Wan Bigfala Ogenaesesen We i Kea Long Ol Narawan

WEPLES we ae blong yu i kasem, yu save luk man nomo. Plante oli ol olfala, we sam long olgeta oli handikap, oli no save wokbaot. I gat ol woman we oli gat bel mo ol hasban mo waef we oli jes bonem pikinini. Olgeta evriwan ya oli ol refuji​—⁠ol man, woman, mo pikinini, we faet, ol disasta, no ol narafala trabol i mekem se oli mas ronwe long haos blong olgeta blong go haed long wan narafala kantri. Samfala, plante taem finis ol man oli ronemaot olgeta long ples blong olgeta. Taem i gat saen se bambae wan faet no wan disasta i kamaot, oli karem sam samting we oli nidim, oli karem ol pikinini blong olgeta, mo oli ronwe i go long kantri we i moa sef. Biaen, taem ol samting oli kamgud bakegen, plante refuji oli gobak mo bildim haos blong olgeta bakegen. Ale oli traehad bakegen blong kasem ol samting we oli lusum.

Long ol yia we i pas, Ripablik Blong Sentrol Afrika i akseptem ol refuji blong ol narafala kantri. I no longtaem i pas, plante taosen man, wetem sam Witnes blong Jeova tu, oli mas ronwe long faet we i stap gohed long Demokratik Ripablik Blong Kongo. Ol man ya, oli mas go haed long Ripablik Blong Sentrol Afrika.

Ol Brata Oli Givhan

Ol Witnes long Ripablik Blong Sentrol Afrika oli harem se i wan blesing blong givhan long ol narafala. Oli rerem ol ples blong slip blong ol Kristin brata we bambae oli kam. Fastaem, oli faenem rum long haos blong ol brata, be biaen namba blong ol refuji i go antap. Taswe, i klia se ol Witnes long ples ya oli faenem narafala rod blong givim ples blong slip. Oli mekem sam Haos Kingdom i kam ples blong slip. Ol Witnes long ples ya oli rere blong wok. Oli putumap sam moa laet, joenem ol paep blong wota, mo oli putum simen long floa blong mekem i gud long olgeta we bambae oli slip long ples ya. Ol refuji oli joen wetem ol brata long ples ya blong stanemap ol ples ya blong slip. Oli mekem plan blong holem ol Kristin miting long lanwis Lingala. Long rod ya, ol refuji oli save kasem ol kakae long saed blong spirit we i blong givim laef. Ol Witnes long ples ya mo ol Witnes we oli refuji oli rili gat fasin blong wok tugeta. Samting ya i soem se i rili gat wan bigfala ogenaesesen blong ol brata long fulwol.

Ol famle we oli refuji, oli no wokbaot wanples taem oli kamtru long Ripablik Blong Sentrol  Afrika. Sam oli kam fastaem, sam oli kam afta. Biaen, ol memba blong famle we oli bin seraot, oli joen bakegen olsem wan famle taem oli kasem Sentrol Afrika. Long wanwan Haos Kingdom, i gat lis blong ol refuji we oli sef nomo taem oli kasem ples ya. Ol brata oli mekem plan blong faenem olgeta we oli lus yet. Branj ofis we i lukaot long wok blong ol Witnes blong Jeova long kantri ya, i sanem trifala trak evri dei blong givhan long ol Witnes we oli stap wokbaot i kam, mo blong lukaot olgeta we maet oli lus. Long ol trak ya, oli putum ol bigfala saen, we i talem se “WATCH TOWER​—⁠Jehovah’s Witnesses.”

Tingbaot bigfala glad blong seven pikinini, we oli bin seraot long papa mama blong olgeta, taem oli luk trak blong ol Witnes blong Jeova. Kwiktaem nomo oli resis i go long trak ya mo talemaot se oli ol Witnes. Ol brata oli karem olgeta i go insaed long trak mo tekem olgeta i go long Haos Kingdom. Nao long ples ya, oli joen bakegen wetem famle blong olgeta.

?Wanem nao i mekem se ol trufala Kristin ya oli naf blong givhan olsem, i no wan taem nomo, be plante taem? Oli bilif fulwan se yumi stap laef long ol lasdei olsem we Tabu Baebol i talem.​—⁠2 Timoti 3⁠:​1-5; Revelesen 6⁠:​3-8.

Taswe, oli save se i no longtaem Jeova God bambae i finisim ol faet, fasin agens, raf fasin, mo ol raorao. Problem long saed blong refuji bambae i finis olgeta. Go kasem taem ya, ol Witnes blong Jeova oli folemgud advaes blong aposol Pol long 1 Korin 12⁠:​14-26. Oli stap traehad blong kea long ol narawan blong olgeta. Nating se reva, mak blong kantri, mo lanwis, i seraotem olgeta, oli tingbaot wanwan long olgeta, taswe oli hareap blong givhan taem wan long olgeta i kasem trabol.​—⁠Jemes 1:​22-​27.

[Map blong pija long pej 30]

(Lukluk niuspepa)

AFRICA

Central African Republic

Democratic Republic of Congo

[Credit Line]

Mountain High Maps® Copyright © 1997 Digital Wisdom, Inc.

[Tok blong pija long pej 30]

Tri Haos Kingdom oli kam olsem ples blong welkamem ol refuji

[Tok blong pija long pej 31]

Kwiktaem nomo oli stanemap ol kijin

[Tok blong pija long pej 31]

Plante moa oli kamtru

[Tok blong pija long pej 31]

Wan bebi we i jes bon, hem i refuji finis