“Wan Bigfala Denja We i Haed”

I NO longtaem i pas, sam man oli mekem wan stadi blong save hamas man i bin lukluk ol doti pija blong seks long Internet. Yumi sapraes tumas se long Yunaeted Stet, wan long evri tri man oli bin lukluk ol doti pija olsem. Naoia plante man oli letem Internet i pulum filing blong olgeta blong wantem tumas ol rabis fasin blong seks. Dokta Al Cooper, we i man blong stadi long ol samting we i mekemap laef, hem nao i mekem stadi ya. Hem i talem se: “Hemia i wan bigfala denja we i haed. Denja ya i kam antap bigwan, from we smol man nomo oli luksave denja ya.”

?Hu ya olgeta we ol doti pija blong seks long Internet, i save pulum olgeta isi nomo? Dokta Cooper i talem se: “Hemia olgeta we oli stap bos long ol filing blong seks long ful laef blong olgeta, mo oli no gat rod blong soemaot ol filing ya,” be nao “kwiktaem nomo oli faenem se i gat plante janis blong lukluk ol samting long saed blong seks,” insaed long Internet.

Be plante long olgeta we oli stap lukluk ol doti pija, oli ting se oli no save kasem trabol. ?Samting ya i tru? Tingbaot se man we i tekem drag oltaem, bambae drag ya i bos long hem. I sem mak, plante long olgeta we oltaem, oli stap lukluk ol doti pija long Internet, bambae oli wantem lukluk “plante moa” pija olsem, blong mekem oli haremgud long filing blong olgeta. !Ale, maet oli lusum wok blong olgeta, mo oli spolem fasin fren we oli gat wetem waef no hasban blong olgeta!

Be olgeta we oli wantem mekem God i glad, oli gat wan narafala risen from wanem oli no lukluk ol doti pija long Internet. Tok blong God i givim woning se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya, we man i stap wantem evri samting, hemia i olsem nomo we hem i stap mekem wosip long ol narafala god. Mo from ol fasin ya, God bambae i jajem ol man we oli no save obei long hem, i givim panis long olgeta.” (Kolosi 3:​5, 6) Blong ‘kilimaot ol fasin ya blong yumi’ we yumi wantem tumas ol doti fasin blong seks, yumi mas gat bigfala lav long Jeova. (Ol Sam 97⁠:10) Sipos yumi filim se ol doti pija long Internet oli stap pulum yumi, yumi mas gohed strong blong stadi long Tok blong God, Baebol, blong mekem se lav we yumi gat long Jeova i kam moa strong. Mo sipos yumi joen oltaem wetem ol Witnes blong Jeova long Haos Kingdom, samting ya i save givim strong tingting long yumi, blong wantem mekem God i glad.