?From Wanem Yu Mas Stadi Baebol?
?From Wanem Yu Mas Stadi Baebol?
BILL i wan yangfala man blong plei spot. Hem i skulgud mo i gat plante mane. Nating se i olsem, hem i no haremgud. Hem i harem nogud from we laef blong hem i no gat mining. Ale hem i jekemap sam defren skul blong faenem mining long laef blong hem. Be hem i no faenem wanem we hem i stap lukaot. Long 1991, hem i mitim wan Witnes blong Jeova, nao Witnes ya i givim wan buk long hem, we buk ya i tokbaot mining blong laef olsem Baebol i talem. Ale Witnes ya i askem blong stadi Baebol wetem Bill. Olsem nao, hem i save halpem Bill blong kasem save long mining blong laef mo ol narafala poen we hem i intres long hem.
Bill i talem se: “Long faswan stadi we hem i mekem wetem mi, mitufala i jekemap Baebol plante taem. From samting ya, mi kasem save wantaem se hemia nao wanem we mi stap lukaot. Mi glad tumas long ol ansa we Baebol i givim. Afta long faswan stadi ya, mi draev i go antap long ol hil, mi kamaot long trak blong mi, mo mi singaot bigwan from we mi glad tumas. Mi haremgud tumas from we naoia mi kasem ansa blong ol kwestin blong mi.”
I no evri man we oli singaot bigwan from glad taem oli faenem trutok blong Baebol. Be plante man oli glad tumas taem oli faenem ol impoten ansa blong ol kwestin long saed blong laef. Oli gat filing olsem man ya long parabol blong Jisas, we i faenem bokis mane we wan man i bin haedem long wan pis graon. Jisas i talem se: “Hem [man ya] i harem gud tumas from samting ya, nao hem i go salemaot olgeta samting we hem i gat, mo i kam pemaot pis graon ya i blong hem.”—Faenem Laef We i Gat Mining
Bill i bin tingting plante long bigfala kwestin ya se, ?Wanem mining blong laef? Blong plante taosen yia, ol man blong hae save, ol man blong stadi dip long bilif blong ol jos, mo ol sayentis, oli bin traehad blong faenem ansa blong kwestin ya. Ol man oli bin raetem fulap buk blong traem ansa long kwestin ya. Be oli no givim wan stret ansa. Plante long olgeta oli talem se kwestin ya i no gat ansa blong hem. Be, tok ya i no tru. Nating se kwestin ya i dip, ansa blong hem i no hadwok blong faenem. Baebol i eksplenem ansa blong kwestin ya. Rod blong faenem glad mo laef we i gat mining, hemia se: Yumi mas frengud wetem Jeova, Papa blong yumi long heven we i wokem yumi. ?Nao, olsem wanem blong frengud wetem Jeova?
I gat tu defren fasin we tufala i joen blong pulum yumi i kam klosap long God. Olgeta we oli frengud wetem God oli mas fraetgud long hem, mo tu, oli mas lavem hem. I gud yumi luk tu vas blong Baebol we i soemaot poen ya. Longtaem bifo, waes King Solomon i skelemgud laef blong ol man, nao ol tingting we hem i faenem, hem i raetemdaon olgeta long buk blong Prija. Hem i talem bakegen bigfala poen se: “Antap long ol samting ya, wan samting nomo mi wantem talem long yu, se yu mas tinghevi long God, yu mas ona [“fraetgud,” NW ] long hem, mo yu mas obei long ol tok blong hem, from we hemia nao samting we hem i mekem yumi from.” (Prija 12:13) Sam handred yia biaen, wan man i askem se weswan long ol Loa blong Moses we i hae moa. Jisas i ansa long man ya se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) ?Maet yu ting se i narakaen blong fraetgud long God mo lavem hem long semtaem? I gud yumi luk from wanem i impoten blong gat fasin ya blong fraet mo lav, mo olsem wanem tufala fasin ya i joen blong wokem wan gudfala fasin fren wetem God.
Mining Blong Fraetgud Long God
Sipos yumi wantem se God i agri long wosip blong yumi, yumi mas fraetgud long hem. Fraet ya i soem se yumi respektem God. Baebol i talem se: “Fasin blong fraetgud long Jeova, hem i stamba blong waes.” (Ol Sam 111:10, NW ) Aposol Pol i talem se: “I gud yumi stap talem tangkiu long God, from we hem i tekem yumi i kam, nao hem i King blong yumi. Mo hem i King we paoa blong hem i no save lus, i no save foldaon samtaem. I gud yumi stap mekem wosip long hem long fasin we hem i glad long hem, we yumi ona long hem, mo yumi fraet long hem tu.” (Hibrus 12:28) Mo tu, long wan vison, aposol Jon i luk wan enjel i stap flae antap long skae we i stap talemaot gud nius. Enjel ya i talem se: “Yufala i mas ona gud [“fraetgud,” NW ] long God, mo yufala i mas leftemap nem blong hem.”—Revelesen 14:6, 7.
Sipos yumi wantem se laef blong yumi i gat mining, yumi mas fraetgud long God. Fraet ya i no sem mak long fraet we i mekem man i harem nogud. Maet yumi fraet tumas taem wan man nogud i wantem kilim yumi. Be fasin ya blong fraetgud long God, hem i minim bigfala respek long Jeova, mo dip ona long hem, we i joen wetem fasin blong no wantem nating blong mekem wan samting we i save mekem Hem i no glad long yumi. Yes, God hem i Bigfala Jaj blong yumi, mo hem i Hae Olgeta. Hem i gat paoa mo hem i gat raet blong panisim olgeta we oli no save obei.
Fraet Mo Lav Tufala i Wok Wanples
Be, Jeova i no wantem se ol man oli wosipim hem jes from we oli fraet long hem. Jeova i wan God we i lavem tumas ol man. Tabu spirit i pusum aposol Jon blong talem se: “God i stamba blong fasin ya blong lavem man.” (1 Jon 4:8) Jeova God i soem bigfala lav long ol man, nao from samting ya, hem i wantem se olgeta man oli lavem hem. ?Be, olsem wanem lav ya i wok tugeta wetem fasin blong fraetgud long God? Yes, tufala fasin ya i wok tugeta. Man blong raetem Ol Sam i talem se: “Yu [Jeova] yu fren blong olgeta we oli stap obei [“fraetgud,” NW ] long yu.”—Ol Sam 25:14.
Traem tingbaot wan pikinini we i gat respek mo i fraetgud long papa blong hem, we i strong mo i waes. Long semtaem, bambae pikinini ya i haremgud long lav we papa blong hem i soemaot long hem. Pikinini ya bambae i trastem papa blong hem mo i askem advaes long hem. Hem i trastem se papa blong hem bambae i givim ol advaes we oli save givhan long hem. Long sem fasin, sipos yumi lavem mo fraetgud long Jeova, bambae yumi obei long ol loa blong hem, mo samting ya bambae i givhan long yumi. Makemgud wanem we Jeova i talem long saed blong ol man Isrel: “Sipos olgeta oli holem tingting ya oltaem nomo, bambae i gud tumas. Mi mi wantem tumas blong oli ona long mi oltaem, mo blong oli obei long olgeta tok blong mi, mo sipos oli mekem olsem, evri samting long laef blong olgeta, mo long laef blong ol pikinini blong olgeta, mo long laef blong olgeta we bambae oli stap kamaot biaen long olgeta, bambae i ron gud.”—Dutronome 5:29.
Fasin blong fraetgud long God i no olsem wan kalabus, be hem i mekem yumi fri. Fasin ya i no mekem yumi harem nogud, be hem i mekem yumi haremgud. Aesea i talem wan profet tok long saed blong Jisas se: “Bambae hem i glad long fasin fraet long Jeova.” (Aesea 11:3, NW ) Mo man blong raetem Ol Sam i talem se: “!Yufala i presem Ja! Man we i fraetgud long Jeova, mo i glad tumas blong obei long ol loa blong hem, man ya nao i harem gud.”—Ol Sam 112:1, NW.
Be i klia se yumi no save fraetgud long God mo lavem hem sipos yumi no save hem. Hemia nao from wanem i impoten tumas blong stadi Baebol. Stadi olsem i halpem yumi blong save ol fasin blong God mo blong luksave se i waes blong folem tok blong hem. Taem yumi frengud wetem God, yumi wantem mekem wanem we hem i talem mo yumi gat strong tingting blong folem ol loa blong hem, from we yumi save se bambae ol loa ya oli givhan long yumi.—1 Jon 5:3.
Yumi glad taem yumi kasem save se yumi stap folem wan rod blong laef we i stret. Hemia i tru long saed blong Bill we yumi tokbaot antap. I no longtaem i pas, Bill i talem se: “Long ol naen yia we i pas, stat long taem we mi stadi Baebol fastaem, mi bin frengud moa wetem Jeova. Faswan glad we mi bin kasem, hem i kam wan rod blong laef we i mekem mi haremgud tumas. Oltaem mi gat gudfala tingting long saed blong laef. Mi mi bisi wetem ol wok we oli gat mining, be mi no stap ronem ol samting blong haremgud we oli nating nomo. Long tingting blong mi, Jeova i wan trufala man, mo mi save se hem i tingbaot ol nid blong mi.”
Long haf we i kam biaen, bambae yumi tokbaot moa olsem wanem save blong Jeova i karem glad mo blesing long olgeta we oli folem ol save ya long laef blong olgeta.
[Tok blong pija long pej 5]
Fasin blong kam klosap long god i min se yumi lavem hem mo fraetgud long hem
[Tok blong pija long pej 6]
Jisas i faenem glad from fasin blong fraetgud long Jeova