?Yumi Gat Wan Spirit We i No Save Ded Samtaem?

APOSOL Pol i talem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Yes, Baebol i wan buk blong trutok we i kamaot long trufala God, Jeova.—Ol Sam 83:18.

From we Jeova i Man we i Wokem olgeta samting, mo hem i wokem ol man tu, hem i savegud wanem i hapen taem yumi ded. (Hibrus 3:4; Revelesen 4:11) Mo long tabu Tok blong hem, Baebol, hem i givim ol ansa we oli tru mo klia long ol kwestin blong laef afta ded.

?Wanem Ya Spirit?

Long Baebol, tok we oli tanem i kam “spirit” i minim “win.” Be hemia i no jes minim win we yumi pulum. Jemes, wan long ol man blong raetem Baebol, i talem se: “Bodi we i no gat win [“spirit,” NW ] blong hem, hem i ded.” (Jemes 2:26) Taswe, spirit i wan paoa we i mekem bodi i laef.

Paoa ya we i mekem bodi i laef, i no save minim nomo win we yumi stap pulum i go insaed long waet leva. ?From wanem yumi talem olsem ? From we, blong smol taem afta we man i no moa pulum win, bodi i save gat laef long hem yet. Buk ya The World Book Encyclopedia, i talem se bodi i save laef “blong sam menet” afta we win i finis. From samting ya, samtaem, ol dokta oli save pamem win blong hem bakegen. Be taem laef i lus long ol sel * blong bodi, nating se ol dokta oli mekem olsem wanem, oli no moa save mekem man i pulum win bakegen. Nating we oli pamem no blu olsem wanem long maot blong hem, be oli no save mekem wan sel nating i laef bakegen. Taswe, spirit ya, hem i paoa blong laef we yumi no save luk. Hemia paoa we i mekem ol sel blong bodi oli wok. Paoa ya blong laef i stap from we yumi gohed blong pulum win.—Job 34:14, 15.

?Olsem wanem? ?Ol man nomo oli gat wan spirit? Baebol i givhan long yumi blong kasem stret save long saed ya. Waes King Solomon i luksave se olgeta man mo anamol oli gat “wan spirit we i sem mak nomo,” (NW ) mo hem i askem se: “?Olsem wanem man i save talem se taem hem i ded, spirit blong hem bambae i go antap long heven,  be taem anamol i ded, bambae spirit blong hem i godaon long graon?” (Prija 3:19-21) Taswe, Baebol i tokbaot we man mo anamol, oli gat wan spirit. ?Olsem wanem samting ya i tru?

Yumi save talem se spirit, no paoa blong laef, i olsem lektrik we i mekem wan mesin i wok. Nating se yumi no save luk lektrik, be hem i save mekem plante wok taem hem i go insaed long ol defdefren mesin. Tingbaot wan lektrik oven we i save kam hot taem lektrik i go long hem, no wan kompiuta we i save skelem plante save taem i gat lektrik, no wan televisin we i save singsing mo soem plante pija taem lektrik i givim paoa long hem. Be lektrik ya i neva jenis blong tekem ol fasin mo mekem ol wok blong mesin ya, no gat. Hem i stap olwe olsem wan paoa nomo. Sem mak nao long paoa blong laef. Hem i no save tekem fasin blong ol man no anamol we hem i stap long olgeta. Hem i no gat ol prapa fasin blong hem mo i no save tingting. Man mo anamol tugeta oli gat “wan spirit we i sem mak nomo.” (Prija 3:19, NW ) Taswe, taem wan man i ded, spirit blong hem i no gohed blong laef samples olsem wan spirit man.

?Oraet, be ol dedman oli stap olsem wanem? ?Mo taem man i ded, spirit blong hem i go wea?

“Bambae Yu Yu Kam Graon Bakegen”

Taem faswan man Adam i brekem loa blong God, God i talem long hem se: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” (Jenesis 3:19) ?Bifo we Jeova i wokem Adam long graon, Adam i stap wea? !Hem i no stap samples! Hem i no gat nating. Taswe taem Jeova God i talem long hem se bambae hem i “gobak bakegen long graon,” hem i minim se Adam bambae i ded mo i kam graon bakegen. Bambae hem i no go long ples blong ol spirit man. Taem hem i ded, bambae hem i olsem fastaem we hem i no stap nating. Panis blong hem, ded, hemia se, hem i lus olgeta, i no se hem i go long wan narafala ples.—Rom 6:23.

?Olsem wanem long ol narafala man we oli ded? Prija 9:5, 10 i mekem i klia se ol dedman oli stap olsem wanem. Hem i se: “Ol dedman oli no save samting . . . I no gat wok, plan, save, no tingting, long beregraon.” (Moffatt) Taswe, ded i minim se man i lus olgeta. Man blong raetem Ol Sam i talem se taem man i ded, “spirit blong hem i kamaot long hem, nao man ya i gobak long graon blong hem bakegen. Long sem dei ya, ol tingting blong hem oli finis.”—Ol Sam 146:4, NW.

I klia nomo se ol dedman oli no laef i stap samples. Oli no save wan samting. Oli no save luk yu, harem yu no toktok long yu. Oli no save halpem yu mo oli no save spolem yu. Taswe yu yu no nid blong fraet long olgeta. ?Be, i minim wanem se taem man i ded spirit blong hem i “kamaot” long hem?

Spirit ‘i Gobak Long God’

Baebol i talem se taem yumi ded, “laef ya [“spirit,” NW ] we God i givim long yumi, bambae  i gobak long hem bakegen.” (Prija 12:7) ?Olsem wanem? Hemia i min se wan spirit samting i aot long bodi, i flae antap long skae go kasem ples we God i stap long hem? !No gat! Taem Baebol i yusum tok ya “gobak,” i no evritaem we i minim se man i wokbaot i go long narafala ples. Tingbaot tok we Jeova i talem long ol man Isrel taem oli no moa obei long hem: “ ‘Yufala i mas kambak long mi nao, blong mi tu mi save gobak long yufala.’ ” (Malakae 3:7, NW ) Blong “kambak” long Jeova ol man Isrel oli mas tanem tingting blong olgeta from ol nogud fasin, mo oli mas folem ol stret fasin bakegen. Mo Jeova i “gobak” long ol man Isrel, hem i min se, hem i glad long olgeta bakegen mo i stap klosap long olgeta. Tufala tok ya, i minim wan fasin no tingting, be i no minim se ol man Isrel ya, no Jeova, oli aot i go long wan narafala ples.

Sem mak nao, taem man i ded, spirit blong hem we i “gobak” long God i no aot long wol ya i flae antap long skae kasem wan ples long heven. No gat. Taem paoa blong laef i lus, God nomo i naf blong givimbak long man. Taswe, spirit ‘i gobak long God,’ i minim se laef blong man ya we i ded i stap long han blong God, hem nomo bambae i save mekem man ya i laef bakegen no nogat.

Tingbaot wanem Baebol i talem long saed blong ded blong Jisas. Gospel blong Luk i talem se: “Nao Jisas i singaot bigwan, i talem se, ‘!Papa! !Mi mi putum laef [“spirit,” NW ] blong mi long han blong yu!’ Hem i talem tok ya, nao hem i ded.” (Luk 23:46) Taem spirit i aot long Jisas, hemia i no min se hem i go long heven. Long namba tri dei nomo, hem i laef bakegen. Mo foti dei biaen, nao hem i go antap long heven. (Ol Wok 1:3, 9) Taem Jisas i ded, hem i livim spirit blong hem i stap long han blong Papa blong hem, i min se hem i trastem fulwan se Jeova i naf blong mekem hem i laef bakegen.

Yes, God i save mekem dedman i laef bakegen. (Ol Sam 104:30) !Taswe yumi save gat wan nambawan fiuja!

Wan Promes We i Tru

Baebol i talem se: “I gat taem i stap kam we ol dedman bambae oli harem voes blong mi [Jisas], nao bambae oli aot long beregraon blong olgeta [“ol gref blong rimemba,” NW ].” (Jon 5:28, 29) Yes, Jisas Kraes i promes se olgeta dedman we Jeova i rimemba olgeta, bambae oli girap oli laef bakegen. Yumi sua se ol man blong Jeova we oli bin folem stret fasin bambae oli laef bakegen long ded. Be plante milian narafala man we oli ded finis, oli no bin soemaot sipos oli glad blong folem ol stret rul blong God no nogat. Maet oli no bin save long ol samting we Jeova i askem long yumi blong mekem, no maet oli no bin gat inaf taem blong jenisim laef blong olgeta. Olgeta ya tu, God i stap tingbaot olgeta yet, mo bambae hem i mekem olgeta oli laef bakegen long ded. Baebol i promes se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”—Ol Wok 24:15.

Tede, wol i fulap wetem trabol, raf fasin, fasin blong no laekem narafala, mo fasin blong kilim narafala i ded. Long evri ples, man i spolem win mo wota, mo ol sik oli stap kam plante tumas. Sipos ol dedman oli laef bakegen long wol naoia, ating glad blong olgeta bambae i blong sot taem nomo. Be Man we i Wokem olgeta samting i promes se i no longtaem bambae hem i finisim wol ya we i stap aninit long paoa blong Devel Setan. (Ol Proveb 2:21, 22; Daniel 2:44; 1 Jon 5:19) Wan grup blong man we oli stretgud olgeta—wan “niufala wol”—bambae i kamtru.—2 Pita 3:13.

Long taem ya “bambae i no gat wan man ples we i save talem se: ‘Mi mi sik.’ ” (Aesea 33:24, NW ) Mo tu, trabol soa we ded i mekem long man bambae i finis, from we God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:4) !Hemia wan nambawan fiuja blong olgeta ya we oli stap long ol “gref blong rimemba”!

Taem Jeova i finisim nogud fasin long wol ya, bambae hem i no spolem ol stret man wetem ol rabis man. (Ol Sam 37:10, 11; 145:20) Bambae i gat “wan bigfala kampani” blong man, we oli laef tru long “bigfala trabol,” we bambae i spolem rabis wol ya. Bigfala kampani ya i “kamaot long olgeta  nesen, mo long olgeta laen, mo long olgeta kantri, mo long olgeta lanwis.” (Revelesen 7:9-14, NW ) Taswe, bambae i gat wan bigfala kampani blong man blong welkamem ol dedman taem oli laef bakegen.

?Yu yu wantem tumas blong luk bakegen ol famle mo fren blong yu we oli ded finis? ?Yu yu wantem laef blong olwe long Paradaes long wol? Ale, yu mas kasem stret save long ol stamba tingting blong God mo ol samting we hem i wantem yu blong mekem. (Jon 17:3) Jeova i wantem “sevem olgeta man, mo i wantem we olgeta man bambae oli save trutok blong hem.”—1 Timoti 2:3, 4.

[Futnot]

[Tok blong pija long pej 4]

“Mi mi wokem yu long graon fastaem, mo bambae yu yu kam graon bakegen.”

[Tok blong pija long pej 5]

Yumi save talem se spirit i olsem lektrik

[Tok blong pija long pej 7]

Taem God i mekem ol dedman oli laef bakegen bambae ol man oli glad blong olwe