!Gohed Blong Tekem Kakae Long Garen!
!Gohed Blong Tekem Kakae Long Garen!
“I gat ol man blong mifala we taem oli stap planem kakae long garen blong olgeta, oli stap harem nogud, oli stap krae. Be taem oli tekemaot kakae long garen ya, plis yu mekem olgeta oli glad.”—OL SAM 126:5.
1. ?Tede, from wanem yumi mas “askem strong long masta blong garen ya, blong hem i save sanem sam moa man oli kam”?
AFTA we Jisas Kraes i mekem namba tri trep blong hem i go long Galili blong prij, hem i talem long ol disaepol blong hem se: “I gat plante kakae tumas i stap long garen we i rere finis, be smol man nomo oli stap blong karem i go long haos.” (Matiu 9:37) Long Judia tu, i olsem we kakae long garen i rere finis. (Luk 10:2) Yes, klosap 2,000 yia bifo, kakae long garen i rere finis. ?Taswe olsem wanem long taem blong yumi tede? Long laswan sevis yia, bitim 6,000,000 Witnes blong Jeova oli stap gohed strong blong tekem kakae long garen long wol ya we i gat 6,000,000,000 man long hem. Plante long ol man ya “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” Taswe, Jisas i givim advaes se: “Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” Advaes ya i stret yet tede.—Matiu 9:36, 38.
2. ?Wanem i mekem se ol man oli makemgud yumi?
2 Jeova God, we hem i Masta blong garen, hem i lesin taem ol man blong hem oli askem hem blong sanem sam moa man oli kam. !Yumi glad tumas blong joen long wok ya blong tekem kakae long garen! God nao i stap lidim wok ya. I tru se namba blong yumi i smol nomo taem yumi skelem wetem namba blong olgeta nesen. Be strong tingting we yumi gat blong talemaot Kingdom mo blong pulum ol man i kam disaepol, i mekem se ol man long wol oli makemgud yumi. Long plante kantri, plante taem ol man oli tokbaot yumi long ol nius. Long ol film we oli plei long televisin, samtaem oli soem we wan man i kilkilim doa, nao yumi harem man i talem se, hemia ol Witnes blong Jeova. Yes, long ol yia 2,000 ol man oli savegud yumi, olsem ol man blong tekem kakae long garen.
3. (a) ?Olsem wanem yumi save se ol man oli makemgud wok blong talemaot Kingdom long faswan handred yia? (b) ?From wanem yumi save talem se ol enjel oli stap givhan long yumi long wok blong prij?
3 Long faswan handred yia tu, ol man oli makemgud wok blong talemaot Kingdom mo oli mekem i nogud long olgeta we oli talemaot gud nius. Taswe, aposol Pol i talem se: “Mi luk se God i putum mifala i stap daon long las ples olgeta. Mifala i stap olsem ol man blong kalabus, we jaj i jajem olgeta finis, se oli mas ded. Nao i olsem we mifala [ol aposol] i stap stanap long fes blong olgeta enjel, mo long fes blong olgeta man blong wol tu, blong oli save luk ol trabol blong mifala.” (1 Korin 4:9) Yumi tu, sipos yumi gohed oltaem blong talemaot Kingdom, nating se ol man oli mekem nogud long yumi, bambae ol man blong wol oli makemgud yumi mo ol enjel tu bambae oli tinghae long fasin we yumi soemaot long wok ya. Revelesen 14:6 i talem se: “Mi [aposol Jon] luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” !Yes, ol enjel oli stap givhan long yumi long wok blong prij—hemia wok blong tekem kakae long garen!—Hibrus 1:13, 14.
“Bambae Olgeta Man Oli No Laekem Yufala”
4, 5. (a) ?Jisas i givim wanem woning long ol disaepol blong hem? (b) ?From wanem ol man oli ‘no laekem nating’ ol man blong God tede?
4 Taem Jisas i sanem ol aposol blong hem oli go blong tekem kakae long garen, hem i givim advaes long olgeta se: “Yufala i mas waes long ol trik, olsem snek. Mo yufala i mas kwaet man, olsem sotleg.” Jisas i gohed se: “Yufala i mas lukaot gud. Bambae ol man oli save mekem yufala i pas long ol kaonsel blong olgeta, blong ol kaonsel ya oli jajem yufala. Bambae oli save wipim yufala insaed long haos blong prea blong olgeta. Mo from we yufala i man blong mi, bambae oli save pulum yufala i go stanap long fes blong ol haeman blong gavman, mo long fes blong ol king. Be sipos oli mekem olsem, bambae yufala i gat janis blong talemaot gud nius blong mi long fes blong olgeta, mo long fes blong ol hiten man. . . . Bambae olgeta man oli no laekem yufala nating, oli agens long yufala, from we yufala i holem nem blong mi. Be man we i stanap strong gogo kasem en blong hem, bambae God i sevem hem.”—Matiu 10:16-22.
5 Tede, “olgeta man oli no laekem” yumi nating from we “oli stap long paoa blong Setan,” we i bigfala enemi blong God mo ol man blong Hem. (1 Jon 5:19) Ol enemi blong yumi oli luk ol gudfala samting we yumi gat long saed blong spirit, be oli no wantem givim ona long Jeova. Ol man blong agens oli luk we yumi hapi mo yumi glad taem yumi stap mekem wok ya blong tekem kakae long garen. !Oli sapraes tumas taem oli luk we yumi joengud! Oli no wantem luksave, be taem oli go long narafala kantri, oli faenemaot se ol Witnes blong Jeova oli stap mekem sem wok we ol Witnes long kantri blong olgeta oli stap mekem. Yes, yumi save se long stret taem we Jeova i makemaot finis, bambae ol enemi blong yumi oli save Jeova, man ya we i stap givhan long yumi mo i stamba blong fasin joengud.—Esikel 38:10-12, 23.
6. ?Yumi sua long wanem samting taem yumi joen long wok blong tekem kakae long garen, be wanem kwestin i stanap?
6 Masta blong garen “i givim olgeta paoa . . . long olgeta samting long heven mo long wol” long Pikinini blong hem, Jisas Kraes. (Matiu 28:18) Taswe, Jisas nao i stap lidim ol enjel long heven mo tabu “slef ya we i stret mo waes” long wol ya blong tekem kakae long garen. (Matiu 24:45-47, NW; Revelesen 14:6, 7) ?Olsem wanem blong holemtaet glad blong yumi mo gohed long wok ya blong tekem kakae long garen nating se ol enemi oli agensem yumi?
7. ?Yumi mas traehad blong holem wanem tingting taem ol man oli agensem mo mekem i nogud long yumi?
7 Taem ol man oli agensem mo mekem i nogud long yumi, i gud yumi askem long God blong i halpem yumi, blong holem sem tingting olsem Pol. Hem i talem se: “Taem ol man oli tok nogud long mifala, be mifala i no givimbak olsem, mifala i stap blesem olgeta. Taem ol man oli ronem mifala blong spolem mifala, be mifala i stap stanap strong. Taem ol man oli spolem nem blong mifala long ol rabis tok, be mifala i stap toktok gud nomo long olgeta.” (1 Korin 4:12, 13) Sipos yumi gat tingting olsem mo gat waes fasin long wok blong prij, samtaem hemia i save jenisim tingting blong ol man we oli agensem yumi.
8. ?Ol tok blong Jisas long Matiu 10:28 i mekem yumi sua long wanem samting?
8 Nomata we ol man oli wantem kilim yumi i ded, samting ya i no save blokem strong tingting we yumi gat blong tekem kakae long garen. Yumi no fraet blong talemaot Kingdom long olgeta man. Mo tok ya blong Jisas i leftemap tingting blong yumi bigwan, se: “Bambae yufala i no fraet long olgeta ya we oli save kilim yufala i ded, be oli no save kilim spirit blong yufala. Yufala i mas fraet long God, we hem nomo i gat raet blong mekem bodi mo spirit blong yufala, tufala i lus wantaem long hel [“Gehena,” NW ].” (Matiu 10:28) Yumi save se Papa blong yumi long heven, hem nao i givim laef long yumi. Hem i givim pei long ol man we oli holemstrong long hem, oli stap gohed strong long wok blong tekem kakae long garen.
Wan Mesej We i Save Givim Laef
9. ?Sam man oli mekem wanem taem oli harem tok blong Esikel, mo olsem wanem tede?
9 Taem profet Esikel i stap gohed blong talemaot mesej blong Jeova long kingdom blong Isrel mo Juda we oli gat fasin “agens,” wanwan man i glad long wanem we Esikel i talem. (Esikel 2:3) Jeova i talem se: “Oli stap luk yu olsem we yu wan man we i stap plei long gita, i stap singsing long ol sing blong switat, mo voes blong hem i naes we i naes.” (Esikel 33:32) Nating se ol man ya oli laekem ol tok blong Esikel, oli no mekem ol tok ya i wok long laef blong olgeta. ?Olsem wanem tede? Taem smol grup blong ol tabu Kristin mo ol fren blong olgeta, oli stap wok strong blong talemaot mesej blong Jeova, samfala man oli wantem harem ol blesing we bambae oli kamaot aninit long Kingdom, be oli no soem fasin tangkiu from ol blesing ya. Olgeta ya, oli no wantem kam disaepol mo joen long wok ya blong tekem kakae long garen.
10, 11. ?Long fashaf blong ol yia 1900, ol Witnes oli mekem wanem blong talemaot mesej we i save givim laef, mo wanem frut i kamaot?
10 Be i gat plante man tu we oli gat tangkiu from wok ya blong tekem kakae long garen, nao oli joen long wok blong talemaot mesej blong God. Ol mesej blong jajmen agensem rabis wol blong Setan i bin kamaot klia long sam haf blong Kristin asembli long ol yia 1922 kasem 1928. Ol mesej ya, oli bin kamaot long plante radio stesen. Samtaem afta, ol man blong God oli seremaot plante pepa we i karem mesej ya.
11 Long en blong ol yia 1930, wan niufala rod blong givim witnes i open—hemia ol maj blong prij. Fastaem, ol man blong Jeova oli hangem ol bigfala kad, wan long fored mo wan long baksaed, mo oli maj wetem blong talemaot ol pablik tok. Biaen, ol kad ya oli karem ol tok ya se, “Skul i wan trap mo wan kruked bisnes” mo “Mekem Wok Blong God Mo Kraes We i King.” Taem oli maj wetem ol kad ya long rod oli pulum tingting blong ol man we oli stap pas. Wan brata we i bin joen oltaem blong maj wetem ol kad ya long ol bisi rod long London, Inglan, i talem se, ‘Samting ya i mekem se ol man oli savegud ol Witnes blong Jeova mo i mekem se ol Witnes oli no fraet.’
12. ?Taem yumi stap talemaot mesej blong jajmen blong God, wanem narafala samting i kam klia, mo naoia hu i stap joen long wok blong prij?
12 Taem yumi stap talemaot ol mesej blong jajmen blong God, sam narafala gudfala samting oli kam klia, we oli joen long mesej ya blong Kingdom. Fasin blong no fraet blong givim witnes long olgeta ples long wol, i givhan long yumi blong faenem ol gudfala man. (Matiu 10:11) Long ol yia 1920 mo 1930, plante long ol laswan tabu man oli lesin long tok we i singaot olgeta blong tekem kakae long garen. Ale, long wan asembli long 1935, wan nambawan nius i kamaot. Nius ya, hem i long saed blong nambawan fiuja blong “bigfala hip” blong “ol narafala sipsip” we bambae oli laef long paradaes long wol ya. (Revelesen 7:9; Jon 10:16) Olgeta ya oli bin obei long mesej blong jajmen blong God mo oli joen wanples wetem ol tabu man blong talemaot gud nius ya we i save sevem laef.
13, 14. (a) ?Olsem wanem Ol Sam 126:5, 6 i save leftemap tingting blong yumi? (b) ?Wanem bambae i hapen sipos yumi gohed blong planem sid mo putum wota long hem?
13 Ol Sam 126:5, 6 i rili leftemap tingting blong ol man blong God we oli stap tekem kakae long garen, antap moa, olgeta we narafala i stap mekem i nogud long olgeta. Vas ya i talem se: “I gat ol man blong mifala we taem oli stap planem kakae long garen blong olgeta, oli stap harem nogud, oli stap krae. Be taem oli tekemaot kakae long garen ya, plis yu mekem olgeta oli glad. . . . Ol man ya, taem oli go planem kakae long garen, oli stap harem nogud, oli stap krae. Be biaen, taem oli go tekemaot kakae long garen ya oli karem i kam, bambae oli singsing from we oli glad we i glad long kakae ya.” Ol tok ya we man blong raetem Ol Sam i talem long saed blong fasin blong planem mo tekem kakae long garen, oli soemaot se Jeova i kea mo i stap blesem smol grup blong ol prisena we oli aot long Babilon, oli gobak long kantri blong olgeta. Olgeta ya oli glad tumas taem oli aot long Babilon, be maet oli krae taem oli stap planem sid long graon blong olgeta we oli no bin wokem long ol 70 yia we oli kalabus. Be olgeta we oli no lego wok ya blong planem kakae long garen mo bildim bakegen ol haos, oli kasem gudfala frut mo oli haremgud tumas from hadwok blong olgeta.
14 I tru, yumi harem nogud taem yumi kasem traem. Yumi harem nogud tu, taem yumi, no ol brata sista blong yumi i safa from we yumi traem holem ol gudfala fasin. (1 Pita 3:14) Long wok ya blong tekem kakae long garen, maet fastaem i hadwok from we i luk olsem se i nogat wan samting we i soem se bambae wok blong yumi i karem frut. Be sipos yumi gohed blong planem sid mo putum wota long hem, bambae God i mekem sid ya i gru, nomata we yumi ting se i no save gru. (1 Korin 3:6) Ol gudfala frut we oli kamaot from wok we yumi stap mekem blong seremaot Baebol mo ol buk we oli tokbaot Baebol, oli soemaot samting ya.
15. ?Wanem eksampol i soem se ol Kristin buk oli givhan bigwan long wok ya blong tekem kakae long garen?
15 Tingbaot eksampol blong wan man we nem blong hem Jim. Taem mama blong hem i ded, hem i faenem long haos blong hem buk ya, Life—How Did It Get Here? By Evolution or by Creation? * Jim i laekem wanem we hem i ridim long buk ya. Ale hem i storian wetem wan Witnes we hem i mitim long rod, mo i wantem se Witnes ya i visitim hem bakegen. Long rod ya, Jim i stadi Baebol. Hem i gohedgud long trutok, i givim laef blong hem long Jeova, mo i tekem baptaes. Hem i storian wetem ol memba blong famle blong hem, mo i tokbaot wanem we hem i bin lanem. Nao, sista mo brata blong hem, tufala i kam Witnes blong Jeova, mo biaen Jim i gat janis blong wok fultaem long Betel long London.
Oli Glad Nating We Ol Man i Ronem Olgeta
16. (a) ?From wanem gudfala frut i kamaot long wok ya blong tekem kakae long garen? (b) ?Jisas i givim wanem woning long saed blong samting we i save kamaot from wok blong prij, be yumi mas gat wanem fasin taem yumi toktok wetem ol man?
16 ?From wanem i gat plante gudfala frut i kamaot long wok ya blong tekem kakae long garen? From we ol tabu Kristin wetem ol fren blong olgeta oli folem advaes ya blong Jisas se: “Ol samting ya we mi mi talem long yufala long tudak, yufala i mas talemaot bakegen long delaet. Mo ol samting ya we mi stap tok smosmol blong talem long sora blong yufala, yufala i mas singaot bigwan blong talemaot long fes blong ol man.” (Matiu 10:27) Be yumi save se bambae yumi fesem hadtaem from we Jisas i givim woning se: “Bambae man i save letem stret brata blong hem i go long han blong olgeta ya, blong oli kilim hem i ded. Mo bambae man i save letem stret pikinini blong hem i go, blong oli kilim hem i ded. Mo ol pikinini tu bambae oli save girap, oli agens long papa mo mama blong olgeta, oli save letem tufala i go ded olsem.” Jisas i talem tu se: “I nogud yufala i ting se mi mi kam blong mekem olgeta man long wol oli stap kwaet. Mi mi no kam blong putum pis nomo, mi kam blong mekem ol man oli seraot tu, oli faet.” (Matiu 10:21, 34) Hemia i no min se Jisas i wantem seraotem ol famle. Be, samtaem gud nius i mekem se wan famle i seraot. Ol man blong God tede tu, oli no wantem seraotem ol famle. Taem yumi visitim ol famle, yumi no gat tingting blong mekem samting ya. Yumi wantem se ol famle oli akseptem gud nius. From samting ya, yumi traem blong toktok gud wetem olgeta memba blong wan famle long fasin we i kaen. Yumi wantem talemaot mesej blong yumi long rod we i save pulum intres blong olgeta we oli save “kasem laef ya we i no save finis.”—Ol Wok 13:48.
17. ?Olsem wanem olgeta we oli sapotem hae rul blong Jeova oli defren long ol narafala man, mo wanem wan eksampol long saed ya?
17 Mesej blong Kingdom i mekem se ol man we oli sapotem hae rul blong God oli defren long ol narafala man. Eksampol, tingbaot ol brata blong yumi long taem blong Nasnal Sosialis gavman long Jemani. Oli defren long ol narafala man from we ‘samting we i blong Sisa, oli givimbak long Sisa. Mo samting we i blong God, oli givimbak long God.’ (Luk 20:25) Yes, ol man blong Jeova oli stanap strong mo oli no wantem brekem ol rul blong Baebol. Oli defren olgeta long ol lida blong skul mo ol giaman Kristin we oli joen wetem Krisendom. * (Aesea 2:4; Matiu 4:10; Jon 17:16) Profesa Christine King, wan woman we i raetem buk ya The Nazi State and the New Religions, i talem se: “Ol Witnes nomo, gavman [blong Nasi] i no naf blong winim olgeta. Nating se plante taosen blong olgeta oli ded, wok blong olgeta i gohed. Mo long Mei 1945, skul blong ol Witnes blong Jeova i laef yet, be Nasnal Sosialis gavman i no moa stap.”
18. ?Ol man blong Jeova oli soemaot wanem fasin nating se narafala i mekem i nogud long olgeta?
18 Samting we i mekem ol man oli sapraes tumas, hemia fasin we ol man blong Jeova oli soem taem ol narafala oli mekem i nogud long olgeta. Maet ol lida blong gavman oli sek long bilif blong yumi, be oli sapraes bigwan taem oli luk se yumi no givimbak long ol man ya we oli mekem i nogud long yumi. Eksampol, ol Witnes we oli no ded long Holokos, * plante taem oli soem bigfala glad taem oli tingtingbak long taem ya. Oli save se Jeova nao i givim “paoa ya we i bigwan tumas.” (2 Korin 4:7) Ol tabu man we oli stap wetem yumi oli sua fulwan se ‘God i raetemdaon nem blong olgeta i stap long heven finis.’ (Luk 10:20) Fasin blong olgeta blong stanap strong longtaem i givim hop long olgeta mo i neva mekem oli harem nogud. Ol narafala man blong tekem kakae long garen, we oli gat hop blong laef foreva long wol ya, olgeta tu oli gat strong tingting.—Rom 5:4, 5.
Gohed Long Wok Blong Tekem Kakae Long Garen
19. ?Wanem sam rod blong prij we oli karem gudfala frut long wok blong prij?
19 Yumi no save hamas taem i stap yet blong mekem wok ya blong tekem kakae long garen. Be, naoia, yumi mas tingbaot se ol man blong tekem kakae long garen oli gat sam spesel rod blong mekem wok ya. Long sem fasin, yumi sua se bambae yumi gat gudfala frut taem yumi folem ol spesel rod blong prij we ol narafala oli traem finis. Pol i talem long ol Kristin se: “Mi mi [talem] strong long yufala, se plis yufala i folem fasin blong mi.” (1 Korin 4:16) Taem Pol i mit wetem ol elda blong Efesas long Maelitas, hem i talem long olgeta se hem i no haedem wan samting nating long olgeta. Hem i ‘stap tijim olgeta long fes blong ol man, mo long ol haos blong olgeta.’ (Ol Wok 20:20, 21) Timoti, wan fren blong Pol, i lanem blong folem ol fasin blong aposol Pol, taswe hem i save tijim ol Kristin long Korin long ol semfala fasin ya. (1 Korin 4:17) God i blesem fasin we Pol i yusum blong tijim ol man. Yumi tu, sipos yumi gohed blong talemaot gud nius long fes blong ol man mo long ol haos wanwan, long ol visit mo ol Baebol stadi, mo long eniples we yumi save faenem man long hem, bambae God i blesem yumi.—Ol Wok 17:17.
20. ?Olsem wanem Jisas i soemaot se i gat bigfala wok blong tekem kakae long saed blong spirit, mo olsem wanem samting ya i tru long ol yia we oli jes pas?
20 Afta we Jisas i givim witnes long wan woman Sameria klosap long Saeka long yia 30 K.T., Jisas i tokbaot wok blong tekem kakae long saed blong spirit. Hem i talem long ol disaepol blong hem se: “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae nao. Man blong tekem kakae i kam, hem i stat kasem pei blong hem finis, mo kakae ya we hem i stap tekem i kam, hem i blong laef ya we i no save finis. Long fasin ya, man we i go blong planem garen, wetem man we i go blong karem kakae i kam, tufala evriwan i save glad.” (Jon 4:34-36) Maet Jisas i luk ol gudfala frut we oli kamaot taem hem i prij long woman Sameria, from we ol tok we woman ya i talem oli pulum plante man oli bilif long Jisas. (Jon 4:39) Long ol yia we oli jes pas, ol gavman blong sam kantri oli tekemaot tabu we oli bin putum long wok blong ol Witnes blong Jeova, no oli rejistarem skul blong olgeta, mekem se i gat sam niufala garen bakegen oli rere. Frut blong samting ya, hemia se wok blong tekem kakae long saed blong spirit i stap gohedgud. Yes, long olgeta ples long wol, yumi kasem bigfala blesing taem yumi stap gohed blong tekem kakae long saed blong spirit.
21. ?From wanem yumi gat risen blong gohed blong tekem kakae long garen wetem glad?
21 Taem ol kakae long garen i rere, ol man blong wok oli mas hareap blong tekemaot ol kakae. Oli no mas wet. Tede, yumi nidim blong wok strong mo tingbaot se wok ya i impoten tumas from we yumi stap laef long “en blong wol ya.” (Daniel 12:4) Yes, ol man blong Jeova oli kasem traem, be oli gat bigfala wok blong tekem kakae long garen bitim bifo. Taswe, naoia hem i taem blong glad. (Aesea 9:3) !Olsem ol hapi man blong wok, i gud we yumi gohed long wok ya blong tekem kakae long garen!
[Ol futnot]
^ Wan buk we ol Witnes blong Jeova oli wokem.
^ Ol skul we oli giaman se oli Kristin.
^ Rabis wok blong ol Nasi blong kilim i ded plante man long Seken Wolwo.
?Bambae Yu Yu Ansa Olsem Wanem?
• ?Olsem wanem Masta blong garen i ansa, taem ol man blong wok oli askem hem blong sanem moa man i kam?
• ?Nating se ol man ‘oli no laekem yumi nating,’ oltaem yumi gat wanem tingting?
• ?From wanem yumi glad nating se ol man oli mekem i nogud long yumi?
• ?From wanem yumi mas tingbaot se i impoten tumas blong gohed long wok ya blong tekem kakae long garen?
[Kwestin]
[Tok blong pija long pej 17]
Ol enjel oli stap givhan long olgeta we oli stap tekem ol kakae long saed blong spirit
[Tok blong pija long pej 18]
Ol maj blong prij save i mekem plante man oli kasem mesej blong Kingdom
[Tok blong pija long pej 18]
Yumi planem mo putum wota long hem, be God i mekem i gru