Advaes Blong God Taem Yu Jusum Wan Blong Mared
Advaes Blong God Taem Yu Jusum Wan Blong Mared
“Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”—OL SAM 32:8.
1. ?I nidim wanem blong gat wan gudfala mared?
WAN man blong jimnastik i stap swing long kros ba we hem i stap hang long hem. Nao wantaem nomo, hem i swing i go antap, i lego kros ba ya mo i tantanem hem long ea. Ale hem i stretem han blong hem, mo i hang long han blong fren blong hem we i stap swing long wan kros ba narasaed long hem. Wan man wetem wan woman, tufala i stap glis long sno. Wantaem nomo, man ya i leftemap woman ya i go antap long ea. Woman ya i tantanem hem wan, ale i kam daon bakegen, i stanap long wan leg, mo i gohed blong glis i goraon long man blong hem. I luk olsem se tufala pleplei ya i isi nomo. Be olgeta we oli mekem samting ya oli mas trengud fastaem, oli mas jusum wan fren we i stret, mo oli mas folem ol advaes no tijing we oli stret long saed ya. Samting ya i sem mak long saed blong mared. Wan gudfala mared i no save kamaot olsem nomo. Sipos yu wantem wan gudfala mared, yu mas jusum wan man no woman we i stret, yutufala i mas wokgud tugeta, mo yu mas folem ol waes advaes. Yes, ol advaes we oli stret long saed ya oli impoten tumas.
2. (a) ?Hu i stanemap mared, mo from wanem? (b) ?Sam man oli folem wanem rod long saed blong mared?
2 I no rong sipos wan yangfala boe no gel i tingbaot mared. Stat long taem we Jeova God i stanemap mared, kam kasem tede, mared i wan samting we i stret nomo blong mekem. Be fas man ya, Adam, i no hem we i jusum waef blong hem. Jeova we i lavem Adam tumas, hem nao i givim waef blong hem. (Jenesis 2:18-24) God i wantem se faswan man mo woman tufala i karem plante pikinini mo fulumap wol. Samtaem afta long faswan mared, ol papa mama nao oli jusum boe no gel we bambae i mared wetem pikinini blong olgeta. (Jenesis 21:21; 24:2-4, 58; 38:6; Josua 15:16, 17) Tede, fasin ya i stap gohed yet long sam kantri. Be long plante kantri, boe no gel nao i jusum waef no hasban blong hem.
3. ?Olsem wanem blong jusum wan hasban no waef?
3 ?Olsem wanem blong jusum wan hasban no waef? Samfala oli lukluk bodi mo fes nomo. Sam narafala oli jusum hemia we i rij. Sam narafala bakegen, oli jusum wan we i save lukaotgud long olgeta, mo givim ol samting we oli nidim mo wantem. ?Be ol samting ya oli naf blong mekem wan hapi mared? Ol Proveb 31:30 i talem se: “Gudfala fasin blong woman i save trikim man isi nomo, mo fes we i naes i no save stap longtaem. Be woman we i stap ona long Hae God, i stret blong olgeta man evriwan oli stap leftemap nem blong hem.” Vas ya i soemaot wan impoten poen: Tingbaot Jeova taem yu stap jusum hasban no waef blong yu.
Ol Nambawan Advaes We Oli Kamaot Long God
4. ?Wanem help we God i givim long yumi blong jusum wan hasban no waef?
4 Jeova, Papa blong yumi long heven, i lavem yumi tumas. Taswe, hem i givim Tok blong hem blong lidim yumi long evri samting we yumi mekem long laef blong yumi. Hem i talem se: “Mi, Jeova, mi mi God blong yufala, God ya we i stap tijim yufala blong karem gudfala frut long laef blong yufala. Mi mi stap mekem yufala i wokbaot long rod we i stret.” (Aesea 48:17, NW ) Olsem nao, yumi no sapraes se Baebol i givim sam gudfala advaes, we oli bin wokgud longtaem finis, blong jusum wan hasban no waef. Jeova i wantem se mared blong yumi i hapi mo i stap longtaem. Taswe, hem i stap halpem yumi blong kasem save mo folem ol advaes ya. !Yumi rili glad se Man ya we i Wokem yumi i stap mekem i gud tumas long yumi olsem!—Ol Sam 19:8.
5. ?Wanem i save mekem se mared i stap glad olwe?
5 Taem Jeova i stanemap mared, hem i wantem se mared i stap strong olwe. (Mak 10:6-12; 1 Korin 7:10, 11) Hemia nao from wanem hem i “no laekem nating fasin ya we man i mekem divos long woman blong hem.” Hem i letem divos from wan risen nomo, hemia sipos hasban no waef ‘i slip wetem narafala man no woman.’ (Malakae 2:13-16; Matiu 19:9) Taswe, fasin ya blong jusum wan hasban no waef i wan step we i impoten tumas, hem i no wan pleplei. Disisen we yu mekem i save givim bigfala glad, sipos no, bigfala sore. Sipos yu jusum wan gudfala hasban no waef, bambae yu gat gudfala mared we i givim glad. Be sipos yu jusum rong, bambae yu sore long ful laef blong yu. (Ol Proveb 21:19; 26:21) Sipos yu wantem hapi oltaem long mared blong yu, yu mas waesgud taem yu stap jusum hasban no waef blong yu. Mo tu, yu mas rere blong mekem promes ya blong stap tugeta olwe, from we God i wantem se tufala we i mared i joengud mo wok tugeta oltaem.—Matiu 19:6.
6. ?From wanem ol yangfala man mo woman oli mas lukaotgud taem oli stap jusum wan we oli wantem mared wetem, mo olsem wanem oli save mekem waes disisen?
6 Ol yangfala man mo woman oli mas lukaotgud taem oli stap jusum waef no hasban blong olgeta. Oli no mas letem naes fes mo strong filing i pulum olgeta. Sipos yu mared jes from naes fes mo strong filing, kwiktaem biaen bambae yu no moa respektem mared blong yu, bambae yu agensem hemia we yu mared wetem. (2 Samuel 13:15) Be yu save wokem strongfala lav taem yu savegud yu wan mo hemia we yu wantem mared wetem. Yu mas luksave tu se maet ol samting we yu rili nidim, oli no stap long hat blong yu. (Jeremaea 17:9) Hemia nao from wanem ol advaes blong God long Baebol oli impoten tumas. Ol advaes ya oli halpem yumi blong luksave olsem wanem blong mekem ol waes disisen long laef blong yumi. Man blong raetem Ol Sam i tok long nem blong Jeova, i se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Ol Sam 32:8; Hibrus 4:12) Yes, yumi bon wetem filing ya blong wantem kampani wetem narafala mo blong narafala i lavem yumi. I tru, mared i rod blong soemaot filing ya, be tu mared i save givim ol bigfala problem. Blong winim ol problem ya, yumi mas bigman long saed blong tingting mo gat fasin luksave.
7. ?From wanem samfala oli no akseptem advaes blong Baebol taem oli stap jusum hasban no waef blong olgeta?
7 Man we i Stamba blong mared, hem i givim ol advaes blong lidim yumi taem yumi stap jusum waef no hasban blong yumi. I waes blong folem ol advaes ya. Samtaem, maet yumi no agri taem papa mama blong yumi no ol Kristin elda oli givim sam advaes blong Baebol long yumi. Maet yumi tingting se oli no rili kasem save long yumi, nao ol filing blong yumi oli pusum yumi blong mekem wanem we i stap long hat blong yumi. Be, taem yumi luk ol nogud frut we i kamaot from disisen blong yumi, maet yumi tingting bak bakegen se, i moagud sipos yumi bin lesin long advaes. (Ol Proveb 23:19; 28:26) Maet i no gat lav nating long mared blong yumi, yumi gat hadtaem blong tijim pikinini, no maet hasban no waef blong yumi i no stap long trutok. !I nogud tumas sipos mared we i rod blong givim bigfala glad, hem i givim plante trabol long yumi!
I Impoten Tumas Blong Fasgud Long God
8. ?Olsem wanem fasin blong fasgud long God i save halpem wan mared blong stanap strong mo glad oltaem?
8 I tru se gudfala fasin blong hasban mo waef i save mekem mared blong tufala i kam strong. Be sipos tufala i wantem joengud mo hapi oltaem, tufala tugeta i mas gat sem tingting long saed blong wanem we i moa impoten long laef blong tufala. Sipos tufala tugeta i fasgud long Jeova God, tufala i save wokem wan mared we i strong mo tufala i save joengud tugeta. (Prija 4:12) Taem Kristin hasban mo waef i putum wosip blong Jeova fastaem long laef blong tufala, tufala i joengud long saed blong spirit, tingting, mo fasin. Tufala i stadi tugeta long Tok blong God. Tufala i prea tugeta, mo samting ya i mekem se tufala i gat wan tingting. Tufala i go tugeta long ol Kristin miting mo long wok blong prij. Ol samting ya oli mekem se tufala i joengud moa long saed blong spirit. Antap long hemia, tufala i kasem blesing blong Jeova.
9. ?Ebraham i mekem wanem blong faenem waef blong Aesak, mo wanem frut i kamaot?
9 Ebraham i wan man we i fasgud long God oltaem. Hem i wantem mekem God i glad taem hem i jusum waef blong boe blong hem Aesak. Hem i talem long wokman blong hem se: “Yu kam. Mi wantem blong yu go lukaot wan woman blong pikinini blong mi Aesak. . . . Hae God i God blong heven mo wol, mo mi wantem blong yu talem nem blong hem, mo yu promes se bambae yu no jusum wan gel Kenan, blong pikinini ya blong mi i mared long hem. Yu mas promes se bambae yu gobak long kantri ya we mi mi bon long hem, nao bambae yu go luk ol famle blong mi we oli stap yet long ples ya, yu jusumaot dota blong wan long olgeta, blong pikinini ya blong mi i mared long hem. . . . [Jeova] bambae i sanem enjel blong hem i go fastaem long yu long ples ya, nao bambae yu save tekem wan gel blong ples ya, blong pikinini blong mi bambae i mared long hem.” Rebeka i kam wan gudfala waef blong Aesak, we Aesak i lavem hem tumas.—Jenesis 24:3, 4, 7, 14-21, 67.
10. ?Wanem ol rul long Baebol we ol hasban mo waef oli mas folem?
10 Sipos yu yu wan Kristin we i no mared yet, i impoten tumas blong fasgud long God. Fasin ya bambae i halpem yu blong folem ol rul blong Baebol long saed blong mared. Pol i tokbaot sam long ol rul ya i se: “Yufala ol woman we i mared. Yufala i mas ona long ol man blong yufala, olsem we yufala i stap ona long Masta blong yumi . . . Mo yufala ol man we i mared, yufala i mas lavem ol woman blong yufala, olsem we Kraes i lavem [“kongregesen,” NW ] ya. Taswe hem i letem laef blong hem, blong sevem [kongregesen] ya. . . . Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. . . . Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.” (Efesas 5:22-33) Ol tok ya we Pol i talem long paoa blong tabu spirit oli soem se hasban mo waef i mas gat lav mo respek long tufala. Taem hasban mo waef i folem rul ya, tufala i soem se tufala i ona gud long Jeova. I gud we tufala i mekem promes wetem fulhat blong tufala se bambae tufala i joen tugeta long ol gud taem mo long ol nogud taem tu. Ol Kristin we oli stap tingting blong mared oli mas rere blong karem wok blong olgeta.
Jusum Stret Taem Blong Mared
11. (a) ?Baebol i givim wanem advaes long saed blong taem blong mared? (b) ?Wanem eksampol i soem se i waes blong folem advaes blong Baebol long 1 Korin 7:36?
11 I impoten tumas blong save wetaem yu yu naf blong mared. Baebol i no talem wan stret yia long saed ya from we ol wanwan man oli no sem mak. Be Baebol i soem se i moagud blong wet go kasem we yu “pastru long yangtaem” blong yu. Hemia taem ya we filing blong seks i strong mo i save lidim ol yangfala blong mekem wan nogud disisen. (1 Korin 7:36, NW ) Michelle i talem se: “Plante fren blong mi oli gat boefren mo oli stap mared we oli no kasem 20 yia yet. Taem mi luk samting ya, i hadwok long mi blong folem advaes blong Baebol. Be mi luksave se Jeova nao i givim advaes ya, mo evri samting we hem i talem long yumi oli blong givhan long yumi. Ale, mi mi no hareap blong mared. From samting ya, mi gat janis blong tingting long fasin fren we mi gat wetem Jeova mo blong save plante samting long saed blong laef. Hemia ol samting we yu no save kasem taem yu yang yet. Sam yia biaen, mi mi kam inaf blong mared mo blong winim ol problem we oli kamaot long mared.”
12. ?From wanem i waes blong no mared taem yu yang tumas?
12 Olgeta we oli mared taem oli yang tumas, plante taem oli faenem se ol nid mo tingting blong olgeta i jenis taem oli kam bigman. Nao, oli luksave se wanem we fastaem oli wantem tumas, i no moa impoten long olgeta. Wan yangfala Kristin gel i gat tingting blong mared taem hem i gat 16 yia. Bubu woman blong hem mo mama blong hem, tufala i mared taem tufala i gat 16 yia. Taem boefren blong hem i no wantem mared long taem ya, gel ya i jusum wan narafala boe we i wantem mared wetem hem. Be biaen, gel ya i sore tumas from disisen ya we hem i bin hareap blong mekem.
13. ?Olgeta we oli mared taem oli yang tumas oli no naf blong mekem wanem?
13 Sipos yu wantem mared, i impoten tumas blong savegud laef blong mared. Olgeta we oli mared taem oli yang tumas, oli save kasem plante problem we oli no rere yet blong winim. Maet oli no save laef blong mared mo tingting blong olgeta i olsem pikinini, mekem se oli no naf blong winim ol wari mo oli no save lukaot long pikinini. Man we i wantem mared, hem i mas wan man we i bigman long saed blong bodi, tingting, mo spirit. Olsem nao, mared blong hem i save stap strong longtaem.
14. ?I nidim wanem blong winim ol problem long mared?
14 Pol i talem se olgeta we oli mared bambae “oli gat trabol long laef blong olgeta.” (1 Korin 7:28) Bambae i gat problem i kamaot from we tu defren man i joen wanples, mo tufala i no agri long wan tingting. From we yumi sinman, samtaem i hadwok blong folem ol rul blong Baebol long saed blong mared. (1 Korin 11:3; Kolosi 3:18, 19; Taetas 2:4, 5; 1 Pita 3:1, 2, 7) Yumi mas kam bigman long saed blong tingting mo spirit. Olsem nao, bambae i moa isi long yumi blong lukaot mo folem ol advaes blong God blong stretem ol problem wetem lav.
15. ?Olsem wanem ol papa mama oli save rerem pikinini blong olgeta blong mared? Talem wan eksampol.
15 Ol papa mama oli mas givhan long yangfala blong olgeta blong luksave se i impoten tumas blong folem tok blong God. Olsem nao, oli mekem se ol yangfala ya oli rere blong mared. Ol papa mama oli save yusumgud Baebol mo ol Kristin buk blong halpem ol yangfala blong olgeta blong faenemaot sipos ol yangfala ya no hemia we bambae oli mared wetem i rere blong mekem promes blong mared, no nogat. * Blossom, wan gel we i gat eitin yia, i fren wetem wan yangfala boe long kongregesen blong hem. Boe ya i wan fultaem paenia, mo tufala i wantem mared. Be, papa mama blong gel ya i talem long hem blong wet wan yia moa, from we hem i yang tumas. Samtaem biaen, Blossom i raetem se: “Mi talem bigfala tangkiu we mi bin lesin long waes advaes ya. Long wan yia ya, mi kam inaf moa blong skelem samting mo mi luksave se ol fasin blong boe ya oli no save givhan blong mekem wan gudfala mared. Biaen, hem i lego ogenaesesen, mo mi sef long samting ya we i save spolem mi bigwan. !Mi mi glad tumas blong gat wan papa mo mama we tufala i rili waes! Mi mi rili trastem ol advaes blong tufala.”
‘Mared Nomo Long Wan Man Blong Masta’
16. (a) ?From wanem maet i no isi long ol Kristin blong ‘mared nomo long wan man blong Masta’? (b) ?Sipos wan Kristin i stap tingting blong mared wetem wan we i no bilif, hem i mas tingbaot wanem?
16 Tok blong Jeova i talem klia se: ‘Mared nomo long wan man blong Masta.’ (1 Korin 7:39, NW ) Maet ol Kristin papa mama mo ol pikinini blong olgeta oli faenem se i hadwok blong folem rul ya. ?From wanem? From we maet ol yangfala oli wantem mared, be oli no faenem wan stret man no woman long kongregesen blong olgeta. Sam kongregesen i olsem. Maet i gat plante sista be i no gat brata, no i no gat wan brata nating we i stret blong mared. Maet wan yangfala man we i no givim laef blong hem yet long God, i laekem wan Kristin sista (no maet wan sista i laekem wan man we i no givim laef blong hem yet long God). Long taem olsem, maet i hadwok long Kristin woman ya mo papa mama blong hem blong folem ol rul blong Jeova. Be, i gud blong tingbaot eksampol blong Ebraham. Hem i wantem tumas blong holemtaet fasin fren we hem i gat wetem God. Taswe, hem i meksua se boe blong hem Aesak i mared wetem wan woman we i wosipim Jeova. Aesak i mekem sem samting long saed blong boe blong hem Jekob. Fasin ya i no isi, be hem i mekem God i glad mo i karem blesing i kam long hem.—Jenesis 28:1-4.
17. ?From wanem fasin blong mared long hemia we i no bilif i save karem bigfala trabol? ?Wanem impoten risen blong ‘mared nomo long wan man blong Masta’?
17 I tru se sam long ol man ya we oli no bilif, oli kam Kristin. Be plante taem, fasin blong mared wetem wan we i no bilif i karem bigfala trabol nomo. Bilif blong tufala i no sem mak, tufala i no gat sem tingting long saed blong ol rul, mo ol mak we tufala i wantem kasem long laef oli defdefren. (2 Korin 6:14) Samting ya i save blokem glad mo fasin blong toktokgud tugeta insaed long mared. Eksampol, wan Kristin sista i sore tumas from we, afta long wan nambawan miting, hem i no save tokbaot ol samting long saed blong spirit wetem hasban blong hem we i no bilif. Be, samting we i moa impoten hemia se, man we i ‘mared nomo long wan man blong Masta,’ hem i soem we hem i fasgud long Jeova. Taem yumi folem Tok blong God, tingting blong yumi i no jajem yumi, from we yumi stap mekem wanem we “[God] i glad long hem.”—1 Jon 3:21, 22.
18. ?Sipos yu gat tingting blong mared, wanem impoten samting blong tingbaot, mo from wanem?
18 Sipos yu gat tingting blong mared, faswan samting we yu mas tingbaot, hemia ol gudfala fasin mo bilif blong man no woman we yu wantem mared wetem. Ol gudfala Kristin fasin, mo fasin blong lavem God mo blong fasgud long hem, oli moa impoten i bitim naesfala fes mo bodi. God i glad tumas long ol hasban mo waef we oli holem promes blong olgeta blong kam ol mared man mo woman we oli strong long bilif. Blong mekem mared i strong moa, hasban mo waef, tufala i mas fasgud long God, we i wokem olgeta samting, mo obei long ol rul blong hem. Long rod ya, tufala i givim bigfala ona long Jeova, mared blong tufala i stanap long wan strongfala fandesen long saed blong spirit, mo bambae tufala i joengud oltaem.
[Futnot]
^ Lukluk Wajtaoa blong Februari 15, 1999, pej 4-8.
?Bambae Yu Yu Ansa Olsem Wanem?
• ?From wanem i nidim advaes blong God sipos yu wantem jusum wan gudfala hasban no waef?
• ?Olsem wanem wosip blong God i save mekem mared i kam strong moa?
• ?Olsem wanem ol papa mama oli save rerem pikinini blong olgeta blong mared?
• ?From wanem i impoten blong ‘mared nomo long wan man blong Masta’?
[Kwestin]
[Tok blong pija long pej 17]
Yu save faenem bigfala glad sipos yu folem rul blong God taem yu jusum hasban no waef blong yu
[Tok blong pija long pej 18]
Yu save kasem plante nambawan blesing sipos yu ‘mared nomo long wan man blong Masta’