya we dokta ya i save jekemap Vicky. Taem mitrifala i kasem ples ya, ol Kristin brata blong mifala we oli blong kongregesen blong ol Witnes blong Jeova long Homburg, wetem sam famle blong mitrifala, oli welkamem mitrifala. Wan brata we i stap blong welkamem mitrifala, hem i wok long Komiti we i toktok wetem ol dokta long ples ya. Brata ya nao i tekem mitrifala i go long hospital mo i traem bes blong hem blong leftemap tingting blong mitrifala. Mitufala i harem gud tumas blong luk se, nating se mifala i stap long wan kantri we i no ples blong mifala, be ol Kristin brata blong mifala oli sapotem mifala fulwan.

Taem mifala i mitim Dokta Graf long hospital, mifala i harem gud bigwan. Hem i wan dokta we i lesin gud long tingting blong mifala mo hem i mekem mifala i sua se bambae hem i traem bes blong hem blong givim tritmen long Vicky we i no yusum blad. Dokta ya i agri se, nating sipos level blong hemoglobin long blad blong Vicky i godaon kasem 5 g/dl, * bambae hem i gohed nomo long tritmen ya we hem i no yusum blad. Hem i talem tu se, from we mifala i bin tekem Vicky i go kwiktaem long hospital blong oli faenemaot sik ya, mo from we mifala i hareap blong kam kasem hem, i gat bigfala janis se tritmen ya i wok. Be hem i talem stret se, hemia fastaem we bambae hem i givim wan chemotherapy we i no yusum blad blong winim sik ya we Vicky i gat. Mitufala i gat bigfala tangkiu mo mifala i respektem bigwan, Dokta Graf from we hem i no fraet mo i gat strong tingting blong givhan long mifala.

Problem Long Saed Blong Mane

Naoia wan kwestin i stap se: ?Bambae mifala i kasem mane wea, blong pem tritmen blong Vicky? Mitufala i sek bigwan blong lanem se, sipos tritmen ya i gohed blong tu yia, bambae mitufala i mas pem 150,000 mark (raonabaot 9 milian vatu). Mitufala i gat smol haf nomo blong mane ya, mo i rili impoten blong statem tritmen blong Vicky kwiktaem. From we mitufala i lego Swiden blong kasem tritmen long Jemani, gavman blong Swiden i no save pem tritmen ya. Yes, mitufala i gat wan smol gel we i sik bigwan mo mitufala i faenem tritmen we hem i nidim, be nomo se, mitufala i no gat inaf mane.

Hospital i rere blong halpem mitufala. Oli talem long mitufala se oli save statem tritmen ya naoia, sipos mitufala i pem 20,000 mark (samwe long 1 milian vatu) fastaem, mo mitufala i saenem wan pepa blong soemaot se bambae mitufala i pem narafala haf blong mane ya biaen. Mitufala i gat smol mane i stap long bang, mo sam fren mo famle oli rere blong givhan tu, mekem se mitufala i naf blong pem 20,000 mark ya. ?Be, olsem wanem long narafala haf blong mane ya?

Long taem ya bakegen, mifala i luksave se mifala i gat plante fren we oli sapotem mifala long faet ya blong holem bilif. Wan Kristin brata, we long taem ya mifala i no save hem, i rere blong pem bigfala mane ya. Be, biaen, mifala i no nid blong yusum mane blong brata ya from we mifala i wokem wan narafala rod blong pem praes ya.

Ol Dokta Oli Yusumgud Save Blong Olgeta

Tritmen blong chemotherapy i stat. Ol dei mo ol wik oli pas. Samtaem mitufala, mo smol gel blong mitufala tu, i harem nogud mo i taed. Be, mitufala i glad mo i harem gud tumas taem mitufala i luk se, sloslou, ol dokta oli stap winim sik ya. Tritmen ya i gohed blong eit manis. Hemoglobin level long blad blong Vicky i godaon kasem 6 g/dl, mo Dokta Graf i holem promes blong hem.

Naoia, sikis yia i pas finis, mo long laswan jekap we ol dokta oli bin mekem long gel blong mitufala oli no faenem wan saen blong leukemia. Vicky hem i wan pikinini we i hapi mo ol man oli no save  luk se hem i bin sik bigwan. Yes, hemia wan merikel, we Vicky i kamgud fulwan. Mitufala i save se plante pikinini we oli kasem semfala sik ya, oli ded nating se oli folem tritmen blong chemotherapy mo nating se oli bin tekem blad.

Mifala i winim faet we mifala i mekem blong holem bilif blong mifala. Be maet mifala i no save winim faet ya sipos ol famle, ol Kristin brata sista, mo ol dokta we oli gat save, oli no bin halpem mifala. Hospital Infomesen Sevis i rili givhangud long mifala long enitaem we mifala i nidim. Dokta Graf mo ol man we oli wok blong hem oli yusumgud save we oli gat blong halpem Vicky. Mitufala i rili tangkiu bigwan from olgeta samting ya.

Bilif Blong Mitufala i Kam Strong Moa

Antap long samting ya, mitufala i talem tangkiu long God blong yumi, Jeova, from lav, fasin kea mo paoa we hem i givim long mitufala tru long Tok blong hem, Baebol. Taem mitufala i tingtingbak long hadtaem ya, mitufala i luksave se mitufala i bin lanem fulap samting, mo mitufala i luksave se hadtaem we i kasem laef blong mitufala i mekem bilif blong mitufala i kam strong moa.

Naoia, mitufala i wantem tumas blong gohed blong frengud wetem Jeova God mo blong tijim gel blong mitufala se i impoten blong mekem laef blong yumi i laenap wetem olgeta samting we Jeova i wantem. Yes, mitufala i wantem givim wan gudfala presen long smol gel blong mitufala, wan presen we bambae i givhan long hem blong kasem laef we i no save finis long Paradaes long wol ya.​—⁠Oli sanem stori ya i kam.

[Ol futnot]