Wan Kwestin
Wan Kwestin
?Wetaem nao God i makemaot “Tabu Ples we i Tabu Tumas,” olsem we Daniel 9:24 (NW ) i tokbaot?
Daniel 9:24-27 (NW ) i wan profet tok long saed blong taem ya we “Lida ya, Mesaea”—hemia Kraes—bambae i kamtru. Tok ya se God bambae i makemaot “Tabu Ples we i Tabu Tumas,” i no minim taem we hem i makemaot Rum we i Tabu, insaed long haos tempol blong Jerusalem. Be, tok ya “Tabu Ples we i Tabu Tumas” i stap minim haos prea blong God long heven—Rum we i Tabu long heven—insaed long bigfala tempol blong Jeova long saed blong spirit. *—Hibrus 8:1-5; 9:2-10, 23.
?Wetaem nao tempol blong God long saed blong spirit i stat blong mekem ol wok blong hem? Tingbaot wanem i bin hapen taem Jisas i kam blong tekem baptaes long yia 29 K.T. Afta long taem ya, olgeta samting we Jisas i mekem long laef blong hem oli laenap stret wetem ol tok blong Ol Sam 40:6-8. Biaen aposol Pol i soemaot we Jisas i bin prea long God, i se: “Yu yu no wantem we ol man oli stap mekem sakrefaes, mo we oli stap tekem presen i kam blong givim long yu. Be yu yu mekem wan bodi blong mi i stap rere finis blong mi go long wol.” (Hibrus 10:5) Jisas i save se God i “no wantem” we ol man oli gohed blong mekem sakrefaes blong anamol, long tempol blong Jerusalem. Defren olgeta, Jeova i rerem wan bodi we i stret gud olgeta, blong Jisas i givim olsem wan sakrefaes. Jisas i soemaot se hem i wantem tumas blong mekem samting ya, taem hem i se: “God, mi mi rere blong mekem ol samting ya we yu yu wantem, stret olsem we oli raetem long buk blong Loa blong yu, blong tokbaot mi.” (Hibrus 10:7) ?Mo Jeova i mekem wanem? Gospel blong Matiu i talem se: “Nao taem Jon i baptaesem Jisas finis, Jisas i kamaot long wota, nao wantaem nomo skae i open long hem, mo hem i luk Spirit blong God i stap kamdaon olsem wan sotleg, i kam sidaon long hem. Nao God i tok i talem se, ‘Hemia pikinini blong mi, we mi lavem hem tumas. Mi mi glad tumas long hem.’ ”—Matiu 3:16, 17.
Taem Jeova God i agri long bodi we Jisas i givim olsem sakrefaes, samting ya i minim se wan narafala olta i stanap, we i impoten moa long hemia we i stap long tempol blong Jerusalem. Hem i wan olta blong ol “samting ya we God i wantem,” no wan plan we i stanap blong bambae God i save agri long laef blong Jisas olsem wan sakrefaes. (Hibrus 10:10, NW ) Taem tabu spirit i makemaot Jisas, samting ya i minim se naoia God i stanemap fulwan tempol blong hem long saed blong spirit. * Taswe, long taem ya we Jisas i baptaes, God i makemaot ples blong hem long heven, i mekem i kam olsem “Tabu Ples we i Tabu Tumas” long plan blong bigfala tempol long saed blong spirit.
[Ol futnot]
^ Blong kasem save moa long ol defren haf blong tempol blong God long saed blong spirit, lukluk pej 14-19 long Wajtaoa blong Julae 1, 1996.
^ Samting ya i kamaot klia long pej 195 blong buk ya Pay Attention to Daniel’s Prophecy!
[Tok blong pija long pej 27]
Jeova i makemaot “Tabu Ples we i Tabu Tumas” taem Jisas i baptaes