No Letem Tingting We i Hafhaf i Spolem Bilif Blong Yu

Wan dei yu ting se yu gat gudfala helt. Nekis dei yu harem se yu sik. Wantaem nomo yu no moa gat paoa mo bodi blong yu i slak. Hed blong yu i soa, mo ful bodi i soa bitim mak. ?Wanem i mekem yu olsem? Ol jem oli bin kam insaed long bodi blong yu, mo oli stap spolem ol sel * we wok blong olgeta i blong faet agensem sik. Sipos yu no hareap blong karem meresin, bambae ol jem ya oli spolem helt blong yu blong olwe, no maet oli save kilim yu yu ded.

I SUA se, sipos yu no gat gudfala helt bambae i isi moa blong sik ya i spolem yu. Eksampol, Peter Wingate, wan man blong raetem buk blong meresin, i talem se sipos bodi blong yu i slak from we yu no stap kakae gud, bambae yu no naf blong blokem sik mo “wan smol jem nomo i save kilim yu yu ded.”

Sipos hemia i tru, maet bambae yu no jus blong laef long wan ples we kakae i sot. Ating bambae yu wantem traem bes blong yu blong kakae gud mo gat gudfala helt. Mo tu, ating bambae yu traem bes blong yu blong blokem olkaen jem we oli save mekem yu yu sik. ?Be, olsem wanem? ?Yu stap lukaotgud oltaem blong stap “strong long fasin blong bilif”? (Taetas 2:2, NW ) ?Eksampol, yu yu luksave denja we i save kamaot taem yu stat blong gat ol tingting we oli hafhaf? Ol tingting we oli hafhaf oli save spolem bilif mo fasin fren blong yumi wetem Jeova kwiktaem nomo. Sam man oli no luksave denja ya. Oli no stap kakae gud long saed blong spirit ale, ol kwestin oli kam antap long tingting blong olgeta. ?Maet yu tu yu stap mekem olsem?

?I Rong Oltaem Blong Gat Kwestin Long Tingting Blong Yumi?

I tru, i no rong blong askem kwestin long ol samting we oli no klia. Samtaem, yu mas jekem wan samting bifo we yu save bilif long hem. I no stret blong folem toktok blong sam skul we oli talem se yu mas bilivim evri samting mo yu no mas askem kwestin. Hemia wan denja we i save lidim man i gorong. I tru, Baebol i talem se lav i “bilivim olgeta samting.” (1 Korin 13:7, NW ) Wan Kristin we i gat lav i rere blong bilivim toktok blong olgeta we oli pruvum finis se oli no man blong giaman. Be, Tok blong God i givim woning tu se yumi no mas “bilif long evri samting.” (Ol Proveb 14:15) Samtaem ol samting we wan man i bin mekem bifo, oli pulum yumi blong gat tingting we i hafhaf long saed blong hem. Baebol i givim woning se: “Nating we ol tok ya blong hem [man we i gat tu tingting] i gud we i gud, be yu no mas bilif long hem, from we hem i stap giaman nomo.”—Ol Proveb 26:24, 25.

Aposol Jon tu i givim woning long ol Kristin se oli mas lukaot  long fasin blong bilivim evri samting. Hem i raetem se: “I gat plante profet we oli stap talem se Spirit blong God i stap long olgeta, be yufala i no mas bilif long olgeta evriwan. Yufala i mas traem olgeta fastaem, blong faenemaot se spirit we i stap long olgeta i kamaot long God, no nogat.” (1 Jon 4:1) Maet i luk olsem se wan toktok, no wan tijing i kamaot long God. ?Be hem i rili kamaot long God? Fasin blong askem kwestin, no blong jekemap wan bilif fastaem, i save protektem yumi from we, olsem aposol Jon i talem: “I gat plante man blong giaman we oli go olbaot long wol finis.”—2 Jon 7.

Ol Krangke Kwestin

Yes, blong faenemaot trutok, plante taem yumi mas gat tingting daon mo jekem gud ol samting. Be, fasin blong letem ol krangke kwestin oli gru long tingting mo hat blong yumi hemia nao i nogud. Ol kwestin olsem oli save spolem fulwan ol bilif we yumi gat finis mo fasin fren blong yumi wetem narafala. Ol kwestin ya oli olsem “bilif no tingting we i hafhaf, we plante taem i spolem fasin blong mekem ol waes disisen.” ?Yu rimemba olsem wanem Setan i bin pulum Iv blong gat wan tingting we i hafhaf long saed blong Jeova? Hem i askem se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” (Jenesis 3:1) Kwestin ya i gat paoa long tingting blong Iv, mo i spolem fasin blong hem blong mekem ol waes disisen. Hemia nao wan rod we Setan i stap yusum. Olsem wan man we i raetem leta blong spolem nem blong narafala, Setan i gat gudhan blong talem ol tok we oli nogud, we oli no tru fulwan, mo we oli giaman stret. Tru long rod ya blong putum kwestin long tingting blong man, Setan i bin spolem fulap gudfala fasin fren bitwin ol man we fastaem ol trastem olgeta fulwan.—Galesia 5:7-9.

Disaepol Jemes i bin kasem save se i denja tumas blong gat ol kwestin olsem. Hem i tokbaot nambawan janis ya we yumi gat blong singaot God blong i halpem yumi taem yumi kasem trabol. Be Jemes i givim woning se taem yumi prea long God, ‘yumi mas bilif tru, we tingting blong yumi i no hafhaf.’ Sipos tingting blong man i hafhaf, “hem i olsem wef blong solwota, we win i blu long hem, i mekem i go olbaot.” Yumi kam olsem ‘man we tingting blong hem i hafhaf, we oltaem hem i stap tingbaot blong go long tu rod.’ (Jemes 1:6, 8) Bambae tingting blong yumi i hafhaf nao yumi no save mekem wan stret disisen. Ale, olsem Iv, ol tijing mo tingting blong ol rabis spirit oli gat paoa long yumi isi nomo.

Holem Gudfala Helt Long Saed Blong Spirit

?Olsem wanem yumi save protektem yumi long ol kwestin we oli save mekem tingting blong yumi i hafhaf? Ansa ya i klia nomo: yumi mas strong blong sakemaot evri rod we Setan i yusum blong spolem bilif blong yumi, mo yumi mas yusum fulwan ol samting we God i givim blong mekem yumi “strong long bilif.”—1 Pita 5:8-10.

Wan samting we i impoten tumas, hemia se yumi mas kakae gud long saed blong spirit. Peter Wingate, we yumi tokbaot hem long stat blong haf ya, i eksplenem se: “Nating sipos bodi i stap spel, be i nidim paoa oltaem blong mekem ol samting insaed long bodi oli wokgud. Bodi i wok oltaem blong klinimaot ol doti mo mekem ol skin mo narafala samting oli kam niuwan bakegen.” Hemia i sem mak long helt long saed blong spirit. Sipos yumi no gohed blong tekem ol kakae long saed blong spirit, bambae bilif blong yumi i olsem bodi blong yumi we sipos i no kasem kakae, bambae i kam slak mo i ded. Jisas Kraes i makem poen ya taem hem i talem se: “Man i no save laef long kakae nomo. Evri tok we God i talem, hemia nao samting blong mekem man i laef.”—Matiu 4:4.

Tingbaot samting ya. ?Olsem wanem yu bin bildimap bilif blong yu fastaem? Aposol Pol i talem olsem: “Ol man oli stap bilif long God, taem oli harem gud nius ya.” (Rom 10:17) Hem i min se fastaem yumi bildimap bilif mo tras long Jeova, ol promes blong hem, mo ogenaesesen blong hem, taem yumi lesin long Tok blong God. Be yumi no akseptem wantaem nomo ol samting ya we yumi harem. Yumi bin mekem olsem ol man long taon ya Berea. Yumi bin “ridimgud ol tok blong Baebol, blong luksave sipos ol samting ya oli tru, no olsem wanem.” (Ol Wok 17:11, NW ) Yumi wanwan i bin “jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” Mo yumi bin traem olgeta samting fastaem blong meksua se oli tru. (Rom 12:2; 1 Tesalonaeka 5:21) Stat long taem ya, yumi luk klia moa se Tok blong God mo ol promes blong hem oli tru oltaem, mo hemia i mekem bilif blong yumi i kam strong moa.—Josua 23:14; Aesea 55:10, 11.

 No Lego Kakae Blong Spirit

Naoia yumi mas wokhad blong holemstrong long bilif mo no letem tingting blong yumi i kam hafhaf, from we hem i save mekem yumi no moa trastem fulwan Jeova mo ogenaesesen blong hem. Blong holemstrong bilif, yumi mas gohed blong ridim Baebol evri dei. Aposol Pol i talem se: “Long ol taem biaen, samfala [we fastaem i luk olsem se oli gat strong bilif] bambae oli foldaon, oli lego bilif ya. Bambae oli lesin long sam toktok we oli giaman se spirit nomo i stamba blong olgeta, mo sam tijing blong ol rabis enjel.” (1 Timoti 4:1, NW ) Ol giaman toktok mo tijing oli save mekem tingting blong sam man i hafhaf mo biaen oli lego God. ?Wanem i save protektem yumi? Yumi mas gohed blong ‘kam strong long ol tok blong fasin blong bilif long God, mo long ol gudfala tijing we yumi biaen long hem, olsem we ol tok ya oli gudfala kakae blong yumi.’—1 Timoti 4:6.

Sore tumas, tede i gat sam we oli jus blong no tekem ‘tok ya we i gudfala kakae’, nating se ol gudfala kakae ya oli fri nomo. Wan man blong raetem Proveb i soemaot se, i blong nating nomo sipos wan man i stap klosap long plante gudfala kakae long saed blong spirit, be hem i no putum kakae ya long maot blong hem mo i no tantanem ol kakae ya long bel blong hem.—Ol Proveb 19:24; 26:15.

I denja blong mekem olsem. Peter Wingate i talem se: “Taem bodi i no moa gat kakae nao hem i stat blong kakae ol protin * we oli stap finis insaed long hem, helt i stat blong kam nogud tu.” Taem wan man i no moa kakae, bodi blong hem bambae i stat blong yusum ol paoa we hem i bin hivimap finis i stap. Nao, taem bodi i finisim olgeta paoa we i stap, bambae hem i stat kakae ol protin we bodi i nidim blong gru mo blong fiksimap ol haf blong bodi. Ale, ol impoten haf blong bodi oli stat blong kam nogud, mo kwiktaem biaen helt blong man ya i kam nogud olgeta.

Sem samting i bin hapen long saed blong spirit long sam memba blong faswan Kristin kongregesen. Oli traem gohed blong laef wetem paoa we oli holem finis long saed blong spirit. Maet oli no mekem stadi wanwan, mo biaen oli kam slak long saed blong spirit. (Hibrus 5:12) Aposol Pol i eksplenem denja blong samting ya taem hem i raetem leta long ol Hibru Kristin, se: “Yumi mas strong moa blong holem ol trutok ya we yumi harem finis, blong bambae yumi no lusum rod blong yumi.” Hem i save se bambae i isi blong lusum rod mo stat mekem ol rong samting sipos yumi “no tekem gudfala rod ya we God i yusum blong sevem yumi.”—Hibrus 2:1, 3.

Makem poen ya se, samtaem wan man we i no stap kakaegud hem i no luk sik mo maet i no bunbun, ale yumi ting se hem i oraet nomo. Long sem fasin, maet yumi no luksave kwiktaem se wan man i no stap kakae gud long saed blong spirit. Ol man we oli luk yumi maet oli ting se yumi stap kakae gud long saed blong spirit, nating se yumi no stap kakae gud long saed blong spirit. !Be i blong sot taem nomo! Bambae yumi kam slak yet long saed blong spirit, tingting blong yumi bambae i kam hafhaf isi nomo, mo bambae yumi no naf blong faet strong blong holem bilif. (Jud 3) Ol narafala man oli no save sipos yumi stap kakae gud long saed blong spirit no nogat, yumi wanwan nomo i save.

Taswe i impoten blong gohed blong stadi yu wan. Faet strong agens long ol tingting we i hafhaf. Sipos yu no blokem tingting we i hafhaf, i olsem we yu no mekem wan samting blong blokem wan sik we yu ting se i smol nomo. Ale biaen yu save kasem bigfala trabol. (2 Korin 11:3) ‘?Yumi rili stap long ol las dei? ?Yumi save trastem olgeta tok blong Baebol? ?I tru se hemia nao ogenaesesen blong Jeova?’ Setan i wantem tumas blong putum ol kwestin ya long tingting blong yumi. Yu no mas letem fasin les i winim yu blong no tekem ol kakae long saed blong spirit. Samting ya bambae i mekem i isi nomo blong Setan i trikim yu wetem ol giaman tijing. (Kolosi 2:4-7) Folem advaes we Timoti i bin kasem. Kam wan gudfala studen blong “ol tok blong Baebol,” nao bambae yu save “stanap strong long ol samting we  yu lanem finis, we man i pulum yu blong yu bilif long hem.”—2 Timoti 3:13-15, NW.

Maet yu nidim help blong mekem olsem. Man ya Peter Wingate, i gohed blong talem se: “Sipos wan man i no moa kakae blong longtaem, ol haf blong bodi blong hem we oli stap tantanem kakae oli no moa save wok gud from we oli no bin kasem ol kakae we oli nidim blong wokgud, nao hem i no moa naf blong tantanem eni kaen kakae. Ol man olsem, maet oli mas stat fastaem blong tekem ol kakae we oli sofsof.” Sipos man i no bin kakae gud blong longtaem lelebet, i gat ol spesel rod blong mekem bodi blong hem i kam gud bakegen. Long sem fasin, sipos wan man i lego fasin blong stadi Baebol hem wan longtaem tumas, bambae ol narafala oli mas givhan bigwan long hem blong mekem se hem i wantem tekem kakae long saed blong spirit bakegen. Sipos samting ya i bin hapen long yu, askem help mo akseptem wetem glad eni help we narafala i wantem givim blong bildimap bakegen helt mo paoa blong yu long saed blong spirit.—Jemes 5:14, 15.

No Letem Bilif i Kam Slak

Taem yu tingbaot ol samting we oli bin hapen long Ebraham, maet yu ting se hem i gat gudfala risen blong gat tingting we i hafhaf. Nating we God i bin mekem promes long Ebraham, maet i stret blong hem i ting se neva bambae “hem i kam stamba blong ol man blong plante ples.” ?From wanem? From we i luk olsem se hem i no save gat pikinini. Baebol i talem se: “Hem i tingbaot we hem i olfala, we bodi blong hem i slak finis, mo we Sera tu i olfala finis, i no save karem pikinini.” Be hem i no letem tingting blong hem i hafhaf long saed blong God mo ol promes blong hem. Aposol Pol i talem se bilif blong hem i no kam slak, mo “bilif blong hem i stap strong.” Ebraham i “savegud we bambae God i save mekem olgeta samting we hem i promes blong mekem.” (Rom 4:18-21) Long plante yia, Ebraham i bin bildimap wan gudfala fasin fren wetem Jeova, mo hem i trastem Jeova fulwan. Hem i sakemaot tingting we i hafhaf from we tingting ya i save spolem fasin fren blong hem wetem Jeova.

Yu tu yu save mekem sem mak sipos yu ‘holemstrong ol tok ya . . . we i stret gud, we i blong soemaot rod blong yu.’ Hemia i min se yu mas kakae gud long saed blong spirit. (2 Timoti 1:13) Luksave se tingting we i hafhaf hem i wan denja. Setan i stap yusum tingting ya we i olsem ol jem blong spolem gud helt blong wan man long saed blong spirit. Sipos yu no stap tekem gudfala kakae blong spirit from we yu no stap stadi Baebol yu wan mo yu no go long Kristin miting, bambae i isi blong Setan i spolem yu. Yusum gud olgeta kakae long saed blong spirit we “slef we i stret mo waes” i stap givim long stret taem blong hem. Ol kakae ya oli plante tumas. (Matiu 24:45, NW ) Gohed blong “wantem ol trutok ya” mo stap “strong long fasin blong bilif.” (1 Timoti 6:3; Taetas 2:2, NW ) No letem tingting we i hafhaf i spolem bilif blong yu.

[Ol futnot]

[Tok blong pija long pej 21]

?Yu yu stap kakae gud long saed blong spirit?