Kasem Glad We i Kamaot From Fasin Blong Givim Presen
Kasem Glad We i Kamaot From Fasin Blong Givim Presen
“Man we i stap givim presen i go, hem i save harem gud moa, i winim man we i stap kasem presen blong hem.”—OL WOK 20:35.
1. ?Olsem wanem Jeova i soemaot se glad i save kamaot from fasin blong givim presen?
GLAD mo ol blesing we oli kamaot from we yumi save trutok oli olsem ol sas presen we God i givim. Ol man we oli save Jeova oli gat plante risen blong glad. Be, nating se man i glad taem hem i kasem wan presen, hem i save glad tu taem hem i givim presen i go. Jeova i Man blong Givim “evri samting we oli gud mo evri presen we oli nambawan,” mo hem i God we i “stap harem gud oltaem.” (Jemes 1:17; 1 Timoti 1:11) Hem i givim ol gudfala tijing long olgeta we oli lesin, mo hem i glad taem ol man we hem i tijim olgeta oli obei long hem. Hem i olsem wan papa we i glad taem ol pikinini blong hem oli lesin long advaes we hem i givim wetem lav.—Ol Proveb 27:11.
2. (a) ?Jisas i talem wanem long saed blong fasin blong givim presen? (b) ?Wanem glad we yumi kasem taem yumi tijim trutok blong Baebol long ol narafala?
2 Long sem fasin, taem Jisas i stap long wol hem i glad blong luk we man i obei long ol tijing blong hem. Aposol Pol i talem bakegen tok blong Jisas we i se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Be glad we yumi kasem taem yumi tijim trutok blong Baebol long wan man i no jes kamaot from we man i agri long bilif blong yumi. Yumi haremgud moa from we yumi save se tijing we yumi givim long man ya i sas tumas mo bambae i givhan long hem blong longtaem. Taem yumi givim presen long saed blong spirit, yumi save halpem ol man blong kasem blesing naoia mo oltaem gogo i no save finis.—1 Timoti 4:8.
Glad From Fasin Blong Givim Presen
3. (a) ?Olsem wanem aposol Pol mo Jon tufala i tokbaot glad we tufala i kasem taem tufala i givhan long ol narafala long saed blong spirit? (b) ?From wanem fasin blong tijim trutok blong Baebol long ol pikinini blong yumi i soemaot lav?
3 Yes, olsem Jeova mo Jisas, ol Kristin tu oli glad blong givim presen long saed blong spirit. Aposol Pol i glad blong save se hem i stap givhan long ol narafala blong lanem trutok long Tok blong God. Hem i raet long kongregesen blong Tesalonaeka se: “Tingting blong mifala i stap strong yet, se taem Jisas, Masta blong yumi i kamtru, bambae hem i glad long mifala. ?Be tingting blong mifala i stap strong olsem from wanem? From yufala ya nao. Long Dei ya, bambae yufala i save mekem mifala i harem gud. Bambae yufala i olsem medol we mifala i winim, we bambae mifala i save tok flas from. Yufala ya nao i save mekem mifala i harem gud, mifala i glad.” (1 Tesalonaeka 2:19, 20) Long sem fasin, aposol Jon i tokbaot ol pikinini blong hem long saed blong spirit, we i minim olgeta we hem i tijim trutok long olgeta, se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) !Mo tu, tingbaot glad we yumi kasem taem yumi givhan long prapa pikinini blong yumi blong oli kam ol pikinini blong yumi long saed blong spirit! Yes, ol papa mama oli soemaot lav taem oli lukaotgud long ol pikinini blong olgeta mo “tijim olgeta, olsem we Masta blong yumi i stap stretem yumi, i stap tijim yumi.” (Efesas 6:4) Long rod ya, ol papa mama oli soemaot se oli wantem se ol pikinini blong olgeta oli haremgud blong olwe. Mo taem ol pikinini ya oli obei, ol papa mama oli kasem bigfala glad mo oli haremgud tumas.
4. Talem wan ekspiriens we i soemaot glad we i kamaot taem yumi givim presen long saed blong spirit.
4 Dell, we i wok olsem wan fultaem paenia, i gat faef pikinini. Hem i talem se: “Mi harem se ol tok blong aposol Jon oli stret long mi. Mi glad tumas we fo long ol pikinini blong mi oli stap folem trutok. Mi save se ol famle we oli joen tugeta long trufala wosip, oli givim ona long Jeova mo oli leftemap nem blong hem. Taswe mi mi haremgud tumas we Jeova i blesem hadwok blong mi blong tijim trutok long ol pikinini blong mi. Taem mi tingbaot nambawan promes ya se mi mo famle blong mi bambae mifala i save kasem laef we i no save finis long Paradaes, samting ya i givim hop long mi mo i mekem se mi wantem stanap strong nomata wanem traem mo hadtaem we mi fesem.” Sore tumas, wan long ol gel blong Dell i jus blong folem wan fasin blong laef we i no blong ol Kristin, ale kongregesen i mas putumaot hem. Nating se i olsem, Dell i traehad blong putum tingting blong hem i stap oltaem long ol positif saed blong laef. Hem i talem se: “Mi hop we wan dei gel blong mi bambae i gat tingting daon mo kambak long Jeova wetem fulhat blong hem. Be mi tangkiu long Jeova we bighaf blong ol pikinini blong mi oli gohed blong mekem wok blong hem wetem bilif. Glad we mi mi kasem i givim paoa long mi.”—Nehemaea 8:10.
Faenem Ol Fren We Oli Blong Olwe
5. ?Yumi glad taem yumi pulum ol man oli kam disaepol, from we yumi save long wanem?
5 Jisas i givim oda long ol man blong hem se oli mas pulum ol man oli kam Kristin disaepol mo tijim olgeta long saed blong Jeova mo ol rul blong hem. (Matiu 28:19, 20) Jeova mo Jisas, tufala i no tingbaot tufala nomo, be tufala i givhan long ol narafala blong lanem trutok. Taswe, taem yumi yusum taem blong yumi blong pulum ol man oli kam disaepol, yumi haremgud from we yumi save se yumi stap folem eksampol blong Jeova mo Jisas, olsem we ol faswan Kristin oli bin mekem. (1 Korin 11:1) Taem yumi wok tugeta wetem God ya we i gat olgeta paoa mo Pikinini blong hem we hem i lavem tumas, laef blong yumi i gat mining. !Fasin ya blong “joen wetem God blong mekem wok blong hem” i givim bigfala glad long yumi! (1 Korin 3:9) !Mo yumi glad tumas we ol enjel tu oli joen long wok ya blong talemaot gud nius!—Revelesen 14:6, 7.
6. ?Taem yumi joen long wok blong givim presen long saed blong spirit, hu i kam fren blong yumi?
6 Yes, taem yumi joen long wok ya blong givim presen long saed blong spirit, yumi wok wetem God. Be tu, yumi save kam fren wetem hem. From we Ebraham i soem bilif long God, ol man oli singaot hem se fren blong Jeova. (Jemes 2:23) Taem yumi traehad blong mekem wanem we God i wantem, yumi save kam fren blong God. Mo sipos yumi mekem olsem, bambae yumi kam fren blong Jisas tu. Hem i talem long ol disaepol blong hem se: “Mi stap singaot yufala, se ol fren blong mi, from we olgeta samting ya we mi mi harem long Papa blong mi, mi talemaot finis long yufala.” (Jon 15:15) Plante man oli glad blong gat ol fren we oli gat paoa mo haenem. !Be yumi save kam fren blong tufala man ya we oli impoten moa bitim olgeta narafala man long heven mo long wol!
7. (a) Talem olsem wanem wan woman i faenem wan trufala fren. (b) ?Yu yu gat wan ekspiriens olsem?
7 Antap long samting ya, taem yumi givhan long man blong kasem save long God, man ya i kam fren blong yumi tu, mo yumi kasem bigfala glad from. Joan, we i laef long Yunaeted Stet, i statem Baebol stadi wetem wan woman we nem blong hem Thelma. Nating se famle blong Thelma i agensem hem, hem i gohed strong mo wan yia biaen hem i tekem baptaes. Joan i talem se: “Mitufala i gohed blong kampani tugeta. Yes, mitufala i stap gud fren klosap 35 yia nao. Plante taem mitufala i joen blong prij no blong go long wan asembli. Samtaem biaen, mi mi muf i go long wan niufala haos 800 kilometa longwe long hem. Be Thelma i gohed blong sanem ol naesfala leta we oli mekem mi mi haremgud tumas. Long ol leta ya, hem i talem se hem i tingbaot mi mo i tangkiu long mi from fasin fren blong mitufala, from eksampol we mi bin soem long hem mo tu from trutok blong Baebol we mi tijim long hem. Wan gudfala fren olsem i wan nambawan blesing. Mi kasem blesing ya from traehad blong mi blong halpem hem blong kasem save long Jeova.”
8. ?Wanem gudfala tingting i save givhan long yumi long wok blong prij?
8 I tru, plante man oli no intres tumas long Tok blong Jeova. Be, sipos yumi gat tingting ya se maet yumi faenem wan man we i wantem save trutok, bambae yumi holemstrong long wok blong prij. Taem ol man oli no intres, samting ya i save traem bilif mo fasin blong yumi blong holemstrong long wok ya. Be, wan tingting we i stret i save givhan long yumi. Fausto, we i blong Guatemala, i talem se: “Taem mi prij long wan man no woman, mi tingbaot se i nambawan sipos hem i save kam wan brata no sista blong mi long saed blong spirit. Mi tingting olsem se, ating wan long ol man we mi prij long olgeta bambae i akseptem trutok long Tok blong God. Ale, tingting ya nao i pusum mi blong gohed mo i givim trufala glad long mi.”
Hivimap Ol Gudgudfala Samting Long Heven
9. ?Jisas i talem wanem long saed blong ol sas samting long heven, mo yumi lanem wanem from ol tok blong hem?
9 I no isi blong pulum wan man i kam disaepol, nating se hemia pikinini blong yumi no wan narafala man. Maet i tekem taem blong mekem olsem, mo maet yumi nidim longfala tingting mo fasin blong gohed oltaem. Be rimemba se, plante man oli stap wokhad blong hivimap ol sas samting long wol ya, we oli no save givim glad mo we oli no save stap foreva. Jisas i talem long ol man we oli stap lesin long hem se i moa gud blong wokhad from ol samting long saed blong spirit. Hem i se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos, blong go insaed blong stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos, blong go insaed blong stil.” (Matiu 6:19, 20) Taem yumi traehad blong mekem ol wok long saed blong spirit—olsem impoten wok ya blong pulum ol man oli kam disaepol—yumi save haremgud from we yumi save se yumi stap mekem samting we God i wantem mo yumi save se bambae hem i blesem yumi. Aposol Pol i raetem se: “[God] i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”—Hibrus 6:10.
10. (a) ?From wanem Jisas i gat plante sas samting long saed blong spirit? (b) ?Wanem samting we Jisas i givim, mo hemia i karem wanem blesing long ol man?
10 Taem yumi wokhad blong pulum ol man oli kam disaepol, yumi stap ‘hivimap ol gudgudfala samting blong yumi long heven,’ olsem we Jisas i talem. Wok ya i mekem yumi haremgud, i olsem we yumi kasem wan presen blong yumi. Sipos yumi no tingbaot yumi nomo be yumi rere blong givhan long ol narafala, bambae yumi kasem plante blesing from. Jisas i gohed strong long wok blong Jeova long plante milian yia. !Tingbaot olgeta sas samting we hem i hivimap long heven! Nating se i olsem, neva Jisas i lukaot rod blong kasem ol samting we hem nomo i wantem. Aposol Pol i talem se: “Jisas Kraes, hem i letem hem i ded from ol sin blong yumi, blong i save tekemaot yumi long fasin blong wol ya we i nogud olgeta. Hem i ded, stret olsem we God Papa blong yumi i wantem.” (Galesia 1:4) Yes, Jisas i givim taem blong hem blong mekem wok blong Jeova. Be i no hemia nomo. Hem i givim laef blong hem tu, olsem wan ransom blong givim janis long ol narafala man blong hivimap ol sas samting long heven.
11. ?From wanem ol presen long saed blong spirit oli moa gud i winim ol presen blong wol ya?
11 Taem yumi tijim ol man long saed blong God, yumi givhan long olgeta blong luksave olsem wanem oli save hivimap ol sas samting long saed blong spirit we oli no save rotin. I no gat wan narafala presen blong givim long ol man, we i moa gud i bitim hemia. Sipos yu givim wan sas presen long wan fren, olsem wan hanwaj, wan trak, no maet wan haos, ating fren blong yu i glad tumas mo yu tu yu haremgud from presen we yu givim long hem. ?Be olsem wanem long presen ya afta long 20 yia, 200 yia, no 2000 yia i pas? Defren olgeta nao, sipos yu halpem wan man blong mekem wok blong Jeova, man ya i save kasem blesing from presen ya blong olwe.
Faenem Ol Man We Oli Laekem Trutok
12. ?Plante long yumi oli mekem wanem blong givhan long ol narafala long saed blong spirit?
12 Blong joen long glad ya blong givim ol presen long saed blong spirit, ol man blong Jeova oli talemaot trutok go kasem olgeta ples long wol. Plante taosen oli lego hom mo famle blong olgeta mo oli lanem ol niufala lanwis mo kastom blong wok olsem misinari long narafala kantri. Samfala oli muf i go long sam ples long kantri blong olgeta we i nidim moa man blong talemaot gud nius blong Kingdom. Sam narafala bakegen oli lanem wan lanwis blong oli save prij long ol man blong narafala kantri we oli muf i kam long ples blong olgeta. Eksampol, wan hasban mo waef long New Jersey, Yunaeted Stet, tufala i lukaot mo trenem gud tufala pikinini blong tufala, gogo kasem taem we tufala pikinini ya i go wok long hedkwota blong ol Witnes blong Jeova. Ale biaen, hasban mo waef ya, tufala i statem wok blong paenia mo tufala i lanem Jaenis. Long tri yia, tufala i stadi Baebol wetem 74 man we oli toktok Jaenis, mo we oli stap skul long wan kolej klosap long haos blong tufala. ?Yu yu save mekem moa long minista wok blong kasem moa glad long wok blong pulum ol man oli kam disaepol?
13. ?Yu save mekem wanem blong karem moa frut long minista wok blong yu?
13 Maet yu wantem tumas blong gat wan Baebol stadi, be yu no faenem wan yet. Long sam kantri i had tumas blong faenem ol man we oli intres. Maet ol man we oli stap long teritori blong yu oli soem se oli no intres long Baebol. Sipos i olsem, maet i gud yu tokbaot samting ya long prea blong yu, from we Jeova mo Jisas tufala i intres tumas long wok blong yu mo maet tufala i save lidim yu blong faenem wan man we i olsem sipsip. Askem advaes long olgeta long kongregesen blong yu we oli gat gudhan no we oli kasem gudfala frut long minista wok blong olgeta. Yusumgud trening mo ol advaes we yu kasem long ol Kristin miting. Lesin long ol advaes we ol seket elda mo waef blong olgeta oli stap givim. Mo antap long olgeta samting ya, neva lego wok ya. Wan waes man i raetem se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” (Prija 11:6) Tingbaot ol man olsem Noa mo Jeremaea, we oli gat strong bilif. Nating se i no gat plante man we oli lesin long olgeta, be i gat sam we oli lesin, mo gudfala risal i kamaot from minista wok blong olgeta. Mo antap long samting ya, wok ya i mekem Jeova i glad long olgeta.
Traem Bes Blong Yu
14. ?Wanem tingting blong Jeova long saed blong ol olfala we oli mekem wok blong hem?
14 Maet ol samting long laef blong yu oli blokem yu blong no spenem moa taem long wok blong prij olsem we yu wantem. Eksampol, maet yu olfala, nao yu no save mekem plante long wok blong Jeova. Nating se i olsem, tingbaot tok we wan waes man i raetem se: “Waet hea i naes olsem hat blong King blong flasem hed blong man, sipos man ya i stap folem wei blong stret fasin.” (Ol Proveb 16:31, NW ) Long tingting blong Jeova, wan man we i spenem laef blong hem long wok blong God hem i naes tumas. Mo Baebol i gohed i talem se: “Mi mi God blong yufala, mo mi bambae mi stap lukaot long yufala yet, gogo hea blong yufala i kam waet. Mi mi mekem yufala, mo mi bambae mi holem yufala i stap gud. Mi bambae mi stap givhan long yufala, mo mi bambae mi stap sevem yufala.” (Aesea 46:4) Papa blong yumi long heven, we i gat lav, i promes blong givhan mo sapotem ol man blong hem we oli stap tru long hem.
15. ?Yu yu bilif se Jeova i luksave ol traem we yu yu fesem? ?From wanem?
15 Maet yu kasem wan bigfala sik, maet hasban no waef blong yu we i no bilif i agensem yu, maet wok blong yu blong sapotem famle i kam wan hevi baden, no maet yu fesem sam narafala problem we i strong tumas. Jeova i luksave ol traem we yumi fesem mo wanem we yumi naf blong mekem, mo hem i lavem yumi from fasin traehad we yumi mekem long wok blong hem. Samting ya i tru tu, nating se wanem we yumi mekem i smol moa long wanem we ol narafala oli mekem. (Galesia 6:4) Jeova i save se yumi no stretgud olgeta, mo hem i no askem yumi blong mekem wanem we yumi no naf blong mekem. (Ol Sam 147:11) Sipos yumi traem bes blong yumi, yumi save sua se long ae blong Jeova yumi sas tumas mo hem i no save fogetem ol wok we bilif blong yumi i pusum yumi blong mekem.—Luk 21:1-4.
16. ?Olsem wanem fulwan kongregesen i joen long wok blong pulum wan man i kam disaepol?
16 Mo tu, rimemba se, wok blong pulum ol man i kam disaepol, i wan wok we yumi mekem tugeta olsem wan tim. Wan smol drop ren i no naf blong mekem wan flaoa i gru. Long sem fasin, wan man nomo i no naf blong pulum narafala i kam disaepol. Maet wan Witnes i faenem wan man we i intres mo i stadi Baebol wetem hem. Be taem man ya i stat blong kam long Haos Kingdom, fulwan kongregesen i givhan long hem blong luksave trutok. Lav we ol brata sista oli gat i soemaot paoa we tabu spirit blong God i gat long olgeta. (1 Korin 14:24, 25) Ol pikinini mo ol yangfala we oli givim ol gudfala ansa oli soemaot long ol niuwan se ol yangfala blong yumi oli defren long ol yangfala blong wol. Olgeta long kongregesen we oli sik, we oli handikap, mo we oli olfala, oli save tijim ol niuwan olsem wanem blong stanap strong. Nomata hamas yia we yumi gat mo nomata wanem we yumi naf blong mekem, yumi evriwan i givhan long ol niuwan blong lavem moa trutok blong Baebol mo blong kasem mak ya blong baptaes. Maet long tingting blong yumi, ol wanwan aoa we yumi spenem long wok blong prij, ol wanwan visit we yumi mekem, mo ol wanwan taem we yumi storian wetem wan niuwan long Haos Kingdom i smol nomo. Be olgeta samting ya oli haf blong wan bigfala wok we Jeova i lidim.
17, 18. (a) ?Antap long wok blong pulum ol man blong kam disaepol, long wanem rod bakegen yumi save kasem glad we i kamaot from fasin blong givim? (b) Yumi folem eksampol blong hu, taem yumi joen long glad we i kamaot from fasin blong givim?
17 Be i tru se, antap long wok ya blong pulum ol man oli kam disaepol, yumi Kristin, yumi kasem glad tu from sam narafala rod blong givim presen. Yumi save givim smol mane blong sapotem klin wosip mo blong halpem olgeta we oli trabol. (Luk 16:9; 1 Korin 16:1, 2) Yumi save lukaot rod blong singaot narafala i kam long haos blong yumi. (Rom 12:13) Yumi save traehad blong “mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:10) Mo i gat sam narafala rod tu blong givim presen long narafala—olsem, raetem leta, telefon long narafala, mekem wan smol wok blong givhan, no talem wan toktok we i leftemap tingting. Hemia sam samting we oli smol nomo be oli impoten tumas.
18 Taem yumi givim presen i go, yumi soem se yumi folem eksampol blong Papa blong yumi long heven. Mo tu, yumi soemaot se yumi lavem ol brata blong yumi, we fasin ya i makemaot yumi olsem trufala Kristin. (Jon 13:35) Sipos yumi rimemba ol poen ya, bambae yumi save joen long glad ya we i kamaot from fasin blong givim presen.
?Yu Yu Save Eksplenem?
• ?Olsem wanem Jeova mo Jisas i soem eksampol long fasin blong givim presen long saed blong spirit?
• ?Olsem wanem yumi save faenem ol fren we oli blong olwe?
• ?Yumi save mekem wanem blong minista wok blong yumi i karem moa frut?
• ?Olsem wanem fulwan kongregesen i save joen long glad we i kamaot from fasin blong givim presen?
[Kwestin]
[Tok blong pija long pej 13]
Ol papa mama oli kasem bigfala glad mo oli haremgud tumas taem ol pikinini oli folem trening we oli givim
[Tok blong pija long pej 15]
Taem yumi joen long wok blong pulum ol man oli kam disaepol yumi save faenem ol trufala fren
[Tok blong pija long pej 16]
Jeova i lukaot long yumi taem yumi kam olfala
[Tok blong pija long pej 17]
Yumi save kasem glad from ol samting we yumi givim, nating se oli smol nomo