Stadi Long Baebol—?Hem i Save Givhan Long Yu?

“I TABU blong ridim sipos pris i no stap.” Hemia woning we i stap long faswan pej blong sam Baebol blong ol man Katolik. Kay Murdy we i wok long Catholic Bible Institute long Los Angeles, i talem se: “Mifala ol Katolik, fastaem mifala i no stap ridim Baebol, be fasin ya i stap jenis.” Hem i gohed i talem se taem ol Katolik oli luk olsem wanem Tabu Baebol i save gat paoa long laef blong olgeta, “oli wantem tumas blong kasem save moa long hem.”

Folem jenis ya, magasin ya U.S. Catholic i tokbaot samting we wan man we i lukaot long tijing long saed blong jos i talem long saed blong ol Katolik we oli stap joen long ol klas blong stadi Baebol. Ol man ya oli harem se “from we oli Katolik oli no gat plante save, mo se i gat plante sas samting blong lanem long Baebol. Oli wantem kasem save long ol sas samting ya we oli neva bin lanem bifo.”

?Nating se i olsem wanem, wanem “ol sas samting” we wan man we i stadi long Baebol i save faenem? Tingbaot: ?Yu yu laekem blong save olsem wanem blong winim ol wari blong laef blong evri dei? ?Olsem wanem blong gat pis insaed long famle blong yu? ?From wanem ol man oli no save joengud wetem ol man raonabaot long olgeta mo oli stap spolem olgeta? ?Wanem nao stamba blong ol raf fasin we ol yangfala oli gat tede? Tok blong God, Baebol, i givim ol ansa we yumi save trastem long saed blong ol kwestin ya, mo ol narafala bigfala kwestin bakegen. I tru se “ol sas samting” insaed long Baebol, oli no blong givhan nomo long ol Katolik no ol Protestan, be oli save givhan tu long ol Budis, ol Hindu, ol Muslim, ol Sinto, mo ol man we oli no bilif se God i stap. Taswe man blong raetem Sam i talem se, “Tok blong God i olsem laet. Oltaem hem i stap soemaot rod blong mi, mo i stap lidim mi.” Hem i save givhan long yu tu.​—⁠Ol Sam 119:⁠105.