Oli Win Long Kot Blong Federol Konstitusen

KOT kes we ol Witnes blong Jeova oli winim long Kot blong Federol Konstitusen long Karlsruhe, i makem wan impoten jenis long wok blong olgeta long Jemani. Kes ya i givhan long olgeta blong kasem moa raet blong wok olsem wan kampani we loa i agri long hem.

Ol Witnes blong Jeova oli stap mekem wok blong prij long Jemani blong bitim 100 yia finis. Oli pastru long ol hadtaem we Nasnal Sosialis pati mo Komunis pati i bin mekem long olgeta long ol yia 19 handred. Stat long 1990, ol Witnes oli traem kasem raet olsem wan kampani blong pablik loa we gavman i agri long hem. Ol Witnes oli bin winim tu disisen long kot finis we i stap long saed blong olgeta, mo oli bin lusum wan disisen we i go agensem olgeta. Ale nao oli apil i go long Kot blong Federol Konstitusen. Kot ya i talemaot disisen blong hem long namba 19 Disemba, 2000.

Disisen We i Tekem Saed Blong Ol Witnes

Olgeta seven jaj blong kot ya oli mekem disisen we i tekem saed blong ol Witnes. Oli sakemaot wan disisen we Federol Administratif Kot i bin mekem long 1997. Ol jaj ya oli givim oda se kot i mas tingting bakegen long wanem we ol Witnes oli askem.

Kot blong Federol Konstitusen i tekem janis ya blong tokbaot fasin we Gavman i stap mekem long ol smosmol grup blong skul. Blong luksave sipos wan grup hem i wan skul, “yumi no lukluk long ol bilif blong hem, be yumi lukluk long ol wok blong hem.”

Mo tu, kot i luksave se taem ol Witnes oli talem se oli “no wantem joen long ol wo,” oli no “go agensem rul blong demokratik gavman” mo oli no “traem stanemap prapa gavman blong olgeta.” Taswe, fasin ya blong no joen long ol politik eleksen i no wan pruf blong yusum agensem ol Witnes we oli askem raet blong wok olsem wan kampani we loa i agri long hem.—Jon 18:36; Rom 13:1.

Kot i gohed blong talem se, sam samtaem wan man we i holem bilif—nating se hem i wan Witnes no wan memba blong narafala skul—bambae i faenem se ol samting we Gavman i askem hem blong mekem oli go agensem bilif blong hem. Sipos man ya i folem tingting we i jajem hem, nao hem i “obei moa long bilif blong hem, bitim we hem i obei long loa,” Gavman i mas luksave se hemia i stret mo i laenap wetem loa ya we i talem se man i fri blong wosip.—Ol Wok 5:29.

Disisen blong kot ya i mekem bigfala toktok long ol nius. Ating evri niuspepa long Jemani oli tokbaot ripot blong kes ya. Olgeta bigfala televisin mo radio stesen blong kantri oli givim ripot long saed ya no oli askem kwestin long sam man we oli bin joen long bisnes ya. I neva gat wan taem long Jemani we nem blong Jeova i kamaot plante olsem.

[Foto Credit Line blong pija long pej 8]

AP Photo/Daniel Maurer