!Muf i Go Fored Blong Win Long Laswan Faet!
!Muf i Go Fored Blong Win Long Laswan Faet!
“Nao mi luk wan waet hos i kamtru. Man we i stap sidaon long hem i holem bonara blong hem, mo i putum gudfala hat blong flasem hem, olsem hat blong man we i win finis long faet. Hem i raed long hos i go, olsem man we i win finis long faet, nao i go blong faet bakegen, blong bambae i win bakegen.”—REVELESEN 6:2.
1. ?Long vison, Jon i luk wanem we bambae i hapen long fiuja?
TABU Spirit blong God i mekem se aposol Jon i naf blong luk wanem we bambae i hapen 1,800 yia long fiuja. Nao from samting ya, Jon i tokbaot taem ya we bambae Jisas Kraes i kam King. Jon i nidim bilif blong trastem wanem we hem i luk long vison. Tede, yumi gat klia pruf se vison ya we Jon i luk i bin kamtru long 1914. Wetem ae blong bilif, yumi luk Jisas Kraes i stap go “blong faet bakegen, blong bambae i win bakegen.”
2. ?Devel Setan i mekem wanem taem Kingdom i stanap, mo wanem i pruvum samting ya?
2 Smoltaem afta we Kingdom i stanap, oli sakemaot Setan long heven. Samting ya i mekem se Setan i kros tumas, nao i stap gohed strong moa long faet blong hem, be hem i no save win. (Revelesen 12:7-12) From we hem i kros tumas, hem i mekem se laef long wol ya i kam moa nogud. Fasin blong ol man i stap kam nogud olgeta. Long tingting blong ol Witnes blong Jeova, ol samting ya oli pruvum klia se King blong olgeta i stap muf i go fored “blong faet bakegen, blong bambae i win bakegen.”
Wan Niufala Grup Blong Man
3, 4. (a) ?Taem Kingdom i stanap, wanem ol jenis we oli kamaot insaed long Kristin kongregesen, mo from wanem i nidim ol niufala jenis ya? (b) ?Olsem wanem ol jenis ya we Aesea i tokbaot oli givhan bigwan?
3 Taem ya we Kingdom i stanap, hem i stret taem blong Kristin kongregesen tede i folemgud ol plan we Kristin kongregesen blong faswan handred yia i bin folem. Naoia Kristin kongregesen i gat moa wok blong mekem long saed blong Kingdom. Taswe, Wajtaoa blong Jun 1 mo 15, 1938 i eksplenem olsem wanem Kristin ogenaesesen i mas wok. Biaen, wan haf insaed long Wajtaoa blong Disemba 15, 1971, aninit long stamba tok ya, A Governing Body as Different From a Legal Corporation, i eksplenemgud wok blong Hed Kampani long taem blong yumi. Long 1972, Hed Kampani i putumap grup blong ol elda blong givhan mo lidim ol kongregesen.
4 Kristin kongregesen i stat bakegen blong folem stret rod blong lidim wok, taswe hem i kam strong moa. Wan narafala samting we i givhan bigwan, hemia plan we Hed Kampani i stanemap blong trenem ol elda long wok blong olgeta. Wan long ol trening we oli kasem, hemia blong mekem kot komiti. Aesea 60:17 i bin tokbaot ol niufala plan insaed long ogenaesesen blong God long wol ya mo ol gudfala frut we oli stap kamaot. Vas ya i talem se: “Fastaem yufala i stap yusum bras blong wokem ol samting, be bambae mi mi givim gol long yufala. Fastaem yufala i stap yusum aean mo wud, be bambae mi mi givim silva mo bras long yufala. Fastaem yufala i stap yusum ston, be bambae mi mi givim aean long yufala. Bambae ol haeman mo ol lida oli no moa save mekem i strong long yufala. Mi bambae mi mekem we pis mo stret fasin, tufala i rul long yufala.” Ol nambawan jenis ya oli soemaot se God i glad tumas long olgeta we oli strong blong leftemap Kingdom blong hem mo hem i stap blesem olgeta.
5. (a) ?Setan i mekem wanem taem Jeova i stap blesem ol man blong Hem? (b) ?Folem Filipae 1:7, ol man blong Jeova oli mekem wanem taem Setan i kros long olgeta?
5 Afta we Kingdom i stanap, Setan i luk we God i stap keagud mo i lidim ol man blong hem. Eksampol. Long 1931, smol grup ya blong ol Kristin i talemaot klia se olgeta oli no jes ol Baebol Studen nomo. !Be folem Aesea 43:10, olgeta oli ol Witnes blong Jeova! Maet from samting ya, Setan i mekem trabol agensem ol Witnes long plante ples raonabaot long wol. Long ol kantri ya tu we ol skul oli fri blong wosip, olsem Yunaeted Stet, Kanada, mo Jemani, ol Witnes oli mas pas long kot blong holemtaet fasin fri blong olgeta blong wosip. Long 1988, Saprim Kot blong Yunaeted Stet i lukluk bakegen long 71 kes blong ol Witnes blong Jeova, mo bighaf blong ol kes ya, ol Witnes oli winim. Tede, long olgeta ples long wol, ol Witnes oli stap gohed blong pas long kot. Nao, olsem long faswan handred yia, oli save “blokem ol enemi blong gud nius, mo mekem [gud nius] i stanap strong long saed blong loa.”—Filipae 1:7.
6. ?Ol tabu we gavman i putum oli blokem ol man blong Jeova blong muf i go fored? Givim wan eksampol.
6 Long ol yia 1930, hemia bifo long Seken Wolwo, ol strongfala gavman long Jemani, Spen, mo Japan oli blokem wok blong ol Witnes blong Jeova. Hemia tri kantri nomo aot long plante kantri we oli putum tabu long wok blong ol Witnes. Be long yia 2000, i gat klosap 500,000 man we oli stap wok strong blong talemaot Kingdom long trifala kantri ya nomo. !Hemia i klosap ten taem antap long namba blong ol Witnes blong Jeova long fulwol long 1936! I klia se ol tabu we gavman i putum oli no save blokem ol man blong Jeova blong muf i go fored wetem Lida blong olgeta, Jisas Kraes, we i win finis.
7. ?Wanem nambawan samting i hapen 1958, mo stat long taem ya i kam, wanem bigfala jenis i kamaot?
7 Yes, ol man blong Jeova oli stap muf i go fored. Samting ya i kam klia long Intenasnal Asembli ya Divine Will, we ol Witnes blong Jeova oli holem long New York Siti, long 1958. I gat 253,922 man oli kam long asembli ya. I neva gat wan bigfala asembli olsem bifo. Long 1970, gavman i tekemaot finis ol tabu we oli bin putum long trifala kantri we yumi tokbaot antap. Long Is Jemani nomo, tabu i stap yet. Be long bighaf blong Soviet Yunion mo ol nesen we oli stap aninit long wan kontrak we oli kolem Warsaw Pact, ol Witnes oli no fri yet. Tede, i gat bitim 500,000 Witnes we oli stap wok strong long ol kantri ya we bifo oli stap aninit long Komunis gavman.
8. ?Wanem frut i kamaot taem Jeova i blesem ol man blong hem, mo Wajtaoa blong 1950 i talem wanem long saed ya?
8 Jeova i blesem ol Witnes blong hem, i mekem namba blong olgeta i go antap bigwan, from we oli stap gohed blong “lukaot Kingdom mo stret fasin [blong God] fastaem.” (Matiu 6:33, NW ) Yes, yumi luk stret we profet tok ya blong Aesea i kamtru, se: “Wan smolwan hem wan bambae i kam wan taosen, mo wan smolwan bambae i kam wan bigfala nesen. Mi Jeova, bambae mi mekem i spid long prapa taem blong hem.” (Aesea 60:22, NW ) !Mo namba i stap go antap yet! Long ol ten yia we oli jes pas, i gat 1,750,000 moa man oli kam aninit long rul blong Kingdom. Olgeta ya oli joen wetem grup blong man we wan Wajtaoa blong 1950 i tokbaot olgeta se: “Naoia, God i stap rerem wan niufala grup blong man. . . . Grup ya bambae i pastru long Amagedon, . . . mo oli ol faswan man blong wok long ‘niufala wol’ . . . Oli folem tiokratik oda, mo oli save ol plan blong ogenaesesen.” Lastok blong haf ya i talem se: “!Ale, yumi evriwan long niufala grup ya, yumi muf i go fored, yumi no letem wan samting i blokem yumi!”
9. ?Olsem wanem ol samting we ol Witnes blong Jeova oli bin lanem long ol yia we oli pas i save givhan bigwan long olgeta?
9 Kam kasem naoia, niufala grup ya we namba blong hem i stap go antap, i lanem blong wok folem gudfala oda mo i karem gudfala frut. Samting ya i givhan bigwan long ol wok we oli mekem naoia mo bambae i givhan bigwan long ol wok we bambae oli mekem afta long Amagedon. Eksampol, ol Witnes oli lanem blong ogenaesem ol bigfala asembli, givim help long olgeta we oli trabol, mo bildim ol haos kwiktaem. Wok ya i pulum plante man blong ona mo respektem ol Witnes blong Jeova.
Stretem Ol Rong Tingting
10, 11. Eksplenem olsem wanem sam man oli bin stretem ol rong tingting long saed blong ol Witnes blong Jeova.
10 Be, sam man blong agens oli talem se ol Witnes blong Jeova oli no joen long fasin blong laef olsem narafala man. Oli talem olsem from we ol Witnes oli strong blong folem wanem we Baebol i talem long saed blong blad transfiusen, oli no joen long faet, oli no smok, mo oli no mekem rabis fasin. Be naoia, ol man oli stat blong luksave se ol tingting blong ol Witnes oli stret. Eksampol, wan woman dokta long Polan i telefon long ofis blong ol Witnes blong Jeova mo i talem se hem mo ol fren blong hem long hospital oli bin agiu bigwan from blad transfiusen. Oli agiu from wan haf we oli ridim insaed long wan niuspepa blong Polan (Dziennik Zachodni). Dokta ya i talem se: “Mi sore tumas se ol dokta oli stap givim tumas blad long ol sikman. Fasin ya i mas stop, mo mi glad we toktok ya i kamaot blong pulum tingting blong mifala i go long poen ya. Mi wantem kasem moa save.”
11 Long wan miting las yia, ol dokta we oli kamaot long Kanada, Yurop, Isrel, mo Yunaeted Stet, oli tokbaot sam rod blong winim sam sik we oli no yusum blad. Long miting ya, we oli holem long Switselan, oli makem wan samting we i defren olgeta long tingting blong plante man. Oli faenemaot se plante moa man we oli tekem blad oli stap ded i bitim olgeta we oli no tekem blad. Ol Witnes we oli sik oli kwik moa blong aot long hospital, i bitim olgeta we oli tekem blad. Mo plante taem, i no nidim tumas mane blong tritim sik blong ol Witnes.
12. Talem olsem wanem sam haeman oli bin presem ol Witnes blong Jeova from we oli no joen long faet.
12 Plante man oli bin presem ol Witnes blong Jeova from wan narafala samting bakegen. Long taem blong Seken Wolwo, ol Witnes oli no joen long faet taem ol Nasi oli mekem i nogud tumas long olgeta. Video kaset ya, Jehovah’s Witnesses Stand Firm Against Nazi Assault, i pulum ol man blong talem plante gudfala toktok long saed blong ol Witnes. Kaset ya we ol Witnes blong Jeova oli wokem, faswan taem we oli soemaot, hemia long Novemba 6, 1996, long Ravensbrück, wan rabis kalabus long Jemani. Oli soemaot kaset ya bakegen long rabis kalabus blong Bergen-Belsen, long Eprel 18, 1998. Long taem ya, Dr. Wolfgang Scheel, we i daerekta long Senta blong Politik Edukesen long Lower Saxony i talem se: “Wan long ol trutok we histri i soemaot, mo we i mekem yumi sem, hemia se ol Witnes blong Jeova oli sakemaot Nasnal Sosialis pati. Tingting blong olgeta i strong i bitim ol narafala Kristin jos. . . . Nating se yumi gat wanem filing long saed blong ol tijing mo skul blong ol Witnes blong Jeova, i stret we yumi soem respek long olgeta from fasin blong olgeta blong stanap strong long taem blong rul blong ol Nasi.”
13, 14. (a) ?Wan haeman blong kot i talem wanem blong protektem ol faswan Kristin? (b) ?Wanem gudfala toktok we sam man oli talem long saed blong ol man blong Jeova tede?
13 Sam haeman mo disisen long kot oli tekem saed blong ol Witnes blong Jeova taem ol man oli agensem olgeta. Maet samting ya i sarem maot blong ol man ya we oli agensem olgeta mo i pulum ol man blong gat stret tingting long saed blong ol Witnes. Plante taem, samting ya i mekem se ol Witnes oli gat janis blong prij long man we i neva lesin long olgeta bifo. Olsem nao, ol Witnes blong Jeova oli glad tumas mo oli gat bigfala tangkiu long wanem we ol haeman ya mo kot i mekem. Samting ya i mekem yumi tingbaot wanem we i hapen long Jerusalem long faswan handred yia. Long taem ya, Sanhedrin, hae kot blong ol man Jiu, i wantem kilim i ded ol Kristin from we oli strong blong prij. Be, Gamaliel, wan “tija blong Loa, we olgeta oli stap ona long hem,” i givim woning long olgeta se: “Ol man ples. Yumi mas tingting gud long samting ya we yumi wantem mekem long olgeta ya. . . . Yumi mas livim ol man ya i stap. Yumi mas letem olgeta oli go fri, from we sipos samting ya i tingting mo wok blong man nomo, bambae i no save gotru. Be sipos samting ya i blong God, bambae yumi no save blokem olgeta. Maet bambae yumi faenemaot we yumi stap faet agens long God ya.”—Ol Wok 5:33-39.
14 I no longtaem i pas, sam haeman oli mekem olsem Gamaliel. Oli toktok plante blong protektem fasin fri we ol Witnes blong Jeova oli gat blong wosip. Eksampol, wan man we i bin jeaman blong International Academy for Freedom of Religion and Belief i talem se: “I no stret blong tekemaot raet blong wan skul jes from we ol man oli no akseptem ol bilif blong skul ya, no from we ol bilif blong hem oli narakaen lelebet.” Mo wan profesa we i stap stadi long saed blong ol skul long yunivesiti blong Leipzig, i stanemap wan impoten kwestin taem wan grup we gavman blong Jemani i stanemap i jekemap wok blong ol smosmol grup blong skul. Profesa ya i askem se: “?From wanem yumi mas jekemap ol smosmol jos, be yumi no jekemap tu bigfala jos ya [Roman Katolik Jos mo Luteran Jos]?” Wan man we bifo hem i haeman blong gavman long Jemani, i talem wan samting we i givim klia ansa long kwestin ya se: “I klia se ol haeman blong jos, olgeta nao oli biaenem ol lida blong politik blong stanemap grup ya blong mekem wan wok olsem.”
?Yumi Mas Lukaot Help Weples?
15, 16. (a) ?From wanem ol tok blong Gamaliel oli givhan smol nomo? (b) ?From wanem trifala haeman i no save blokem Jisas fulwan long trabol we hem i kasem?
15 Wanem we Gamaliel i talem, i soemaot se i no gat wan samting i save blokem wok blong God. I tru se ol faswan Kristin oli kasem bigfala blesing from tok we Gamaliel i talem long Sanhedrin, be oli no fogetem ol tok blong Jisas se, bambae ol man oli mekem nogud long olgeta. Ol lida blong skul oli bin plan se bambae oli kilim i ded ol faswan Kristin ya. Be Gamaliel i blokem rabis plan ya blong olgeta. Nating se i olsem, fasin blong mekem nogud long ol Kristin i no stop. Yumi ridim se: “Nao olgeta oli singaot ol aposol blong oli kam insaed bakegen. Nao oli talem long ol soldia blong oli wipim olgeta. Nao oli tok strong long ol aposol, se bambae oli no yusum nem ya blong Jisas bakegen samtaem, blong tijim ol man. Nao oli letem olgeta i go fri.”—Ol Wok 5:40.
16 Taem Ponjes Paelet i stap jajem Jisas, hem i no faenem wan rong nating long Jisas. Ale, hem i traem blong letem Jisas i gofri, be hem i no win. (Jon 18:38, 39; 19:4, 6, 12-16) Tu memba blong Sanhedrin, hemia Nikodimas mo Josef blong Aramatia, tufala tu i tekem saed blong Jisas. Be, tufala i no naf blong blokem wanem we hae kot i plan blong mekem agensem Jisas. (Luk 23:50-52; Jon 7:45-52; 19:38-40) I gat sam man we oli stanap long saed blong ol man blong Jeova, mo samting ya i givhan smol. Be long wol ya, i no gat wan man we i naf blong stopem fasin ya blong mekem nogud long ol man blong Jeova. Bambae ol man blong wol oli gohed blong agensem ol trufala man blong Kraes, olsem we oli bin agensem hem. Jeova nomo i naf blong stopem fasin ya fulwan.—Ol Wok 2:24.
17. ?Ol Witnes blong Jeova oli luksave wanem samting, be from wanem oli no kam slak blong talemaot gud nius?
17 Ol Witnes blong Jeova oli save se bambae ol man oli gohed blong mekem i nogud long olgeta. Bambae ol man oli gohed blong agensem olgeta go kasem we rabis wol ya blong Setan i lus. Nating se i olsem, ol fasin agens ya oli no stopem ol Witnes long wok ya blong talemaot Kingdom. ?From wanem? From we God i stap wetem olgeta. Oli folem nambawan eksampol blong strongfala Lida blong olgeta, Jisas Kraes.—Ol Wok 5:17-21, 27-32.
18. ?Wanem hadtaem we ol man blong Jeova oli mas fesem yet, be oli bilif strong long wanem samting long fiuja?
18 Kam kasem tede, ol man oli stap gohed blong agensem trufala skul. I no longtaem, Gog, hemia Setan we oli sakemaot hem long heven i kamdaon long wol ya, bambae i mekem bigfala trabol long trufala skul. Be trufala skul bambae i win. (Esikel 38:14-16) Bambae Setan i lidim “ol king blong evri ples long wol,” nao ‘bambae olgeta ya oli faet agens long Smol Sipsip blong God. Be Smol Sipsip ya, hem i Masta blong olgeta masta, mo i King blong olgeta king. Nao from samting ya, hem [Smol Sipsip] . . . bambae i winim olgeta.’ (Revelesen 16:14; 17:14) Yes, naoia King blong yumi i stap muf i go fored blong win fulwan, mo i no longtaem bambae hem i “faet bakegen blong bambae i win bakegen.” !I wan bigfala blesing blong muf i go fored wetem Jisas! !Yes, ol man blong Jeova oli save se i no longtaem, bambae i no moa gat wan man i agensem olgeta, taem oli talem se: “God i stap wetem yumi”!—Rom 8:31; Filipae 1:27, 28.
?Yu Yu Save Eksplenem?
• ?Taem Kingdom i stanap, Jeova i mekem wanem blong Kristin kongregesen i kam strong moa?
• ?Setan i bin mekem wanem blong traem blokem Jisas Kraes long faet blong hem, mo wanem frut i kamaot?
• ?Wanem stret tingting we yumi mas gat long saed blong ol gudfala samting we ol man blong wol oli mekem long ol Witnes?
• ?I no longtaem bambae Setan i mekem wanem, mo wanem bambae i kamaot?
[Kwestin]
[Tok blong pija long pej 18]
Ol asembli oli pruvum se ol man blong Jeova oli stap muf i go fored
[Tok blong pija long pej 20]
Ol Witnes oli no joen long faet long Seken Wolwo, mo naoia fasin ya i stap givim ona yet long nem blong Jeova