?Yu Yu Stap ‘Yusum Evri Janis We Yu Kasem’?

APOSOL Pol i givim advaes long ol Kristin long faswan handred yia long Efesas se: “From samting ya, yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa.” (Efesas 5:​15, 16) ?From wanem Pol i givim advaes ya? Blong kasem ansa blong kwestin ya i gud blong save ol samting we ol Kristin oli stap fesem long taon ya blong bifo.

Efesas i wan taon we i rij, mo hem i fulap wetem ol rabis fasin long saed blong seks, ol fasin blong brekem loa, mo ol defren kaen fasin blong wok wetem ol rabis spirit. Mo tu, ol Kristin oli mas lan blong laef long medel blong ol man we oli bilif long prapa waes blong olgeta long saed blong ol taem. Ol man Gris long Efesas we oli no Kristin, oli no bilif se taem i stap muf i go fored oltaem. Waes blong ol man Gris i tijim olgeta se laef i stap goraon bakegen mo bakegen we i no gat en blong hem. Wan man we i no yusumgud taem blong hem long laef, i save statem wan narafala laef bakegen. Maet tingting olsem ya nao i pulum ol Kristin long Efesas blong no tinghevi long ol taem we Jeova i stanemap, olsem taem ya we hem i putum blong jajem ol man. Taswe advaes we Pol i givim blong ‘yusum evri janis we yumi kasem’ i stret nomo.

Pol i no stap tokbaot taem olsem ol aoa blong dei. Grik tok we hem i yusum i minim wan stret taem we man i makemaot, wan taem we i stret folem wan plan. Pol i givim advaes long ol Kristin blong faswan handred yia blong waesgud taem oli yusumgud taem ya, no janis ya we oli stap haremgud long hem yet. Oli mas mekem olsem, bifo we en blong taem ya i kam, from we long taem ya sore blong God bambae i finis mo bambae oli lusum janis blong kasem sef.​—⁠Rom 13:​11-​13; 1 Tesalonaeka 5:​6-​11.

Yumi stap laef long wan impoten taem we i sem mak olsem taem blong ol Kristin long faswan handred yia. I nogud blong yusum taem ya, we bambae yumi neva faenem bakegen, blong ronem ol samting we wol ya i stap givim. Ol Kristin oli waes sipos oli yusum taem we i stap blong mekem “ol fasin we [God] i wantem” mo frengud moa wetem Man We i Wokem yumi, Jeova.​—⁠2 Pita 3:​11; Ol Sam 73⁠:28; Filipae 1:​10.