‘God i Stap Wetem Yumi, i No Gat Man i Save Agens Long Yumi’
‘God i Stap Wetem Yumi, i No Gat Man i Save Agens Long Yumi’
“?Taem yumi stap tingbaot ol samting ya, bambae yumi talem olsem wanem? God i stap wetem yumi, mo i no gat man nating we i strong moa, we bambae i save agens long yumi.”—ROM 8:31.
1. ?Hu i bin folem ol man Isrel taem oli aot long Ijip, mo wanem i pulum olgeta blong mekem olsem?
OL MAN Isrel oli bin wok klosap 215 yia olsem slef long Ijip. Taem oli gofri mo oli aot long Ijip, i gat “ol narafala man tu oli go wetem olgeta we oli plante tumas.” (Eksodas 12:38) Olgeta man ya, we oli no man Isrel, oli bin luk ol ten bigfala trabol we i bin spolem Ijip mo i daonem ol giaman god blong olgeta. Ol trabol ya, antap moa, namba fo trabol kasem namba ten trabol, oli soemaot klia se Jeova i naf blong lukaotgud long ol man blong hem. (Eksodas 8:23, 24) Nating se oli no savegud ol stamba tingting blong Jeova, oli sua long wan samting: Ol god blong ol man Ijip oli no naf blong sevem olgeta, be Jeova i pruvum se hem i gat paoa blong sevem ol man Isrel.
2. ?From wanem Rehab i givhan long tufala spae blong Isrel, mo from wanem i stret nomo we Rehab i bilif long God blong tufala ya?
2 Foti yia biaen, ol man Isrel oli stap rere blong go insaed long Promes Lan. Nao Josua, we i tekem ples blong Moses, i sanem tu man i go blong spae long kantri ya. Taem tufala i go, tufala i mitim Rehab, wan woman we i stap long Jeriko. Woman ya i harem finis ol stori blong ol bigbigfala wok we Jeova i bin mekem blong lukaot long ol man Isrel long olgeta 40 yia afta we oli aot long Ijip. From samting ya, hem i save se sipos hem i wantem kasem blesing blong God, hem i mas givhan long ol man blong Hem. From we Rehab i mekem waes disisen, hem mo famle blong hem, oli sef taem ol man Isrel oli spolem taon ya. Oli kasem sef long wan fasin we i olsem merikel, mo hemia i soemaot klia se God i stap wetem olgeta. Taswe, i stret nomo taem Rehab i bilif long God blong ol man Isrel.—Josua 2:1, 9-13; 6:15-17, 25.
3. (a) ?Jisas i mekem wanem merikel klosap long taon ya Jeriko we oli bildim bakegen, mo ol lida blong ol man Jiu oli mekem wanem? (b) ?Sam long ol man Jiu, mo plante hiten man tu, oli bin luksave wanem?
3 Wan taosen faef handred yia biaen, klosap long taon ya Jeriko we oli bin bildim bakegen, Jisas Kraes i mekem wan blaen man i lukluk bakegen. (Mak 10:46-52; Luk 18:35-43) Man ya i askem strong long Jisas blong sore long hem, from we hem i luksave se God i stap wetem Jisas. Be ol lida blong ol man Jiu wetem ol man blong olgeta, oli no wantem agri se ol merikel blong Jisas oli pruvum we hem i stap mekem wok blong God. Defren olgeta, oli traem faenem poen long hem. (Mak 2:15, 16; 3:1-6; Luk 7:31-35) Nating se oli luk ol pruf we oli soemaot se Jisas i laef bakegen afta we oli bin kilim hem i ded, oli no wantem bilif se God i bin mekem samting ya. Oli strong blong agensem ol man blong Jisas, mo oli traem blokem wok blong “talemaot gud nius ya blong Jisas.” Be sam man Jiu, mo biaen plante hiten man tu, oli makemgud ol samting we i kamaot mo oli luksave mining blong ol samting ya. Long tingting blong olgeta, i klia se God i sakemaot ol lida blong ol man Jiu we oli ting se oli stret man, mo God i stap wetem ol man blong Kraes we oli gat tingting daon.—Ol Wok 11:19-21.
?God i Stap Wetem Hu Tede?
4, 5. (a) ?Olsem wanem sam man oli jusum skul blong olgeta? (b) ?Blong makemaot trufala skul, wanem impoten kwestin we yu mas tingbaot?
4 I no longtaem i pas, long televisin, oli askem kwestin long Harold Kushner, wan lida blong skul blong save tingting blong hem long saed blong trufala skul. Hem i talem se: “Mi bilif se wan skul i tru sipos laef blong ol man i kam moagud taem oli stat folem ol tijing blong skul ya.” Yes, trufala skul i save mekem fasin blong man i kam moagud. ?Be sipos wan skul i mekem fasin blong man i kam moagud, hemia nomo i naf blong pruvum se God i stap wetem skul ya? ?Yumi luksave trufala skul from poen ya nomo?
5 Yumi evriwan i glad blong mekem prapa disisen blong yumi long laef, mo blong jusum wanem skul we bambae yumi joen long hem. Be nating se man i fri blong jusum skul we hem i wantem folem, hemia i no min se bambae hem i jusumaot trufala skul. Eksampol, sam man oli jusum wan skul from we i gat plante man oli joen long skul ya, no oli jusum hemia we i gat plante mane mo we i mekem ol flas seremoni, no maet oli joen long wan skul from we famle blong olgeta i blong skul ya. Ol samting ya oli no pruvum se skul ya i tru. I impoten blong tingbaot kwestin ya se: ?Weswan skul i pulum ol man blong mekem ol samting we God i wantem, mo i givim klia pruf se God i stap wetem olgeta, nao oli save talem tok ya se: “God i stap wetem yumi”?
6. ?Wanem tok blong Jisas we i givhan long yumi blong luksave trufala skul mo giaman skul?
6 Jisas i putumap wan rul blong luksave trufala wosip no giaman wosip. Hem i se: “Yufala i mas lukaot long ol giaman profet, blong oli no kam spolem yufala. Olgeta ya oli save kam long yufala, we oli kwaet olsem sipsip nomo, be fasin blong olgeta, oli olsem wael dog stret. Bambae yufala i save makem olgeta long frut blong laef blong olgeta.” (Matiu 7:15, 16; Malakae 3:18) Bambae yumi tokbaot sam long ol “frut” ya we i makemaot trufala skul. Long rod ya, bambae yumi luksave olgeta we God i stap wetem olgeta tede.
Ol Mak We Oli Soem Se God i Stap Wetem Trufala Skul
7. ?Fasin ya blong tijim nomo ol samting we i stanap long Baebol i minim wanem?
7 Ol tijing blong trufala skul oli stanap long Baebol. Jisas i talem se: “Ol tok ya we mi stap tijim ol man long hem, oli no blong mi nomo, oli kamaot long God we i sanem mi mi kam. Mo sipos wan man i tingting strong blong mekem ol samting we God i wantem, hem bambae i faenemaot se tok ya blong mi i kamaot long God, no i kamaot long mi nomo.” Jisas i talem tu se: “Man we i kamaot long God, hem i save harem ol tok blong God.” (Jon 7:16, 17; 8:47) Taswe, God i stap wetem skul we i tijim wanem we i stap long Tok blong hem, Baebol, mo i sakemaot ol tijing we oli stanap long waes mo kastom blong man.—Aesea 29:13; Matiu 15:3-9; Kolosi 2:8.
8. ?From wanem i impoten blong yusum nem blong God taem yu wosipim hem?
8 Trufala skul i yusum mo talemaot nem blong God, Jeova. Aesea i se: “Long taem ya bambae yufala i talem se: ‘Yufala i talem tangkiu long Jeova. Yufala i singaot long nem blong hem. Yufala i talemaot ol fasin blong hem long ol laen blong man. Yufala i talemaot samting ya: se ol man oli mas leftemap nem blong hem. Singsing long Jeova, from we hem i mekem ol samting long fasin we i nambawan tumas. Samting ya, ol man oli talemaot long olgeta ples long wol.’ ” (Aesea 12:4, 5, NW ) Jisas i bin tijim ol man blong hem blong prea se: “Papa blong mifala. Yu yu stap long heven. Nem blong yu i tabu.” (Matiu 6:9) Taswe, nating sipos wan Kristin i wan man Jiu no wan man blong narafala nesen, hem i mas “holem nem blong [God].” (Ol Wok 15:14) God i glad tumas blong stap wetem ol man we oli tinghae long “nem blong hem.”
9. (a) ?From wanem fasin glad i wan mak blong trufala skul? (b) ?Olsem wanem Aesea i soemaot se trufala skul i defren long giaman skul?
9 Trufala skul i soemaot glad blong God. Jeova hem i God blong “gud nius,” mo hem i wan “hapi God.” (1 Timoti 1:11, NW ) Taswe, ol man blong God tu oli hapi, mo oli no stap tingting nogud oltaem long evri samting. Wol ya i fulap long trabol, mo olgeta man oli gat problem. Be ol trufala Kristin oli glad from we oltaem, oli tekem ol gudfala kakae long saed blong spirit. Aesea i soem se trufala skul i defren olgeta long ol man long giaman skul. Hem i se: “Bambae yufala i stap hanggri tumas, mo yufala i stap tosta, mo nem blong yufala bambae i kam nogud, nao bambae yufala i sem bigwan. Be ol man blong wok blong mi we oli stap mekem wosip long mi, mo oli stap obei long mi, bambae oli save kakae gud, oli save dring gud, mo bambae oli harem gud, oli glad. Bambae olgeta oli hapi, we oli stap singsing from, be yufala, bambae tingting blong yufala i foldaon olgeta, we yufala i stap krae from.”—Aesea 65:13, 14.
10. ?Olsem wanem ol man long trufala skul oli blokem trabol we i kamaot from fasin blong folem tingting blong olgeta nomo?
10 Fasin blong olgeta mo ol disisen we oli mekem i laenap wetem ol rul blong Baebol. Man we i raetem buk blong Ol Proveb i givim advaes long yumi se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:5, 6) God i stap wetem olgeta we oli lukluk i go long hem blong lidim olgeta, i bitim we oli folem tingting blong ol man we oli sakemaot waes blong God. Sipos wan man i folem Tok blong God, bambae hem i no nid blong pastru long ol trabol blong faenemaot weswan i stret.—Ol Sam 119:33; 1 Korin 1:19-21.
11. (a) ?From wanem trufala skul i no gat wan grup blong man we oli hae moa long ol narafala memba blong kongregesen? (b) ?Olgeta we oli lukaot long ol sipsip blong God oli mas soem wanem eksampol?
11 Trufala skul i wok folem semfala plan we Kristin kongregesen long faswan handred yia i folem. Jisas i stanemap rul ya, se: “Bambae yufala i no letem ol man oli singaot yufala se ‘Tija’, from we yufala i gat wan tija nomo, mo yufala evriwan i brata. Mo bambae yufala i no singaot wan man long wol ya se ‘Papa’, from we yufala i gat wan Papa nomo blong yufala, we hem i stap long heven. Mo bambae yufala i no letem ol man oli singaot yufala se ‘Masta’, from we yufala i gat wan Masta nomo blong yufala, we hemia mi ya, mi Mesaea. Man we i haeman blong yufala hem i mas kam man blong wok blong yufala.” (Matiu 23:8-11) Yumi evriwan long kongregesen i brata nomo. Taswe long kongregesen, i no gat ples blong ol praod lida we oli karem sam spesel taetel blong leftemap olgeta. (Job 32:21, 22) Baebol i talem long olgeta we oli stap lukaot long ol sipsip blong God se oli mas mekem wok ya ‘we tingting blong olgeta i glad blong mekem, olsem we God i wantem. I nogud oli mekem blong kasem pei nomo. Oli mas mekem from we oli glad long hem. Bambae oli no kam olsem bigfala masta blong olgeta ya we God i putum olgeta long han blong olgeta. Oli mas soemaot ol stret fasin long ol man blong olgeta, blong oli save folem, olsem we ol sipsip oli folem man blong lukaot long olgeta.’ (1 Pita 5:2, 3) Ol trufala Kristin man blong lukaot sipsip oli no traem blong bos long bilif blong narafala. Oli wok wetem ol narafala long wok blong God, mo oli traehad blong soem gudfala eksampol.—2 Korin 1:24.
12. ?Olgeta we oli wantem se God i stap wetem olgeta, oli mas gat wanem tingting long saed blong ol gavman?
12 Trufala skul i obei long ol gavman, be long semtaem hem i no joen long politik. God i no save stap wetem olgeta we oli no “ona long gavman.” ?From wanem? From we “i no gat man i save rul sipos God i no letem hem. Ol haeman we oli stap, oli stap long prapa ples blong olgeta from God. Taswe man we i agensem ol haeman ya, hem i agensem plan blong God. Olgeta we oli stanap agens long samting ya, bambae oli mas kasem jajmen blong olgeta.” (Rom 13:1, 2, NW ) Be, Jisas i luksave se hemia wan samting we yumi mas skelemgud. Taswe hem i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12:17) Sipos yumi wantem se God i stap wetem yumi, yumi mas ‘lukaot gud blong obei long God we i King blong yumi, mo folem ol stret fasin blong hem.’ Mo tu, yumi mas obei long ol loa blong kantri, sipos ol loa ya oli no agensem loa blong God. (Matiu 6:33; Ol Wok 5:29) Jisas i soem klia se yumi no mas joen long politik. Hem i tokbaot ol disaepol blong hem se: “Mi mi no man blong wol ya, mo long sem fasin, olgeta tu oli no man blong wol ya.” Biaen hem i gohed se: “Kingdom blong mi i no blong wol ya.”—Jon 17:16; 18:36, NW.
13. ?Olsem wanem lav i wan impoten mak blong ol man blong God?
13 Trufala skul i no stap mekem i gud long sam man nomo, be hem i “mekem i gud long olgeta man.” (Galesia 6:10) Man we i gat Kristin lav, hem i no stap mekem i moagud long wan man i bitim narafala. Hem i akseptem olgeta man, nomata oli gat wanem kala blong skin, oli rij no oli pua, oli skulgud no nogat, mo oli blong wanem kantri no lanwis. Ol Kristin oli mas mekem i gud long olgeta man, antap moa, long olgeta Kristin brata sista blong olgeta. Fasin ya i pruvum se God i stap wetem olgeta. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.”—Jon 13:35; Ol Wok 10:34, 35.
14. ?Sipos God i stap wetem ol man blong hem, hemia i min se evri man bambae i laekem olgeta? Eksplenem.
14 Trufala skul i rere blong kasem trabol from wok blong God. Jisas i givim woning long ol man blong hem se: “From we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala. Sipos olgeta oli stap obei long ol tok blong mi, bambae oli save obei long ol tok blong yufala tu, be olgeta oli no obei long ol tok blong mi nating.” (Jon 15:20; Matiu 5:11, 12; 2 Timoti 3:12) Longtaem finis i kam, ol man oli no laekem olgeta we God i stap wetem olgeta. Tingbaot Noa. Hem i stap bilif strong long God mo from samting ya, i olsem we hem i jajem ol man. (Hibrus 11:7) Tede, olgeta we oli wantem se God i stap wetem olgeta, oli lukaotgud blong no tanem baksaed long tok blong God mo ol rul blong hem jes blong mekem se narafala i no kilim olgeta. Oli save se taem oli gohed blong mekem wok blong God mo stap tru long hem, bambae ol narafala oli “tok nogud” long olgeta.—1 Pita 2:12; 3:16; 4:4.
Taem Blong Skelem Ol Samting
15, 16. (a) ?Wanem ol kwestin we oli save givhan long yumi blong makemaot skul ya we God i stap wetem hem? (b) ?Wanem samting we plante milian man oli luksave, mo from wanem?
15 Askem long yu wan se, ‘?Weswan skul i folem gud Tok blong God, nating sipos ol tijing blong hem oli defren long bilif blong ol narafala man? ?Hu olgeta we oli tinghae long nem blong God, mo we oli stap yusum nem ya blong makemaot olgeta? ?Hu i stap pulum ol man i go long Kingdom blong God olsem rod ya nomo we i save winim ol problem blong man? ?Hu olgeta we oli no fraet blong folem ol rul blong Baebol long laef blong olgeta, nating sipos ol narafala oli ting se oli krangke? ?Weswan grup i defren long ol narawan from we oli no gat ol lida we oli kasem pei, mo we olgeta memba blong hem oli mekem wok blong prij? ?Hu olgeta we oli no joen long politik, be oli stap folem gud ol loa blong kantri? ?Hu i stap soem lav taem oli spenem taem mo mane blong olgeta blong halpem ol narafala blong lanem moa long saed blong God mo ol stamba tingting blong hem? ?Mo hu olgeta we ol man oli stap daonem olgeta, jikim mo agensem olgeta nating se oli stap mekem ol gudfala wok?’
16 Plante milian man long wol oli bin skelem ol kwestin ya, mo oli luksave se ol Witnes blong Jeova nomo oli trufala skul. Oli luksave samting ya from ol tijing mo fasin blong ol Witnes blong Jeova, mo tu from ol gudfala frut we olgeta oli kasem taem oli folem skul ya. (Aesea 48:17) Naoia, i olsem we plante milian man oli stap talem tok ya we i stap long Sekaraea 8:23, (NW ) se: “Bambae mifala i go wetem yufala, from we mifala i harem se God i stap wetem yufala.”
17. ?From wanem i stret nomo we ol Witnes blong Jeova oli talem se oli stap long trufala skul?
17 ?Ol Witnes blong Jeova oli flas taem oli talem se God i stap wetem olgeta nomo? Nogat. I olsem nesen blong Isrel taem oli stap long Ijip. Olgeta tu oli bin talem se God i stap wetem olgeta nomo, nating we ol man Ijip oli gat plante kaen bilif. Mo ol Kristin long faswan handred yia, olgeta tu oli talem se God i stap wetem olgeta, be i no wetem skul blong ol man Jiu. I gat ol pruf oli soem se God i stap wetem yumi nomo. Long 235 kantri, ol Witnes blong Jeova oli stap mekem wok we Jisas i bin talemaot finis se ol man blong hem bambae oli mekem long taem blong en. Hem i talem se: “Nao bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”—Matiu 24:14.
18, 19. (a) ?From wanem ol Witnes blong Jeova oli gohed nomo long wok blong prij, nating se man i agensem olgeta? (b) ?Olsem wanem Ol Sam 41:11 i soemaot klia se God i stap wetem ol Witnes blong Jeova?
18 Bambae ol Witnes blong Jeova oli gohed long wok ya, mo neva bambae oli letem fasin agens i blokem olgeta. Wok blong Jeova i mas gohed, mo yumi sua se i no gat wan samting nating i save stopem hem. Long ol handred yia we oli pas, ol man oli bin traehad blong blokem ol Witnes long mekem wok blong God, be ol man ya oli no win. Hemia from we Jeova i bin promes se: “Eni tul blong faet we bambae ol man oli stanemap agensem yu bambae oli no save win, mo ol tok we ol man bambae oli talemaot agensem yu long jajmen bambae yu winim olgeta. Hemia samting we ol man blong Jeova bambae oli kasem, mo stret fasin blong olgeta i kamaot long mi.”—Aesea 54:17, NW.
19 Ol Witnes blong Jeova long fulwol oli fesem fasin agens, be oli stanap strong mo oli mekem plante moa wok bitim bifo. Samting ya i pruvum se Jeova i glad long wok we oli stap mekem. King Deved i talem se: “Taem mi luk we olgeta oli no save winim mi, bambae mi savegud we yu yu glad long mi.” (Ol Sam 41:11; 56:9, 11) !Neva bambae ol enemi blong God oli save singaot from we oli winim ol man blong Jeova! !Yes, lida blong olgeta, Jisas Kraes, i stap muf i go fored blong win fulwan long laswan faet!
?Yu Yu Save Ansa?
• ?Wanem eksampol blong sam man bifo we i soemaot se God i stap wetem olgeta?
• ?Wanem sam mak blong trufala skul?
• ?From wanem yu yu sua se God i stap wetem ol Witnes blong Jeova?
[Kwestin]
[Tok blong pija long pej 13]
Olgeta we oli wantem se God i stap wetem olgeta, oli mas meksua se ol tijing blong olgeta oli stanap nomo long Tok blong God
[Tok blong pija long pej 15]
Ol Kristin elda oli soem eksampol long ol memba blong kongregesen