Hadtaem We Tu Widowoman i Fesem

SANDRA i wan wido woman we i laef long Ostrelia. Taem hasban blong hem i ded sam yia bifo, Sandra i sek bigwan. “Mi kasem save se mi lusum bes fren blong mi mo tingting ya i mekem mi mi trabol bigwan. Mi no moa rimemba olsem wanem mi lego hospital blong kambak long haos no wanem we mi mekem afta we mi kasem haos. Long ol wik we oli kam biaen, mi harem se mi fraet tumas mo samting ya i mekem se bodi blong mi i soa oltaem.”

Elaine, hem i wan fren blong Sandra we i olfala moa long hem. Hem i wan wido woman sikis yia finis. Elaine i lukaot long hasban blong hem, David, blong sikis manis bifo we hem i ded from kansa. From we Elaine i sore bigwan afta we hasban blong hem i ded, hem i kam blaen blong smoltaem. Tu yia biaen, hem i no moa gat paoa nao hem i foldaon long medel blong plante man. Dokta blong hem i no save faenem wan samting i rong long bodi blong hem. Be, hem i faenemaot se Elaine i bin holem ol filing blong hem mo i no tokbaot sore blong hem long wan narafala. Dokta ya i talem long hem blong gobak long haos mo traehad blong krae. Elaine i talem se: “I tektaem blong mi mi lan blong laef wetem filing ya blong harem nogud oltaem.” Mo samtaem, taem hem i rili harem nogud from we hem i stap hem wan, Elaine i talem se “mi ledaon long bed mo mi kavremap hed blong mi wetem klos blong David.”

Yes, taem wan woman i lusum hasban blong hem long ded, samting ya i save mekem plante samting long hem, i no jes minim se hem i no moa gat hasban. Tingbaot Sandra. Blong samtaem, hem i harem olsem se hem i lusum wan bigfala haf blong laef blong hem. Mo tu, olsem plante narafala wido we oli lusum hasban blong olgeta i no longtaem, Sandra i fraet, i no moa harem sefgud. Sandra i tingtingbak i se: “Mi bin dipen oltaem long hasban blong mi blong mekem ol laswan disisen, be afta we hem i ded, mi wan nao mi mas mekem ol disisen ya. Mi no moa save slip gud long naet. Mi taed we mi taed. Mi no save bambae mi mekem wanem.”

Evri dei, long plante ples long wol, ol woman oli fesem ol semkaen trabol we Sandra mo Elaine i fesem. From ol sik, aksiden, ol faet bitwin ol kantri, ol faet blong klinimaot wan ful laen blong man, mo raf fasin, namba blong ol woman we oli kam wido i kam antap bigwan. * Plante long ol woman ya oli no talemaot soasore blong olgeta long ol narafala, mo oli no save olsem wanem blong fesem hadtaem ya. ?Ol fren mo famle oli save mekem wanem blong givhan long ol wido woman ya? Haf we i kam biaen i gat sam advaes we maet i save givhan.

[Futnot]