“!Jeova i Mekem i Gud Tumas Long Mi!”

LONG wan naesfala sapa blong Maj 1985, ol man mo woman long Raeting Dipatmen long hedkwota blong ol Witnes blong Jeova long New York, Yunaeted Stet blong Amerika, oli makemgud wan impoten samting we i hapen. Long taem ya, Karl F. Klein i bin wok 60 yia finis long fultaem minista wok. Brata Klein i talem wetem bigfala glad se: “!Jeova i mekem i gud tumas long mi!” Hem i talem se hem i laekem tumas vas ya blong Baebol we i stap long Ol Sam 37:⁠4. Biaen, hem i mekem evriwan i glad taem hem i plei long vaeolin blong hem.

Long ol 15 yia we oli kam biaen, Brata Klein i gohed blong wok long Raeting Dipatmen mo hem i wan memba blong Hed Kampani blong Ol Witnes blong Jeova. Biaen, long Jenuware 3, 2001, Karl Klein i kasem en blong laef blong hem long wol ya taem hem i gat 95 yia.

Karl i bon long Jemani. Famle blong hem i muf i go long Yunaeted Stet, mo Karl i gruap long Illinois, wan eria afsaed long Chicago. Taem Karl mo yangfala brata blong hem tufala i pikinini yet, tufala i intres bigwan long Baebol. Karl i baptaes long 1918, mo ol nambawan samting we hem i harem long asembli blong ol Baebol Studen long 1922, i pusum hem blong laekem wok blong prij long ful laef blong hem. Hem i no wantem se wan wik i pas we hem i no joen long wok blong prij. Hem i gohed olsem go kasem ol laswan wik blong laef blong hem.

Karl i kam wan memba blong hedkwota long 1925, mo fastaem hem i wok long ples blong prentem ol buk. Hem i rili laekem miusik, mo blong sam yia hem i bin plei vaeolin wetem wan grup we miusik blong olgeta i stap kamaot long redio, long program blong ol Kristin. Samtaem biaen, hem i wok long Sevis Dipatmen, mo hem i glad moa taem hem i wok wanples wetem brata we i lukaot long Dipatmen ya, hemia T. J. Sullivan. Long sem taem ya, Ted i maredem Doris, mo tufala i go mekem misinari wok long Porto Riko.

Karl Klein i wok fifti yia long Raeting Dipatmen. Long ples ya, hem i givhan bigwan from hem i laekem blong mekem dip stadi mo hem i gat bigfala save long Baebol. Long 1963, Karl i maredem Margareta, wan misinari blong Jemani we i stap wok long Bolivia. Margareta i givhan bigwan long Karl, antap moa taem Karl i kasem sam problem long saed blong helt. From samting ya, Karl i naf blong wok strong go kasem we hem i olfala bitim yia we ol man oli stap ritae long hem. Karl i wan man blong tok stret, mo tu hem i laekem tumas blong plei miusik. From samting ya, hem i save givim ol nambawan tok long ol kongregesen mo long ol asembli. I no longtaem bifo we hem i ded, hem i lidim vas blong dei long bigfala famle long Betel blong New York. Evriwan oli glad tumas mo samting ya i givhan bigwan long olgeta.

Plante long olgeta we oli ridim Wajtaoa oltaem bambae oli rimemba naesfala stori blong Brata Klein we i stap long Wajtaoa blong Oktoba 1, 1984. Bambae yu glad taem yu ridim no ridim bakegen stori ya, mo tingbaot se man we i raetem stori ya i spenem ten yia haf bakegen blong wok strong mo fasgud long God.

Brata Klein i wantem tumas blong rul wetem Kraes long heven, from we hem i wan long olgeta we Masta i makemaot. Yumi save bilif fulwan se naoia, Jeova i mekem samting ya we Karl i bin wantem tumas i kamtru.​—⁠Luk 22:​28-​30.

[Tok blong pija long pej 31]

Karl, T. J. Sullivan, Ted mo Doris long 1943

[Tok blong pija long pej 31]

Karl mo Margareta, Oktoba 2000