Wan Kwestin
Wan Kwestin
Long 1 Pita 4:3 (NW ) yumi ridim se sam Kristin oli bin “prea long ol narafala god long fasin we i brekem loa.” ?Hemia i min se i gat sam fasin blong prea long narafala god we i stret? ?God i no talem se hem i agensem mo putum tabu long evrikaen fasin blong wosipim aedol?
Yes, God i putum tabu long evrikaen fasin blong wosip long narafala god. Ol man we oli wantem se God i glad long olgeta, oli no mas prea long ol narafala god.—1 Korin 5:11; Revelesen 21:8.
Be i luk olsem se long vas ya, aposol Pita i stap minim wan narafala samting. Fastaem yumi mas tingbaot se long plante nesen bifo, bighaf blong ol man oli gat fasin ya blong wosipim ol defren kaen aedol, mo i no gat loa blong gavman we i agensem fasin ya. Hemia i min se ol loa blong ol kantri bifo oli no putum tabu long fasin blong wosipim aedol. Mo tu, i gat sam gavman we oli putumap loa we i talem stret se ol man blong olgeta oli mas wosipim aedol. Hemia nao from wanem vas ya i talem se sam Kristin oli bin ‘mekem wosip long ol aedol long fasin we i no gat loa blong blokem.’ (New World Translation, kopi blong 1950) Tingbaot taem ya we King Nebukadnesa blong Babilon i wokem wan bigfala aedol long gol. Long taem ya, trifala man blong Jeova, hemia Sadrak, Mesak mo Abednego, trifala i no wantem wosip long aedol ya.—Daniel 3:1-12.
I gat wan narafala samting tu we yumi mas tingbaot. Plante taem, ol man we oli mekem wosip long ol aedol oli folem sam kastom we oli rabis olgeta mo oli go agensem ol fasin we oli stret blong man i folem. Ol kastom ya oli pulum man blong mekem sam fasin we oli agensem loa we God i putum finis long tingting blong olgeta. (Rom 2:14, 15) Aposol Pol i tokbaot sam long ol fasin ya we oli rabis olgeta. Hem i talem se oli “stap tanem stret fasin blong woman wetem man, nao oli stap mekem ol fasin we i no stret” mo hem i se ol fasin ya oli “blong sem nomo.” Plante long ol fasin ya nao, ol man oli stap mekem taem oli wosip long narafala god. (Rom 1:26, 27) Ol man mo woman we oli joen long wosip blong ol aedol oli no stap folem ol stret fasin blong man wetem woman. From samting ya, i stret nomo we ol man oli lego ol rabis fasin ya taem oli joen long Kristin skul.
Antap long samting we yumi jes tokbaot, Jeova i talem long ol man Jiu se i tabu blong joen long olkaen fasin blong wosipim aedol we ol hiten man oli stap mekem. I klia se, fasin ya i agensem loa blong God. *—Kolosi 3:5-7.
[Futnot]
^ Long Grik hanraet, stret tok we i stap long vas blong 1 Pita 4:3 i minim “fasin blong wosipim aedol we i go agensem loa.” Long sam Inglis Baebol, ol man oli tanem tok ya i kam “wosip blong aedol we man i no gat raet blong mekem,” “wosip blong ol aedol we i tabu blong mekem,” mo “wosip long ol aedol we loa i no agri long hem.”