Stanap Strong Olsem Bigman Mo Bilif Fulwan

“!Yufala i Luk! !Hemia Nao Bigfala Kampani Ya!”

I GAT wan kwestin, we i mekem tingting blong ol man blong Jeova i fasfas blong plante yia. Oli bin traehad blong faenem ansa blong kwestin ya long Baebol. Plante toktok i kamaot from kwestin ya. Be biaen oli faenem ansa long Baebol, mo long 1935, long wan asembli long Washington, D.C., ansa ya i mekem evriwan we oli lesin, oli singaot from glad.

Plante long ol toktok we i bin kamaot, oli stanap long bigfala kwestin ya se: ?Hu ya “bigfala hip blong ol man” (King James Version), no “bigfala kampani” (New World Translation), we Revelesen 7:9 i tokbaot? ?Grup ya blong ol man we oli bilif, bambae oli laef long heven?

Wan Kwestin We i Stanap Longtaem Finis

Stat long taem blong aposol Jon i kam kasem taem blong yumi tede, ol Kristin oli askem plante kwestin long saed blong hu ya “bigfala hip blong ol man.” Ol Baebol studen oli ting se bigfala kampani ya, hem i namba tu grup blong olgeta we bambae oli laef long heven. Mo oli ting se, grup ya i gat save long trutok blong Baebol, be oli no talemaot long ol narafala man.

Be, i gat sam long olgeta we oli kampani wetem ol tabu Kristin we biaen oli kam strong long wok blong prij. Oli no gat hop blong go long heven. Yes, hop blong olgeta i laenap wetem pablik tok ya “Plante Milian We Oli Laef Naoia, Bambae Oli Neva Ded Samtaem,” we ol man blong Jeova oli mekem, i stat long 1918 go kasem 1922. Olgeta ya bambae oli kasem blesing blong laef we i no save finis long wol ya.

Wajtaoa blong Oktoba 15, 1923, i tokbaot parabol blong Jisas long saed blong ol sipsip mo ol nani. Wajtaoa ya i talem se: “Ol sipsip ya hemia i no olgeta we tabu spirit i makemaot olgeta. Hemia ol man long olgeta nesen we oli laekem stret fasin, we long tingting blong olgeta oli agri se Jisas Kraes i Masta mo we oli wet mo hop long ol gudfala blesing aninit long rul blong hem.”​—⁠Matiu 25:​31-​46.

Laet i Saenaot Moa

Long yia 1931, Buk ya Vindication, buk Wan, i tokbaot Esikel japta 9 mo i soemaot se olgeta we oli gat mak long fored blong olgeta, nao oli laef tru long en blong wol, hemia ol sipsip long parabol blong Jisas. Buk ya Vindication, buk Tri, (we oli prentem long 1932), i tokbaot man ya Jonadab, we hem i no man Isrel. Jonadab i gat wan hat we i stret, hem i klaem long kat blong faet blong Jehu, King we God i jusumaot, mo i go wetem hem blong luk fasin blong Jehu, taem hem i strong blong kilim i ded ol man we oli stap mekem giaman wosip. (2 King 10:​15-​28) Buk ya i talem se: “Jonadab i olsem saen blong kampani blong ol man we naoia oli stap long wol [we] oli no joen wetem ogenaesesen blong Setan, we oli stanap long saed blong stret fasin, mo bambae Masta i sevem olgeta long taem blong Amagedon, mo i givim laef long olgeta we i no save finis long wol. Hemia nao kampani blong ol ‘sipsip.’ ”

Long 1934, Wajtaoa i soemaot klia se ol Kristin we oli gat hop blong laef long wol ya oli mas givim laef blong olgeta i go long Jeova mo tekem baptaes. !Laet long saed blong grup we bambae oli laef long wol ya, i stap saenaot moa!​—⁠Ol Proveb 4:​18.

Save i Kam Moa Klia

Ol save long saed blong Revelesen 7⁠:​9-17 i stat blong kam moa klia. (Ol Sam 97⁠:11) Wajtaoa i bin talem se oli wantem asembli ya we bambae i kamaot long Mei 30 go kasem Jun 3, 1935, long Washington D.C., Yunaeted Stet, i mekem olgeta we oli olsem Jonadab bifo, “oli haremgud mo i givhan” long olgeta. !Samting ya i rili kamtru!

 Long asembli ya, i gat wan tok blong wekemap tingting we stamba blong hem se “Bigfala Kampani” ya, mo samwe long 20,000 man oli lesin long hem. Long tok ya J. F. Rutherford i pruvum long Baebol se “ol narafala sipsip” oli sem mak long “bigfala kampani” blong Revelesen 7:⁠9. (Jon 10⁠:16) Long en blong tok ya, brata Rutherford i askem se: “?Yufala we i gat hop blong laef blong olwe long wol ya, plis yufala i stanap?” Bighaf blong ol man we oli lesin long hem oli stanap, nao Rutherford i talemaot se: “!Yufala i luk! !Hemia nao bigfala kampani ya!” Fastaem ol man oli stap kwaet nomo, be biaen oli singaot from glad. Long nekis dei blong hem, 840 niufala Witnes blong Jeova oli baptaes, bighaf blong olgeta oli bilif se oli blong bigfala kampani blong man.

Bigfala Kampani i Kamtru

Bifo long 1935, namba blong olgeta we oli lesin long mesej blong Baebol, we oli gat strong tingting blong talemaot gud nius mo we oli soem se oli intres blong laef olwe long paradaes wol ya i kam antap. Ol man ya oli no wantem go long heven, from we God i no givim hop ya long olgeta. Oli luksave se oli haf blong bigfala kampani blong ol narafala sipsip. Samting ya i soemaot se long 1935, God i singaot finis fulnamba blong ol 144,000 tabu Kristin.​—⁠Revelesen 7:⁠4.

Taem Seken Wolwo i stat, Devel Setan i traehad blong stopem wok ya blong hivimap olgeta we bambae oli mekemap bigfala kampani ya. Long plante kantri, gavman i blokem wok blong talemaot Kingdom. Long ol trabol taem ya, mo smol taem bifo we J. F. Rutherford i ded long Jenuware 1942, hem i talem se: “I luk olsem se ‘bigfala hip blong ol man’ bambae i no bigfala tumas.”

Be from blesing blong God, ol samting i no kamaot olsem. Olgeta we tabu spirit i makemaot olgeta, mo ol fren blong olgeta, ol narafala sipsip, oli ‘stanap strong olsem bigman mo oli bilif fulwan.’ Oli gohed nomo long wok blong mekem disaepol. (Kolosi 4:​12, NW; Matiu 24⁠:14; 28:​19, 20) Long 1946, namba blong ol Witnes blong Jeova we oli stap prij long ful wol hem i 176,456​—⁠bighaf blong olgeta oli blong bigfala kampani ya. Long yia 2000, bitim 6,000,000 Witnes oli gohed blong mekem wok blong Jeova wetem strong bilif long 235 kantri​—⁠!tru ya, hemia i wan bigfala kampani blong man! Mo namba ya bambae i gohed blong gru.