Laef Stori

Kasem Paoa Mo Glad From We Mifala i No Lego Rod Blong Jeova

LUIGGI D. VALENTINO I TALEM STORI YA

Jeova i givim advaes ya se: “Hemia rod. Yufala i folem.” (Aesea 30:⁠21) Stat long taem we mi baptaes, hemia 60 yia bifo, mak blong mi i blong folem advaes ya. Gudfala eksampol blong papa mama blong mi i givhan long mi blong wantem kasem mak ya. Papa mama blong mi, tufala i blong Itali, be long 1921, tufala i muf i kam long Cleveland, Ohio, Yunaeted Stet. Long ples ya nao, bigfala brata blong mi, Mike, smol sista blong mi, Lydia, mo mi, mifala i gruap long hem.

PAPA mama blong mi, tufala i jekemap bilif blong plante defren kaen skul, be tingting blong tufala i foldaon oltaem, mekem se tufala i no moa intres long ol skul. Ale, wan dei long 1932, Papa i stap lesin long wan program long radio we i stap long lanwis Itali. Hem i wan program we ol Witnes blong Jeova oli mekem, mo Papa i laekem samting we hem i harem. Hem i raetem leta i go long ol Witnes blong kasem moa save. Wan Witnes blong Itali, we i stap long hedkwota blong ol Witnes blong Jeova long Brooklyn, New York, i kam visitim mifala. Hem i storian wetem papa mo mama go kasem we i brok delaet. Nao, papa mama tufala i luksave se tufala i faenem trufala skul.

Papa mo Mama, tufala i stap go long olgeta Kristin miting mo evri taem we wan elda i visitim kongregesen, tufala i tekem hem i kam stap long haos blong mifala. Nating se mi smol yet, ol man ya oli letem mi mi go wetem olgeta long wok blong prij. From samting ya, mi stat tingbaot blong mekem wok blong Jeova fultaem. Wan long ol elda ya hem i Carey W. Barber,  we naoia hem i wan memba blong Hed Kampani blong ol Witnes blong Jeova. Mi tekem baptaes long Februari 1941, taem mi gat 14 yia, mo long 1944, mi statem wok blong paenia long Cleveland. Mike mo Lydia tu, tufala i folem rod blong ol trutok blong Baebol. Mike i mekem wok blong Jeova gogo kasem taem we hem i ded, mo Lydia i folem hasban blong hem, Harold Weidner, blong 28 yia long wok blong visitim ol kongregesen. Tede, tufala i stap wok olsem ol spesel fultaem paenia.

Kalabus i Mekem Tingting Blong Mi i Strong Moa

Long stat blong 1945, mi go long Chillicothe Federol Prisen blong Ohio from we mi strong blong folem tingting we Baebol i trenem. Tingting ya i laenap wetem Aesea 2⁠:4 we i se, yumi mas hamarem ol naef blong faet oli kam aean blong digim graon. Fastaem, olgeta we oli bos long kalabus oli letem ol Witnes long kalabus oli holem sam buk nomo blong Baebol we ol Witnes blong Jeova oli wokem. Be, ol Witnes blong wan kongregesen klosap long ples ya, oli givhan long ol brata ya we oli prisena. Wanwan taem, oli sakem sam buk i stap long plantesen klosap long kalabus. Ale, long moning, taem ol prisena oli go long ples blong wok, oli lukaot ol buk ya mo haedem olgeta blong go insaed long kalabus. Taem we mi mi kam kalabus long ples ya, mifala i kasem raet nao blong holem moa buk. Nating se i olsem, mi mi lanem se ol kakae long saed blong spirit we Jeova i givim, oli sas tumas. Hemia wan samting we mi stap tingbaot yet, evri taem we mi kasem wan niufala Wajtaoa no Wekap!

Nating se oli letem mifala i holem ol miting long kalabus, olgeta we oli no Witnes oli no gat raet blong kam long ol miting ya. Nating se i olsem, sam man we oli wok long kalabus, mo sam prisena oli kam long ol miting ya long fasin haed, mo smol namba blong olgeta ya oli akseptem trutok. (Ol Wok 16⁠:​30-34) Wan samting we i mekem mifala i harem gud bigwan, hemia taem Brata A. H. Macmillan i visitim mifala. Oltaem hem i leftemap tingting blong mifala se, taem ya we mifala i spenem long kalabus i no blong nating from we hem i trenem mifala blong mifala i naf blong mekem moa wok long fiuja. Gudfala brata ya i tajem hat blong mi mo i mekem tingting blong mi i strong moa blong wantem wokbaot long rod blong Jeova.

Mi Faenem Wan Fren

Seken Wol Wo i finis, mifala i gofri long kalabus, mo mi statem wok blong paenia bakegen. Be long 1947 papa blong mi i ded. Blong givhan long famle blong mi, mi stat wok fultaem. Long semtaem, mi lan blong holem man we i sik​—⁠hemia wan samting we bambae i halpem mi bigwan long hadtaem we mi mo waef blong mi, mitufala i fesem samwe 30 yia biaen. Be, mi stap talem stori ya olbaot lelebet, i moagud mi stat fastaem blong tokbaot waef blong mi.

Long wan aftenun long 1949 taem mi stap long Haos Kingdom, telefon i ring. Mi holem telefon mo mi harem wan swit voes i talem se: “Nem blong mi Christine Genchur. Mi wan Witnes blong Jeova. Mi jes muf i kam long Cleveland blong faenem wok, mo mi wantem joen wetem wan kongregesen klosap long ples we mi stap.” Haos Kingdom blong mifala i stap longwe long ples we hem i stap long hem, be mi laekem voes blong sista ya, ale, mi talem ples blong miting blong mifala mo mi talem long hem se i gud we hem i kam long Sande​—⁠hemia dei we bambae mi givim pablik tok. Long Sande, mi faswan blong kam long Haos Kingdom, be i no gat wan niufala sista we i kam. Taem mi givim tok blong mi, mi stap sakem ae i go oltaem long doa, be i no gat wan sista i kam. Long nekis dei mi telefon long sista ya, mo hem i talem se hem i no save gud rod blong tekem bas long ples ya. Ale, mi mekem plan blong mitim hem blong eksplenem samting ya long hem.

Mi lanem se papa mama blong Christine, we tufala i blong Jekoslovakia, tufala i stat joen wetem ol Baebol Studen afta we tufala i ridim buklet ya Where Are the Dead? Tufala i baptaes long 1935. Long 1938, papa blong Christine i kam man blong lukaot long kongregesen (we tede yumi kolem presiden elda) blong ol Witnes blong Jeova long Clymer, Pennsylvania, Yunaeted Stet. Mo long 1947, Christine i tekem baptaes, taem ya hem i gat 16 yia. I no tektaem long mi blong laekem tumas naesfala sista ya we tingting blong hem i stap oltaem long trutok. Mitufala i mared long Jun 24, 1950, mo stat long taem ya, Christine i stap olsem gudfala patna blong mi we i rere oltaem blong putum wok blong Kingdom fasples. Mi tangkiu tumas long Jeova se gudfala fren ya i agri blong joen long laef blong mi.​—⁠Ol Proveb 31:⁠10.

Wan Bigfala Sapraes

Long Novemba 1, 1951, mitufala i stat paenia tugeta. Tu yia biaen, long wan asembli long Toledo, Ohio, Brata Hugo Riemer mo Brata Albert Schroeder, tufala i toktok long wan grup blong ol paenia we oli intres long wok blong misinari. Mifala i stap long grup ya tu. Tufala i leftemap tingting blong mitufala  blong gohed blong paenia long Cleveland, be wan manis nomo biaen, mitufala i kasem wan bigfala sapraes​—⁠!oli singaot mitufala blong joen long klas namba 23 long Wajtaoa Baebol Skul Blong Gilead, we i stat long Februari 1954!

Taem mitufala i stap draevem trak blong go long Gilead Skul, we i stap long Saot Lansing, New York, Christine i fraet lelebet, ale hem i stap talem bakegen mo bakegen long mi se: “!Yu draev slou!” Be, mi talem long hem se: “Christine, sipos mi draev slou moa bitim hemia, bambae trak i no moa ron nao.” Taem mitufala i kasem ples blong skul ya, mitufala i harem se tingting blong mitufala i stap kwaet lelebet. Brata Nathan Knorr i welkamem grup blong ol studen mo i tekem mifala i goraon blong visitim ol ples long Gilead. Hem i eksplenem tu, olsem wanem mifala i save sevem wota mo lektrik, from we hem i se, wan gudfala fasin we yumi mas gat taem yumi mekem ol wok blong Kingdom hem i blong sevem mane. Advaes ya i stap oltaem long tingting blong mitufala. Tede yet, mitufala i stap folem advaes ya.

Tekem Plen i Go Long Rio

I no longtaem, skul i finis, mo long Disemba 10, 1954, mitufala i tekem plen i aot long New York Siti, long koltaem. Mitufala i glad tumas from niufala teritori ya we bambae mitufala i go wok long hem, hemia taon blong Rio de Janeiro, wan ples we i hot tumas long Brasil. Tu narafala misinari, tufala i tekem plen wetem mitufala, nem blong tufala Peter mo Billie Carrbello. Trep blong mifala i mas tekem 24 aoa, mo bambae mifala i stop smoltaem long Porto Riko, Veneswela, mo Belém long not blong Brasil. Be, from we i gat sam problem wetem enjin blong plen, i tekem 36 aoa bifo we mifala i kamdaon long Rio de Janeiro. Ples ya i naes tumas. Ol laet blong taon oli saen gud olsem plante smosmol daemon long tudak, mo laet blong mun we i olsem silva, i saen antap long wota blong Guanabara Bei.

Long epot i gat sam memba blong famle blong Betel we oli stap wet long mifala. Oli welkamem gud mifala, ale oli tekem mifala i go long branj ofis, mo samwe long tri klok moning, mifala i go slip. Sam aoa nomo biaen, bel i ring blong wekemap mifala long faswan dei blong misinari wok blong mifala.

Faswan Lesen Blong Mifala

I no longtaem afta we mitufala i kamtru long ples ya, mitufala i lanem wan impoten lesen. Wan naet, mitufala i go kakae long haos blong wan famle we oli Witnes. Taem mitufala i wantem aot blong wokbaot i gobak long branj ofis, papa blong famle ya i se: “No, yutufala i no save go, ren i stap foldaon.” Hem i talem se i moagud mitufala i slip long haos blong hem long naet ya. Mi talem long hem se: “Long ples blong mitufala tu i gat ren.” Ale, mi laf mo mitufala i wokbaot i go.

From we i gat plante bigfala hil raon long Rio, kwiktaem nomo ol wota blong ren oli hivap wanples mo oli ron i kamdaon long taon. Taswe, plante taem wota i kam antap long ples ya. Taem mitufala i stap wokbaot, wota i kasem ol ni blong mitufala finis. Klosap long branj ofis, wota i ron bigwan long ol rod, olsem wan bigfala reva we i kam antap kasem jes blong mitufala. Taem mitufala i kamtru long Betel, mitufala i wetwet evriwan. Long nekis dei, Christine i harem nogud mo i sik wetem fiva ya we oli kolem typhoid. Sik ya i mekem bodi blong hem i slak blong longtaem. I klia se, mitufala we i niufala misinari, mitufala i mas lesin long advaes blong ol Witnes we oli manples.

Statem Wok Blong Misinari Mo Visitim Ol Kongregesen

Afta long smol problem ya we i kasem mitufala, mitufala i statem wok blong prij blong mitufala. Mitufala i ridimaot ol fastok long lanwis Potugal long ol man we mitufala i mitim, mo i luk olsem se toktok blong mitufala long lanwis ya i stap kam gud sloslou. Wan man long haos i talem long Christine se, “Mi kasem save long yu taem yu toktok, be mi no kasem save long hem.” Nao hem i poen i kam long mi. Wan narafala woman long haos i talem long mi se, “Mi kasem save long yu be mi no kasem save long hem.” Nating se i olsem, mitufala i glad blong mekem moa long 100 sabskripsen blong Wajtaoa long ol faswan wik ya we mitufala i prij. Sam long ol Baebol stadi we mitufala i mekem, oli tekem baptaes long faswan yia ya we mitufala  i kam long Brasil. Hemia wan stat nomo we i soemaot olsem wanem we teritori ya we mitufala i misinari long hem, i wan teritori we bambae i karem plante frut.

Long medel blong ol yia 1950, plante kongregesen long Brasil oli no gat seket elda we i stap visitim olgeta oltaem from we i no gat naf brata blong tekem wok ya. Taswe, nating se mi no lanem gud lanwis blong Potugal yet, mo mi no bin mekem wan tok yet long lanwis ya, be ol brata oli putum mi long wok blong seket elda blong visitim ol kongregesen long eria blong São Paulo. Hemia long 1956.

Faswan kongregesen we mitufala i visitim, i no gat seket elda i visitim hem blong tu yia finis. Taswe, evriwan long kongregesen ya i wantem tumas blong harem pablik we bambae mi mekem. Blong rerem tok ya, mi katem sam haf blong ol Wajtaoa we i stap long lanwis Potugal mo mi stikim olgeta tugeta long wan pis pepa. Long Sande, Haos Kingdom i fulap gud long man. I gat man i stap sidaon long platfom tu, evriwan oli stap wet blong harem spesel tok ya. Ale, mi statem tok, no riding, blong mi. Wanwan taem mi lukluk i go antap, long ol man we oli stap lesin. Mi sapraes we i no gat wan long olgeta i muf, ol pikinini tu oli sidaon kwaet. Oli stap lukluk mi nomo wetem bigfala ae. Long tingting blong mi, mi se: “Man, Valentino, ating yu toktok gud lanwis blong Potugal nao. Ol man ya oli stap lesingud.” Plante yia biaen, taem mi visitim kongregesen ya bakegen, wan brata we i bin stap long faswan taem ya we mi mekem tok blong mi, i se: “?Yu tingbaot pablik tok ya we yu bin givim long ples ya? Mifala i no kasem save wan tok blong hem.” Mi talem stret long hem se, mi tu mi no bin kasem save long wan samting we mi talem.

Long faswan yia ya we mi statem wok blong seket elda, mi ridim plante taem, Sekaraea 4:⁠6. Ol tok ya, ‘I no long paoa blong yu, be long paoa blong spirit blong mi nomo,’ oli mekem mi mi tingbaot se wok blong Kingdom i gohed from wan samting nomo, hemia spirit blong Jeova. Mo, tru ya, wok i gohed nating sipos i gat sam samting we mifala i no naf blong mekem.

Ol Problem Mo Blesing

Wok blong seket elda i minim se mifala i mas wokbaot i go olbaot long kantri wetem wan taepraeta, ol bokis blong buk, ol basket blong klos mo ol basket blong miting. Christine i putum namba long olgeta wanwan samting we mifala i karem, blong mitufala i no save mestem olting blong mitufala taem mitufala i stap resis aot long wan bus i go long narafala bas. Plante taem mitufala i mas ron long bas blong 15 aoa, long ol rod we oli raf mo we oli fulap long das blong go long nekis ples we mitufala i mas go long hem. Samtaem, ol trep ya oli mekem mifala i fraet tumas. Olsem wan taem we tu bas tufala i ron i kam mit tugeta long wan olfala brij, mo ples i smol tumas we klosap nomo tufala i glisim tufala. Mitufala i wokbaot tu, long ol tren, sip, mo long ol hos.

Long 1961, mi statem wok blong distrik elda. Naoia mi no moa visitim ol kongregesen wanwan, be mi visitim ol wanwan seket. Long sam naet blong wik, mifala i soem ol film we ogenaesesen blong Jeova i wokem​—⁠oltaem long wan defren ples. Plante taem mifala i mas wok hareap blong bambae ol lida blong skul long ol ples ya oli no traem blokem mifala blong soem ol film ya. Long wan taon, wan pris i tok strong long wan man we mifala i bin askem hem blong rentem haos blong hem. Pris ya i tok strong long man ya blong i kanselem miting blong mifala long ples ya. Mitufala i spenem plante dei blong lukaot wan narafala ples. Ale, taem mitufala i faenem wan ples we i stret, mitufala i no talem long ol man mo mitufala i gohed blong singaot olgeta oli kam long faswan haos ya we mitufala i bin wantem rentem. Bifo we miting ya i stat, Christine i go long haos ya mo i tekem olgeta man we oli wantem luk film ya, oli kam long seken ples ya we mitufala i bin faenem. Long naet blong miting ya, i gat 150 man we oli luk film ya, we nem blong hem, The New World Society in Action​—⁠hem i laenap stret wetem traehad we mitufala i bin mekem.

Samtaem, wok ya blong visitim ol seket i mekem mifala i taed bigwan. Be ol brata blong ples ya, oli gat tingting daon mo bigfala tangkiu from we mitufala i kam visitim olgeta. Oli rere oltaem blong tekem mifala i kam long ol haos blong olgeta, nating se ol haos ya oli no flas tumas. Ol samting ya nao oli mekem se oltaem nomo mitufala i talem tangkiu long Jeova se mitufala i gat janis blong stap wetem olgeta. Mitufala i kasem plante blesing from we mitufala i fren gud wetem olgeta. (Ol Proveb 19⁠:⁠17; Hagae 2:⁠7) !Taswe, afta long 21 yia we mitufala i wok long Brasil, mitufala i sore tumas se misinari wok blong mitufala i finis!

Long Taem Blong Trabol, Jeova i Soem Rod Long Mitufala

Long 1975, Christine i mas pas long ol dokta blong oli katem hem. Mitufala i statem wok blong visitim ol kongregesen bakegen, be helt blong Christine i kam  moa nogud. Mitufala i tingting se i moagud blong gobak long Yunaeted Stet blong hem i kasem gudfala tritmen. Long Eprel 1976, mitufala i kasem Long Beach, long California, mo mitufala i stap wetem mama blong mi. From we mitufala i laef samwe long 20 yia finis long narafala ples, mitufala i no save olsem wanem bambae mitufala i winim problem ya. Mi stat mekem wok blong holem bodi blong man, mo mane we mi kasem from wok ya i givhan smol long mitufala. Gavman blong California i givim wan fri ples long hospital blong Christine i save stap long hem. Be long ples ya, ol dokta oli no wantem lukaot long hem from we hem i no agri blong tekem blad. Ale, helt blong hem i kam nogud moa. Mitufala i no moa save nao wanem blong mekem, mo mitufala i prea long Jeova blong i lidim mitufala.

Wan aftenun, taem mi stap long wok blong prij, mi pas long fored blong ofis blong wan dokta. Wantaem nomo, mi tekem disisen blong go luk dokta ya. Nating se dokta ya i rere finis blong gobak long haos, hem i tekem mi mi go long ofis blong hem, mo mitufala i toktok gogo tu aoa i pas. Ale hem i talem se: “Mi rili tinghae long wok blong yufala olsem misinari, mo bambae mi tritim woman blong yu we yutufala i no nid blong pem, mo bambae mi no yusum blad long hem.” Mi no save bilivim samting we mi harem.

Gudfala dokta ya, we plante man oli savegud hem, hem i tekem Christine i go long hospital we hem i stap wok long hem, mo hem i lukaot gud long Christine, gogo hem i kamgud smol. !Mitufala i harem gud bigwan from we Jeova i soem rod long mitufala long hadtaem ya!

Niufala Ples Blong Wok

Taem Christine i stap kam gud sloslou, mitufala i joen long wok blong paenia mo mitufala i glad tumas blong givhan long sam man long Long Beach blong kam wosipim Jeova. Long 1982 Sosaeti i askem mi blong mekem wok blong seket elda long Yunaeted Stet. Evri dei, mitufala i tangkiu long Jeova from we hem i letem mitufala i joen bakegen long wok ya blong visitim ol kongregesen​—⁠hemia wan wok we mitufala tugeta i laekem tumas. Mitufala i wok long California mo biaen long Niu Inglan, ol ples we i gat sam kongregesen blong ol man Potugal. Biaen, mitufala i visitim ol kongregesen long Bermuda tu.

Afta long fo yia, mitufala i kasem wan narafala wok. Sosaeti i askem mitufala blong jusum eni ples we mitufala i wantem go long hem blong wok olsem spesel paenia. Mitufala i sore lelebet blong lego wok blong visitim ol kongregesen, be mitufala i gat strong tingting blong gohed blong wok long ol niufala ples ya. ?Be long weples? Taem mitufala i stap visitim ol kongregesen, mi makem se kongregesen blong ol man Potugal long New Bedford, Massachusetts, i nidim help. Taswe, mitufala i go long New Bedford.

Taem mitufala i kasem ples ya, kongregesen ya i mekem wan bigfala lafet blong welkamem mitufala. !Samting ya i mekem mitufala i harem se oli nidim mitufala! Wota i ronaot long ae blong mitufala. Wan yangfala hasban mo waef wetem tu smol pikinini blong tufala, oli soem kaen fasin long mitufala taem oli tekem mitufala i go stap long haos blong olgeta go kasem we mitufala i faenem wan ples blong ren. Jeova i blesem wok blong mitufala long ples ya, i bitim wanem we mitufala i tingbaot. Stat long 1986, mitufala i halpem samwe long 40 defren man long taon ya blong kam ol Witnes. Oli olsem famle blong mifala long trutok. Antap long hemia, mitufala i glad tumas blong luk faef brata long kongregesen ya oli tekem wok blong lukaot ol sipsip. I olsem we mitufala i mekem misinari wok long wan teritori we i karem plante frut.

Taem mitufala i tingtingbak, mitufala i glad se mitufala i bin mekem wok blong Jeova stat long taem we mitufala i yangfala yet. Mo mitufala i glad we mitufala i folem trutok wetem olgeta laef blong mitufala. Yes, naoia mitufala i olfala mo samtaem mitufala i sik, be mitufala i gohed yet blong wokbaot long rod blong Jeova olsem stamba samting we i givim paoa mo glad long mitufala.

[Tok blong pija long pej 26]

Taem mitufala i jes kam long Rio de Janeiro

[Tok blong pija long pej 28]

Famle blong mifala long saed blong spirit​—⁠kongregesen blong ol man Potugal long New Bedford, Massachusetts