?Yu Yu Save Letem Wan Rong i Pas?

?SAMTAEM yu bin kros bigwan taem narafala i mekem i rong long yu? ?Yu yu hareap blong toktok taem yu luk se ol gudfala fren blong yu oli stat folem sam fasin we oli rong?

Samtaem, i nidim blong tekem strong aksin kwiktaem blong stopem wan sin we i save spolem narafala. Eksampol, long ol yia 15 handred B.K.T. *, ol rabis fasin we ol man Isrel oli mekem, klosap i pulum bigfala trabol i kam long olgeta. Long taem ya, Finehas we i smol bubu blong Eron, i tekem aksin kwiktaem mo finisim ol rabis fasin ya. Jeova God i agri long aksin ya blong Finehas. Hem i talem se: “From we pris [Finehas] i mekem samting ya . . . mi no moa kros long yufala. Fastaem mi mi kros tumas long yufala, be hem i blokem yufala blong yufala i no moa mekem wosip long narafala god ya, yufala i mekem wosip long mi nomo, nao from samting ya, mi mi no spolem yufala.”—Namba 25:1-11.

Yes, aksin we Finehas i tekem, hem i stret from we hem i blokem sin blong i no spolem narafala. ?Be olsem wanem sipos yumi stap kros kwiktaem from ol smosmol mastik we ol narafala oli mekem long yumi? Sipos yumi mekem olsem, yumi no man blong leftemap stret fasin, be yumi man we i no save letem wan rong i pas mo yumi man we yumi no luksave se narafala i save mestem samtaem. ?Wanem i save halpem yumi blong no foldaon long trap ya?

‘Jeova i Stap Fogivim Ol Sin Blong Yumi’

Jeova i “wan God we i jalus (gat strong tingting). Hem i wan God we i no save letem narafala i agensem hem.” (Eksodas 20:5, NW, futnot) God i Wokem olgeta samting, taswe hem i gat raet blong askem se yumi wosip long hem nomo. (Revelesen 4:11) Nating se i olsem, Jeova i letem ol slak fasin blong yumi oli pas. From samting ya, Deved, man blong raetem Ol Sam, i tokbaot Jeova long wan sing se: “Hae God, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem we oltaem i stap lavem man tumas, hem i gud we i gud, i bitim mak. Hem i no save gohed oltaem blong tok strong [“faenem poen,” NW ] long man, . . . Hem i no save panisim yumi stret long mak blong ol sin blong yumi, mo hem i no save givimbak ol fasin nogud ya long yumi we yumi stap mekem long hem.” Yes, sipos yumi tanem tingting blong yumi, God bambae i ‘fogivim ol sin blong yumi.’—Ol Sam 103:3, 8-10.

Jeova i save se ol man oli gat sin, taswe hem i no “save gohed oltaem blong tok strong [“faenem poen,” NW ]” long olgeta we oli tanem tingting from sin blong olgeta. (Ol Sam 51:5; Rom 5:12) Stamba tingting blong hem, hemia blong finisim sin mo ol trabol we oli kamaot from sin. Be bifo long taem ya, bambae hem i no “givimbak ol fasin nogud ya long yumi we yumi stap mekem long hem.” God i gat sore, nao hem i stap fogivim yumi tru long sakrefaes blong Jisas Kraes we i pemaot yumi. I no gat wan long yumi we i save stap laef sipos Jeova i no soem sore long yumi taem i stret blong hem i mekem olsem. (Ol Sam 130:3) !Yumi glad tumas we Papa blong yumi long heven i stap letem ol rong blong yumi oli pas, nating se hem i gat raet blong askem yumi blong wosipim hem fulwan!

I Nidim Blong Skelemgud Samting

Sipos Haefala Masta blong heven mo wol i stap letem ol rong blong yumi oli pas, yumi tu, yumi mas mekem sem mak. Fasin ya blong letem rong i pas i min se yumi “holem longfala tingting taem narafala i gat wan tingting no fasin we i defren long yumi.” ?Yumi rere blong soemaot longfala tingting mo no wari tumas taem ol narafala oli talem no mekem sam samting we maet yumi no agri long hem, be oli no wan bigfala sin?

I tru, yumi mas lukaot blong no letem enikaen rong nomo i pas. Eksampol, plante haeman blong jos oli letem nomo we ol pris blong olgeta oli gohed blong mekem trabol long ol smol boe mo gel. Samting ya i mekem bigfala trabol i kamaot. Wan  man blong givim nius long Aerlan, i talem se: “Ol haeman blong jos oli talem se samting we i hapen long ol pikinini ya i kamaot from sin nomo, ale, oli no stretem pris we i mekem rong ya, oli jes sanem hem i go [long wan narafala ples].”

?Fasin ya blong no stretem man olsem, hem i rili wan gudfala eksampol blong letem wan rong i pas? !Nogat! Tingbaot sipos wan dokta blong katem man i stap kilim i ded no spolem ol sikman, be ol dokta long hospital oli no karemaot hem long wok ya, be oli jes sanem hem i go long narafala hospital. Sipos ol dokta oli letem rong blong man ya “i pas,” maet hemia from we oli wantem holemtaet gudfala fasin fren blong olgeta wetem hem. ?Be, olsem wanem long ol man we oli lusum laef blong olgeta no oli kasem bigfala kil long bodi blong olgeta from man ya we i no kea, no i mekem ol fasin we oli agensem loa?

Be i gat denja tu sipos man i no save letem wan rong nating i pas. Taem Jisas i stap long wol, sam man Jiu we oli kolem olgeta ol Silot, oli yusum eksampol blong Finehas blong traem pruvum se wok blong olgeta we i bitim mak, i stret nomo. Wan fasin we ol Silot oli bitim mak long hem, hemia taem oli “haed long medel blong ol hip man long Jerusalem, long taem blong ol bigfala lafet mo ol narafala taem olsem, mo oli stikim ol enemi blong olgeta wetem naef.”

I tru se yumi ol Kristin, bambae yumi neva mekem olsem ol Silot. Bambae yumi no kilim i ded eni man we i mekem yumi harem nogud. Be samtaem, yumi stap mekem samting we i olsem se yumi kilim narafala. Maet yumi toktok nogud long saed blong hem from we yumi no laekem hem. Sipos yumi gat fasin blong letem wan rong i pas, bambae yumi no toktok nogud long saed blong narafala.

Ol Farisi blong faswan handred yia, olgeta tu oli no save letem wan rong i pas. Oltaem, oli stap jajem ol narafala mo oli no wantem luksave se ol man oli gat sin. Ol Farisi ya oli praod tumas, oli lukluk daon long ol man we oli no gat nem, oli stap tok nogud long ol man se “God i kros long olgeta” finis. (Jon 7:49) I stret nomo we Jisas i tok agensem ol Farisi ya we oli ting se oli stretgud olgeta. Hem i talem se: “Ol tija blong Loa mo ol Farisi. Sore tumas long yufala. Yufala i gat tu fes. Yufala i stap mekem taet blong yufala long ol smosmol lif ya, min mo dil mo kamin, we man i stap putum long kakae. Hemia i stret, i folem Loa, be yufala i tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem. Hemia nao ol nambawan tok we yufala i mas folem. Be yufala i no mas lego ol taet ya blong yufala tu.”—Matiu 23:23.

Taem Jisas i talem tok ya, hem i no stap minim se Loa blong Moses i no impoten. Hem i wantem soem se, blong folem “ol nambawan tok” blong Loa, man i mas skelem gud ol samting mo i mas gat fasin sore. !Jisas mo ol disaepol blong hem oli defren olgeta long ol Farisi mo ol Silot we oli jajem man long evri samting!

I tru, Jeova God mo Jisas Kraes, tufala i neva agri long fasin nogud. I no longtaem, bambae God i ‘givim panis long olgeta we oli no save ona long hem, mo long olgeta we oli no save obei long gud nius.’ (2 Tesalonaeka 1:6-10) Jisas i strong blong holem ol fasin we i stret. Be oltaem, hem i soem fasin blong Papa blong hem long heven. Hem i soem longfala tingting, sore, mo lav long ol man we oli wantem mekem fasin we i stret. (Aesea 42:1-3; Matiu 11:28-30; 12:18-21) !Jisas i soemaot wan nambawan eksampol long yumi!

Longfala Tingting Blong No Kros Long Narafala

Taem yumi wantem gat strong tingting blong mekem wanem we i stret, yumi mas folem advaes ya blong aposol Pol se: “Yufala i no mas kros long yufala, mo taem wan long yufala i faenem poen agens long narawan long yufala, be oltaem nomo tufala ya i mas fofogivim tufala. Jeova i glad blong fogivim yufala finis, nao long sem fasin, yufala tu i mas glad blong fogivim yufala.” (Kolosi 3:13, NW; Matiu 6:14, 15) Yes, evriwan i sinman. Taswe, yumi mas rere blong letem ol smosmol sin mo mastik blong narafala i pas. Yumi no mas bitim mak long ol samting we yumi wantem narafala i mekem long yumi.—Filipae 4:5.

Fasin ya blong letem rong blong narafala i pas i no min se yumi agri long ol fasin nogud mo se yumi satem ae long ol mastik blong narafala. Samtaem wan brata blong yumi i gat sam tingting no fasin we i no laenap wetem ol rul blong Jeova. Nating se ol tingting no fasin ya oli no lidim hem yet  blong mekem wan bigfala sin, oli olsem wan saen we i soemaot se hem i mas stretem sam samting kwiktaem. (Jenesis 4:6, 7) !Ol man we oli bigman long tingting oli soemaot lav taem oli stretem hemia we i foldaon, wetem kwaet fasin! (Galesia 6:1) Be blong givhangud long ol man olsem, hemia we i givim advaes i mas soem se hem i rili kea long hem, be i no blong daonem hem.

“Wetem Kwaet Fasin Mo Dip Respek”

?Olsem wanem long ol man we bilif blong olgeta i defren long bilif blong yumi? ?Yumi save soem longfala tingting long olgeta? Tok ya “General Lesson” we oli sanem i go long ol Nasnal Skul long Aerlan long 1831 i talem se: “Jisas Kraes i no wantem yusum raf fasin blong fosem ol man blong joenem skul blong hem. . . . Sipos yumi wantem we ol man raonabaot long yumi oli luksave se yumi stap folem stret rod mo olgeta oli stap long rong rod, yumi no mas rao mo tok kros long olgeta. Fasin olsem i save pulum olgeta blong tingting se yumi no gat ol gudfala Kristin fasin.”

Ol tijing mo fasin blong Jisas oli pulum ol man oli kam long Tok blong God. Taswe yumi tu, yumi mas mekem sem mak. (Mak 6:34; Luk 4:22, 32; 1 Pita 2:21) Jisas i wan man we i stret gud olgeta mo God i mekem hem i naf blong luksave samting, taswe hem i save luk wanem we i stap long hat blong man. Ale, taem i nidim, Jisas i talemaot ol strongfala tok agensem ol enemi blong Jeova. (Matiu 23:13-33) Be, samting ya i no min se hem i wan man we i no save letem wan rong i pas.

Yumi no olsem Jisas we i save wanem i stap long hat blong man. Taswe, yumi mas folem advaes ya blong aposol Pita se: “Yufala i mas mekem Kraes i Masta blong yufala, mo yufala i mas mekem hem i nambawan long laef blong yufala. Mo sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta [“wetem kwaet fasin mo dip respek,” NW ].” (1 Pita 3:15) Yumi ol man blong wok blong Jeova, yumi mas strong blong leftemap bilif blong yumi, from we bilif ya i stanap long Tok blong God. Be taem yumi mekem olsem, yumi mas soem respek long narafala mo long bilif we oli gat. Pol i raetem se: “Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan.”—Kolosi 4:6.

Long Bigfala Toktok antap long Hil, Jisas i talem se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:12) Taswe, i gud yumi gat longfala tingting mo soem respek long ol man we yumi talemaot gud nius long olgeta. Taem yumi strong blong holem ol stret fasin mo taem yumi folem Baebol, nao yumi fogetem rong blong narafala, bambae Jeova i glad long yumi mo long rod ya, yumi soemaot se yumi man we yumi save letem rong blong narafala i pas.

[Futnot]

[Tok blong pija long pej 23]

No folem fasin blong ol Farisi we oli no save letem wan rong i pas

[Tok blong pija long pej 23]

Jisas i folemgud fasin blong Papa blong hem we i letem ol rong oli pas. ?Yu yu stap mekem olsem?