Wan Kwestin

?Daniel i stap wea taem trifala Hibru ya oli kasem oda blong bodaon long bigfala aedol we Nebukadnesa i bin stanemap long levelples long Dura?

Baebol i no talem se Daniel i stap wea long taem ya, taswe i no gat man i save talem stret.

Sam man oli talem se Daniel i gat wan wok we i hae moa long Sadrak, Mesak mo Abednego, no maet Nebukadnesa i laekem Daniel moa bitim trifala ya, taswe Daniel i no nid blong folem oda ya blong go long levelples long Dura. Daniel 2:49 i soemaot we, blong smoltaem, Daniel i bin holem wan posisen we i hae moa long trifala fren blong hem. Be i no gat pruf se samting ya nao i givim raet long hem blong no joen wetem ol narafala blong stanap long fored blong pija ya.

Sam narafala oli traem eksplenem risen we Daniel i no stap long taem ya, mo oli talem se maet hem i bin go long narafala ples blong mekem wan spesel wok, no maet hem i sik, taswe hem i no save go. Be Baebol i no talem olsem. Nomata se i olsem wanem, Daniel i mas gat wan gudfala risen blong no stap long taem ya. Sipos no, i sua se ol haeman blong Babilon we oli jalus long Daniel, bambae oli yusum samting ya blong tok agens long hem. (Daniel 3:8) Bifo long taem ya, mo biaen tu, Daniel i pruvum se hem i fasgud mo i stap tru long God nomata wanem traem we hem i fesem. (Daniel 1:8; 5:17; 6:4, 10, 11) Taswe, nating se Baebol i no talem from wanem Daniel i no stap long levelples long Dura, yumi sua se Daniel i stap tru long Jeova God oltaem.—Esikel 14:14; Hibrus 11:33.