Help Blong Kasem Save Long Baebol

BAEBOL i wan buk we i spesel. Ol man we oli raetem, oli talem se God nao i lidim olgeta blong raetem, mo ol tok blong Baebol oli pruvum se wanem we ol man ya oli talem i tru. (2 Timoti 3:16) Baebol i tokbaot plante samting. Hem i soem olsem wanem yumi kam long wol, from wanem yumi stap long wol, mo wanem fiuja blong yumi. !Taswe, hemia wan buk we yumi mas stadi gud long hem!

Maet yu bin traem blong ridim Baebol, be yu faenem se i hadwok blong kasem save long hem. Maet yu no save wanem vas yu mas luk blong faenem ansa blong ol kwestin blong yu. Sipos i olsem, tingbaot se i no yu wan nomo. Plante man oli gat problem ya. Wan man long faswan handred yia, hem tu i bin gat problem long saed ya. Man ya hem i stap ron long wan kat we hos i pulum. Hem i aot long Jerusalem, i stap go long kantri blong hem, hemia Itiopia. Haeman Itiopia ya i stap ridim wan profet tok long buk blong Aesea, we Aesea i bin raetemdaon bitim seven handred yia bifo.

Wantaem nomo wan man i resis i kam klosap long hem mo i talem halo long hem. Man ya, we nem blong hem Filip, hem i wan disaepol blong Jisas. Hem i askem long man Itiopia ya i se: “?Olsem wanem? ?Yu yu save mining blong tok ya we yu stap ridim?” Man Itiopia ya i ansa i se: “?Bambae mi mi save olsem wanem? I no gat man blong i talemaot mining blong hem long mi.” Nao hem i talem long Filip blong kam antap long kat blong hem.  Nao Filip i eksplenem mining blong vas we man ya i bin ridim mo i gohed blong “talemaot gud nius blong Jisas.”—Ol Wok 8:30-35.

Ol Witnes blong Jeova tede oli save halpem ol man blong kasem save long Baebol, stret olsem we Filip i bin halpem man Itiopia ya blong kasem save long Tok blong God. Ol Witnes bambae oli glad blong halpem yu tu. I gud blong stadi Baebol folem wan program, we i stat fastaem wetem ol stamba tijing blong Baebol. (Hibrus 6:1) Taem yu stap gohed blong stadi, bambae yu kasem wanem we aposol Pol i kolem “strong kakae,” hemia ol dip mining blong trutok. (Hibrus 5:14) Taem yu stap stadi long Baebol, ol narafala buk long saed blong Baebol oli save halpem yu blong faenemaot mo kasem save long ol vas blong Baebol we oli tokbaot ol defdefren poen.

I gud blong jusum wan stret ples mo stret taem blong mekem stadi. Sam man oli mekem stadi long telefon. Stadi ya i no wan stadi olsem long klasrum. Hem i wan stadi blong yu wan we bambae i laenap wetem ol samting long laef blong yu. Yu no nid blong pem wan fi blong gat wan Baebol stadi. (Matiu 10:8) I no gat eksam, mo stadi ya bambae i no save mekem yu yu sem. Bambae yu faenem ansa blong ol kwestin blong yu, mo bambae yu lanem olsem wanem blong kam klosap long God. ?Be from wanem yu mas stadi Baebol? Bambae yumi luk sam risen from wanem stadi long Baebol i save givim glad long yumi.