!Stanap Strong Olsem We Yumi Luk God!
!Stanap Strong Olsem We Yumi Luk God!
“[Moses] i no save tanemraon blong gobak, i stap gohed olwe nomo, olsem we i stap luk God ya we man i no save luk long ae blong hem.”—HIBRUS 11:27.
1. ?Taem Jisas i tijim ol man antap long Hil, hem i talem wanem long saed blong God?
JEOVA hem i God ya we ol man oli no save luk long ae blong olgeta. Taem Moses i wantem luk God, Jeova i ansa se: “Bambae mi no save letem yu yu luk fes blong mi, from we sipos wan man i luk fes blong mi, man ya bambae i ded from.” (Eksodas 33:20) Mo aposol Jon i raetem se: “I no gat man we i luk God samtaem.” (Jon 1:18) Taem Jisas Kraes i stap long wol ya, hem i no save luk God olsem we ol narafala man tu oli no save luk God. Long tijing we Jisas i givim antap long Hil hem i talem se: “Olgeta we tingting blong olgeta i klin gud, oli save harem gud, from we bambae oli save luk God.” (Matiu 5:8) ?Wanem mining blong tok ya blong Jisas?
2. ?From wanem yumi no save luk God stret long ae blong yumi?
2 Baebol i talem se Jeova i wan Spirit man we yumi no save luk hem. (Jon 4:24; Kolosi 1:15; 1 Timoti 1:17) Taswe, Jisas i no talem se yumi man i save luk Jeova long prapa ae blong yumi. I tru, ol tabu Kristin bambae oli luk Jeova God long heven, afta we oli laef bakegen long ded olsem spirit man. Be ol man we “tingting blong olgeta i klin gud” mo we oli gat hop blong laef olwe long wol ya, olgeta tu oli save “luk” God. ?Oli save luk hem olsem wanem?
3. ?Olsem wanem man i save luk sam long ol fasin blong God?
3 Taem yumi luklukgud olgeta samting we Jeova i wokem, yumi save lanem fulap samting long saed blong hem. Maet yumi sapraes long paoa blong hem mo from samting ya maet yumi agri fulwan se hem i God ya we i Wokem olgeta samting. (Hibrus 11:3; Revelesen 4:11) Aposol Pol i soemaot samting ya taem hem i raetem se: “I stat long taem ya we [God] i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” (Rom 1:20) Taswe, taem Jisas i talem se man i save luk God, hem i stap minim tu se man i luk sam long ol fasin blong Jeova. Wan man i naf blong mekem olsem, taem hem i kasem stret save mo i luksave ol samting long saed blong spirit, wetem ‘ae blong tingting.’ (Efesas 1:18, NW ) Mo tu, olgeta tok mo wok blong Jisas oli soem plante samting long saed blong God. Taswe, Jisas i talem se: “Man we i luk mi, hem i luk Papa blong mi.” (Jon 14:9) Jisas i tekem gud olgeta fasin blong Jeova. Taswe, taem yumi gat save long saed blong laef mo ol tijing blong Jisas, samting ya bambae i halpem yumi blong luk, no blong luksave, sam long ol fasin blong God.
Ol Samting Long Saed Blong Spirit Oli Impoten Tumas
4. ?Olsem wanem plante man tede oli soemaot se oli no intres long ol samting long saed blong spirit?
4 Tede, i no gat plante man we oli gat bilif mo we oli intres long ol samting long saed blong spirit. Pol i talem se: “I no olgeta man evriwan we oli bilif long Kraes.” (2 Tesalonaeka 3:2) Plante man oli bisi tumas blong ronem ol samting we olgeta nomo oli wantem, mo oli no gat bilif long God. Oli folem ol fasin blong sin mo oli no intres long ol samting long saed blong spirit. Samting ya i blokem olgeta blong kasem save ya we bambae i givhan long olgeta blong luk God. Aposol Jon i raetem se: “Man we i stap mekem ol rabis fasin, hem i no luk God samtaem.” (3 Jon 11) Ol man ya oli no save luk God stret long ae blong olgeta. Taswe oli ting se God i no save luk ol samting we oli stap mekem. (Esikel 9:9) Oli no laekem nating ol samting long saed blong spirit, nao from samting ya, oli no “faenem save blong God.” (Ol Proveb 2:5, NW ) I stret nomo we Pol i raetem se: ‘Man we Tabu spirit ya i no stap long hem, hem i no save kasem ol paoa ya we Tabu spirit i stap givim. Hem i no gat rod blong save ol samting ya, i stap luk olgeta olsem we oli krangke samting nomo, from we Tabu spirit nomo i save mekem man i save ol paoa ya we hem i stap givim.’—1 Korin 2:14.
5. ?Ol man we oli tingbaot ol samting long saed blong spirit oli luksave wanem samting?
5 Sipos yumi man we i tingbaot ol samting long saed blong spirit bambae yumi luksave se Jeova i no wan God we i stap lukaot mastik long man. Be, hem i save taem man i letem ol rong tingting no filing oli pusum hem blong mekem nogud fasin. Yes, “olgeta samting we man i stap mekem, hem i stap mekem long fes blong Jeova, mo hem nao i stap lukluk gud ol rod we man ya i wokbaot long hem.” (Ol Proveb 5:21, NW ) Sipos yumi lavem Jeova mo yumi no wantem mekem hem i harem nogud, bambae yumi rere blong tanem tingting blong yumi from sin blong yumi mo askem hem blong fogivim yumi.—Ol Sam 78:41; 130:3.
?Wanem i Givhan Long Yumi Blong Stanap Strong?
6. ?Wanem mining blong stanap strong?
6 Yumi no save luk Jeova stret long ae blong yumi. Be, yumi no mas fogetem se hem i save luk yumi. Yumi mas tingbaot oltaem se hem i laef i stap mo yumi mas bilif strong se hem i stap klosap long olgeta we oli krae i go long hem. Long rod ya, bambae yumi stanap strong. Hemia i min se bambae yumi no letem wan samting i mekem yumi lego bilif we yumi gat long hem. (Ol Sam 145:18) Yumi save mekem olsem Moses, we Pol i tokbaot hem se: “From we Moses i stap bilif strong long God, taswe hem i aot long Ijip, we i no fraet long king ya we i kros tumas. Hem i no save tanemraon blong gobak, i stap gohed olwe nomo, olsem we i stap luk God ya we man i no save luk long ae blong hem.”—Hibrus 11:27.
7, 8. ?Wanem i givhan long Moses blong no fraet long Fero?
7 God i askem Moses blong lidim ol man Isrel oli go aot long kalabus long Ijip. Blong mekem olsem, Moses i mas go toktok plante taem long strongfala rula ya Fero. Hem i mas stanap long bigfala rum long haos blong king we fulap bigman blong skul mo gavman oli stap long hem. Ating ol stonwol long haos blong king ya oli fulap long ol pija blong ol god blong Ijip. Be, Moses i save se Jeova i stap wetem hem, nating se hem i no save luk hem. Jeova i no olsem ol god ya blong Ijip we oli no gat laef. !From samting ya nao, Fero i no naf blong mekem Moses i fraet!
8 ?Wanem i givhan long Moses blong gobak bakegen mo bakegen long Fero? Baebol i talem se “Moses, hem i wan man we tingting blong hem i stap daon moa, i no gat wan narafala man long wol we tingting blong hem i stap daon olsem hem.” (Namba 12:3) I klia se, Moses i strong long saed blong spirit mo hem i bilif fulwan se God i stap wetem hem. From samting ya, Moses i gat paoa blong stanap long fored blong stronghed king ya blong Ijip, blong toktok long nem blong “God ya we man i no save luk long ae blong hem.” ?Olsem wanem tede? ?Ol man we oli “luk” God ya we yumi no save luk, oli mekem wanem blong soemaot bilif blong olgeta?
9. ?Wanem wan rod we i save givhan long yumi blong stanap strong?
9 Wan rod blong soem bilif mo gohed blong stanap strong olsem we yumi luk God ya we man i no save luk, hemia taem yumi prij oltaem nomata we man i agensem yumi. Jisas i givim woning long ol disaepol blong hem se: “Bambae ol man oli no laekem yufala nating, oli agens long yufala, from we yufala i holem nem blong mi.” (Luk 21:17) Mo hem i talem tu se: “I no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) Stret olsem we Jisas i talem, afta long ded blong hem, ol man blong hem oli safa bigwan from ol narafala man we oli tok nogud long olgeta, putum olgeta long kalabus, mo kilim olgeta. (Ol Wok 4:1-3, 18-21; 5:17, 18, 40) Nating se bigfala trabol i kasem ol aposol blong Jisas wetem ol narafala disaepol tu, be olgeta ya oli gohed blong talemaot gud nius we oli no fraet nating.—Ol Wok 4:29-31.
10. ?Sipos yumi sua fulwan we Jeova i kea mo i lukaotgud long yumi, samting ya bambae i halpem yumi blong mekem wanem long wok blong prij?
10 Olsem Moses, ol faswan disaepol blong Jisas oli no fraet long ol enemi blong olgeta. From we oli bilif long God, oli naf blong stanap strong nomata wanem kaen hadtaem we oli kasem. Yes, oli gohed blong stanap strong olsem we oli luk God ya we man i no save luk. Tede, yumi mas tingbaot oltaem se Jeova i kea mo i lukaotgud long yumi. Taem yumi tingbaot samting ya, tingting blong yumi i kam strong mo yumi no fraet blong talemaot Kingdom. Tok blong God i talem se “fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.” (Ol Proveb 29:25) Ale, sipos ol man oli mekem trabol long yumi, bambae yumi no fraet mo tanem baksaed long wok blong yumi. Bilif blong yumi bambae i pusum yumi blong prij long ol man raonabaot long yumi, long ples blong wok, long skul, mo long ol narafala ples bakegen.—Rom 1:14-16.
God Ya We Yumi No Save Luk i Stap Lidim Ol Man Blong Hem
11. ?Pita mo Jud, tufala i talem se sam man insaed long Kristin kongregesen oli mekem wanem, we i soemaot se oli slak long saed blong spirit?
11 Bilif i halpem yumi blong luksave se Jeova nao i stap lidim ogenaesesen blong hem long wol ya. Ale, bambae yumi no tok smosmol agensem olgeta we oli gat wok insaed long kongregesen. Aposol Pita mo Jud ya we i haf brata blong Jisas, tufala i givim woning agensem ol man we oli slak long saed blong spirit. Tufala i talem se, ol man ya oli stap tok nogud long saed blong olgeta we oli gat wok blong lukaot long ol Kristin. (2 Pita 2:9-12; Jud 8) ?Be, olsem wanem sipos Jeova i stap stanap fored long ol man ya we oli stap faenem poen long narafala? ?Bambae oli save toktok olsem? !Nogat! Taswe i klia se, from we ol man ya oli no tingbaot ol samting long saed blong spirit, oli no save luk God, nao oli no luksave se oli gat kaon long fes blong Hem from evri samting we oli mekem.
12. ?Yumi mas gat wanem tingting long saed blong olgeta we oli lukaot long kongregesen?
12 I tru, evriwan insaed long Kristin kongregesen oli sinman. Ol brata we oli mekem wok blong elda oli mekem mastik samtaem, mo maet yumi harem nogud from. Nating se i olsem, Jeova i stap yusum ol brata ya blong lukaot long ol sipsip blong hem. (1 Pita 5:1, 2) Ol man mo woman we tingting blong olgeta i stap long ol samting long saed blong spirit bambae oli luksave se Jeova i stap yusum ol elda blong lidim ol man blong hem. Taswe, from we yumi Kristin yumi mas lukaot blong no tok agensem narafala mo no komplen oltaem. Yumi mas soem respek long tiokratik oda we God i stanemap. Taem yumi obei long olgeta we oli stap lidim yumi, yumi soem se yumi luk God ya we man i no save luk.—Hibrus 13:17.
Luk God Olsem Bigfala Tija Blong Yumi
13, 14. ?Sipos yu luk Jeova olsem Bigfala Tija blong yu hemia i minim wanem?
13 I gat wan narafala samting i stap, we yumi nidim blong luksave wetem ae blong tingting. Aesea i talem profet tok ya se: “Bambae yufala i luk Bigfala tija blong yufala.” (Aesea 30:20, NW ) Yumi nidim bilif blong luksave se Jeova nao i stap tijim yumi tru long ogenaesesen blong hem long wol ya. (Matiu 24:45-47) Sipos yumi luk se God i Bigfala Tija blong yumi, i minim se yumi stadi Baebol oltaem mo go long ol miting. Be i no hemia nomo. Hem i minim tu se yumi stap yusumgud evri samting we God i stap givim blong halpem yumi long saed blong spirit. Eksampol, yumi mas lukaot gud oltaem se yumi stap letem Jeova i lidim yumi tru long Jisas blong bambae yumi no lusum rod long saed blong spirit.—Hibrus 2:1.
14 Samtaem yumi mas traehad moa blong tekem evri haf blong ol gudfala kakae long saed blong spirit. Eksampol, maet yumi stap jam ova long sam stori blong Baebol from we yumi faenem i had blong kasem save long olgeta. Taem yumi ridim ol Wajtaoa mo Wekap!, maet yumi no ridim sam haf from we oli tokbaot sam samting we yumi no intres long olgeta. No maet long taem blong miting yumi letem tingting blong yumi i flae olbaot. Be, sipos yumi tingting gud long olgeta wanwan poen we yumi stap tokbaot long miting, bambae yumi save lesin gud. Taem yumi soem tangkiu long tijing long saed blong spirit we yumi stap kasem, hem i min se yumi luksave Jeova olsem Bigfala Tija blong yumi.
Yumi Gat Kaon Blong Pembak
15. ?Sam long yumi oli mekem olsem se Jeova i no save luk olgeta taem oli mekem wanem?
15 Naoia we en blong wol ya i “klosap,” rabis fasin i kam antap bigwan tumas. Taswe yumi rili nidim blong bilif long God ya we yumi no save luk stret long ae blong yumi. (Daniel 12:4) Long evri ples, i gat ol man we oli stap stil, giaman mo mekem nogud fasin long saed blong seks. Be, i waes blong tingbaot se Jeova i save luk olgeta samting we yumi mekem nating sipos ol narafala man oli no luk yumi. Sam long yumi oli fogetem samting ya. Taem i no gat man i stap lukluk olgeta, maet oli mekem sam fasin we i no laenap wetem Baebol. Eksampol, samfala oli no strong blong agensem traem ya we i pulum olgeta blong lukluk sam rabis pija long Internet, televisin, mo narafala ples bakegen. From we oli save wajem ol pija ya long wan rum olgeta nomo, samfala oli gohed long ol nogud fasin ya. Oli mekem olsem we Jeova i no save luk olgeta.
16. ?Wanem samting i mas halpem yumi blong folem ol haefala rul blong Jeova?
16 I gud blong tingbaot oltaem ol tok ya blong aposol Pol se: “Bambae yumi evriwan i mas talemaot olgeta fasin blong yumi long fes blong God.” (Rom 14:12) Yumi mas luksave se evri taem we yumi sin, yumi stap sin agensem Jeova. Fasin luksave bambae i givhan long yumi blong folem ol haefala rul blong hem mo stap longwe long enikaen doti fasin. Baebol i talem bakegen long yumi se: “I no gat wan samting nating long wol ya we God i mekem, we i save haed long fes blong hem. Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.” (Hibrus 4:13) Tru ya, bambae yumi mas pem kaon long Jeova from evri samting we yumi mekem. Be, stamba samting we i mas pusum yumi blong mekem wok blong Jeova mo fasgud long ol stret rul blong hem, hemia from we yumi lavem hem tumas. Taswe, i gud yumi waes taem yumi jusum ol pleplei blong harem gud mo tu, i gud ol man oli lukaot long fasin we oli mekem taem oli stap wetem ol woman, mo ol woman i gud oli lukaot long fasin we oli mekem taem oli stap wetem ol man.
17. ?From wanem risen nao, Jeova i stap wajem yumi?
17 Jeova i intres bigwan long evri samting we yumi mekem. Be, samting ya i no minim se hem i wajem evri samting we yumi mekem blong bambae hem i save panisim yumi taem yumi mestem. Nogat. Jeova i stap wajem yumi from we hem i kea long yumi mo i lavem yumi. Hem i olsem wan papa we i wantem mekem i gud long ol pikinini blong hem we oli obei long hem. !I gud tumas blong save se Papa blong yumi long heven i glad long yumi taem yumi holem strong long bilif mo “i stap mekem i gud long olgeta we oli stap traem faenem hem”! (Hibrus 11:6) I gud yumi bilif fulwan long Jeova mo mekem ‘wok blong hem long olgeta tingting blong yumi.’—1 Kronikel 28:9.
18. ?From we Jeova i stap wajem yumi mo i luksave taem we yumi holem bilif, Baebol i mekem yumi sua long wanem samting?
18 Ol Proveb 15:3 i talem se: “Hae God i stap luk olgeta samting we i stap hapen long evri ples. Nating we yumi stap mekem i gud no i nogud, be oltaem, hem i stap luk yumi.” Yes, God i stap lukluk ol man nogud mo bambae i mekem long olgeta olsem we i stret long fasin blong olgeta. Be, sipos yumi wan long olgeta ya we i stap “mekem i gud,” yumi save sua we Jeova i luksave ol wok we yumi mekem wetem bilif. Taem yumi save se ‘wok blong yumi, i no blong nating nomo,’ samting ya i leftemap tingting blong yumi. Mo yumi glad se God ya we yumi no save luk, ‘hem i no save fogetem ol wok ya we yumi mekem. Hem bambae i stap tingbaot we yumi lavem hem.’—1 Korin 15:58; Hibrus 6:10.
Yumi Wantem We Jeova i Lukluk Yumi
19. ?Wanem sam long ol blesing we oli kamaot from we bilif blong yumi long Jeova i strong?
19 Ol man blong Jeova we oli holemstrong long bilif, oli sas tumas long hem. (Matiu 10:29-31) Nating se yumi no save luk hem stret long ae blong yumi, hem i rili stap, mo yumi save wokem wan gudfala fasin fren wetem hem. Fasin ya blong frengud wetem Papa blong yumi long heven, bambae i karem plante blesing i kam long yumi. Wan bilif we i strong i save halpem yumi blong gat wan hat we i klingud, mo i save mekem we yumi no sem blong stanap long fes blong Jeova from we tingting blong yumi i no stikim yumi. Mo taem yumi gat bilif we i no hafhaf, samting ya i blokem yumi blong yumi no gat tu fes. (1 Timoti 1:5, 18, 19) Taem bilif blong yumi i stap strong oltaem long God, yumi soem wan gudfala eksampol long ol narafala, mo samting ya i save givhan long olgeta. (1 Timoti 4:12) Mo tu, bilif olsemia bambae i save leftemap ol fasin we God i laekem, mekem se, Jeova i glad long yumi.—Ol Proveb 27:11.
20, 21. (a) ?From wanem yumi wantem we Jeova i wajem yumi? (b) ?Olsem wanem yumi save folem tok blong Ol Sam 139:23, 24 long laef blong yumi?
20 Sipos yumi waes, bambae yumi glad we Jeova i stap wajem yumi. Yumi wantem se hem i lukluk yumi, be tu, yumi wantem tumas we hem i jekemap olgeta tingting mo aksin blong yumi. Taem yumi prea, i gud sipos yumi askem Jeova blong lukluk gud yumi mo faenemaot sipos i gat sam nogud tingting i stap long yumi. Hem i save halpem yumi blong fesem ol problem blong yumi mo blong stretem eni samting we i nidim blong stretem. Deved we i raetem Sam, i singsing se: “God, plis yu lukluk gud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem. Mo sipos i gat sam samting nogud long laef blong mi, plis i gud yu traem faenemaot, nao yu lidim mi long rod ya we i no save lus.”—Ol Sam 139:23, 24.
21 Deved i askem Jeova blong lukluk gud hem blong faenem sipos i gat “sam samting nogud” long hem. ?Yu yu gat tingting olsem Deved? ?Yu wantem tumas we God i lukluk gud long laef blong yu mo faenem sipos i gat sam nogud tingting i stap long yu? Yumi mas bilif mo askem Jeova blong i skelem laef blong yumi. ?Be, olsem wanem sipos tingting blong yumi i trabol tumas long wan sin we yumi bin mekem no from we i gat wan nogud tingting i stap long yumi? Ale, i gud yumi gohed blong prea long God blong yumi, Jeova, we hem i gat lav. I gud yumi gat tingting daon mo letem tabu spirit blong hem mo Tok blong hem oli lidim yumi. Yumi sua we bambae hem i givhan long yumi mo bambae hem i halpem yumi blong gat ol gudfala fasin we i save lidim yumi i go kasem laef ya we i no save finis.—Ol Sam 40:11-13.
22. ?Wanem disisen we yumi mekem long saed blong God we yumi no save luk hem stret wetem prapa ae blong yumi?
22 Yes, sipos yumi mekem laef blong yumi i folem wanem we Jeova i wantem, bambae hem i givim blesing ya long yumi, hemia laef we i no save finis. Be yumi mas luksave se hem i gat bigfala paoa mo hem i hae olgeta. Hemia i olsem tok we aposol Pol i raetem se: “Yumi mas stap ona long King blong olwe, we fasin blong hem i no save kam nogud, mo yumi no save luk hem. Hem nomo i God, i no gat narafala, nao yumi mas stap leftemap nem blong hem, gogo i no save finis. Amen.” (1 Timoti 1:17, NW ) I gud we oltaem yumi ona long Jeova wetem fulhat blong yumi. Ale, nomata wanem samting i save hapen long laef blong yumi, bambae yumi neva kam slak long disisen we yumi mekem blong stanap strong olsem we yumi luk God ya we man i no save luk.
?Bambae Yu Yu Ansa Olsem Wanem?
• ?Long wanem fasin, man i save luk God?
• ?Sipos yumi rili bilif we Jeova i stap, bambae yumi mekem wanem taem ol man oli kilim yumi?
• ?Sipos yumi luk Jeova olsem Bigfala Tija blong yumi, hemia i minim wanem?
• ?From wanem yumi mas wantem we Jeova i lukluk gud long laef blong yumi?
[Kwestin]
[Tok blong pija long pej 18]
Moses i no fraet long Fero, mo i mekem wok olsem we hem i stap luk Jeova, God ya we man i no save luk
[Tok blong pija long pej 21]
I nogud yumi fogetem we Jeova i save luk evri samting we yumi mekem
[Tok blong pija long pej 23]
Yumi wantem tumas blong kasem save long God from we yumi luksave hem olsem Bigfala Tija blong yumi