Laef Stori

!Tangkiu From Mi Gat Ol Gudfala Memori!

DRUSILLA CAINE I TALEM STORI YA

Long yia 1933, mi mared wetem Zanoah Caine. Hem i mekem sem wok we mi stap mekem, hemia wok blong prij fultaem. Mi mi glad tumas blong joen wetem man blong mi long wok ya. Be, blong mekem olsem, mi nidim wan baskel. Hemia wan samting we i sas tumas mo neva mi bin naf blong pem, from we mifala i fesem hadtaem long saed blong mane. ?Bambae mi mekem wanem?

TAEM ol brata blong hasban blong mi oli harem problem blong mi, oli lukluk long ples blong sakem doti blong traem faenem ol olfala haf blong baskel, blong oli save wokem wan blong mi. Oli faenem mo joenem ol haf blong baskel, nao oli wokem wan nambawan baskel blong mi. Afta we mi lan blong ron long baskel, mi mo Zanoah mitufala i glad tumas blong ron long tufala baskel ya i go long eria blong Worcester mo Hereford, mo prij long olgeta man we mitufala i mitim.

Long taem ya mi no luksave se samting ya we mi bin mekem from bilif blong mi, bambae i lidim mi long wan gudfala laef we bambae mi glad blong tingtingbak long hem. Be, gudfala papa mo mama blong mi, tufala nao i stamba blong laef blong mi long saed blong spirit.

Hadtaem Tru Long Faswan Wolwo

Mi mi bon long Disemba 1909. I no longtaem biaen, mama blong mi i kasem buk ya, The Divine Plan of the Ages, mo long 1914 papa mama tufala i karem mi mi go long Oldham, Lancashire, blong luk sinema blong “Photo-Drama of Creation.” (Olgeta we naoia oli karem nem ya ol Witnes blong Jeova oli bin wokem tufala samting ya.) !Nating we mi pikinini nomo, mi rimemba gud we taem mifala i wokbaot blong gohom, mi stap jamjam from we mi glad tumas long ol samting we  mi bin luk! Biaen, Frank Heeley i statem wan Baebol stadi grup long Rochdale, hemia ples we mifala i stap long hem. Miting ya i givhan long famle blong mifala blong kasem moa save long saed blong Baebol.

Long sem yia ya, Bigfala Faet, no wanem we naoia yumi kolem Faswan Wolwo, i spolem kwaet laef blong mifala. Gavman i singaot papa blong joen long ami, be hem i tekem disisen blong no joen. Long kot, oli talem se hem i wan “gudfala man,” mo lokol niuspepa i kasem plante leta blong ol “man we oli bilif se hem i tok wetem fulhat blong hem taem hem i talem se hem i no wantem karem ol tul blong faet”.

Be kot i no talemaot we oli givim ful raet long papa blong no joen long ami. Hem i talem nomo se oli agri we papa bambae i no joen long faet. Wantaem nomo, ol narafala man oli stat jikim hem wetem mama blong mi, mo mi tu. Biaen, kot i lukluk bakegen long kes blong hem, nao oli givim raet long hem blong mekem wok long garen. Be sam man blong lukaot long ol plantesin oli spolem hem, mo oli pem hem smol mane nomo, no oli no pem hem nating. Blong sapotem famle, mama blong mi tu i mas wok. Hem i mekem wok we i strong tumas long wan ples blong wasem klos, be hem tu i kasem mane we i smol nomo. Naoia mi luksave se from we mi bin fesem hadtaem taem mi yang, samting ya i mekem mi mi kam strong, mo i halpem mi blong gat fasin tangkiu from ol samting long saed blong spirit we i impoten moa.

Wan Smol Stat

I no longtaem biaen, mifala i mitim Daniel Hughes, wan Baebol studen we i gat strong tingting. Hem i wok long maen long Ruabon blong digimaot ol jakol. Ruabon i wan vilej samwe 20 kilometa longwe long Oswestry, ples ya we mifala i bin muf i go long hem. Mi singaot Daniel se Angkel Dan, mo hem i stap raet i kam long famle blong mifala. Taem hem i kam luk mifala, oltaem hem i stap tokbaot ol samting long Baebol. Neva hem i storian blong nating nomo. Long 1920 i gat wan Baebol stadi klas i stat long Oswestry, mo long 1921 Angkel Dan i givim wan buk long mi we nem blong hem The Harp of God. Mi laekem buk ya tumas from we hem i mekem i isi moa blong mi blong kasem save long ol tijing blong Baebol.

Mo tu, mifala i save Pryce Hughes, * we biaen hem i kam man blong lukaot long branj ofis blong ol Witnes blong Jeova long London. Hem i stap wetem famle blong hem long Bronygarth, wan taon klosap long mifala, mo i klosap long kantri ya Welsh. Sista blong hem, Cissie, i kam wan gudfala fren blong mama blong mi.

Mi rimemba we long 1922 mifala i glad tumas taem toktok i goaot blong ‘talemaot King ya mo kingdom blong hem.’ Long ol yia we i kam biaen, nating we mi stap skul yet, mi glad tumas blong joen long wok blong seremaot ol spesel traket olsem hemia we nem blong hem, Ecclesiastics Indicted we mifala i seremaot long 1924. Taem mi tingtingbak long ol yia ya, mi luksave se mi bin kasem wan nambawan blesing blong kampani wetem plante brata sista we oli stap tru long Jeova—sam long olgeta hemia Maud Clark * mo fren blong hem Mary Grant,* Edgar Clay,* Robert Hadlington, Katy Roberts, Edwin Skinner,* mo tu Percy Chapman wetem Jack Nathan,* we biaen tufala i go long Kanada blong givhan long wok longwe.

Tok ya we i stanap long Baebol, nem blong hem “Plante Milian Man We Oli Laef Naoia, Bambae Oli Neva Ded Samtaem” i kamaot long stret taem long bigfala teritori blong mifala. Long Mei 14, 1922, Stanley Rogers, we i wan famle blong Pryce Hughes, i aot long Liverpool i kam long Chirk blong givim tok ya. Chirk i wan vilej we i stap long not blong taon blong mifala. Let long sapa, hem i givim tok ya bakegen long Pija Pleihaos, long Oswestry. Mi holem yet pepa ya we oli prentem blong talemaot tok ya. Long ol yia ya, smol grup blong mifala i gohed blong kam moa strong from help blong trifala elda we oli goraon, hemia Herbert Senior, Albert Lloyd, mo John Blaney.

Wan Taem Blong Mekem Disisen

Long 1929 mi mekem disisen blong tekem baptaes. Mi gat 19 yia, mo long sem taem, mi fesem faswan traem blong bilif blong mi. Mi bin mitim wan man we papa blong hem i wan man blong politik.  Mitufala i fren, mo hem i askem mi blong mared wetem hem. Wan yia bifo, buk ya Government i bin kamaot, mo mi givim buk ya long hem. Be, i no longtaem biaen, i klia nomo se hem i no intres nating long gavman long heven, we buk ya i tokbaot. From Baebol stadi we mi mekem, mi save finis se God i talem long ol man Isrel bifo blong no mared wetem ol narafala man we oli no bilif long hem, mo mi save se rul ya i blong ol Kristin tu. Taswe, nating se i no isi, mi tekem disisen blong no mared wetem man ya.—Dutronome 7:3; 2 Korin 6:14.

Tok ya blong aposol Pol i givim paoa long mi, se: “Bambae yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol hadwok ya blong yumi.” (Galesia 6:9) Mo tu, gudfala fren blong mi, Angkel Dan, i leftemap tingting blong mi taem hem i raetem leta long mi se: “Sipos yu kasem trabol we i smol no i bigwan, tingbaot Rom japta 8, vas 28,” we i talem se: “Yumi save finis, se God i stap wok long olgeta samting we oli stap kamtru long laef blong yumi, blong mekem i gud long yumi ya we yumi lavem hem. Yumi ya, hem i singaot yumi finis stret long rod we hem i makemaot.” Samtaem i no isi, be mi save se mi bin mekem disisen we i waes. Long sem yia mi statem wok blong prij fultaem.

Kam Naf Blong Mekem Wok Ya We i No Isi

Long 1931 mifala i kasem niufala nem ya, Witnes blong Jeova, mo long yia ya mifala i wok strong blong seremaot buklet ya, The Kingdom, the Hope of the World. Mifala i givim buklet ya long olgeta man blong politik, ol pris mo man blong mekem bisnes. Teritori we mi mekem i stat long Oswestry go kasem Wrexham, we i samples 25 kilometa long not. I no isi blong kavremap teritori ya.

Long nekis yia, long wan asembli long Birmingham, i gat wan tok we i talem se i nidim 24 man blong wok. Mifala 24 i glad tumas blong putum nem blong mifala blong mekem wok ya, nating se mifala i no save yet se wanem wok we bambae mifala i mekem. Mifala i sapraes bigwan taem oli sanem mifala tutu blong seremaot sem buklet ya, The Kingdom, the Hope of the World, mo long semtaem mifala i mas hangem ol bigfala saen long bodi blong mifala we i talemaot Kingdom.

Taem mifala i wok long eria klosap long jos, mi sem lelebet from ol man oli save luk mi, be mi stap ting se i oraet nomo from we i no gat man long taon ya we i save mi. Be, faswan man we mi mitim, hem i wan fren we mi bin skul wetem hem. Hem i lukluk mi mo i se: “!Man! ?From wanem yu stap wokbaot wetem saen olsem?” !Samting ya i halpem mi blong winim fasin fraet long man!

Muf i Go Longwe Moa

Long 1933, mi mared wetem Zanoah. Hem i wan wido man, mo hem i gat 25 yia moa long mi. Faswan waef blong hem i wan Baebol Studen we i bin wok strong, mo afta we hem i ded, Zanoah i bin gohed strong long wok blong prij. Mitufala i aot long Inglan, mo muf i go long niufala teritori blong mitufala long Not Wales, samwe 150 kilometa longwe. Mitufala i hivimap ol katon, bokis mo ol narafala samting blong mitufala we i impoten mo putum antap long baskel blong mitufala. !Nating se ol samting ya oli plante lelebet, mitufala i kasem niufala teritori ya! Long teritori ya, baskel blong mitufala i givhan bigwan—oli karem mitufala i go long evri ples, go kasem antap long Cader Idris, wan bigfala hil long Welsh we hae blong hem i klosap 900 mita. Mitufala i haremgud tumas blong faenem ol man we oli wantem lesin long “gud nius blong kingdom ya.”—Matiu 24:14, NW.

Smoltaem nomo afta we mitufala i stap long ples ya, ol man oli talem long mitufala se wan man we nem blong hem Tom Pryce, i bin prij long olgeta olsem we mitufala i stap mekem. Biaen mitufala i faenem Tom. Hem i stap long wan ples klosap long Welshpool, we nem blong hem Long Maonten, mo  taem mitufala i mitim hem, mitufala i sapraes bigwan. Long taem we mi jes stat blong joen long wok blong prij, mi bin givim wan buk long hem. Buk ya, Reconciliation i blong givhan long man blong stadi Baebol. Hem i bin stadi hem wan long buk ya, mo biaen i raetem leta i go long branj ofis long London blong askem sam moa buk. Stat long taem ya, hem i bin wok strong blong serem niufala bilif blong hem wetem ol narafala. Mitrifala i glad tumas blong spenem plante taem blong stori tugeta mo joen wanples blong stadi mo blong leftemap tingting blong mitrifala.

Wan Disasta We i Karem Blesing

Long 1934 olgeta we oli mekem wok blong prij fultaem, klosap long Not Wales, oli kasem toktok we i singaot olgeta blong go long taon ya Wrexham blong seremaot buklet ya, Righteous Ruler. Long dei bifo we mifala i statem spesel wok ya, wan bigfala disasta i hapen. Tri kilometa not long Wrexham, wan maen blong digim jakol long Gresford i bosta, mo 266 man we oli wok insaed long maen ya oli ded. From samting ya, bitim 200 pikinini oli no moa gat papa, mo 160 woman oli lusum hasban blong olgeta.

Mifala i raetemdaon nem blong olgeta we oli lusum wan famle long aksiden ya, mo mifala i visitim olgeta wanwan, mo givim wan buklet long olgeta. Wan long ol nem we oli givim long mi, hemia Misis Chadwick, we i bin lusum boe blong hem we i gat 19 yia nomo. Taem mi visitim Misis Chadwick, wan narafala boe blong hem, Jack, hem tu i stap blong leftemap tingting blong mama blong hem. Jack i bin luk mi finis bifo, be hem i no talem wan samting. Ale, hem i ridim buklet ya, mo biaen hem i traem faenem The Final War, wan narafala buklet we mi bin givim long hem longtaem finis.

Jack mo waef blong hem, May, tufala i faenem ples we mi stap long hem, mo tufala i askem sam moa buk bakegen. Long 1936 tufala i agri blong mifala i mekem ol miting long haos blong tufala long Wrexham. Sikis manis biaen, Albert Lloyd i visitim mifala. Nao biaen, wan kongregesen i stanap long ples ya, mo Jack Chadwick i stap olsem presiden elda blong kongregesen ya. Naoia i gat tri kongregesen long Wrexham.

Laef Long Kat Blong Ol Jipsi

Long olgeta taem ya, mitufala i bin stap long eni ples nomo we mitufala i faenem, from we mitufala i stap muf oltaem i go long ol defren taon. Be Zanoah i tekem disisen se i taem nao blong mitufala i gat prapa haos blong mitufala. Hem i wantem wan haos we mitufala i save pulum i go wetem mitufala long ol defren ples we bambae mitufala i go long hem. Hasban blong mi i kamaot long laen blong ol man Jipsi, mo hem i gat gudhan long wok blong kapenta. Hem i wokem wan kat blong mitufala we i olsem kat blong ol Jipsi. Mitufala i putum nem blong kat ya se, Elizabeth, nem ya i kamaot long Baebol mo i minim “God we i Givim Plante Samting.”

Mi rimemba gud wan ples we mitufala i bin stap long hem. Ples ya i klosap long wan smol reva we i gat plante tri we oli karem frut long hem. !Long tingting blong mi, ples ya i olsem Paradaes! Nating we mitufala i no gat plante rum, mo plante samting, i no gat wan samting we i spolem glad blong mitufala long ol yia we mitufala i stap laef tugeta long kat ya. Long taem blong kolkol, ol sit bed oli kam strong olsem aes mo oli fas long wol blong kat ya. Mo ol smosmol drop wota oli kavremap evri samting insaed long kat ya, from we i kolkol  tumas afsaed. Mitufala i mas karem wota, mo samtaem wota i stap longwe, be mitufala i bin winim ol problem ya tugeta.

Wan taem, long koltaem, mi bin sik mo mitufala i gat smol kakae nomo, mo mitufala i no gat mane tu. Zanoah i sidaon long bed, i holem han blong mi mo i ridim Ol Sam 37:25 long mi: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” Hem i lukluk mi, mo hem i talem se: “!Sipos yumitu no kasem wan samting kwiktaem, bambae yumitu mas asaskem kakae olbaot, be mi no ting se God bambae i letem samting ya i hapen!” Ale, biaen hem i go prij long ol man raonabaot long mifala.

Taem Zanoah i kambak long medel dei blong rerem wan samting blong mi mi dring, hem i faenem wan leta i stap long doa. Insaed long leta ya i gat moa long 10,000 vatu we papa blong hem i sanem i kam. Sam yia bifo, oli bin tok agensem Zanoah se hem i stilim sam mane, be oli jes faenemaot naoia se samting ya i no tru. Presen mane we oli sanem i blong talem sore mo blong stretem bisnes ya. !Mane ya i kam long stret taem!

Wan Gudfala Lesen

Samtaem yumi lanem wan lesen afta we plante yia i pas. Eksampol: Bifo we mi finis skul long 1927, mi bin prij long olgeta fren mo tija blong mi long skul. Be i gat wan tija nomo we mi no prij long hem, nem blong hem Lavinia Fairclough. I no gat wan we i intres long wanem we mi plan blong mekem long laef blong mi, mo from we mi no fren gud wetem Misis Fairclough tu, mi tekem disisen blong no talemaot plan blong mi long hem. !Tingbaot bigfala sapraes we mi kasem—mo bigfala glad tu—from we samwe 20 yia biaen, mama blong mi i talem se tija ya i bin kambak blong visitim ol fren blong hem mo ol pikinini we hem i bin tijim olgeta long skul, blong talem long olgeta se naoia hem i wan Witnes blong Jeova!

Taem mi mitim hem, mi eksplenem long hem from wanem mi no bin talemaot long hem ol bilif blong mi mo wok we mi bin plan blong mekem. Hem i lesin long mi, mo biaen i talem se: “Oltaem nomo mi bin traem faenem trutok ya. !Hemia bigfala samting long laef blong mi we mi traehad blong faenem!” Ekspiriens ya i mekem mi mi harem nogud fastaem, be biaen mi lanem wan gudfala lesen—yumi neva mas stap kwaet be yumi mas prij long olgeta man we yumi mitim, mo yumi neva mas jajem narafala.

Wan Narafala Wo—Mo Wanem i Hapen Biaen

Klosap long en blong ol yia 1930, ol saen blong wan narafala wo i stat kamaot. Dennis, smol brata blong mi, i kasem raet blong no joen long faet sipos hem i gohed long prapa wok blong hem. Hem i neva bin intres long trutok. Taswe mi mo hasban blong mi i askem tufala paenia ya Rupert Bradbury mo brata blong hem, David, blong tufala i visitim brata blong mi. Tufala i visitim hem, mo tufala i stat stadi Baebol wetem hem. Dennis i tekem baptaes long 1942, mo biaen hem i mekem wok blong paenia, mo long 1957 hem i statem wok blong elda we i goraon blong visitim ol kongregesen.

Gel blong mitufala, Elizabeth, i bon long 1938, mo from samting ya Zanoah i mekem kat blong mifala i kam bigwan moa. Long 1942, taem narafala gel blong mitufala, Eunice, i bon, mitufala i luk se i waes blong faenem wan haos. From samting ya Zanoah i lego wok blong paenia blong sam yia, mo mifala i muf i go long wan smol haos klosap long Wrexham. Biaen, mifala i go stap long Middlewich, long eria blong Cheshire. Long 1956, long ples ya nao, gudfala hasban blong mi i ded.

Tufala gel blong mitufala oli mared mo oli glad blong mekem wok blong prij fultaem. Eunice i stap mekem wok blong spesel paenia long London wetem hasban blong hem we i wan elda. Hasban blong Elizabeth tu i wan elda long kongregesen. Mi glad tumas we olgeta, wetem pikinini blong olgeta, mo fofala smol bubu blong mi oli stap klosap long mi long taon ya Preston, long Lancashire.

Mi mi glad tumas we mi save wokbaot i go long Haos Kingdom we i stap narasaed long rod, klosap long haos blong mi. Long ol yia we i jes pas, mi stap joen long miting blong olgeta we oli toktok lanwis Gujarati. I no isi blong lanem lanwis blong olgeta from we naoia sora blong mi i fas. Samtaem i hadwok mo mi no harem mo kasemsave ol toktok blong olgeta, olsem we ol yangfala oli save mekem. Be i wan samting we mi intres blong traem lanem.

Mi save prij long ol haos wanwan mo mekem ol Baebol stadi long haos blong mi. Taem ol fren oli kam visitim mi, mi glad tumas blong tokbaot ol ekspiriens long laef blong mi. Mi mi tangkiu tumas from we mi gat gudfala memori blong olgeta nambawan blesing ya we mi kasem long klosap 90 yia ya we mi joen wetem ol man blong Jeova.

[Ol futnot]

[Tok blong pija long pej 25]

Traket we i talemaot tok ya “Plante Milian Man We Oli Laef Naoia, Bambae Oli Neva Ded Samtaem,” we mi harem long Mei 14, 1922

[Tok blong pija long pej 26]

Wetem Zanoah afta we mitufala i mared long 1933

[Tok blong pija long pej 26]

Mifala i stanap klosap long “Elizabeth,” kat ya we hasban blong mi i wokem