Wan Kwestin

?Sipos Jeova i rere blong fogivim sin blong man tru long sakrifaes blong Jisas, from wanem ol Kristin oli mas talemaot sin blong olgeta long ol elda blong kongregesen?

Yumi luk se Jeova i fogivim Deved from bigfala sin we hem i mekem wetem Batseba, from we Deved i soem se hem i rili sore from sin blong hem. Taem profet Natan i kam long Deved, Deved i talemaot se: “Mi mi bin mekem wan samting we i nogud olgeta, i agens long Jeova.”​—⁠2 Samuel 12:​13, NW.

Be, afta we Jeova i akseptem sore blong man mo fogivim man we i talemaot sin blong hem, hem i go moa. Wetem lav, Jeova i mekem rod blong halpem man we i sin blong i gohed mo kam strong long saed blong spirit bakegen. Long saed blong Deved, hem i bin kasem help tru long profet Natan. Tede long Kristin kongregesen, i gat ol elda. Olgeta ya oli bigman long saed blong spirit. Disaepol Jemes i talem se: “?I gat wan long yufala we i sik? I gud hem i singaot ol elda blong [“kongregesen,” NW ] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong [“Jeova,” NW ]. Mo prea blong man we i bilif bambae i hilim sikman ya. Jeova bambae i mekem bodi blong hem i strong bakegen, mo sipos hem i bin mekem sam sin, [Jeova] bambae i fogivim hem from.”​—⁠Jemes 5:​14, 15.

Ol elda we oli gat ekspiriens oli save givhan bigwan long man we i soemaot sore from sin blong  hem, blong i haremgud bakegen. Taem oli givhan long hem, oli traehad blong soem fasin olsem Jeova. Oli neva wantem mekem i strong tumas long man ya, nating se maet oli mas stretem hem. Wetem lav, oli traem luksave ol nid blong hem. Wetem longfala tingting, oli yusum tok blong God blong traem pulum tingting blong man we i mekem sin, blong hem i folem stret fasin bakegen. (Galesia 6:⁠1) Nating we wan man i no talemaot sin blong hem long ol elda, be maet hem i soemaot trufala sore taem ol elda oli kam toktok wetem hem, olsem Deved i bin mekem taem Natan i kam luk hem. Help we ol elda oli givim long man we i mekem sin i save givhan long hem blong no mekem semfala sin bakegen, mo blong no kasem trabol we i kamaot from we hem i gohed blong mekem sin oltaem.​—⁠Hibrus 10:​26-​31.

I tru, i no isi blong talemaot wan sin we i mekem yumi sem, long wan narafala mo askem fogif. Yumi nidim wan strong tingting blong mekem olsem. Be, tingbaot sipos yu no talemaot sin ya. Wan man we i no bin talemaot bigfala sin blong hem long ol elda long kongregesen i talem se: “Mi filim wan soa long hat blong mi we i no save gowe. Mi traem joen moa long wok blong prij, be ol nogud filing oli gohed nomo.” Hem i ting se sipos hem i talemaot sin blong hem long God tru long prea, hemia i naf. Be i klia se i no naf, from we hem i bin kasem ol filing olsem King Deved. (Ol Sam 51:​8, 11) !I moagud blong akseptem gudfala help we Jeova i givim tru long ol elda!