Ol Tri We Oli Strong Blong Stap Longtaem

Wan man we i wantem wokem haos blong hem, ating bambae hem i neva jusum stip ples, antap moa sipos ples ya i stap long ol bigbigfala hil. Be yet, long ol stip ples ya we maet yumi ting se oli nogud, i gat sam tri we oli stap gru. Rus blong ol tri ya i holemstrong long ol ston. Nating se ples i kolkol bitim mak no i hot tumas we i no moa gat wota, be oli stanap i stap.

PLANTE taem, ol tri we oli gru long ol stip ples ya, oli no kam bigwan olsem ol narafala tri we oli gru long levelples. Stamba blong ol smosmol tri ya i benben, i kruked olbaot mo oli no save kam bigwan. Ol strongfala win mo rabis weta wetem graon we i fulap long ston nomo, oli blokem ol tri ya oli stap sot.

Maet yumi ting se ol tri ya oli no save laef longtaem from we oli gru long ol ples long wol ya we graon mo weta i nogud tumas. Be nogat. Sam man oli talem se wan long ol tri ya, we oli putum nem blong hem se Metusela, i gat bitim 4,700 yia finis. Tri ya hem i wan bristlecone paentri we i gru antap long ol hil ya White Mountains, long California, long ol ples we i hae olsem 3,000 mita. Wan buk (The Guinness Book of Records 1997) i talem se tri ya i olfala moa i winim ol narafala tri long wol. Edmund Schulman, i bin stadi long ol olfala tri ya mo i talem se: “I luk olsem se, paentri ya bristlecone . . . bambae i ded sipos i stap long wan ples we i gud. Olgeta olfala [paentri] we man i save faenem long White Mountains oli gru nomo long drae ples we i gat fulap ston long hem, samwe 3,000 mita antap.” Schulman i faenemaot se, ol narafala olfala paentri, olgeta tu oli gru long ol ples we graon mo weta i nogud.

Ol tri ya we oli gru long ol ples we i nogud olgeta, oli wan gudfala eksampol blong soem fasin blong stanap strong longtaem. Ol tri ya oli laki from tufala risen. Faswan se, oli stap olgeta nomo, longwe long ol narafala tri mo gras, mekem se i no gat bigfala faea we i save spolem olgeta. Mo tu, ol rus blong olgeta oli olsem wan angka we i holemstrong ol ston, mekem se, ating graon we i seksek hemia nomo bambae i naf blong rutumaot olgeta.

Baebol i yusum pijatok long saed blong ol tri taem hem i tokbaot ol man blong God we oli holemstrong long bilif. (Ol Sam 1:1-3; Jeremaea 17:7, 8) Ol man olsem, oli bin fesem hadtaem from ol defren samting we i hapen long laef. Maet narafala i kilim olgeta, maet oli sik bigwan no oli pua tumas. Ol samting ya oli traem bilif blong olgeta, mo i hadwok moa sipos ol traem ya oli stap longtaem. Be, God we i  wokem olgeta, hem i leftemap tingting blong olgeta se bambae hem i stap givhan long olgeta. Sem mak olsem ol tri ya we hem i wokem blong oli stanap strong tru long weta we i rabis olgeta. Baebol i mekem promes ya long ol man we oli stanap strong, i se: “Hem bambae i mekem yufala i strong, i givim paoa long yufala, i stanemap yufala olsem pos we i no save muv.”—1 Pita 5:9, 10.

Long Baebol, Grik veb ya we plante taem yumi tanem i kam “stanap strong longtaem” i karem tingting ya se man i ‘stanap long sem ples, i holem strong, mo i gohed olwe.’ Wan impoten samting we i givhan long ol paentri blong stanap strong, hemia rus blong olgeta we i holemtaet ston. Ol Kristin tu oli mas holem strong long Jisas Kraes sipos oli wantem kam naf blong stanap strong longtaem. Pol i raetem se: “From we yufala i tekem Jisas Kraes i Masta blong yufala finis, oltaem, laef blong yufala i mas joen long laef blong hem. Yufala i mas holem hem strong, olsem we rus blong tri i holem graon. Laef blong yufala i mas stanap long hem, olsem we haos i stanap strong long graon. Mo bilif blong yufala long hem i mas kam strong moa oltaem, olsem we oli tijim yufala long hem finis. Mo oltaem, yufala i mas talem tangkiu long hem.”—Kolosi 2:6, 7.

Pol i luksave se yumi nidim ol strong rus long saed blong spirit. Hem wan i bin faet strong nating se hem i gat wan ‘trabol we i olsem nil blong aranis we i stap stikim hem.’ Mo hem i stanap strong long wok blong prij, nating we ol man oli mekem i nogud tumas long hem. (2 Korin 11:23-27; 12:7) Be, hem i faenem se paoa blong God i halpem hem blong gohed. Hem i se: “Mi save mekem evri samting, long paoa blong Kraes ya we i stap mekem mi mi strong.”—Filipae 4:13.

Eksampol blong Pol i soem klia se ol Kristin oli no save gat fasin ya blong stanap strong longtaem sipos oli neva fesem hadtaem. Olsem ol paentri we, plante handred yia finis oli stanap strong long ol ples we graon mo weta i nogud, yumi save stanap strong tu sipos yumi putum rus blong yumi long Kraes mo sipos yumi dipen long paoa we God i stap givim. Mo tu, sipos yumi stanap strong gogo kasem en, bambae yumi gat janis blong luk narafala promes ya blong God i kamtru, se: “Bambae [ol man blong mi] oli save stap longtaem, olsem tri we i save stap longtaem.”—Aesea 65:22; Matiu 24:13.