Yufala i No Mas Man Blong Fogetem Samting

“I nogud yufala i stap giaman nomo long yufala, we yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem.”—JEMES 1:22.

1. ?Wanem ol nambawan merikel we nesen blong Isrel bifo i gat janis blong luk?

 OL MERIKEL we Jeova i mekem long Ijip bifo, oli ol samting we man i no save fogetem. Wanwan long olgeta Ten Trabol oli rili mekem man i sapraes. Mo afta long ol trabol ya Jeova i seraotem solwota blong Red Si blong sevem nesen blong Isrel. (Dutronome 34:10-12) Sipos yu bin stap long taem ya, ating bambae yu no save fogetem Man ya we i bin mekem ol bigbigfala merikel ya. Be yet, man blong raetem Sam i singsing se: “God i bin mekem ol bigbigfala wok long Ijip blong sevem olgeta [ol man Isrel], be oli no moa tingbaot hem. !Ol wok we hem i mekem long ples ya i bigfala tumas! !Ol wok ya we hem i mekem long Red Si, i samting blong sapraes we man i seksek from!”—Ol Sam 106:21, 22.

2. ?Wanem i soem se fasin tangkiu we ol man Isrel oli gat long ol bigbigfala wok blong God i blong smoltaem nomo?

² Afta we ol man Isrel oli krosem Red Si, oli ‘tinghevi tumas long [“Jeova,” NW ] mo oli ona long hem.’ (Eksodas 14:31) Moses wetem ol man Isrel oli sing long wan sing blong presem Jeova we i win, mo Miriam wetem ol narafala woman oli plei long tamborin mo oli danis. (Eksodas 15:1, 20) Yes ol man blong God oli sapraes bigwan long ol bigbigfala wok blong Jeova. Be tangkiu we oli gat long God ya we i mekem ol merikel ya, i blong smoltaem nomo. I no longtaem biaen, plante long olgeta oli mekem sam samting we i soemaot se oli fogetem ol merikel ya finis. Oli stat toktok smol mo komplen agensem Jeova. Sam long olgeta oli go wosipim ol narafala god mo oli mekem ol rabis fasin long saed blong seks.—Namba 14:27; 25:1-9.

?Wanem i Save Mekem Yumi Foget?

3. ?From we yumi sinman yumi save fogetem wanem samting?

³ Ating yumi no kasem save from wanem ol man Isrel oli lusum fasin tangkiu we oli gat long God. Be, yumi mas tingbaot se semfala samting i save hapen long yumi. I tru, yumi no bin luk sam bigbigfala merikel olsem hemia we ol man Isrel oli luk. Be taem yumi stap olsem fren blong God, i sua se sam samting i hapen finis long laef blong yumi we yumi no save fogetem. Sam long yumi i rimemba taem ya we yumi akseptem trutok blong Baebol. Maet i gat ol narafala taem blong glad, olsem taem yumi prea blong givim laef blong yumi long Jeova mo tekem baptaes blong kam wan trufala Kristin. Plante long yumi i harem save samtaem long laef blong yumi, se Jeova i bin halpem yumi. (Ol Sam 118:15) Antap long olgeta samting ya, sakrefaes blong Jisas Kraes, we hem i stret Pikinini blong God, i mekem se yumi gat hop blong sef. (Jon 3:16) Be, yumi sinman taswe, taem tingting blong yumi i pulum yumi long samting we i nogud mo taem yumi gat ol wari long laef, maet kwiktaem nomo, yumi fogetem ol gudfala samting we Jeova i bin mekem long yumi.

4, 5. (a) ?Olsem wanem Jemes i givim woning agensem fasin blong fogetem samting we yumi harem? (b) ?Olsem wanem pijatok blong man we i lukluk hem long glas i stret long yumi?

⁴ Taem Jemes, we i haf brata blong Jisas, i raetem leta i go long ol Kristin, hem i givim woning long saed blong fasin blong fogetem samting we oli harem. Hem i raetem se: “I nogud yufala i stap giaman nomo long yufala, we yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem. Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i save luklukgud fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem.” (Jemes 1:22-24) ?Jemes i minim wanem long ples ya?

⁵ Taem yumi girap long moning, ating yumi evriwan i lukluk yumi long glas blong luk sipos i nidim  blong stretem sam samting long fes blong yumi. Long dei, yumi gohed wetem ol defren wok blong yumi, mo tingting blong yumi i stap long plante defren samting. Ale, maet yumi no moa tingbaot ol samting we yumi bin luk long glas. Sem samting ya i save hapen long yumi long saed blong spirit. Taem yumi ridim Tok blong God, yumi save makem sipos fasin blong yumi i laenap wetem wanem we Jeova i wantem no nogat. Ale, yumi luksave ol slak fasin blong yumi. Taem yumi luksave samting ya, yumi mas traehad blong mekem sam jenis long fasin blong yumi. Be taem yumi gohed wetem ol wok blong yumi evri dei mo yumi fesem ol problem blong yumi, i isi nomo blong fogetem ol samting long saed blong spirit. (Matiu 5:3; Luk 21:34) I olsem we yumi fogetem ol samting we God i mekem blong soemaot lav blong hem long yumi. Sipos samting ya i hapen, bambae yumi no naf blong blokem ol trap blong sin.

6. ?Wanem vas blong Baebol i save halpem yumi blong no fogetem ol tok blong Jeova?

⁶ Long faswan leta we aposol Pol i raetem i go long ol Kristin long Korin, hem i tokbaot ol man Isrel we oli fogetem ol bigbigfala samting we Jeova i bin mekem taem oli stap long draeples. Ol tok blong Pol oli givhan bigwan long ol Kristin blong faswan handred yia, mo oli save givhan bigwan long yumi tu. Ol tok ya oli save halpem yumi blong no fogetem ol samting we Jeova i talem. I gud naoia yumi tingbaot ol vas blong 1 Korin 10:1-12.

Yumi No Mas Wantem Tumas Ol Samting Blong Wol Ya

7. ?Wanem samting i pruvum se Jeova i lavem ol man Isrel?

⁷ Ol samting we Pol i talem long saed blong ol man Isrel, hem i wan woning long ol Kristin tede. Pol i raetem se: “Ol brata mo sista. Mi wantem yufala i tingbaot fasin blong ol bubu blong mifala bifo olgeta, long taem blong Moses. Olgeta ya evriwan oli aninit long sem klaod nomo, mo olgeta oli wokbaot long drae graon nomo, oli krosem Red Si. Nao long klaod ya, mo long solwota ya, olgeta evriwan oli joen long Moses.” (1 Korin 10:1-4) Ol man Isrel long taem blong Moses oli bin luk plante saen we i soemaot paoa blong God. Wan long ol saen ya hemia bigfala klaod ya we i lidim olgeta long dei mo we i bin halpem olgeta blong krosem Red Si. (Eksodas 13:21; 14:21, 22) Yes, ol man Isrel ya oli kasem klia pruf se Jeova i lavem olgeta.

8. ?Wanem frut i kasem ol man Isrel ya we oli fogetem ol samting long saed blong spirit?

⁸ Pol i gohed i se: “Be God i no glad long bighaf blong olgeta ya, taswe bighaf blong olgeta oli ded olbaot long draeples.” (1 Korin 10:5) !Sore tumas! Bighaf blong ol man Isrel we oli aot long Ijip oli no gohed blong soem bilif long God, taswe oli no go insaed long Promes Lan. God i no moa glad long olgeta, nao oli ded long draeples. (Hibrus 3:16-19) ?Samting ya i tijim yumi long wanem? Pol i talem se: “Mo olgeta samting ya i olsem wan saen, we i blong wekemap yumi. I nogud yumi stap wantem ol rabis fasin, olsem olgeta ya bifo.”—1 Korin 10:6.

9. ?Wanem olgeta samting we Jeova i givim long ol man blong hem, mo wanem tingting blong ol man Isrel long saed blong ol samting ya?

⁹ Ol man Isrel oli gat plante samting we i givhan long olgeta blong stap wekap long saed blong spirit taem oli wokbaot long draeples. Jeova i bin mekem kontrak wetem olgeta mo from samting ya oli stap olsem nesen blong God. Mo tu, oli gat ol pris, wan haos prea we i ples blong wosip blong olgeta, mo oli folem wan plan we i givhan long olgeta blong mekem sakrefaes i go long Jeova. Be oli no glad long ol nambawan presen ya long saed blong spirit. Mo tu, oli lusum fasin tangkiu long ol samting we God i givim long olgeta long saed blong bodi.—Namba 11:4-6.

10. ?From wanem yumi mas tingbaot God oltaem?

¹⁰ Jeova i glad bigwan long ol man blong hem tede, we oli defren olgeta long nesen blong Isrel long draeples. Nating se i olsem, i impoten we olgeta man blong God wanwan oli putum tingting blong olgeta i stap long God oltaem. Samting ya bambae i givhan long olgeta blong blokem fasin blong tingbaot olgeta nomo. Hemia wan fasin we i save blaenem tingting blong olgeta long saed blong spirit. Yes, yumi wanwan i mas gat strong tingting blong “livim olgeta fasin we oli no stret long fes blong [God], . . . Yumi no mas wantem tumas ol samting blong wol ya, mo yumi mas blokem ol samting we yumi nomo i wantem. Naoia yumi mas mekem ol fasin we i stret, we God i stap harem gud long hem.” (Taetas 2:12) I gat sam long yumi we i joen wetem Kristin kongregesen taem yumi pikinini yet. Sipos yumi wan long olgeta ya, yumi mas lukaot long tingting ya se maet yumi stap mestem wan gudfala samting. Sipos yumi stat blong gat tingting olsem, i gud yumi tingbaot Jeova mo ol gudfala blesing we hem i rerem finis blong givim long yumi.—Hibrus 12:2, 3.

 Obei Fulwan Long Jeova

11, 12. ?Olsem wanem wan man i save wosipim narafala god nating sipos hem i no bodaon fored long wan aedol?

¹¹ Pol i givim wan narafala woning long yumi taem hem i raetem se: “Mo i nogud yumi stap prea long ol narafala god, olsem we sam long olgeta ya oli stap mekem. Baebol i talem se, ‘Olgeta ya oli go sidaon, oli kakae mo oli dring, mo biaen, oli girap, oli go pleplei wetem woman.’ ” (1 Korin 10:7) Long ples ya, Pol i stap tokbaot taem we ol man Isrel oli pulum Eron blong wokem pija blong wan bul long gol. (Eksodas 32:1-4) Maet i no gat wan long yumi tede, we bambae i go wosipim wan aedol. Be, maet sam long yumi i save mekem fasin we i sem mak long fasin blong wosip long aedol. Maet yumi letem ol samting we yumi nomo i wantem oli pulum yumi blong no moa wosipim Jeova wetem fulhat blong yumi.—Kolosi 3:5.

¹² Long wan narafala taem, Pol i tokbaot sam man we oli wari tumas long ol samting long saed blong bodi i bitim ol samting long saed blong spirit. Hem i tokbaot olgeta we “oli enemi blong gud nius blong ded blong Kraes long [“pos,” NW ] . . . Olgeta ya oli man blong lus nomo. Kakae nomo i god blong olgeta.” (Filipae 3:18, 19) Pol i no talem se ol man ya oli wosipim narafala god from we oli bodaon long wan aedol. Fasin blong olgeta blong wantem tumas ol samting long saed blong bodi, hemia nao samting we i kam olsem god blong olgeta. I tru, i no rong blong wantem kasem sam gudfala samting long laef. Jeova i wokem yumi wetem ol filing blong harem save taem yumi nidim samting mo blong harem gud long ol gudfala samting long laef. Be, olgeta we oli ronem moa ol gudfala samting long laef i winim we oli frengud wetem God, oli kam olsem man we i stap wosip long narafala god.—2 Timoti 3:1-5.

13. ?Yumi lanem wanem long stori blong ol man Isrel we oli wokem pija blong bul long gol?

¹³ Afta we ol man Isrel oli aot long Ijip, oli wokem wan bul long gol blong mekem wosip long hem. Stori blong olgeta i tijim yumi blong lukaot long fasin blong wosip long giaman god, be i gat wan narafala lesen tu long stori ya. Ol man Isrel oli tanem baksaed long loa blong Jeova we i klia. (Eksodas 20:4-6) Long tingting blong olgeta, oli no mekem fasin ya from we oli wantem sakemaot Jeova olsem God blong olgeta. Nogat. Taem oli givim ol sakrefaes i go long pija blong bul ya, oli talem se oli stap mekem “wan lafet blong ona long Hae God.” Tru ya, oli ting se God bambae i agri long fasin ya we oli mekem. Be, fasin blong olgeta i jikim Jeova, mo i mekem hem i kros bigwan.—Eksodas 32:5, 7-10; Ol Sam 106:19, 20.

14, 15. (a) ?From wanem ol man Isrel oli no gat eskius from fasin blong olgeta blong fogetem samting we oli harem? (b) ?Sipos yumi gat strong tingting blong no fogetem samting we yumi harem, bambae yumi mekem wanem wetem olgeta oda blong God?

¹⁴ Ating i no gat plante Witnes blong Jeova we bambae oli save go joen bakegen long wan giaman skul. Be, sam long yumi we oli stap joen yet wetem kongregesen, maet oli no moa letem Jeova i lidim olgeta. Ol man Isrel oli no gat eskius from fasin blong olgeta blong fogetem wanem we oli harem finis. Oli  bin harem ol Ten Komanmen mo oli stap taem we Moses i givim oda ya blong God se: “Bambae yufala i no wokem ol narafala god blong yufala bakegen long silva no long gol, blong mekem wosip long olgeta olsem we yufala i stap mekem wosip long mi.” (Eksodas 20:18, 19, 22, 23) Nating se i olsem, ol man Isrel oli wosipim pija blong bul we oli wokem long gol.

¹⁵ Yumi tu, yumi no gat wan gudfala eskius sipos yumi fogetem ol samting ya we yumi harem finis. Long Baebol, God i givim plante advaes blong lidim yumi long ol defren haf blong laef blong yumi. Eksampol, tok blong Jeova i talem klia se i no stret blong karem mane blong narafala man mo neva givimbak. (Ol Sam 37:21) Ol pikinini oli kasem oda blong obei long papa mama blong olgeta. Mo ol papa oli mas tijim ol pikinini blong olgeta “olsem we Jeova i wantem.” (Efesas 6:1-4, NW ) Ol Kristin we oli no mared yet oli mas mared nomo long “wan man blong Masta.” Mo ol man blong God we oli mared finis oli mas folem advaes ya se: “Mared i wan fasin we yufala evriwan i mas tinghae long hem. Yufala we i mared, yufala i mas lukaot gud long mared blong yufala, blong i stap klin gud oltaem. God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.” (1 Korin 7:39; Hibrus 13:4) Sipos yumi gat strong tingting blong no fogetem samting we yumi harem, bambae yumi tinghevi long ol advaes ya wetem ol narafala oda blong God tu. Bambae yumi folem olgeta evriwan.

16. ?Wanem i hapen long ol man Isrel we oli wosipim pija blong bul?

¹⁶ Jeova i no agri taem ol man Isrel oli traem wosipim hem long fasin we olgeta nomo oli ting se i stret. I gat 3,000 long olgeta we oli ded. Maet hemia from we olgeta nao oli lidim fasin rebel ya agensem God taem oli wosipim pija blong bul. Ol narafala man we oli joen long sin ya oli kasem wan rabis sik. (Eksodas 32:28, 35) Hemia wan gudfala lesen long olgeta man we oli ridim Tok blong God. !Yumi no mas jusum ol samting we yumi nomo i wantem obei long olgeta!

“Ronwe Long Fasin Ya Blong Mekem Nogud Wetem Woman”

17. ?1 Korin 10:8 i stap tokbaot wanem taem?

¹⁷ Pol i givim wan eksampol blong soemaot olsem wanem ol samting we bodi nomo i wantem, oli save mekem se yumi fogetem ol samting long saed blong spirit. Hem i se: “I nogud yumi stap mekem ol fasin nogud wetem woman, olsem we sam long olgeta ya bifo oli stap mekem, nao long wan dei nomo, i gat twanti tri taosen blong olgeta oli ded.” (1 Korin 10:8) Long ples ya, Pol i tokbaot wanem we i hapen long ol man Isrel taem oli stap long levelples blong Moab. Oli bin wokbaot 40 yia finis long draeples. I no longtaem bifo, Jeova i bin givhan long olgeta blong winim ol kantri long is saed blong Jodan reva. Be, plante  long ol man Isrel ya oli fogetem samting ya mo oli no gat tangkiu long Jeova from ol samting we hem i mekem. Taem oli kam klosap long Promes Lan, oli letem ol traem oli pulum olgeta blong mekem ol nogud fasin long saed blong seks mo blong wosipim Bal blong Peoro. Samwe long 24,000 long olgeta oli ded, we 1,000 long olgeta ya oli bin lidim ol narafala i go long sin.—Namba 25:9.

18. ?Wanem kaen fasin i save lidim wan Kristin i go blong mekem nogud long saed blong seks?

¹⁸ Tede, ol man oli savegud ol Witnes blong Jeova from we oli strong blong folem ol klin fasin. Be, sam Kristin oli fesem traem we i pulum olgeta blong mekem nogud fasin long saed blong seks, nao oli fogetem God mo ol rul blong hem. Olgeta ya oli fogetem samting we oli harem finis. Maet traem ya i no pulum olgeta wantaem blong mekem nogud fasin long saed blong seks. Be, maet fastaem oli stap lukluk ol rabis pija long saed blong seks, oli stat talem ol doti tok plei no oli stap pleplei wetem filing blong narafala, no maet oli fren wetem sam Kristin we oli no strong blong agensem ol rabis fasin. Ol samting olsem, oli save lidim wan Kristin i go long rod blong mekem sin.—1 Korin 15:33; Jemes 4:4.

19. ?Wanem advaes long Baebol i givhan long yumi blong “ronwe long fasin ya blong mekem nogud wetem woman”?

¹⁹ Sipos yumi kasem traem we i pulum yumi blong mekem wan rabis fasin, yumi mas tingbaot Jeova. Yumi mas folem ol advaes long Tok blong hem, we yumi stap harem bakegen mo bakegen. (Ol Sam 119:1, 2) From we yumi Kristin, ating bighaf blong yumi i traehad blong folem ol fasin we oli klin. Be yumi mas traehad oltaem sipos yumi wantem mekem samting we i stret long fes blong God. (1 Korin 9:27) Pol i raetem leta i go long ol Kristin long Rom, hem i se: “Olgeta man oli harem nius finis we yufala i stap stanap strong, yufala i stap holemstrong gud nius blong Kraes. From samting ya, mi mi glad tumas. Mi mi wantem tumas se bambae yufala i kam waes long ol stret fasin, mo we yufala i no go insaed nating long ol rabis fasin.” (Rom 16:19) I gat 24,000 man Isrel we oli ded from sin blong olgeta. Long sem fasin, ol man we oli mekem nogud long saed blong seks mo we oli mekem ol narafala nogud fasin, bambae oli kasem jajmen blong Jeova i no longtaem. (Efesas 5:3-6) Taswe, i nogud yumi kam olsem man we i fogetem samting we i harem. Be, i gud yumi gohed blong “ronwe long fasin ya blong mekem nogud wetem woman.”—1 Korin 6:18, NW.

Gat Tangkiu Oltaem From Ol Samting We Jeova i Givim

20. ?Olsem wanem ol man Isrel oli traem Jeova, mo wanem frut i kamaot from?

²⁰ Bighaf blong ol Kristin oli no foldaon long trap blong ol nogud fasin long saed blong seks. Be, yumi mas lukaot gud from we maet yumi save stat folem wan fasin we i mekem God i no glad long yumi, olsem fasin blong tok smosmol agens long narafala. Pol i givim advaes long yumi se: “I nogud yumi stap traem Hae God, olsem we sam long [ol man Isrel] ya oli stap mekem, nao ol snek oli kilim olgeta oli ded. Mo i nogud yumi stap tok smosmol agens long God, olsem we sam long olgeta ya oli stap mekem, nao enjel blong kilim man i kam kilim olgeta oli ded from.” (1 Korin 10:9, 10) Ol man Isrel oli tok smosmol agensem Moses mo Eron. Yes, long fasin ya oli tok agens long God hem wan. Oli komplen long saed blong mana we God i stap givim long olgeta. (Namba 16:41; 21:5) ?Jeova i ting nating long fasin ya blong olgeta blong tok smosmol agensem hem? ?Fasin ya i nating nomo skelem wetem rabis fasin long saed blong seks? Stori long Baebol i soemaot se plante long olgeta ya we oli tok smosmol agensem God oli ded taem ol posen snek oli kakae olgeta. (Namba 21:6) Long wan narafala taem, bifo long hemia, bitim 14,700 man oli ded from we oli bin rebel mo tok smosmol agensem God. (Namba 16:49) Taswe i klia se yumi no mas traem Jeova blong luk sipos hem i gat longfala tingting no nogat. Yumi mas tinghae long ol samting we hem i givim.

21. (a) ?Tabu spirit i pusum Pol blong raetem wanem woning? (b) ?Folem Jemes 1:25, olsem wanem yumi save kasem trufala glad?

²¹ Taem aposol Pol i raetem leta i go long ol Kristin brata blong hem, hem i finisim tok blong hem  wetem woning ya se: “Olgeta trabol ya we ol man ya oli kasem, i blong tijim olgeta. Mo oli raetem stori blong hem long buk, blong wekemap yumi ya we yumi stap laef tede, we Lasdei blong wol i klosap. Man we i ting se i stap stanap strong, hem i mas lukaot gud, blong bambae i no foldaon bakegen.” (1 Korin 10:11, 12) Olsem ol man Isrel, yumi kasem plante blesing long Jeova. Be, i nogud yumi mekem olsem ol man Isrel ya. Yumi no mas fogetem ol samting ya we God i mekem long yumi. Yumi mas gat tangkiu oltaem from ol gudfala samting ya. Taem ol wari blong laef oli kam hevi tumas long yumi, i gud yumi tingbaot ol nambawan promes blong God we oli stap insaed long Tok blong Hem. I gud yumi tingbaot gudfala fasin fren we yumi gat wetem Jeova, hemia i sas tumas. Mo i gud yumi gohed long wok blong talemaot gud nius blong Kingdom, we God i givim blong yumi mekem. (Matiu 24:14; 28:19, 20) Long rod ya bambae yumi kasem trufala glad, from we Baebol i promes se: “Loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.”—Jemes 1:25.

?Bambae Yu Yu Ansa Olsem Wanem?

• ?Wanem i save mekem se yumi fogetem ol samting we yumi harem?

• ?From wanem i impoten blong obei fulwan long God?

• ?Olsem wanem yumi save “ronwe long fasin ya blong mekem nogud wetem woman”?

• ?Wanem tingting yumi mas gat long saed blong ol samting we Jeova i givim?

[Kwestin]

[Tok blong pija long pej 15]

Ol man Isrel oli fogetem ol bigfala wok we Jeova i mekem long olgeta

[Tok blong pija long pej 16]

Ol man blong Jeova oli gat strong tingting blong folem ol fasin we oli klin oltaem