!Karem Kakae Long Garen Wetem Glad!
!Karem Kakae Long Garen Wetem Glad!
“I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.”—MATIU 9:37, 38.
1. ?Wanem i halpem yumi blong gohed long wok blong God?
TAEM yumi tingtingbak long dei we yumi tekem baptaes olsem wan man blong Jeova maet yumi harem olsem we samting ya i hapen yestede nomo, nating se plante yia finis i pas, no nogat. Yumi stat yusum ful laef blong yumi blong presem Jeova. Bigfala samting long tingting blong yumi hemia blong mekem wok blong Jeova wetem glad, taswe yumi stap yusum evri janis we yumi kasem blong halpem ol narafala blong oli harem mo akseptem mesej blong Kingdom. (Efesas 5:15, 16) Kam kasem naoia, yumi bin bisi mo yumi luk se taem i pas kwik, yes yumi “gat plante wok blong mekem long wok blong Masta blong yumi.” (1 Korin 15:58, NW ) Nating se yumi fesem plante problem, glad i stap pusum yumi blong gohed long wok blong Jeova.—Nehemaea 8:10.
2. ?Wanem i save givim glad long yumi blong gohed long wok blong karem kakae long garen?
2 Wok blong yumi ol Kristin i olsem wok blong karem kakae long garen. Jisas i talem se wok ya blong hivimap ol man we bambae oli kasem laef we i no save finis, hem i olsem wok ya blong karem kakae long garen. (Jon 4:35-38) From we yumi stap joen long wok ya, blong givhan long yumi i gud sipos yumi tingbaot glad blong ol faswan Kristin taem oli stap mekem wok ya. Bambae yumi tokbaot tri samting we oli save givim glad long yumi tede blong gohed long wok ya blong karem kakae long garen. Ol samting ya hemia, (1) mesej blong yumi we i givim hop, (2) gudfala frut we yumi kasem, mo (3) pis we yumi gat.
Ol Man Blong Karem Kakae Long Garen
3. ?Wanem i givim glad long ol faswan man blong Jisas?
3 Laef blong ol faswan man blong karem kakae long garen—antap moa, ol 11 trufala man blong Jisas—i jenis bigwan long 33 K.T. * taem oli go long wan hil long Galili blong mitim Kraes we i laef bakegen. (Matiu 28:16) I gat “moa long faef handred” brata oli stap long taem ya. (1 Korin 15:6) Oli stap tingbaot tok we Jisas i bin talem long olgeta, se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ (Matiu 28:19, 20) Nating se ol man oli mekem i nogud long olgeta, ol faswan man blong Jisas oli glad tumas long wok ya blong karem kakae long garen from we oli luk se ol kongregesen blong ol man blong Kraes oli stap gru long plante ples. Biaen, ‘oli talemaot gud nius ya long olgeta man long wol.’—Kolosi 1:23; Ol Wok 1:8; 16:5.
4. ?Kraes i sanem ol disaepol blong hem oli go blong mekem wanem?
4 Taem Jisas i statem minista wok blong hem long Galili, hem i singaot ol 12 aposol mo i sanem olgeta oli go talemaot mesej ya se: “Taem blong God i kam King blong olgeta man long wol, i kam klosap finis.” (Matiu 10:1-7) Jisas hem wan i bin “wokbaot, i stap pas long ol taon mo ol vilej [long Galili], mo i stap tij insaed long ol haos blong prea blong olgeta. Hem i stap talemaot gud nius ya we God i stap kam King blong olgeta man long wol, mo i stap mekem olgeta we oli sik, mo olgeta we bodi blong olgeta i nogud, oli gud bakegen.” Jisas i sore tumas long wan bigfala hip man, “from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:35, 36) Nao, hem i talem long ol disaepol blong hem se: “Yufala i luk. I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya [Jeova God], blong hem i save sanem sam moa man oli kam blong karem ol kakae ya i go long haos blong hem.” (Matiu 9:37, 38) Taem Jisas i stap mekem minista wok blong hem long Judia, hemia long ol laswan sikis manis blong hem long wol ya, hem i talem bakegen se i rili nidim ol man blong karem kakae long garen. (Luk 10:2) Long tufala taem ya, hem i sanem ol man blong hem blong mekem wok ya we i olsem wok blong karem kakae long garen.—Matiu 10:5; Luk 10:3.
Mesej Blong Yumi i Givim Hop
5. ?Wanem kaen mesej we yumi stap talemaot?
5 Tede, yumi ol man blong Jeova, yumi rere blong obei long tok ya we i singaot yumi blong karem kakae long garen. Wan samting we i mekem yumi glad tumas, hemia se yumi stap talemaot wan mesej we i givim hop long ol man we tingting blong olgeta i foldaon, oli stap harem nogud. Olsem ol disaepol blong Jisas long faswan handred yia, yumi gat bigfala blesing blong talemaot gud nius—wan mesej we i givim trufala hop—long olgeta we “oli olsem ol sipsip we i no gat man blong lukaot long olgeta.”
6. ?Long faswan handred yia, ol aposol oli stap bisi long wanem wok?
6 Long medel blong faswan handred yia, aposol Pol i stap bisi blong talemaot gud nius. Wok we hem i mekem i karem plante frut. From we taem hem i raetem leta i go long ol Kristin long Korin, hemia samwe long 55 K.T., hem i talem se: “Ol brata mo sista. Mi mi wantem talemaot gud nius ya bakegen long yufala olsem we mi talemaot long yufala bifo. Gud nius ya, yufala i kasem finis, mo bilif blong yufala i stap stanap strong long hem yet.” (1 Korin 15:1) Ol aposol mo ol faswan Kristin oli bin wok strong blong karem kakae long garen. I tru, Baebol i no talem stret hamas aposol oli laef biaen long impoten taem ya we Jerusalem i lus long 70 K.T. Be, yumi save se 25 yia biaen, aposol Jon i stap prij yet.—Revelesen 1:9.
7, 8. ?Wanem mesej blong hop we ol man blong Jeova oli stap gohed strong moa blong talemaot?
7 Ale, long ol handred yia we oli kam biaen, haeman blong Krisendom, * we oli “Man blong Brekem Loa,” i gat bigfala paoa long ol man. (2 Tesalonaeka 2:3) Be long en blong ol yia 18 handred, olgeta we oli wantem folem faswan trufala Kristin Skul, oli akseptem mesej blong hop, mo oli talemaot Kingdom. Yes, stat long taem we magasin ya i kamaot (Julae 1879), hem i karem ol nem ya, “Herald of Christ’s Presence,” “Herald of Christ’s Kingdom,” no “Talemaot Kingdom Blong Jeova.”
8 Long 1914, Jisas Kraes i stat rul olsem king long Kingdom blong God long heven. Mo naoia, yumi stap gohed strong moa blong talemaot mesej blong hop. ?From wanem? From we i no longtaem, bambae rul blong Kingdom i spolem rabis wol ya. Hemia wan long ol nambawan blesing we yumi gat. (Daniel 2:44) ?I gat wan mesej we i moa gud i winim mesej ya we yumi stap talemaot? ?Mo i gat wan glad we i bigwan moa i winim glad we yumi gat blong talemaot Kingdom bifo we “bigfala trabol” i kam?—Matiu 24:21; Mak 13:10.
Gudfala Frut We Yumi Kasem
9. ?Jisas i talem wanem long ol man blong hem, mo ol man oli mekem wanem taem oli harem mesej blong Kingdom?
9 Wan narafala samting we i givim glad long yumi taem yumi stap karem kakae long garen, hemia gudfala frut we yumi kasem taem yumi stap pulum ol man i kam disaepol, nao oli joen wetem yumi long wok ya. Long yia 31 mo 32 K.T., Jisas i talem long ol man blong hem se: “Taem yufala i go long wan taon no wan vilej, yufala i mas faenem wan gudfala man.” (Matiu 10:11) I no evri man we oli gudfala man. Yumi luksave samting ya long fasin blong ol man we yumi talemaot mesej blong Kingdom long olgeta. Nating se i olsem, ol disaepol blong Jisas oli wok strong blong talemaot gud nius long eni man we oli faenem.
10. ?Olsem wanem Pol i gohed blong faenem ol gudfala man?
10 Afta we Jisas i ded mo i laef bakegen, ol man blong hem oli gohed strong moa blong faenem ol gudfala man. Pol i mekem plante toktok wetem ol man Jiu long haos prea blong olgeta mo tu wetem ol man we hem i mitim olgeta long ples blong maket long Atens. Taem hem i givim witnes long Areopagus, hemia hae kot long taon ya blong ol man Gris, “sam man oli joen long hem, mo oli bilif long Jisas. Long olgeta ya, i gat wan man, nem blong hem Denis, we i memba blong kaonsel ya. Mo i gat wan woman we nem blong hem Damaris, mo sam narafala man bakegen.” Long eni ples we Pol i go long hem, hem i soem nambawan eksampol taem hem i stap prij “long fes blong ol man, mo long ol haos” wanwan.—Ol Wok 17:17, 34; 20:20.
11. ?Sam yia bifo, oli yusum wanem rod blong givim witnes?
11 Long en blong ol yia 18 handred, ol Kristin we tabu spirit i makemaot olgeta oli wok strong blong faenem ol gudfala man. Long magasin ya, Zion’s Watch Tower blong Julae/Ogis 1881, wan haf we nem blong hem, “Tabu Spirit i Makemaot Olgeta Blong Prij,” i talem se: “Wok blong talemaot gud nius . . . i stap go kasem ‘olgeta we oli gat tingting daon’—hemia olgeta we oli rere mo oli wantem lesin. Sam long olgeta ya bambae oli kam olsem bodi blong Kraes, hemia olgeta we bambae oli rul wetem hem.” Plante taem, ol man blong God we oli stap karem kakae long garen, oli bin go stanap afsaed long ol jos blong givim ol pepa we oli karem ol mesej blong Baebol long ol man we oli stap kamaot long jos. Ol pepa ya, oli save pulum intres blong ol gudfala man. Afta we ol Witnes oli skelemgud ol frut we i kamaot from fasin ya blong givim witnes, Wajtaoa blong Mei 15, 1903, i talem long ol man blong karem kakae long garen se, oli mas seremaot ol pepa ya “long ol haos wanwan, long Sande moning.”
12. ?Long wanem rod, wok blong prij i bin karem moa frut? Talem wan eksampol.
12 Long ol yia we oli jes pas, yumi no prij long ol haos wanwan nomo, be yumi folem narafala rod blong prij long ol man. Rod ya i wok gud long ol rij kantri we ol man oli stap ronem tumas ol samting long laef, mekem se plante man oli no stap long haos blong olgeta taem yumi prij. Long Inglan, i gat tufala Witnes we oltaem, oli luk we ol man oli stap tekem bas blong gobak long haos afta we oli spel long sanbij. Ale, tufala i no fraet, tufala i go seremaot Wajtaoa mo Wekap! long ol man we oli stap kam long ol bas ya. Long wan manis, tufala i seremaot 229 Wajtaoa mo Wekap! Tufala i talem se: “Mitufala i no fraet blong prij long si fran, long ol ofis, no long eni narafala ples we i no isi blong prij long hem. Mitufala i save se oltaem, Jeova i stap wetem mitufala.” Tufala i faenem wan man we i intres, mo oltaem tufala i karem ol niufala magasin i go long hem, mo tufala i statem Baebol stadi wetem man ya. Sista ya wetem fren blong hem, tufala tugeta i bin mekem wok blong paenia.
13. ?Long sam ples, yumi nidim blong mekem wanem jenis long wok blong prij?
13 Taem yumi stap gohed blong lukaot ol gudfala man, maet long sam ples, yumi mas skelemgud minista wok blong yumi. I tru, plante Witnes oli lan finis blong prij long ol haos wanwan long Sande moning. Be, long sam ples i no stret blong go long haos blong ol man long moning from we oli stap slip yet. Plante Witnes oli jenisim program blong olgeta, nao oli prij long aftenun, afta long ol Kristin miting. Mo oli kasem plante gudfala frut from. Las yia, namba blong ol man blong talemaot Kingdom long fulwol i go antap long 2.3 pesen. Samting ya i givim bigfala ona long Masta blong garen mo i karem glad i kam long yumi.
Holemtaet Pis Long Wok Blong Karem Kakae Long Garen
14. ?Wanem tingting yumi mas gat taem yumi stap talemaot mesej blong Kingdom, mo from wanem?
14 Wan narafala samting we i givim glad long yumi, hemia ol fasin we oli givim pis long yumi taem yumi stap karem kakae long garen. Jisas i talem se: “Taem yufala i go stap long wan haos, yufala i mas toktok gud long olgeta se, ‘Pis i stap wetem yufala.’ Sipos olgeta long haos ya oli glad blong tekem yufala, pis ya i save stap long olgeta.” (Matiu 10:12, 13) Fasin blong ol man Hibru blong talem halo mo semfala tok we Grik haf blong Baebol i yusum blong talem halo, i karem tingting ya se ‘Pis i stap wetem yu.’ Yumi holem tingting ya taem yumi stap talemaot gud nius long ol man. Yumi hop se bambae oli lesin long mesej blong Kingdom. Olgeta we oli lesin, oli gat hop blong frengud bakegen wetem God taem oli tanem tingting from sin blong olgeta, jenisim fasin blong olgeta, mo mekem wok blong hem. Nao, pis we oli gat wetem God bambae i lidim olgeta blong kasem laef we i no save finis.—Jon 17:3; Ol Wok 3:19; 13:38, 48; 2 Korin 5:18-20.
15. ?Taem yumi mitim ol man we oli no intres, olsem wanem yumi save holemtaet pis long wok blong prij?
15 ?Olsem wanem yumi save holemtaet pis taem ol man oli no wantem lesin long yumi? Jisas i talem se: “Sipos olgeta long haos ya oli glad blong tekem yufala, pis ya i save stap long olgeta. Be sipos oli no glad long yufala, yufala i mas prea blong God i tekemaot pis ya long olgeta bakegen.” (Matiu 10:13) Long Gospel blong Luk, we i tokbaot ol 70 disaepol we Jisas sanem olgeta oli go prij, Jisas i talem se: “Sipos i gat man long ples ya we i wantem pis, prea ya blong yufala bambae i gat frut blong hem. Be sipos i no gat man olsem i stap, frut blong prea ya blong yufala bambae i kambak long yufala bakegen.” (Luk 10:6) Taem yumi stap talemaot gud nius long ol man, yumi mas gat pis mo kaen fasin. Sipos wan man i no intres, i komplen, no i mekem i strong long yumi, hem wan i mekem se mesej blong pis we yumi stap talemaot i ‘kambak long yumi bakegen.’ Samting ya i no save tekemaot pis blong yumi. Pis ya hem i wan frut blong tabu spirit blong Jeova.—Galesia 5:22, 23.
Wan Nambawan Mak Blong Ol Man We Oli Karem Kakae Long Garen
16, 17. (a) ?Wanem mak blong yumi taem yumi mekem visit bakegen? (b) ?Olsem wanem yumi save halpem olgeta we oli gat kwestin long saed blong Baebol?
16 Yumi ol man blong karem kakae long garen, yumi glad tumas blong joen long wok ya blong hivimap ol man we bambae oli kasem laef we i no save finis. Mo yumi glad tumas taem wan man we yumi prij long hem i lesin, i wantem lanem moa, mo i kam wan man “we i wantem pis.” Maet hem i gat plante kwestin long saed blong Baebol, mo yumi no save ansarem evri kwestin blong hem long wan visit nomo. Mo i tru se, maet i no stret blong stap longtaem tumas blong storian wetem hem long faswan visit. ?Yumi save mekem wanem nao? Yumi save tingbaot mak ya we ol brata sista blong yumi oli bin tingbaot 60 yia bifo.
17 “Olgeta Witnes blong Jeova oli mas rere blong mekem Baebol stadi.” Tok ya i kamaot long namba tri buk blong buklet ya Model Study we oli wokem long 1937 kasem 1941. Buk ya i gohed i se: “Olgeta man blong talemaot [Kingdom] oli mas reregud blong halpem ol gudfala man we oli soem intres long mesej blong Kingdom. Yumi mas visitim ol man ya, ansarem ol defren kwestin . . . , mo biaen, mekem stadi . . . kwiktaem.” Yes, taem yumi mekem ol visit bakegen, mak blong yumi i blong statem Baebol stadi mo gohed oltaem long stadi ya. * I gud we yumi tingbaot man ya we i soem intres mo yumi frengud wetem hem. Samting ya bambae i halpem yumi blong reregud mo blong mekem stadi we i karem frut.
18. ?Olsem wanem yumi save halpem ol niuwan blong kam disaepol blong Jisas Kraes?
18 Buk ya, Save Blong Lidim Yu Long Laef We i No Save Finis mo ol buklet olsem ?Wanem Samting We God i Wantem Yumi Blong Mekem?, oli save halpem yumi blong mekem ol Baebol stadi we oli karem frut mo blong givhan long ol niuwan blong kam disaepol. Yumi mas traehad blong folem eksampol blong Bigfala Tija blong yumi, Jisas Kraes. Nao taem ol Baebol studen ya oli luk we yumi gat pis, glad, yumi stap tru long narafala, mo yumi gat respek long Jeova mo ol rul blong hem, samting ya bambae i givhan bigwan long olgeta. Taem yumi halpem ol niuwan blong faenem ansa blong ol kwestin blong olgeta, yumi mas traem bes blong yumi blong tijim olgeta blong save olsem wanem blong ansa long man we i askem ol kwestin ya long olgeta. (2 Timoti 2:1, 2; 1 Pita 2:21) Las yia, ol man we oli stap karem kakae long garen raonabaot long wol, oli mekem 4,766,631 Baebol stadi. Samting ya i givim bigfala glad long olgeta. Bambae yumi glad tumas sipos yumi wan long olgeta ya we i stap karem kakae long garen, we yumi joen long wok ya blong mekem ol Baebol stadi.
Glad Oltaem Blong Karem Kakae Long Garen
19. ?Long taem we Jisas i stap mekem minista wok blong hem mo smoltaem biaen, from wanem i gat plante risen blong stap glad?
19 I gat plante risen blong stap glad long taem we Jisas i stap mekem minista wok blong hem mo smoltaem biaen tu. Long taem ya, plante man oli lesin long gud nius. Bigfala glad i kamaot long Pentekos 33 K.T. taem samwe long 3,000 man oli akseptem tok blong Pita, oli kasem tabu spirit blong Jeova, mo oli joen long Isrel blong God. Tru ya, namba blong olgeta i gohed blong go antap mo glad blong olgeta i kam bigwan moa taem “evri dei, Hae God i stap sevem ol man, i stap joenem olgeta long grup ya blong ol aposol.”—Ol Wok 2:37-41, 46, 47; Galesia 6:16; 1 Pita 2:9.
20. ?Wanem i mekem se yumi glad tumas long wok ya blong karem kakae long garen?
20 Long taem ya, profet tok ya blong Aesea i kamtru se: “Yu [Jeova] yu mekem mifala [“bigfala nesen,” NW ] i harem gud tumas, yu yu mekem mifala i glad. Mifala i hapi tumas long ol samting ya we yu yu mekem, olsem we ol man oli hapi long taem we oli stap tekemaot ol kakae long garen, oli karem i kam, olsem we oli hapi tumas long taem we oli stap seraot ol samting we oli winim long taem blong faet.” (Aesea 9:3) Nating se naoia, ‘bigfala nesen’ blong ol tabu Kristin i fulap gud finis, yumi glad tumas blong luk se evri yia namba blong ol narafala man blong karem kakae long garen i stap go antap.—Ol Sam 4:7; Sekaraea 8:23; Jon 10:16.
21. ?Bambae yumi tokbaot wanem long nekis stadi?
21 Yes, yumi gat gudfala risen blong stap glad long wok ya blong karem kakae long garen. Mesej blong yumi i givim hop, yumi stap lukaot ol gudfala man, mo yumi gat ol fasin we oli blong mekem pis. Olgeta samting ya oli givim glad long yumi, ol man blong karem kakae long garen. Be, plante man oli no glad long yumi. Sem samting i hapen long aposol Jon. Oli putum hem long kalabus long aelan blong Patmos “from we mi [Jon, mi] stap talemaot tok ya we God i talem, mo we Jisas i talemaot se i tru.” (Revelesen 1:9) ?Nao, olsem wanem yumi save holemtaet glad blong yumi nating se ol man oli ronem mo agensem yumi? ?Wanem i save halpem yumi blong stanap strong nating se plante man we yumi prij long olgeta oli no intres? Long nekis stadi, Baebol bambae i halpem yumi blong ansarem tufala kwestin ya.
[Ol futnot]
^ K.T. i minim Kristin Taem.
^ Ol skul we oli giaman se oli Kristin.
^ Bifo, oli seraotem ol man we oli intres long ol smosmol grup mo mekem stadi blong olgeta. Be i no longtaem biaen, oli mekem stadi long ol wanwan man mo ol famle.—Lukluk pej 574 blong buk ya, Jehovah’s Witnesses—Proclaimers of God’s Kingdom, we ol Witnes blong Jeova oli wokem.
?Bambae Yu Yu Ansa Olsem Wanem?
• ?Wanem wok ya we i olsem wok blong karem kakae long garen?
• ?Wanem mesej we yumi stap talemaot?
• ?From wanem wok we yumi stap mekem blong faenem ol disaepol i karem gudfala frut?
• ?Olsem wanem yumi save holemtaet pis long wok ya blong karem kakae long garen?
• ?From wanem yumi stap glad oltaem long wok blong karem kakae long garen?
[Kwestin]
[Tok blong pija long pej 12]
Wok blong prij long faswan handred yia mo long ol yia 1900
[Tok blong pija long pej 13]
Olsem Pol i mekem, ol man blong karem kakae long garen tede, oli traem blong kasem ol man long evri ples
[Tok blong pija long pej 13]
Talemaot gud nius wetem kaen fasin