Ebraham—Wan Eksampol Blong Bilif

“Ebraham i stamba blong olgeta we oli . . . bilif long God.”—ROM 4:11.

1, 2. (a) ?Wanem faswan samting we ol trufala Kristin tede oli tingbaot long saed blong Ebraham? (b) ?From wanem Baebol i talem se Ebraham i ‘stamba blong olgeta we oli bilif long God’?

 HEM i papa blong wan strongfala laen, hem i wan profet, hem i wan bisnesman, mo hem i wan lida. Be, taem ol Kristin tede oli tingbaot man ya, oli tingbaot fastaem wan fasin blong hem, we i pulum Jeova God blong luk hem olsem wan fren. Yes, hem i wan man blong bilif. (Aesea 41:8; Jemes 2:23) Man ya, nem blong hem, Ebraham. Baebol i talem se hem i “stamba blong olgeta we oli . . . bilif long God.”—Rom 4:11.

² ?Be, olsem wanem long ol man we oli laef bifo long Ebraham, olsem Ebel, Inok, mo Noa? ?Olgeta tu oli gat bilif, no? Yes i tru, be Ebraham nao we God i mekem promes long hem se bambae hem i karem blesing i kam long olgeta laen blong man long wol. (Jenesis 22:18) Taswe, hem nao i olsem stamba blong olgeta we oli bilif long spesel Laen ya we Jeova i promes blong stanemap. (Galesia 3:8, 9) Long wan fasin, Ebraham i olsem papa blong yumi, hemia from we hem i givim wan nambawan eksampol blong bilif, we yumi mas folem. Yumi save tingbaot ful laef blong hem olsem wan eksampol blong bilif, taem hem i stanap strong blong winim plante trabol mo traem. Bigfala samting we i traem bilif blong hem bitim ol narafala samting, hemia taem hem i kasem oda blong kilim pikinini blong hem i ded olsem wan sakrefaes. Be i tru se, longtaem bifo long traem ya, Ebraham i bin soemaot bilif blong hem finis taem hem i winim plante smosmol traem. (Jenesis 22:1, 2) Naoia, bambae yumi tokbaot sam long ol faswan samting we oli traem bilif blong hem, mo yumi luk wanem lesen we yumi save lanem tede.

Oda Blong Aot Long Uru

3. ?Baebol i talem wanem long saed blong ol faswan yia blong laef blong Ebram?

³ Fastaem we Baebol i tokbaot Ebram (we biaen i kam Ebraham), hemia long Jenesis 11:26, we i talem se: “Tera i gat seventi yia blong hem, nao hem i bonem Ebram, mo Naho, mo Haran.” Ebram i wan smol bubu blong man ya Sem, we hem i onagud long God. (Jenesis 11:10-24) Jenesis 11:31 i talem se Ebram mo famle blong hem oli stap long wan rij taon we fastaem i stap klosap long Yufretes Reva, long saed i go long is. Nem blong taon ya, “Uru long Koldia.” * Taswe, Ebram i no gruap long bus olsem wan man we i stap wokbaot olbaot mo slip long haos tapolen, no gat. Hem i gruap long wan bigfala taon we i gat plante sas samting raonabaot long hem blong mekem laef i isi. Long maket long Uru, ol man oli save pem fulap samting we oli kam long ol narafala kantri. Taon ya Uru i fulap long ol bigbigfala haos, we oli pentem olgeta i waet, oli gat 14 rum insaed long olgeta wanwan, wetem ol paep blong wota saplae tu i go insaed.

4. (a) ?Wanem ol samting long Uru we oli save traem ol man blong trufala God? (b) ?Olsem wanem Ebram i kasem bilif long Jeova?

⁴ Antap long ol rij samting blong Uru, i gat sam narafala samting tu we oli save traem wan trufala man blong God. Taon ya i fulap long wosip blong ol aedol mo ol giaman bilif blong mekem man i fraet. Faswan samting we man i luk taem hem i kam long taon ya, hemia wan bigfala taoa we i go antap we i go antap, hemia blong ona long god blong mun we nem blong hem Nanna. Yumi save se ol man mo maet ol famle blong Ebram tu, oli mas traem blong fosem hem blong joen long rabis wosip ya. Sam kastom stori blong ol man Isrel oli talem se Tera, papa blong Ebram, hem tu i wan man blong wokem ol aedol. (Josua 24:2, 14, 15) Nating se i olsem wanem,  Ebram i no joen nating long rabis wosip blong ol giaman god. Sem, olfala bubu blong Ebram, i laef i stap yet, mo i klia se hem i tokbaot ol save we hem i gat long saed blong trufala God. !From samting ya, Ebram i bilif long Jeova, i no long Nanna!—Galesia 3:6.

Samting We i Traem Bilif

5. ?Wanem oda mo promes we God i givim long Ebram taem hem i stap yet long Uru?

⁵ Bilif blong Ebram i kasem traem. God i kamtru long Ebram mo i talem long hem se: “Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu. Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen. Mi bambae mi blesem yu, mo bambae mi mekem we plante man oli savegud nem blong yu, blong yu bambae yu kam olsem rod blong mi blong mi blesem plante man. Olgeta we oli singaot long mi blong mi blesem yu, mi bambae mi blesem olgeta, be olgeta we oli singaot trabol i kam long yu, mi bambae mi mekem trabol i kam long olgeta. Mi bambae mi yusum yu blong blesem ol man blong olgeta narafala kantri long wol.”—Jenesis 12:1-3; Ol Wok 7:2, 3.

6. ?From wanem Ebram i nidim bigfala bilif blong aot long taon ya Uru?

⁶ Ebram i olfala finis be hem i no gat pikinini. ?Olsem wanem hem i save kam “wan strongfala laen”? ?Mo kantri ya we Ebram i mas go long hem, hem i weples stret? God i no talem long hem. Ale, Ebram i nidim bigfala bilif blong lego rij taon ya Uru wetem ol naesfala samting blong hem. Buk ya Family, Love and the Bible i tokbaot laef long taem bifo, i se: “Taem wan man i mekem wan samting we i nogud tumas, maet famle blong hem i panisim hem. Panis we i bigwan olgeta, hemia se oli sakemaot hem, i  no moa stap olsem ‘memba’ blong famle ya. . . . Taswe, taem Ebraham i folem tok blong God blong lego kantri blong hem mo famle blong hem, hem i soemaot long wan bigfala fasin, se hem i obeigud long God mo i trastem Hem fulwan.”

7. ?Wanem ol traem we ol Kristin tede oli save kasem, we oli sem mak long ol traem we Ebram i kasem?

⁷ Tede, plante Kristin oli kasem ol semfala traem ya. Maet i gat plante samting we i save pulum yumi blong putum ol sas samting blong laef fastaem long wosip blong Jeova, olsem ol samting we oli save pulum Ebram bifo. (1 Jon 2:16) Maet sam famle blong yumi oli agensem wosip blong yumi. Maet samfala long famle we kongregesen i putumaot olgeta finis, oli traem pulum yumi blong joen wetem ol rabis fren. (Matiu 10:34-36; 1 Korin 5:11-13; 15:33) Ale, Ebram i givim wan nambawan eksampol long yumi. Hem i putum fasin fren blong hem wetem Jeova, fastaem long olgeta narafala samting, mo fastaem long famle blong hem tu. Hem i no save stret, olsem wanem, wetaem, mo weples, ol promes blong God bambae oli kamtru. Be nating, hem i rere blong mekem laef blong hem i stanap long ol promes ya. !Nambawan eksampol blong hem i save pulum yumi tede, blong putum Kingdom i stap fastaem long ol narafala samting long laef blong yumi!—Matiu 6:33.

8. ?Bilif blong Ebram i mekem wanem long ol prapa famle blong hem, mo ol Kristin oli save lanem wanem from?

⁸ ?Olsem wanem long prapa famle blong Ebram? Ating, bilif mo strong tingting blong Ebram i givhan bigwan long olgeta, from we Sarae, woman blong hem, mo Lot, boe blong brata blong hem we i ded finis, oli aot long Uru tu, folem tok we God i talem. Biaen, Naho, brata blong Ebram, wetem sam pikinini blong hem, oli aot long Uru, oli go stap long taon ya Haran, mo long ples ya oli mekem wosip long Jeova. (Jenesis 24:1-4, 10, 31; 27:43; 29:4, 5) !Yes, Tera, we i papa blong Ebram, hem tu i agri blong aot long taon ya wetem boe blong hem! From samting ya, mo from we hem i hed blong famle, Baebol i talem se hem nao i girap i muf i go long kantri ya Kenan. (Jenesis 11:31) Ating yumi tu bambae  yumi kasem gudfala frut sipos yumi prij long ol famle blong yumi long kaen fasin.

9. ?Olsem wanem Ebram i mekemrere from trip blong hem, mo wanem samting we ating hem i mas rere blong lusum?

⁹ Bifo we Ebram i aot, hem i gat plante samting blong mekem. Hem i mas salem graon blong hem mo olting blong hem, mo pem ol haos tapolen, ol kamel, kakae, mo ol narafala samting we bambae oli nidim. Maet Ebram i bin lusum plante mane taem hem i hareap blong mekem olgeta samting ya. Be hem i no wari, from we hem i glad tumas blong obei long Jeova. !Ale, ol samting i rere nao, ol kamel blong Ebram wetem olting we oli karem, oli stanap i stap afsaed long stonwol blong Uru, oli rere blong statem longfala trip ya! !Hemia wan dei we i impoten tumas! Ale oli aot, oli folem Yufretes Reva i go long notwes. Afta we oli wokbaot plante wik finis, oli kasem wan taon long Not Mesopotemia, nem blong hem Haran. Hem i 1,000 kilometa longwe long Uru, mo hem i wan ples we olgeta man blong mekem ol longfala trip oli stop smol blong spel.

10, 11. (a) ?Ating from wanem nao Ebram i stap longtaem lelebet long Haran? (b) ?Yumi save talem wanem blong leftemap tingting blong ol Kristin we oli stap lukaot long ol olfala papa mama blong olgeta?

¹⁰ Ebram i stap longtaem lelebet long Haran, ating hem i tingbaot olfala papa blong hem, Tera. (Levitikas 19:32) Tede tu, plante Kristin oli mas lukaot long olfala papa mama blong olgeta we maet oli sik. Mo samfala oli mas jenisim sam samting long laef blong olgeta blong mekem wok ya. Olgeta ya oli save bilif strong se ol samting we oli livim blong mekem wok ya wetem lav, “hemia i wan samting we God i glad long hem.”—1 Timoti 5:4.

¹¹ Ale, taem i pas. “Nao Tera i ded long ples ya [Haran], mo taem hem i ded, hem i gat tu handred faef yia blong hem.” Ebram i sore tumas, be taem hem i krae finis from papa blong hem, wantaem nomo hem i aot long Haran. “Nao long taem we Ebram i gat seventi faef yia blong hem, hem i aot long ples ya Haran olsem we Hae God i talem long hem. Hem i tekem Sarae we i woman blong hem, mo Lot we i pikinini blong brata blong hem, tufala i biaen long hem, mo i tekem olgeta samting we trifala i bin kasem long taem ya we trifala i stap long Haran, wetem olgeta slef blong trifala. Nao olgeta evriwan oli aot long Haran, oli wokbaot blong go long kantri ya Kenan.”—Jenesis 11:32; 12:4, 5.

12. ?Ebram i mekem wanem long Haran?

¹² Yumi makem se taem Ebram i stap long Haran, hem i ‘kasem plante samting.’ Taem hem i aot long Uru, hem i bin lus bigwan. Be naoia, taem hem i aot long Haran, hem i wan rij man bakegen. I klia se God i blesem hem bigwan. (Prija 5:19) Tede, God i no promes se bambae i mekem ol man blong hem oli kam rij, be hem i holem promes blong hem oltaem se olgeta we oli ‘lego haos no brata no sista’ blong olgeta blong mekem wok blong Kingdom, bambae hem i givim ol samting we olgeta oli nidim. (Mak 10:29, 30) Ebram i gat ‘ol slef’ tu, hemia ol man blong wok blong hem. Tufala hanraet ya Jerusalem Targum mo Chaldee Paraphrase oli talem se Ebram i ‘pulum olgeta blong jenisim bilif blong olgeta.’ (Jenesis 18:19) ?Olsem wanem long yu? ?Bilif blong yu i pusum yu blong storian wetem ol man raonabaot long yu, ol man we oli wok wetem yu, mo ol yangfala we oli skul wetem yu? Ebram i no spel long Haran mo fogetem oda blong God, no gat. Hem i yusum taem blong hem long fasin we i karem bigfala frut. Be naoia, hem i finis long Haran. “Hem i aot long ples ya Haran olsem we Hae God i talem long hem.”—Jenesis 12:4.

Narasaed Long Yufretes

13. ?Long wanem dei Ebram i krosem Yufretes Reva, mo from wanem dei ya i impoten?

¹³ Bakegen, Ebram i mas wokbaot. Hem wetem ol kampani blong hem, oli aot long Haran, oli wokbaot i go 90 kilometa long wes. Maet Ebram i bin stop smol long narasaed long Yufretes, klosap long wan ples we ol man oli kam long hem blong mekem maket, nem blong hem Kakemis. Ol man we oli stap mekem trip oli krosem reva long ples ya, wetem ol anamol blong olgeta. * ?Long wanem dei stret we Ebram mo ol man we oli wokbaot wetem hem oli krosem reva? Baebol i soemaot se samting ya i kamaot 430 yia bifo we ol man Isrel oli aot long Ijip long Naesan 14, 1513 B.K.T. Eksodas 12:41 i talem se: “Olgeta twelef laen blong ol man ya blong Hae God oli kamaot . . . long kantri ya Ijip. Nao stret long dei ya we fo handred toti yia i finis, olgeta oli aot.” Taswe, ating promes we God i mekem long Ebraham i stat kamtru  long Naesan 14, 1943 B.K.T. *, taem Ebram i obei long God mo i krosem reva ya Yufretes.

14. (a) ?Bilif blong Ebram i mekem se hem i luk wanem samting long tingting blong hem? (b) ?Olsem wanem ol man blong God tede oli kasem blesing we i bigwan moa long hemia we Ebram i kasem?

¹⁴ Ebram i lego wan rij taon. Be long tingting blong hem, hem i stap luk “wan taon we fandesen blong hem i save stap oltaem nomo,” hemia wan stret gavman we bambae i rul long olgeta man. (Hibrus 11:10) Yes, smol save we Ebram i gat, i naf blong hem i stat blong kasem save long stamba tingting blong God blong sevem ol man. Tede, yumi kasem blesing blong gat plante moa save i winim wanem we Ebram i bin gat, long saed blong stamba tingting blong God. (Ol Proveb 4:18) Kingdom gavman, no “taon” ya we Ebram i bin putum tingting blong hem i stap strong long hem, tede hem i kamtru finis. Hem i stanap long heven long 1914. ?Yu ting se samting ya i mas pulum yumi blong mekem ol wok we i soemaot bilif mo tras long Jeova? Yes.

Wokbaot Long Promes Lan i Stat

15, 16. (a) ?From wanem Ebram i nidim fasin blong no fraet blong wokem wan olta blong mekem wosip long Jeova? (b) ?Olsem wanem ol Kristin tede oli save soemaot fasin no fraet, olsem Ebram?

¹⁵ Jenesis 12:5, 6 i talem se: “Nao taem olgeta oli kamtru long kantri ya Kenan, oli wokbaot i go long Sekem. Nao oli go kasem tabu ples ya More, we i gat wan olfala tri i stap long hem.” Sekem i stap 50 kilometa long Jerusalem, long saed i go long not. Hem i stap long wan naesfala ples long medel blong tufala hil, graon i rij, mo plante man oli kolem ples ya se “paradaes blong tabu kantri ya.” Nating se i olsem, “long taem ya, ol laen blong Kenan oli stap yet long ples ya.” Ol man Kenan oli folem ol fasin we oli rabis nomo, taswe Ebram i mas lukaotgud se olgeta oli no spolem gudfala fasin blong famle blong hem.—Eksodas 34:11-16.

¹⁶ Nao, namba tu taem, “Hae God i kamtru long Ebram long ples ya, i talem long hem se, ‘Hemia nao graon ya we mi bambae mi givim long olgeta we bambae oli kamaot biaen long yu.’ ” !Hemia i nambawan  nius! I tru, Ebram i nidim bilif, from se bambae hem i no luk samting ya, ol pikinini blong hem nomo bambae oli luk long fiuja. Nating se i olsem, Ebram i soem se hem i glad, “i wokem wan olta long ples ya blong mekem wosip long Hae God.” (Jenesis 12:7) Wan man blong hae save long saed blong Baebol i talem se: “Fasin ya blong wokem wan olta, i blong soemaot se hem i tekem graon ya i blong hem, mo hem i gat raet blong mekem olsem from we hem i stap soemaot bilif.” Mo tu, taem Ebram i wokem olta ya, hem i soemaot se hem i no fraet. Ating olta ya i sem mak long hemia we Loa i tokbaot biaen, we oli mas wokem long ol ston (we oli no katem). (Eksodas 20:24, 25) Olta ya bambae i defren olgeta long ol olta blong ol man Kenan. Olsem nao, Ebram i no fraet blong soemaot long ol man se hem i stap wosip long trufala God ya, Jeova. Ating plante man oli tok agens long hem from, mo maet oli wantem kilim hem from. ?Olsem wanem long yumi tede? ?Sam long yumi, antap moa ol yangfala, yumi haedem long ol man raonabaot mo long ol fren blong yumi long skul se yumi wosip long Jeova? !I gud sipos eksampol blong Ebram we hem i no fraet nating, i pulum yumi evriwan blong soemaot se yumi glad tumas blong stap olsem ol man blong Jeova!

17. ?Olsem wanem Ebram i soemaot se hem i wan man blong talemaot nem blong God, mo samting ya i mekem ol Kristin tede oli tingbaot wanem?

¹⁷ Nomata wanem ples Ebram i go long hem, hem i putum wosip blong Jeova long fasples long laef blong hem. “Biaen, olgeta oli stap wokbaot i go long saot, nao oli go long ples blong hil, klosap long taon ya Betel, long saed i go long is. Nao Ebram i mekem ples blong hem long medel blong tufala taon ya Betel mo Eae, we Betel i stap long wes mo Eae i stap long is. Nao long ples ya tu, hem i wokem wan olta, mo i stap mekem wosip long [“singaot nem blong,” NW ] Hae God.” (Jenesis 12:8) Hibru tok ya we oli tanem i kam “singaot nem” i save minim “talemaot (prijimaot) nem ya.” I klia se Ebram i no fraet blong talemaot nem blong Jeova long ol man Kenan raonabaot long hem. (Jenesis 14:22-24) Hemia i mekem yumi tingbaot se i impoten we yumi joen fulwan long wok blong “talemaot nem blong hem long ol man” tede.—Hibrus 13:15, NW; Rom 10:10.

18. ?Ebram i stap frengud wetem ol man Kenan raonabaot long hem?

¹⁸ Ebram i no stap longtaem long ol ples we hem i go long olgeta. “Biaen, hem i aot bakegen, i stap wokbaot blong go long haf blong kantri ya long saot [Negeb],” hemia klosap long ol hil blong Juda we smol ren nomo i stap foldaon long hem. (Jenesis 12:9) Ebram mo famle blong hem oli stap wokbaot i go nomo, mo long evri niufala ples we oli go long hem, oli soemaot klia se oli wosip long Jeova. Long fasin ya, “oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.” (Hibrus 11:13) Oltaem, oli lukaotgud blong no fren tumas wetem ol hiten man raonabaot long olgeta. Ol Kristin tede tu oli “no man blong wol ya.” (Jon 17:16) Yumi soemaot kaen fasin mo toktok gud long ol man raonabaot long yumi mo ol man we oli wok wetem yumi, be yumi lukaotgud blong no joen long enikaen fasin blong wol ya we i stap longwe long God.—Efesas 2:2, 3.

19. (a) ?Olsem wanem niufala laef ya blong wokbaot oltaem i wan traem blong Ebram mo Sarae? (b) ?Wanem ol traem we Ebram i mas winim yet?

¹⁹ Yumi no mas fogetem se, ating i no isi long Ebram mo Sarae blong lan long niufala laef ya we oli stap wokbaot oltaem. Laef ya i no isi. Oli no moa save go pem ol defdefren kakae long maket blong Uru, oli mas kilim ol prapa anamol blong olgeta nomo blong kakae. Oli no moa slip long wan gudfala haos we i strong, oli slip long haos tapolen nomo. (Hibrus 11:9) Evri dei Ebram i bisi, hem i gat plante samting blong mekem, blong lukaot long ol anamol blong hem mo givim wok long ol slef blong hem. Sarae i mekem ol wok we oltaem ol woman bifo oli mas mekem, olsem, kukum bred, wokem kaliko, somap klos. (Jenesis 18:6, 7; 2 King 23:7; Ol Proveb 31:19; Esikel 13:18) Be, i gat ol narafala traem we oli mas fesem yet. !I no longtaem, wan trabol i kasem Ebram mo famle blong hem, we klosap oli lusum laef blong olgeta from! ?Olsem wanem long bilif blong Ebram? ?Bambae hem i gat naf bilif blong winim traem ya?

[Ol futnot]

?Yu Yu Makem?

• ?From wanem Baebol i kolem Ebram se ‘stamba blong olgeta we oli bilif long God’?

• ?From wanem Ebram i nidim bilif blong aot long Uru long Koldia?

• ?Olsem wanem Ebram i soemaot se hem i putum wosip blong Jeova long fasples long laef blong hem?

[Kwestin]

[Map blong pija long pej 16]

TRIP BLONG EBRAM

Uru

Haran

Kakemis

KENAN

Mediterenian Si

[Credit Line]

Based on a map copyrighted by Pictorial Archive (Near Eastern History) Est. and Survey of Israel

[Tok blong pija long pej 15]

Ebram i nidim bilif blong lego isi laef long Uru

[Tok blong pija long pej 18]

Fasin blong Ebram mo famle blong hem blong stap long haos tapolen, i “talemaot we oli stap long wol ya, be i olsem we oli strenja nomo”