Kasem Blesing From Ol Fasin We Yu Stap Mekem Oltaem

WAN man i laef 12 yia long sem eria long Athens. Evri dei, taem hem i aot long wok blong hem, hem i stap folem sem rod blong gobak long haos. Biaen, hem i muf i go long wan narafala haf blong taon. Wan dei, afta wok, hem i wantem gobak long haos blong hem. Taem hem i kam klosap long olfala haos blong hem, hem i luksave nao se hem i bin folem rong rod. From we hem i lan blong tekem rod ya oltaem, hem i bin gobak long olfala haos blong hem.

Yumi no sapraes we ol samting we yumi lan blong mekem oltaem long laef blong yumi oli kam olsem prapa fasin blong yumi, mo oli save gat bigfala paoa long laef blong yumi. Ol fasin ya oli olsem wan faea. Long ples we i tudak, yumi glad blong luk laet blong wan faea. Hem i save mekem yumi wom mo yumi save kukum kakae long hem. Be, faea i save kam wan enemi tu. Hem i save spolem yumi mo olting blong yumi. Ol fasin we yumi lan blong mekem oltaem, oli olsem wan faea. Sipos yumi wokemgud ol fasin ya, oli save givhan long yumi. Be, sipos yumi no wokemgud olgeta bambae oli spolem yumi nomo.

 Man ya we yumi tokbaot long stat, i lan long wan fasin we i mekem nomo we hem i westem taem long ol bisi rod blong taon. Be i gat sam impoten fasin we yumi lan long hem we samtaem oli save halpem yumi, no oli save spolem yumi. I gud yumi luk sam trufala stori long Baebol we oli soemaot olsem wanem ol fasin ya oli save halpem yumi no blokem yumi long wok blong God mo fasin fren wetem hem.

Sam Eksampol Long Baebol

Noa, Job, mo Daniel, trifala i kasem blesing blong frengud wetem God. Baebol i presem trifala from “gudfala fasin blong trifala.” (Esikel 14:14) Laef blong trifala i soemaot se trifala ya i wokhad blong mekem we ol gudfala fasin oli kam olsem fasin we oli stap mekem oltaem.

God i talem long Noa blong bildim wan sip. Longfala blong hem i bitim wan futbol fil, mo hem i hae olsem wan haos we i gat faef stori long hem. Long wan man blong wokem sip bifo, wok ya i bigfala tumas. Noa mo seven memba blong famle blong hem nomo oli bildim sip ya. Oli no gat ol tul blong wok olsem we yumi gat tede. Antap long samting ya, Noa i gohed blong prij long ol man long taem ya. Mo tu, yumi sua se Noa i lukaot long ol nid blong famle blong hem long saed blong spirit mo bodi. (2 Pita 2:5) Blong mekem olgeta samting ya, Noa i mas lan long ol gudfala fasin blong wok. Baebol i tokbaot Noa olsem wan man we “i fren gud wetem God. . . . Noa i mekem olgeta samting ya olsem we God i talem.” (Jenesis 6: 9, 22; 7:5) From we Baebol i talem se Noa i wan “stret man,” samting ya i soem se long taem we bigfala wota i ron mo long taem we ol man oli rebel agensem Jeova long Babel, be hem i gohed olwe blong frengud wetem God. Yes, Noa i gohed blong frengud wetem God go kasem we hem i ded taem hem i gat 950 yia blong hem.—Jenesis 9:29.

Job i “wan gudfala man” from we ol gudfala fasin oli samting we hem i stap mekem oltaem. (Job 1:1, 8; 2:3) Wan long ol gudfala fasin ya, hemia se afta long evri lafet we ol pikinini blong hem oli mekem, Job, olsem pris blong famle, i givim wan sakrefaes i go long God from ol pikinini blong hem. “Oltaem hem i stap mekem samting ya, from we hem i ting se maet wan long olgeta i mekem sin long tingting blong hem we i spolem God.” (Job 1:5) I klia se famle blong Job i gat fasin ya oltaem blong mekem ol wok we oli joen long wosip blong Jeova.

Daniel i mekem wok blong Jeova ‘long olgeta tingting blong hem,’ go kasem en blong laef blong hem. (Daniel 6:16, 20) ?Wanem sam long ol gudfala fasin we Daniel i lan blong mekem oltaem? Faswan samting se, hem i prea oltaem long Jeova. Nating se King i putum wan loa we i blokem ol man blong oli no prea, Daniel “i nildaon long saed i go long Jerusalem, nao i nildaon long ples ya, i prea long God blong hem, mo i talem tangkiu long hem, olsem we i stap mekem oltaem.” (Daniel 6:10) Hem i no save lego fasin ya blong prea long God oltaem, nating se hem i save lusum laef blong hem from. Yumi sua se, fasin ya nao i givhan long Daniel blong holem strong long God long ful laef blong hem. Mo tu, i klia se Daniel i gat gudfala fasin ya blong stadi oltaem mo tingting dip long ol gudfala promes blong God. (Jeremaea 25:11, 12; Daniel 9:2) Ol gudfala fasin ya we hem i lan blong mekem oli halpem hem blong stanap strong go kasem en. Hem i gohed long resis ya blong laef, gogo kasem en blong hem.

Defren olgeta nao, Daena i kasem trabol from wan nogud fasin we hem i stap mekem oltaem. Hem i stap ‘go [“oltaem,” NW ] long taon ya Sekem blong go luk ol woman Kenan’ we oli no wosip long Jeova. (Jenesis 34:1) Daena i ting se fasin ya i no save spolem hem, be fasin ya i lidim hem i go kasem bigfala trabol. Fastaem, Sekem “we ol man oli stap tinghae moa long hem, i winim ol narafala boe long haos blong papa blong hem,” i repem hem. Biaen, tufala brata blong hem we oli kros tumas, tufala i kilim i ded olgeta man blong taon ya. !Frut we i kamaot from fasin blong Daena i nogud olgeta!—Jenesis 34:19, 25-29.

?Olsem wanem yumi save sua se ol fasin we yumi lan blong mekem oltaem bambae oli givhan long yumi mo bambae oli no spolem yumi?

 Wokem Ol Gudfala Fasin

Wan waes man i raetem se “i gat wan paoa we i makemaot finis olgeta fasin we bambae yumi tekem long laef blong yumi.” Be Baebol i soemaot se i no olsem. Yumi save jus blong jenisim ol nogud fasin we yumi lan blong mekem oltaem mo yumi save lanem ol gudfala fasin.

Taem wan Kristin i wokem ol gudfala fasin, hem i naf gud moa blong mekem mo gohed oltaem long Kristin wok blong hem. Alex, wan Kristin long Gris, i talem se: “Taem mi lan blong folem wan program oltaem blong mekem ol defren wok, hemia i givhan long mi blong no westem taem.” Theophilus, wan Kristin elda, i talem se fasin blong plan gud i halpem hem blong karem moa frut long wok blong hem. Hem i talem se: “Mi sua se bambae mi no save mekem gud olgeta Kristin wok blong mi, sipos mi no gat fasin ya blong plan gud.”

Baebol i pulum yumi ol Kristin, blong “gohed long rod ya we yumi stap folem kam kasem naoia.” (Filipae 3:16) Blong gohed long rod ya we yumi bin folem i minim se yumi mas gat “fasin . . . blong folem semfala rod oltaem.” Fasin ya i givhan bigwan long yumi from we taem i gat wan samting blong mekem, yumi no nid blong spenem taem blong tingbaot mo tokbaot samting ya fastaem. Yumi wokem sam fasin finis we oli givhan long yumi blong mekem samting ya. Yes, ol fasin ya we yumi lan blong mekem oltaem, yumi no nid blong tingbaot fastaem. Oli olsem ol gudfala fasin blong draev we oli givhan long man blong draevem trak mo no aksiden. Taem man ya i fesem denja, kwiktaem nomo hem i save tekem wan disisen we i sevem laef blong hem. Hemia i sem mak long yumi we yumi folem Kristin rod. Sipos yumi gat sam gudfala fasin we yumi lan blong mekem oltaem, hemia i save givhan long yumi blong tekem ol gudfala disisen kwiktaem.

Jeremy Taylor, wan man Inglan we i raetem ol buk, i talem se: “Ol fasin we man i lan long hem, oli kamaot from samting we hem i stap mekem oltaem.” Sipos yumi lan blong mekem ol fasin we oli gud, bambae i isi nomo long yumi blong mekem ol samting we i gud. Eksampol, sipos yumi ol Kristin minista, yumi gat fasin blong joen oltaem long wok blong prij, bambae wok ya i kam i isi moa long yumi mo bambae yumi glad moa blong mekem. Baebol i tokbaot ol aposol i se “evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Ol Wok 5:42; 17:2) Be, sipos yumi gat fasin blong joen long wok ya sam samtaem nomo, bambae yumi fraet blong prij, mo maet i tektaem bifo we yumi harem se yumi naf blong mekem impoten Kristin wok ya.

Samting ya i tru tu long saed blong sam narafala haf blong Kristin program blong yumi. Yumi save lan blong wokem gudfala fasin ya blong ‘ridim Tok blong God long dei mo long naet.’ (Josua 1:8; Ol Sam 1:2) Wan Kristin i gat fasin ya blong ridim Baebol, 20 go kasem 30 menet evri naet bifo we hem i go slip. Nating se hem i taed, hem i faenem se hem i no save slip gud sipos hem i go long bed be i no ridim Baebol fastaem. Hem i mas girap mo tekem kakae ya long saed blong spirit we hem i nidim. Gudfala fasin ya we hem i stap mekem oltaem, i halpem hem blong ridim fulwan Baebol evri yia.

Jisas Kraes, we hem i eksampol blong yumi, i gat fasin ya blong go oltaem long ol miting we oli eksplenem Baebol. “Long Sabat dei, hem i go insaed long haos blong prea, olsem we i stap mekem oltaem. Nao hem i stanap blong rid.” (Luk 4:16) Joe, wan elda we i gat wan bigfala famle mo we i wok blong plante aoa, i gat gudfala fasin ya tu. From we hem i lan long fasin ya blong go long ol miting, hem i harem se hem i nidim mo i wantem go long olgeta miting oltaem. Hem i talem se: “Fasin ya i givhan long mi blong gohed oltaem, i mekem mi mi strong long saed blong spirit blong winim ol traem mo ol problem.”—Hibrus 10:24, 25.

 Yumi mas gat ol gudfala fasin ya, sipos yumi wantem gohed long Kristin resis blong kasem laef. Wan ripot we i kam long wan kantri we ol man oli stap agensem ol Witnes blong Jeova, i talem se: “Olgeta we oli lan long ol gudfala fasin long saed blong spirit mo we oli gat tangkiu from trutok, oli no faenem se i hadwok blong stanap strong long taem blong traem. Be plante taem, olgeta we ‘long gudfala taem’ oli lan blong mestem miting oltaem, joen long wok blong prij wanwan taem nomo, mo oli no strong blong holem ol rul blong God long ol smosmol samting, olgeta ya nao oli foldaon taem oli kasem wan traem we i olsem ‘faea.’ ”—2 Timoti 4:2, NW.

Lego Ol Nogud Fasin Mo Wokem Ol Gudfala Fasin

Wan tok i talem se ‘wan man i mas wokem olgeta fasin ya nomo we hem i wantem se oli bos long hem.’ Yes, ol nogud fasin oli olsem wan masta we i strong tumas. Nating se i olsem, yumi save lego ol nogud fasin ya.

Bifo, Stella i gat fasin blong wajem televisin oltaem. Hem i no save lego fasin ya. Hem i talem se: “Taem mi stat folem wan nogud fasin oltaem, mi faenem plante ‘gudfala’ risen blong fasin ya.” Samting ya i tru long saed blong fasin blong wajem televisin oltaem. Stella i talem se hem i wantem wajem televisin jes blong “spel lelebet” no blong “jenisim tingting blong smoltaem.” Be hem i bitim mak, nao hem i stap sidaon fored long televisin blong plante aoa. Hem i talem se: “Nogud fasin ya i blokem mi blong gohed gud long saed blong spirit.” Hem i traehad blong daonem ol aoa we hem i spenem blong wajem televisin mo hem i jusumgud ol program we hem i wajem. Stella i talem se: “Oltaem mi tingbaot from wanem mi wantem lego nogud fasin ya, mo mi dipen long Jeova blong i halpem mi blong holem strong long disisen ya we mi tekem.”

Wan Kristin we nem blong hem Charalambos i tokbaot wan nogud fasin we i blokem hem blong gohed gud long saed blong spirit—hemia fasin blong letem wan wok i stap go kasem nekis dei. “Taem mi luksave we fasin ya i stap spolem mi, mi traehad blong jenisim laef blong mi. Mi putum sam mak we mi wantem kasem, mo mi mekem plan wetaem mo olsem wanem bambae mi kasem ol mak ya. Oltaem mi folem ol disisen mo plan blong mi. Fasin ya nao i givhan bigwan long mi, mo mi holem gudfala fasin ya kasem naoia.” Yes, ol gudfala fasin nao oli mas tekem ples blong ol nogud fasin.

Ol fren blong yumi oli save mekem se yumi gat ol gudfala fasin no ol nogud fasin. I isi nomo blong lanem ol gudfala fasin, olsem we i isi nomo blong lanem ol nogud fasin. ‘Ol fren blong yumi we oli no stret, oli save spolem fasin blong yumi.’ Long sem fasin, ol gudfala fren oli soem long yumi ol gudfala fasin we yumi save folem. (1 Korin 15:33) Mo samting we i impoten moa blong tingbaot, hemia se ol fasin we yumi lan blong mekem oltaem oli save spolem fasin fren blong yumi wetem Jeova. Stella i talem se: “Sipos ol fasin we yumi lan blong mekem oli gud, i isi moa blong mekem wok blong Jeova. Sipos oli nogud, bambae oli blokem yumi blong gohed gud.”

Lan blong mekem ol gudfala fasin oltaem, mo letem ol fasin ya oli lidim yu. Bambae oli kam olsem wan strongfala paoa blong mekem i gud long laef blong yu.

[Tok blong pija long pej 19]

Olsem wan faea, ol fasin we yumi lan blong mekem oltaem oli save givhan no oli save spolem yumi

[Tok blong pija long pej 21]

Jisas i gat fasin blong go oltaem long haos prea long Sabat dei blong ridim Tok blong God

[Tok blong pija long pej 22]

Taem yumi lan blong wokem ol gudfala fasin long saed blong spirit oltaem, yumi frengud moa wetem God