Hem i “Stanap Strong Go Kasem En”

LONG wan video kaset blong 1993 we oli stap soem long ol man mo woman we oli kam wok long hedkwota blong ol Witnes blong Jeova, Lyman Alexander Swingle i talemaot filing blong hem long saed blong wok blong Jeova, i se: “!Yu mas werem but blong yu go kasem we yu ded!” *

Brata Swingle, we i gat 90 yia, i mekem samting ya we hem i talem long ol narafala blong mekem. Hem i “stanap strong go kasem en.” (Matiu 24:13, NW ) Long Wenesde, Maj 7, hem i harem nogud tumas long bodi blong hem. Nating se i olsem, hem i go long miting blong Hed Kampani blong ol Witnes blong Jeova, from we hem i wan memba blong Hed Kampani ya. Wan wik biaen, long Tusde, hem i sik bigwan, nao long 4:26 eli moning long Maj 14, dokta i talemaot se Brata Swingle i ded.

Brata Lyman Swingle i stat wok long hedkwota blong ol Witnes blong Jeova long Brooklyn, New York, long Eprel 5, 1930. Hem i wok long ples ya blong 71 yia. Faswan wok blong hem, hemia long ples we oli stap somap tugeta ol pej blong ol buk. Biaen, hem i wok long ples we i gat ol bigbigfala mesin blong prentem buk long hem, mo hem i givhan tu blong mekem ing blong ol buk. Yes, Brata Swingle i wok raonabaot 25 yia long ples blong wokem ing. Mo tu, hem i wok samwe 20 yia olsem memba blong Raeting Dipatmen. Long ol laswan 17 yia blong laef blong hem, hem i wok long Ofis blong Tresora.

Brata Swingle i wan man we i gat strong tingting blong talemaot Kingdom blong God. Long ol faswan yia we hem i stap long Brooklyn, hem i stap serem rum wetem Arthur Worsley, mo tufala i stap tekem selbot blong wan narafala Witnes blong wokbaot long Hudson Reva. Tufala i yusum sam bigfala spika blong talemaot mesej blong Kingdom long olgeta man we oli laef long so blong reva ya.

Brata Swingle i bon long Novemba 6, 1910, long Lincoln, Nebraska. Smoltaem biaen, famle blong hem i muf i go long Salt Lake Siti, long Utah. Long 1913, taem oli stap long ples ya nao, papa mama blong hem tufala i kam ol Baebol Studen, hemia nem blong ol Witnes blong Jeova bifo. Long ol yia afta long taem ya, plante brata we oli wok long hedkwota blong ol Witnes long Brooklyn, oli stap long haos blong famle Swingle taem oli kam blong givim ol tok long kongregesen blong olgeta. Ol brata ya oli wan gudfala eksampol long yangfala Lyman. Ale, long 1923, taem hem i gat 12 yia, hem i tekem baptaes blong soemaot se hem i givim laef blong hem i go long God.

Brata Swingle i wok 26 yia long Brooklyn, we hem i no mared. Nao long Jun 8, 1956, hem i maredem Crystal Zircher. Mared ya i givhan bigwan long laef blong Brata Swingle. Tufala i neva seraot long tufala, mo tufala i joen long wok blong prij tugeta go kasem we sista Crystal i ded long 1998. Crystal i bin kasem wan strok, samwe long tri yia bifo we i ded, mo samting ya i mekem se wan haf bodi blong hem i ded. Brata Swingle i soem wan gudfala eksampol taem hem i kea long woman blong hem evri dei. Hem i soem trufala fasin blong wan hasban. Ol man we oli save tufala oli harem gud blong luk lav we Brata Swingle i soem long waef blong hem taem hem i stap pusum woman blong hem sloslou long wan wiljea i go olbaot long ol rod blong hem i save soem ol Wajtaoa mo Wekap! long ol man we oli wokbaot klosap long tufala.

Brata Swingle hem i wan man we i tok stret, hem i gat sore mo ol fasin blong hem oli pulum ol narafala blong laekem hem tumas. Olsem papa mama blong hem, hem i gat hop ya we Baebol i givim, hemia blong laef wetem Jisas Kraes long Kingdom long heven. Mifala i sua se, naoia, hem i kasem hop ya finis.—1 Tesalonaeka 4:15-18; Revelesen 14:13.

[Futnot]

[Tok blong pija long pej 31]

Brata Swingle i wok samwe 25 yia long ples blong wokem ing

[Tok blong pija long pej 31]

Brata mo sista Swingle, tufala i laekem tumas blong stap tugeta