Winim Ol Filing We Oli Trabol

● Asaf i komplen i se: “!Yu luk! Mi mi stap holem tingting blong mi i klin, mi no stap mekem sin, be hemia i blong nating nomo. Oltaem yu yu stap mekem mi mi harem nogud, i stat long moning, gogo i kasem long sapa. Evri moning, yu yu stap panisim mi.”​—⁠Ol Sam 73:​13, 14.

● Baruk i harem nogud tumas i se: “!O, sore tumas long mi! Mi mi stap harem nogud tumas, mo Hae God i mekem mi mi trabol moa. Mi mi krae we mi krae, gogo mi slak olgeta. Mi no save harem gud nating.”​—⁠Jeremaea 45:⁠3.

● Nomi i krae i se: “Hae God i gat olgeta paoa, mo hem i mekem mi mi harem nogud tumas. Taem mi mi aot long ples ya, mi gat plante samting. Be naoia, hem i tekem mi mi kambak we mi no gat wan samting nating. I nogud yufala i stap singaot mi se ‘Nomi’, from we hem i tanem baksaed finis long mi, i mekem we bigfala trabol i kasem mi.”​—⁠Rut 1:​20, 21.

LONG Baebol i gat fulap eksampol blong ol gudfala man blong Jeova we oli wosipim hem, mo we samtaem tingting blong olgeta i foldaon bigwan. Yumi sinman taswe yumi gat ol filing olsemia sam samtaem long laef blong yumi. Sam long yumi maet i isi nomo blong tingting blong olgeta i foldaon, mo tu maet oli sore long olgeta wan, from we oli bin pas tru long sam kaen trabol long laef blong olgeta.

Be sipos yumi no traem blong bos long ol filing olsem, bambae oli save spolem fasin fren blong yumi wetem ol narafala mo Jeova God. Wan Kristin woman we i stap sore long hem wan oltaem, i talem se: “Mi bin talem no, plante taem long ol narafala we oli bin singaot mi blong joen wetem olgeta blong mekem wan samting. Mi harem olsem se mi mi no gud i naf blong joen wetem olgeta long kongregesen.” !Ol filing olsem ya oli save spolem laef blong wan man! ?Yu save mekem wanem blong karemaot ol filing ya?

Kam Klosap Long Jeova

Long Sam 73, Asaf i i raetemaot klia ol wari blong hem. Hem i kros taem hem i skelem laef blong hem wetem laef blong ol nogud man. Hem i luk se ol man ya we oli no laekem God, oli flas mo oli gat raf fasin, mo i luk olsem se oli no kasem panis from ol samting ya we oli stap mekem. Biaen, Asaf i no moa sua se i impoten blong folem ol stret rod blong God, no nogat.​—⁠Ol Sam 73:​3-​9, 13, 14.

?Samtaem tingting blong yu i olsem Asaf, taem yu luk we ol rabis man oli flas from ol rabis samting we oli stap mekem? ?Asaf i mekem olsem wanem blong winim tingting blong hem we i foldaon? Hem i gohed i se: “Mi traem tingting long ol samting ya, be i had tumas long mi, gogo kasem we mi go insaed long haos blong yu, nao mi jes luksave ol samting we bambae i kasem ol man nogud ya.” (Ol Sam 73:​16, 17) Asaf i folem gudfala rod taem hem i prea long Jeova. Asaf i mekem samting we, biaen, aposol Pol i tokbaot. Hem i karemaot ol tingting blong hem we oli “long saed blong bodi,” taem hem i putum tingting ya blong hem i go long “ol samting long saed blong spirit.” From we nao tingting blong Asaf i stap long ol samting long saed blong spirit, hem i kasem save se Jeova i no laekem nating ol rabis fasin, mo se long stret taem blong hem bambae hem i panisim ol nogud man.​—⁠1 Korin 2:​14, 15, NW.

!I impoten tumas we yu letem Baebol i givhan long yu, blong putum tingting blong yu i stap long trufala mining blong laef! Jeova i talem bakegen  long yumi se hem i no fogetem wanem we ol rabis man oli stap mekem. Baebol i tijim yumi se: “Yufala i no mastik long samting ya. I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae . . . Bambae yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol hadwok ya blong yumi.” (Galesia 6⁠:​7-9) Jeova bambae i putum ol rabis man long “ol ples we i glis.” Bambae hem i mekem olgeta “oli foldaon, oli kam nogud olgeta.” (Ol Sam 73⁠:18) Oltaem stret fasin bambae i mas winim rabis fasin.

Sipos yu gat wan gudfala program blong tekem oltaem ol kakae long saed blong spirit long tebol blong Jeova, mo sipos yu joen long gudfala kampani blong ol man blong God, bambae bilif blong yu i kam strong, mo bambae yu winim tingting we i foldaon no ol narafala nogud filing. (Hibrus 10⁠:25) God i save givhan long yu wetem lav, taem yu stap klosap long hem olsem Asaf i bin mekem. Asaf i gohed i se: “Oltaem mi mi stap klosap long yu, mo yu stap holem mi long han blong mi. Yu yu stap lidim mi long ol toktok blong yu, mo biaen, bambae yu ona long mi, yu tekem mi mi go stap wetem yu.” (Ol Sam 73:​23, 24) Wan Kristin woman, we oli mekem nogud long hem taem hem i pikinini yet, i lanem se i waes blong folem ol tok ya. Hem i talem se: “Fasin blong stap klosap long olgeta long kongregesen, i givhan blong stretem tingting we bifo mi gat long saed blong laef. Mi luk klia se ol Kristin elda oli gat lav, oli no ol polis, be oli man blong lukaot long sipsip.” Yes, ol Kristin elda we oli gat sore oli mekem wan impoten wok blong karemaot ol filing we i save spolem wan Kristin.​—⁠Aesea 32:​1, 2; 1 Tesalonaeka 2:​7, 8.

Akseptem Ol Advaes Blong Jeova

Baruk, sekretari blong profet Jeremaea, i krae from we wok blong hem i mekem hem i wari tumas. Be, long kaen fasin, Jeova i pulum Baruk blong tingting gud long trufala mining blong laef. Hem i se: “?Olsem wanem? ?Yu ting se bambae yu kasem gudfala laef, i winim we ol narafala man bambae oli kasem? I nogud yu mekem olsem. Mi bambae mi letem bigfala trabol i kam kasem olgeta man long wol ya, be bambae mi letem yu yu stap laef long weples we bambae yu yu go long hem. Mi mi Hae God, mo hemia tok blong mi.”​—⁠Jeremaea 45⁠:​2-5.

Jeova i tok stret long Baruk se wari blong hem i kamaot from we hem i bisi tumas blong ronem ol samting we hem nomo i wantem. Baruk i no save stap glad long wok blong Jeova, sipos long semtaem, hem i traem blong kasem wan gudfala laef. Maet yu tu yu faenem se wan gudfala rod blong winim tingting we i foldaon hemia blong blokem ol samting we oli save pulum tingting blong yu i gowe long God. Mo, taem yu glad long wanem we yu gat finis, samting ya i save givim pis long tingting blong yu.​—⁠Filipae 4:​6, 7.

Nomi we hem i wan wido, i no letem wari i blokem hem blong muf aot long Moab, taem hasban mo tufala pikinini blong hem oli ded. Be, i gat klia pruf blong soem se, wan taem hem i bin tingting nogud long saed blong hem wan mo tufala palika blong hem. Taem hem i sanem tufala i go, Nomi  i talem se: “Hae God i tanem baksaed long mi finis, nao mi harem we mi sore tumas long yutufala.” Nao bakegen, taem hem i kasem Betlehem, hem i gohed blong talem se: “Mi Nomi, be yufala i no moa singaot mi se ‘Nomi’ we i min se ‘Harem gud’. I moa gud yufala i singaot mi se ‘Mara’ we i min se ‘Harem nogud’. Hae God i gat olgeta paoa, mo hem i mekem mi mi harem nogud tumas.”​—⁠Rut 1:​13, 20.

Be, Nomi i no gowe long Jeova mo ol man blong hem, blong stap krae hem wan. No gat. Long Moab hem i bin harem we “Hae God i stap givhan gud long ol man ples blong hem, i stap givim plante kakae long olgeta bakegen.” (Rut 1:⁠6) Hem i kasem save se nambawan ples blong hem i stap long medel blong ol man blong Jeova. Biaen Nomi wetem palika blong hem, Rut, tufala i gobak long Juda. Hem i givhan long Rut blong soem wanem we Rut i mas mekem long fored blong man ya, Boas. Boas i wan famle blong tufala, mo bambae hem i maredem Rut.

Samting ya i sem mak tede. Olgeta we oli lusum hasban blong olgeta long ded oli save winim ol filing blong harem nogud, taem oli bisi insaed long Kristin kongregesen. Olsem Nomi, oli gohed blong mekem ol samting long saed blong spirit, oli ridim Tok blong God evri dei.

Ol Frut We i Kamaot Taem Yumi Folem Waes Blong God

Ol stori ya blong Baebol oli givhan long yumi blong kasem save olsem wanem yumi save winim ol nogud filing. Asaf i lukaot help long haos prea blong Jeova mo wetem longfala tingting hem i wet long Jeova blong givhan long hem. Baruk i lesin long advaes mo hem i stap longwe long ol samting blong bodi we i save blokem hem long wok blong God. Nomi i gohed blong wok wetem ol man blong Jeova. Hem i rerem yangfala woman ya, Rut, blong kasem ol blesing we i kamaot from fasin blong wosipim trufala God.​—⁠1 Korin 4⁠:7; Galesia 5⁠:26; 6⁠:4.

Yu save winim tingting we i foldaon mo ol narafala nogud filing, taem yu tingbaot stori blong ol man blong Jeova we hem i bin givhan long olgeta wanwan mo olsem wan grup, blong winim ol filing ya. Blong kasem mak ya, tingting dip long bigfala lav we Jeova i soemaot taem hem i pemaot yumi long ded. Soem fasin tangkiu from trufala lav blong ol Kristin brata sista blong yumi. Putum tingting blong yu i stap strong long laef we yu save gat long niufala wol blong God we i stap kam klosap. Mo i gud we yu gat sem tingting olsem Asaf we i talem se: “Taem we mi mi kam stap klosap long yu, mi harem se i gud tumas long mi. Yu yu sefples blong mi, yu yu stap blokem mi, mo oltaem bambae mi mi stap talemaot olgeta samting we yu yu mekem.”​—⁠Ol Sam 73:⁠28.