Samting We i Stap Longtaem Moa i Winim Gol

GOL, hem i wan samting we olgeta man oli wantem from we hem i naes mo i save stap longtaem. Plante man oli wantem gol from we i saen gud oltaem mo i no save kam doti. Hemia from we enikaen samting we i tajem gol, olsem wota, oksijen, salfa, mo plante narafala samting, oli no save mekem i kam nogud. Ol man blong daeva oli faenem plante samting we oli wokem long gol long ol olfala sip we oli draon longtaem finis. Ol samting ya oli saen gud yet, nating se plante handred yia i pas finis.

Be, Baebol i soem se i gat wan samting we i save stap longtaem moa i winim gol, mo i “gud moa i winim gol.” Gol i save lus, nating se oli “bonem long faea blong faenemaot se i gud no i nogud.” (1 Pita 1:7) Ol man oli save yusum faea mo ol narafala samting blong “bonem” no klinim gol gogo, hem i 99.9 pesen klin. Be, nating se gol i klin gud, hem i save kam nogud mo ron olsem wota, taem oli draonem long aqua regia (royal wota), hemia hydrochloric acid we oli meksem wetem nitric acid. Ale, samting we Baebol i talem i tru nomo se ‘gol i save lus.’

Be, bilif blong ol trufala Kristin i defren, from we hem i save ‘sevem olgeta.’ (Hibrus 10:39) Ol man oli save kilim i ded wan man we i gat strong bilif, olsem oli mekem long Jisas Kraes. Be olgeta we oli gat trufala bilif, oli gat wan promes i stap fored long olgeta, hemia se: “Yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.” (Revelesen 2:10) Olgeta we oli bilif strong long Jeova go kasem we oli ded, Jeova i stap tingbaot olgeta yet, mo bambae hem i mekem olgeta oli laef bakegen. (Jon 5:28, 29) Be nating se man i gat fulap gol, samting ya i no save givhan long hem blong laef bakegen. From samting ya, bilif i sas moa i bitim gol. Blong gat wan bilif we i sas mo i gud olsem, oltaem hem i mas kasem traem, olsem we oli bonem gol. Yes, Pita i talem se, samting we i sas moa i winim gol, hemia taem yumi ‘soemaot we fasin blong bilif blong yumi i tru.’ Blong givhan long yu blong gat strong bilif mo holemtaet bilif ya long trufala God, Jeova, mo long pikinini blong hem Jisas, ol Witnes blong Jeova oli glad blong stadi Baebol wetem yu. Olsem Jisas i talem, long rod ya yumi save kasem “laef we i no save finis.”—Jon 17:3, NW.