Ol Hanraet Blong Baebol Long Wan Buk Nomo

OL FASWAN Kristin, we oli mekem plante kopi blong Baebol, oli ol faswan man blong yusum kodeks​—⁠hemia fasin blong joenem plante pej tugeta olsem wan buk, mo hem i defren long wan skrol. Be taem ol Kristin oli stat yusum kodeks oli no putum olgeta hanraet blong Baebol tugeta long wan buk wantaem. Long ol yia faef handred, Flavius Cassiodorus, hem nao i stat blong wokem ol Baebol we evri hanraet blong hem oli stap long ol buk.

Flavius Magnus Aurelius Cassiodorus i bon raonabaot long ol yia 485-490 K.T. * Famle blong hem i rij mo oli stap long Calabria, hemia long saot blong kantri ya we tede hem i Itali. Hem i laef long wan taem we kantri blong Itali i fulap long faet. Fastaem gavman blong ol man Got mo biaen gavman blong Byzantines, oli rulum kantri ya. Taem Cassiodorus i gat raonabaot 60 no 70 yia, hem i wokem wan haos blong ol pris we nem blong hem Vivarium, mo wan laebri. Hem i wokem tufala samting ya klosap long hom blong hem long Squillace, Calabria.

Wan Man We i Wokhad Blong Putum Ol Hanraet Blong Baebol Tugeta

Bigfala tingting we i pusum Cassiodorus blong wok strong hemia se Baebol i mas go kasem plante moa man. Peter Brown, wan man blong raetem histri, i talem se: “Long lukluk blong Cassiodorus, ol save we ol man oli gat blong raetem ol buk long lanwis Latin, bambae oli mas yusum olgeta long wok blong karem Baebol i go long ol man. Olgeta tul we oli bin yusum fastaem blong stadi mo mekem kopi long ol buk blong ol man [long lanwis Latin], naoia bambae oli mas yusum ol tul ya blong kasem save long Baebol mo mekem ol kopi blong hem we oli stret gud. Olgeta save mo waes blong Latin kalja bambae oli mas wok raon long Tok blong God, olsem ol planet we oli stap goraon long bigfala san.”

Cassiodorus i singaot ol man we oli save tanem wan lanwis i go long narafala lanwis, mo ol man we oli gat save long saed blong grama. Hem i singaot olgeta oli kam long jos haos blong Vivarium blong jekemap mo putumgud olgeta hanraet blong Baebol folem oda. Hem nao i lidim bigfala wok ya blong putum ol hanraet blong Baebol tugeta. Hem i letem wok ya long han blong sam man nomo we oli gat gud save. Oli no mas hareap blong jenisim wan samting we oli ting se hem i wan mastik. Sipos i gat wan samting we i no klia long saed blong grama, oli mas jekemap ol olfala hanraet blong Baebol, oli no mas folem nomo ol rul long lanwis Latin. Cassiodorus i raetem se: “Sipos grama i narakaen be i laenap wetem ol olfala hanraet . . . yumi mas holem grama ya, from we i no mas gat wan nogud samting i kam spolem hanraet ya we i kamaot long God. . . . Yumi no mas jenisim ol tok, ol pijatok, mo stael blong raetem ol stori insaed long Baebol, nating sipos oli narakaen lelebet long lanwis Latin, mo tu, wei blong talem ol nem blong man long ‘Hibru’ lanwis, oli mas stap sem mak.”​—⁠The Cambridge History of the Bible.

Kodeks Grandior

Olgeta we oli wok long jos haos blong Vivarium, oli kasem oda se oli mas wokem tri defren Baebol long lanwis Latin. Wan long trifala Baebol ya, i gat naen buk long hem. Maet hem i holem Olfala Latin hanraet blong Baebol we oli bin wokem samwe long en blong ol yia wan handred. Narafala Baebol we oli wokem, hemia seken wan, hem i holem Baebol ya Vulgate long lanwis Latin, we Jerome i wokem mo i finisim samwe long stat blong ol yia fo handred. Namba tri Baebol, oli kolem Kodeks Grandior, we i minim “bigfala kodeks.” Oli yusum tri defren hanraet blong Baebol blong raetem Baebol ya. Tufala laswan Baebol ya oli wokem blong wanwan long tufala i save holem olgeta buk blong Baebol long wan buk nomo.

Ating Cassiodorus nao i faswan blong wokem ol Baebol long lanwis Latin we olgeta hanraet blong hem oli stap long wan buk nomo. Hem i kolem ol buk ya se  Pandectae. * Hem i luksave se rod ya blong joenem olgeta hanraet blong Baebol long wan buk nomo, i givhan bigwan long man. Rod ya i mekem se ol man oli no moa westem taem blong openem plante buk blong jekemap ol defren hanraet blong Baebol.

I Stat Long Saot Blong Itali i Go Kasem Ol Aelan Blong Briten

Smoltaem afta we Cassiodorus i ded (hemia raonabaot long yia 583 K.T.), ol man oli karem Kodeks Grandior i go long narafala ples. Long semtaem ya, ol man oli muvum wan haf blong olgeta buk we oli stap long laebri blong Vivarium i go long laebri blong Lateran we i stap long Rom. Long 678 K.T., Ceolfrith, wan man Inglan we i hed pris long haos blong ol pris, i karem Baebol ya long Rom i go wetem hem taem hem i gobak long ol Aelan blong Briten. Long rod ya, kodeks ya i kam stap long tufala haos blong ol pris long Wearmouth mo Jarrow, long ples ya we tede oli kolem Northumbria, Inglan. Ceolfrith nao i bos long tufala ples ya.

I sua se Ceolfrith mo ol narafala pris oli intres tumas long Baebol ya we Cassiodorus i wokem. Maet oli laekem wei we Baebol ya i isi blong yusum. Taswe, i no bitim ten yia yet, ol pris ya oli wokem tri narafala Baebol olsem, we i gat olgeta buk blong Baebol long wan buk nomo. Long trifala kopi ya, i gat wan nomo i stap yet long taem blong yumi, hemia bigfala Baebol ya we oli kolem Kodeks Amiatinus. Hem i gat 2,060 pej we oli wokem long skin blong buluk, mo ol wanwan pej ya oli longfala olsem 51 sentimita mo oli bigfala olsem 33 sentimita. Baebol ya i tik olsem 25 sentimita mo hem i kasem 34 kilo. Tede, i no gat wan narafala Baebol long lanwis Latin we i olfala moa mo we i stap gud olsem hemia. Man ya Fenton J. A. Hort, we i stadi long histri blong Baebol long ol yia 18 handred, i jekemap ol defren haf blong kodeks ya long 1887. Hort i talem i se: “Hanraet ya we i nambawan tumas i mekem eni man, ol man blong naoia tu [we oli laef long ol yia 18 handred] oli sapraes bigwan.”

Gobak Long Itali

Kodeks Grandior we Cassiodorus nao i biaenem wok blong raetem hem, naoia i lus finis. Be, Kodeks Amiatinus long lanwis Latin, we ol man Inglan oli wokem folem Kodeks Grandior, i go kasem Itali stret afta we oli finis blong raetem hem. Smoltaem bifo we Ceolfrith i ded, hem i mekemap tingting blong hem blong gobak long Rom. Hem i tekem wetem hem, wan long ol trifala hanraet blong Baebol long lanwis Latin. Hem i wantem givim hanraet ya olsem presen, long Pop Gregory II. Be hem i ded long Langres, Franis, long 716 K.T., taem hem i stap yet long rod blong go long Rom. Ol narafala man we oli bin wokbaot wetem hem long trep ya, oli karem Baebol ya i go kasem ples ya we hem i bin wantem go long hem. Biaen oli putum hanraet ya [kodeks] i go long laebri long haos blong ol pris long Mount Amiata, sentrol Itali, hemia nao from wanem hanraet ya i karem nem ya Kodeks Amiatinus. Long 1782, ol man oli karem Baebol ya i go long wan narafala laebri hemia Laebri blong Medicean-Laurentian long Florence, Itali. Hem i stap yet long ples ya mo hem i wan long ol buk blong Laebri ya, we oli sas tumas.

?Kodeks Grandior i bin gat paoa long laef blong yumi? Stat long taem blong Cassiodorus, ol man blong mekem kopi blong Baebol mo ol man blong prentem ol buk oli laekem moa fasin ya blong joenem olgeta hanraet blong Baebol long wan buk nomo. Kam kasem tede, plante man oli faenem se i isi moa blong faenem ol vas blong Baebol long wan buk i bitim ol skrol, mo from samting ya, plante moa man oli save kasem blesing long laef blong olgeta from Baebol.​—⁠Hibrus 4:⁠12.

[Ol futnot]

[Map blong pija long pej 29]

(Lukluk niuspepa)

Trep we Kodeks Grandior i mekem

Vivarium monastery

Rome

Jarrow

Wearmouth

Trep we Kodeks Amiatinus i mekem

Jarrow

Wearmouth

Mt. Amiata

Florence

[Credit Line]

Mountain High Maps® Copyright © 1997 Digital Wisdom, Inc.

[Tok blong pija long pej 30]

Antap: Kodeks Amiatinus Lefsaed: Pija blong Esra long Kodeks Amiatinus

[Credit Line]

Biblioteca Medicea Laurenziana, Firenze