God Bambae i No Save Letem Man i Safa Longtaem Moa

LONG evri ples, yumi luk se man i safa. Sam man oli safa from we olgeta nomo oli pulum trabol i kam long olgeta. Maet oli kasem sik from ol nogud fasin long saed blong seks no maet oli harem nogud from we oli tekem drag, oli dring alkol bitim mak no oli smok. Mo samfala oli spolem helt blong olgeta from we oli no kakae ol gudfala kakae. Be, plante long ol samting we oli stap mekem man i safa oli kamaot from sam samting we man i no save bos long hem: olsem ol wo, ol faet bitwin ol man blong defren kastom no lanwis, fasin blong brekem loa, fasin pua, sot long kakae, mo ol rabis sik. Wan narafala samting we ol man oli no naf nating blong blokem hemia fasin safa we i kamaot taem man i kam olfala mo i ded.

Baebol i talem se “God i stamba blong fasin ya blong lavem man.” (1 Jon 4:⁠8) ?From wanem nao, God ya we i gat lav, i letem ol man oli safa bigwan blong plante handred yia? ?Wetaem bambae hem i stretem samting ya? Blong ansa long ol kwestin ya, yumi mas save stamba tingting we God i gat taem hem i wokem man. Samting ya bambae i halpem yumi blong kasem save from wanem God i letem man i safa, mo wanem we bambae hem i mekem long saed ya.

Fasin Fri Blong Jus

Taem God i wokem faswan man mo woman, hem i givim wan bodi mo wan bren long tufala. Be i no hemia nomo. God i no wokem Adam mo Iv blong tufala i wok olsem ol  mesin. Hem i mekem tufala i fri blong jusum rod we tufala i wantem folem. Hemia wan nambawan presen we hem i givim long man, taswe “taem hem i luk olgeta wok ya we hem i mekem, hem i luk we oli gud we i gud tumas.” (Jenesis 1⁠:31) Yes, “ol wok blong hem oli stret gud olgeta.” (Dutronome 32:⁠4, NW ) Yumi evriwan i laekem presen ya we yumi fri blong jus. I no gat wan long yumi we i wantem se narafala i bos long olgeta tingting blong yumi mo i kontrolem evri samting we yumi mekem.

?Be, taem man i yusum fasin fri blong jus, i gat sam mak we hem i no mas bitim? Tok blong God i givim ansa long kwestin ya long advaes we i go long ol faswan Kristin, se: “Yufala i kam fri man finis, mo fasin blong yufala i mas soemaot samting ya. Be i nogud yufala i yusum fasin ya we yufala i kam fri man, blong haedem sam fasin we i no stret. Yufala i man blong wok blong God, mo fasin blong yufala i mas soemaot samting ya.” (1 Pita 2⁠:16) Sipos olgeta man long wan komuniti oli wantem stap gud, i mas gat ol mak we oli no bitim. Taswe, fasin fri blong jus i mas folem loa. Sipos no, ol samting long wol ya bambae oli olbaot nomo.

?Loa Blong Hu?

?Loa blong hu i putum mak we man i no mas bitim taem oli yusum fasin fri blong jus? Ansa blong kwestin ya i joen wetem risen from wanem God i letem man i safa. God i wokem ol man, taswe hem i save gud wanem loa we man i mas obei long hem blong harem gud. Baebol i soemaot samting ya taem hem i se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.”​—⁠Aesea 48:⁠17.

Wan samting i klia se: God i no wokem ol man blong oli stap independen long hem. Hem i wokem olgeta long wan fasin we oli mas obei long ol stret loa blong hem sipos oli wantem win mo harem gud long laef. Jeremaea, we i wan profet blong God, i talem se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.”​—⁠Jeremaea 10:⁠23.

God i putum sam loa long ol samting we hem i wokem, mo ol man oli no save ronwe long ol loa ya, olsem loa blong gravity. * Long sem fasin, God i putum sam loa long saed blong wanem fasin i gud mo wanem fasin i nogud. Ol man oli mas stap aninit long ol loa ya blong mekem se oli joengud olsem wan famle long wol. Taswe, i stret nomo we Tok blong God i givim advaes ya se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.”​—⁠Ol Proveb 3:⁠5.

I klia se, ol man long wol bambae oli neva save wokbaot long rod we i stret, sipos oli no letem God i rulum olgeta. Taem ol man oli lego God blong traem lidim olgeta wan, oli stanemap ol rul long saed blong laef, ekonomi, politik, mo skul, we oli no save laenapgud tugeta. Yes, “man i rulum ol man blong spolem olgeta nomo.”​—⁠Prija 8:⁠9, NW.

?From Wanem Wol i Kam Nogud?

Taem God i wokem faswan papa mama blong yumi, Adam mo Iv, hem i mekem tufala i stret gud olgeta. Bodi mo tingting blong tufala i stret, mo tufala i laef long wan garen we i paradaes. Sipos tufala i letem God i rulum tufala bambae tufala i save stap stretgud olgeta mo harem gud blong olwe. Biaen, bambae tufala i save karem  plante pikinini we evriwan oli stretgud mo oli hapi, long wol ya we i wan paradaes. Hemia nao stamba tingting blong God long saed blong ol man.​—⁠Jenesis 1⁠:​27-29; 2⁠:15.

Be, tufala faswan bubu ya blong yumi, tufala i no yusumgud fasin fri blong tufala. Tufala i gat rong tingting ya se tufala i save gat wan gudfala laef nating se tufala i stap independen long God. Tufala nomo i jusum blong bitim ol mak we loa blong God i putum. (Jenesis, japta 3) From we tufala i no moa wantem se God i rulum tufala, God i no i moa nidim blong givim wan laef we i stret gud long tufala. ‘Olgeta ya, tingting blong olgeta i no stap strong long hem. Olgeta oli no stret blong karem nem ya se ol man blong Hae God, from we olgeta oli man blong giaman, mo oli man blong mekem sin.’​—⁠Dutronome 32:⁠5.

Stat long taem we Adam mo Iv, tufala i no moa obei long God, bodi mo tingting blong tufala i stat kam nogud. Jeova i stamba blong laef blong olgeta samting. (Ol Sam 36:⁠9) Taswe, taem faswan man mo woman ya tufala i seraot long Jeova, tufala i no moa stretgud olgeta mo sloslou tufala i ded. (Jenesis 3⁠:19) Taem yumi bon, yumi evriwan i mas tekem fasin blong papa mama we i bonem yumi. Taswe i klia se, olgeta pikinini we oli bon biaen long Adam mo Iv, oli mas kasem samting ya we tufala i gat. ?Wanem samting ya? Hemia wan bodi we i gat sin mo biaen i ded. From samting ya, aposol Pol i raetem se: “Bifo olgeta, wan man nomo [Adam] i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”​—⁠Rom 5:⁠12.

Bigfala Kwestin​—⁠?Hu i Gat Raet Blong Rul?

Taem Adam mo Iv, tufala i rebel agensem God, tufala i stanemap kwestin long saed blong hae rul blong God, hemia raet we hem i gat blong rul. Sipos Jeova i wantem, hem i save karemaot laef blong tufala ya mo wokem tu niufala man mo woman bakegen. Be, sipos hem i mekem olsem, bambae hem i no ansa long kwestin ya se hu i gat raet blong rul, mo rul blong hu i beswan. Taswe God i letem inaf taem long ol man blong oli folem ol fasin mo tingting olsem we oli wantem. Long rod ya, bambae i klia gud sipos man i save rulum hem wan, we i no nidim God no nogat.

?Ol taosen yia we oli pas finis, oli soemaot wanem? Long ol yia ya, ol man oli traem olkaen fasin blong laef, ekonomi, politik, mo ol skul. Be, ol rabis fasin mo fasin safa i gohed nomo. Tru ya, ‘ol man nogud wetem ol man blong giaman, oli gohed blong mekem i mowas olgeta,’ antap moa long taem blong yumi naoia.​—⁠2 Timoti 3:⁠13.

Long ol yia 19 handred, save blong man i kam antap bigwan long saed blong sayens mo oli wokem plante moa samting. Be long semtaem, ol man oli safa moa i bitim ol man we oli laef longtaem bifo. Mo nomata wanem meresin no save we man i gat, loa blong God i tru nomo se: Taem ol man oli gowe long God​—⁠we hem i stamba blong laef​—⁠oli kasem olkaen sik, oli kam olfala, mo oli stap ded. !Ol yia ya oli pruvum klia nomo se ol man oli no naf blong ‘bos long laef blong olgeta’!

Hae Rul Blong God i Kam Long Klia Ples

Ol trabol we oli kamaot taem man i independen long God, oli soemaot klia se man i no save harem gud long laef sipos hem i rulum hem wan. Rul blong God nomo i save mekem man i glad, i joengud, i gat gudfala helt mo gudfala laef. Mo tu, Tabu Baebol, hemia Tok blong Jeova God we neva i rong, hem i soem se yumi stap laef long ol ‘las dei’ blong rul blong man. (2 Timoti 3⁠:​1-5) Klosap nao, bambae Jeova i no moa letem man i rul mo bambae hem i finisim ol rabis fasin mo fasin safa.

I no longtaem, God bambae i kam stretem ol samting long laef blong man. Baebol i talem long yumi se: “Nao long taem blong ol king ya [ol gavman blong man we oli stap rul naoia], God ya we i stap long heven bambae i stanemap wan king [long heven] we rul blong hem bambae i no save finis samtaem. Bambae i no gat wan king i save winim hem [ol man bambae oli neva save rulum wol ya bakegen]. Bambae hem i save flatemgud paoa blong ol narafala king [ol gavman blong naoia], nao bambae hem i rul oltaem gogo i no save finis.”​—⁠Daniel 2:⁠44.

Stamba tok blong Baebol hemia nao se, hae rul blong God bambae i win tru long Kingdom blong heven. Hemia stamba tijing blong Jisas. Hem i se: “Mo ol man bambae oli talemaot gud nius ya blong Kingdom long olgeta ples long wol, blong givim witnes long olgeta man. Nao biaen, en i save kam.”​—⁠Matiu 24:​14, NW.

?Taem rul blong God i tekem ples long rul blong man, hu bambae i sef mo hu bambae i lus? Long Ol Proveb 2:​21, 22, yumi glad blong ridim se: “Ol stret man we yu save trastem olgeta [hemia olgeta we oli sapotem rul blong God], bambae oli save  stap gud long ples ya blong yumi. Be ol man nogud we oli stap mekem ol rabis fasin [hemia olgeta we oli no sapotem rul blong God], bambae God i tekemaot olgeta oli gowe long ples ya.” Tabu spirit i pusum man blong raetem Sam we i singsing se: “Bambae i no longtaem, ol man nogud oli lus. . . . [Be] ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting. Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—⁠Ol Sam 37:​10, 11, 29.

Wan Nambawan Niufala Wol

Ol man we bambae oli laef long taem we God bambae i spolem rabis wol blong naoia, oli save stap long wol aninit long rul blong Kingdom blong God. Aninit long Kingdom ya bambae i no moa gat rabis fasin mo fasin safa. God bambae i tijim olgeta man, nao, sloslou, wol bambae “i fulap gud long ol man we oli savegud Hae God, olsem we solwota i fulap gud long ples blong hem.” (Aesea 11:⁠9) Gudfala tijing ya i givhan bigwan long man, mo i mekem oli kam moagud. From samting ya, famle blong ol man bambae i stap long pis mo i joengud. Ale, bambae i no moa gat faet, man we i kilim man, raf fasin, fasin blong repem woman, stil, mo ol narafala fasin blong brekem loa.

Sam nambawan samting bambae oli kamtru long ol man blong obei, taem oli laef long niufala wol blong God. Bambae God i karemaot olgeta nogud samting we oli kamaot from fasin blong rebel agensem rul blong God. Ol slak fasin, sik, fasin blong kam olfala, mo ded, bambae oli samting blong bifo nomo. Baebol i mekem yumi harem gud i se: “Bambae i no moa gat man olbaot long kantri ya we i save talem se hem i sik.” Mo tu, Baebol i promes se: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 33⁠:24; 35⁠:​5, 6) !Bambae i gud tumas blong gat gud helt evri dei, gogo i no save finis!

God bambae i lidim ol man wetem lav. From samting ya, ol man we oli laef long niufala wol bambae oli yusum paoa mo gudhan we oli gat blong wokem wan paradaes long ful wol. Bambae i no moa gat man we i pua, hanggri, mo we i no gat haos, from we profet tok blong Aesea i talem se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesin blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.” (Aesea 65:​21, 22) Yes, “olgeta man bambae oli stap gud, mo oli gat pis olwe. Bambae oli save stap gud long ol plantesin blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”​—⁠Maeka 4:⁠4.

Graon ya bambae i harem gud from we God mo ol man tu bambae i kea gud long hem. Baebol i mekem yumi sua long samting ya taem hem i se: “Draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem. . . . Long draeples, ol springwota bambae oli kamkamaot, nao i mekem we bambae i gat ol reva oli stap ron long hem.” (Aesea 35:​1, 6) “Yu mekem we bambae i gat plante  kakae long ples ya, we bambae ol hil oli fulap gud long hem. Yu mekem we graon blong mifala bambae i karem plante kakae olsem gudfala graon ya Lebanon, mo we ol taon blong mifala bambae oli fulap gud long man olsem we open ples i fulap gud long gras.”​—⁠Ol Sam 72:⁠16.

?Olsem wanem long ol bilian man we oli ded? Olgeta we oli stap long tingting blong God bambae oli kambak long laef, from we “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24⁠:15) Yes, ol dedman bambae oli kambak long laef. Bambae oli lanem ol nambawan trutok long saed blong rul blong God mo bambae oli gat janis blong laef olwe long Paradaes.​—⁠Jon 5:​28, 29.

Jeova God bambae i karem bigfala jenis i kam taem hem i karemaot ol nogud samting we i mekem man i safa, i sik mo i ded blong plante taosen yia finis. !I no moa gat sik! !I no moa gat man we i handikap! !I no moa gat man i ded! God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”​—⁠Revelesen 21:​3, 4.

Long rod ya nao, God bambae i finisim ol samting we oli stap mekem man i safa. Bambae hem i spolem rabis wol ya mo bambae i karem wan niufala wol “we stret fasin nomo bambae i stap long hem.” (2 Pita 3⁠:13) !Hemia wan gudfala nius ya! Yumi rili nidim wan niufala wol. Mo bambae yumi no nid blong wet longtaem moa blong luk samting ya. From we ol profet tok blong Baebol oli stap kamtru, yumi save se niufala wol i klosap, mo se i no longtaem nao, bambae God i no moa letem man i safa.​—⁠Matiu 24⁠:​3-14.

[Futnot]

[Bokis blong pija long pej 8]

Rul Blong Man i Mestem

Helmut Schmidt, we bifo hem i hed long gavman blong Jemani, i tokbaot rul blong man i se: “Yumi ol man . . . oltaem nomo yumi rulum wol long fasin we i hafhaf nomo, mo plante rul blong yumi i nogud olgeta. . . . Taem yumi rul, i neva gat pis fulwan.” Human Development Report 1999 i talem se: “Long evri kantri i gat ripot se trabol i stap, i no gat pis, fasin blong brekem loa i kam antap, i gat plante moa raf fasin insaed long famle. . . . Ol trabol long wol oli stap kam antap plante tumas mekem se ol kantri oli no naf blong kontrolem olgeta evriwan, mo [ol trabol] oli kam antap kwiktaem moa i winim wanem we man i traem mekem blong stretem olgeta.”

[Tok blong pija long pej 8]

“Bambae oli glad tumas from we pis i fulap.”​—⁠Ol Sam 37:​11, NW

[Foto Credit Line blong pija long pej 5]

Third from top, mother and child: FAO photo/B. Imevbore; bottom, explosion: U.S. National Archives photo