Halpem Ol Wido Long Ol Hadtaem We Oli Kasem

WAN stori long saed blong ol wido we plante man oli savegud long hem, hemia stori long Baebol blong Rut mo mama blong man blong hem, Nomi. Tufala woman ya, tufala i wido. Nomi i lusum hasban blong hem, be tu, hem i lusum tufala pikinini boe blong hem, we wan long tufala i hasban blong Rut. From we tufala i stap long wan ples we ol man oli laef from garen mo we ol woman oli dipen long ol man blong olgeta blong givhan long olgeta, tufala i rili kasem hadtaem.​—⁠Rut 1⁠:​1-5; 20, 21.

Be, Nomi i faenem se Rut, i wan gudfala fren we i leftemap tingting blong hem oltaem. Rut i no wantem lego Nomi. Biaen, hem i soemaot se ‘sipos [Nomi] i gat seven pikinini boe blong hem blong givhan long hem, be bambae oli no save givhan gud long hem, olsem we [Rut] i mekem.’ Rut i mekem i gud long Nomi from we hem i laekem hem, be tu from we hem i laekem God. (Rut 4⁠:⁠15) Taem Nomi i talem long Rut blong gobak long Moab, long ol famle mo fren blong hem, Rut i talem sam toktok we i rili tajem hat blong yumi. Toktok ya, we i stap long Baebol, i soemaot gud fasin we Rut i gat blong holemstrong long Jeova, hem i se: “Ples we yu bambae yu stap long hem, mi tu bambae mi stap long hem. Ol man ples blong yu bambae  oli man ples blong mi, mo God blong yu bambae i God blong mi. Ples we yu bambae yu ded long hem, mi bambae mi ded long hem, mo bambae oli berem mi tu long ples ya. Tru mi talem long yu, i no gat wan samting we bambae i save tekemaot mi long yu, ded nomo bambae i save tekemaot mi. Sipos mi brekem tok ya blong mi, i gud Hae God i givim panis long mi.”​—⁠Rut 1:​16, 17.

Jeova God i luk fasin we Rut i gat. Hem i blesem Rut mo Nomi, mo biaen, Rut i maredem Boas, wan man Isrel. Pikinini blong tufala, we hem i wan bubu blong Jisas Kraes, Nomi i lukaot long hem olsem se hem i pikinini blong hem. Stori ya blong Nomi mo Rut, i soemaot olsem wanem Jeova i stap lukaotgud long ol wido we oli kam klosap long hem mo we oli trastem hem. Antap long samting ya, Baebol i talem se Jeova i tinghae long olgeta we oli halpem ol wido long ol hadtaem we oli kasem. ?Yumi save mekem wanem tede blong givhan long ol wido we oli stap long medel blong yumi?​—⁠Rut 4⁠:​13, 16-22; Ol Sam 68:⁠5.

Halpem Olgeta Be No Traem Bos Long Olgeta

Taem yu wantem givhan long wan wido, i gud blong talem klia wanem samting we yu wantem mekem, be yu no talem long wan fasin we yu traem bos long hem. I nogud blong talem se, “Sipos i gat sam samting blong mekem, talem long mi.” Tok ya i sem mak olsem we yu talem long wan man we i hanggri mo i kolkol se, ‘Yu go putum klos, blong yu i wom, mo yu kakae’ be yu no mekem wan samting blong givhan long hem. (Jemes 2⁠:16) Nating se ol man oli nidim help, be i no plante we bambae oli save askem yu blong givhan long olgeta. Maet oli harem nogud be bambae oli no talemaot. Taswe, sipos yu wantem halpem wan wido, yu mas gat fasin blong luksave wanem nao hem i rili nidim. Be, yu mas lukaot gud tu blong no bitim mak​—⁠we yu traem bos long laef blong hem​—⁠ale biaen hem i harem nogud no maet wan rao i kamaot we i spolem fasin fren blong yutufala. Taswe, Baebol i talem klia se yumi mas skelemgud wanem we yumi mekem long ol narafala. Hem i pulum yumi blong tingbaot nid blong ol narafala, be hem i talem tu se yumi no mas pusum nus blong yumi long ol bisnes blong olgeta.​—⁠Filipae 2⁠:4; 1 Pita 4:⁠15.

Rut i soemaot fasin ya long Nomi. Hem i stap tru oltaem long Nomi, be hem i no traem bos long hem. Hem i mekem sam disisen, olsem blong wok long garen mo kasem kakae blong hem mo Nomi, be tu hem i folem ol advaes we Nomi i givim long hem.​—⁠Rut 2:​2, 22, 23; 3:​1-6.

I tru se, ol nid we ol wido oli gat oli no sem mak evriwan. Sandra, we yumi tokbaot hem fastaem, i talem se: “Long taem we mi harem nogud, mi kasem wanem we mi nidim​—⁠hemia ol gudfala fren we oli gat lav, we oli hivap raon long mi.” Elaine, we yumi tokbaot hem fastaem, i defren long Sandra, hem i nidim blong stap hem wan. Taswe, sipos yu wantem halpem wan wido yu mas gat fasin luksave mo yu mas traem skelemgud sipos hem i wantem stap hem wan no hem i wantem yu blong givhan long hem.

?Olsem Wanem Ol Famle Oli Save Givhan?

Sipos wan wido i gat famle we i gat lav, famle ya i save givhan bigwan long hem blong fesem hadtaem ya. Nating se sam memba blong famle oli save givhan moa bitim ol narafala, olgeta evriwan oli save mekem sam samting blong halpem hem. “Sipos wan wido i gat ol pikinini blong hem no ol smol bubu blong hem, fastaem olgeta oli mas lanem, se wan nambawan wok blong ol Kristin man, i blong lukaot gud long ol famle blong olgeta. Fasin ya, i olsem we oli pem kaon blong olgeta long ol mama mo papa blong olgeta, from we hemia i wan samting we God i glad long hem.”​—⁠1 Timoti 5:⁠4.

Plante taem, i no nidim we ol famle oli givhan long saed blong mane “olsem we oli pem kaon blong olgeta.” Sam wido oli gat naf mane blong pem ol samting we oli nidim, mo sam narafala oli stap long ol kantri we gavman i givhan long olgeta. Be taem wan wido i trabol, famle blong hem i  mas givhan long hem. Sipos wido ya i no gat famle we i save givhan, Baebol i leftemap tingting blong ol Kristin brata sista blong givhan long hem. “Prapa fasin blong ona long [God], we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta.”​—⁠Jemes 1:⁠27.

Olgeta we oli folem ol rul ya blong Baebol oli rili “ona gud long [ol] wido.” (1 Timoti 5:⁠3) Blong ona gud long wan man, i minim se, yu soem respek long hem. Man we i kasem ona, hem i harem se yu tinghae long hem, yu laekem hem, mo yu gat respek long hem. Hem i no harem se ol man oli givhan long hem from tingting ya nomo se oli mas mekem olsem. Rut, we hem tu i wido blong smoltaem, i soem lav mo ona long Nomi taem hem i rere blong givim ol samting we Nomi i nidim long saed blong bodi mo filing. Yes, kwiktaem nomo, Rut i kasem gudnem from fasin blong hem blong givhan long Nomi. From samting ya, fiuja hasban blong hem i talem se: “Olgeta man long ples ya oli save we yu yu wan gudfala woman.” (Rut 3⁠:11) Mo tu, Nomi i gat lav long God, hem i gat fasin we hem i glad oltaem long ol samting we Rut i naf blong mekem, mo hem i gat tangkiu from. Ol fasin ya i mekem se Rut tu i glad nomo blong givhan long hem. !Yes, Nomi i soem nambawan eksampol long ol wido tede!

Kam Klosap Long God

Ol fren mo famle oli no save karemaot nogud filing we i kamaot from ded blong wan hasban no waef. From samting ya, i impoten tumas we ol wido oli kam klosap long “Papa blong yumi we i gat sore, hem i God we i stamba blong fasin blong givhan. Hem i stap givhan long mifala long olgeta trabol blong mifala, blong mekem mifala i harem gud.” (2 Korin 1:​3, 4) Tingbaot eksampol blong Ana, wan widowoman we i strong long bilif. Hem i gat 84 yia long taem we Jisas i bon.

Taem hasban blong Ana i ded afta we tufala i mared seven yia nomo, Ana i lukluk i go long Jeova blong givhan long hem. “Oltaem nomo, hem i stap long haos blong God, nao long moning mo long sapa, hem i stap joen long ol man blong oli mekem wosip, mo i stap livim kakae mo i stap prea.” (Luk 2:​36, 37) ?Jeova i blesem Ana from fasin blong hem blong fasgud long God? !Yes! Long wan rod we i spesel, Jeova i soem lav we hem i gat long Ana. Hem i givim janis long Ana blong luk bebi ya we bambae i kam Man Blong Sevem ol man blong wol. !Samting ya i mekem Ana i haremgud tumas mo i leftemap tingting blong hem! I klia se, hem i luksave trutok blong ol tok long Ol Sam 37:​4, we i talem se: “Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.”

God i Yusum Ol Kristin Brata Sista Blong Givhan

Elaine, i talem se: “Long plante yia afta we David i ded, mi harem soa long jes blong mi, i olsem wan naef i stikim mi. Mi ting se hemia from we bel blong mi i no stap tantanem gud kakae. Wan dei mi harem i soa bitim mak, ale mi wantem go luk dokta. Wan Kristin fren blong mi, we hem i gat fasin luksave, i talem se maet sik i kamaot from we mi soasore yet long hasban blong mi we i ded. Hem i leftemap tingting blong mi blong askem Jeova blong givhan long mi. Mi lesin long advaes blong hem mo stret long taem ya mi prea wetem fulhat blong mi long Jeova mo mi askem strong blong hem i halpem mi blong winim soasore blong mi. !Mo Jeova i givhan long mi!” Sloslou Elaine i winim soasore blong hem, mo i no longtaem biaen, soa we hem i filim long jes blong hem i lus.

Ol elda long kongregesen oli save soem fasin fren mo kaen fasin blong givhan long ol wido we oli harem nogud. Nating se ol wido ya oli fesem hadtaem, ol elda oli save givhan long olgeta long saed blong spirit mo wetem fasin luksave mo kaen fasin oli save leftemap tingting blong ol wido ya mo halpem olgeta blong stap klosap long Jeova. Sipos ol wido ya oli trabol long saed blong bodi, ol elda oli save mekem plan blong givhan long olgeta. Ol elda ya we oli gat fasin sore, mo fasin luksave, oli “olsem strong sefples we man i save go haed long hem blong ronwe long hariken.”​—⁠Aesea 32⁠:2; Ol Wok 6⁠:​1-3.

Niufala King Blong Wol i Givhan Long Olgeta Blong Olwe

Smol bebi ya we olfala Ana i glad tumas blong luk samwe long tu taosen yia bifo, naoia hem i kam Mesaea King blong Kingdom blong God long heven. Bambae i no longtaem, gavman ya i finisim olgeta samting we i mekem ol man oli harem nogud, ded tu bambae i finis. Revelesen 21:​3, 4 i tokbaot  samting ya i se: “!Yu luk! Naoia God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” Makemgud se, vas ya i tokbaot “ol man.” Yes, olgeta man bambae oli fri long ded mo bambae i no moa gat man we i krae from ded.

!Be i no hemia nomo! I gat sam narafala gud nius we Baebol i tokbaot. Baebol i promes se ol man we oli ded bambae oli laef bakegen. “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:​28, 29) Olsem we Jisas i mekem Lasaros i laef bakegen, long sem fasin, ol dedman bambae oli stanap bakegen wetem bodi olsem man, i no bodi blong spirit man. (Jon 11:​43, 44) Olgeta we biaen oli “mekem ol gudfala samting” bambae oli kam stretgud olgeta mo bambae oli luk se Jeova i keagud long olgeta olsem wan papa taem hem i ‘openem han blong hem, nao hem i mekem we olgeta samting we i laef oli harem gud, from we oli kasem ol samting we oli wantem tumas.’​—⁠Ol Sam 145:​16, NW.

Olgeta we oli lusum wan we oli laekem tumas long ded mo we oli bilif strong long hop ya, oli faenem se hem i mekem olgeta oli haremgud bigwan. (1 Tesalonaeka 4⁠:13) Taswe sipos yu wan wido, ‘yu mas prea oltaem’ long God blong givhan long yu blong winim ol problem we yu fesem evri dei. (1 Tesalonaeka 5⁠:17; 1 Pita 5:⁠7) Tekem taem evri dei blong ridim Tok blong God, letem ol tingting blong God i leftemap tingting blong yu. Sipos yu mekem ol samting ya, nating se yu fesem ol traem mo hadtaem olsem wan wido, bambae yu luk se Jeova i halpem yu blong faenem pis.

[Tok blong makem poen long pej 5]

Blong givhan long narafala, yu mas gat respek long raet we hem i gat blong stap hem wan mo tu yu mas rere blong givhan long hem taem hem i nidim

[Tok blong pija long pej 7]

God i blesem olfala widowoman Ana