Stefeket Blong Talem Tangkiu

GRUP ya Association of Congolese and African Journalists for the Development (AJOCAD) blong Demokratik Ripablik blong Kongo i givim wan “stefeket long ol wanwan man mo grup we oli mekem wan gudfala wok blong givhan long [Kongo] blong i kamgud moa.”

Long Novemba 17, 2000, ol Witnes blong Jeova oli kasem wan Stefeket blong Talem Tangkiu. Hemia from “ol nambawan buk blong olgeta we oli givim tijing mo edukesen long ol man, mo we oli mekem Kongo i kamgud moa.”

Niuspepa blong Kinshasa Le Pahare, i talem long saed blong stefeket ya se: “I had blong faenem wan man Kongo we i no bin ridim wan Wajtaoa, Wekap! no wan narafala buk we ol Witnes blong Jeova oli wokem. Ol buk ya [oli tokbaot] evri samting long saed blong laef.” Niuspepa ya i talem tu se, ol buk ya oli talem “olsem wanem blong stretem ol trabol we yumi stap kasem,” mo oli soemaot “bigfala mining blong ol samting we i stap kamaot long wol tede.” Olgeta magasin ya Wekap! “oli no joen nating long politik, mo oli no lukluk se samfala oli defren from kala blong skin.” Mo tu, ol buk ya oli givhan long ol man blong oli wokem “wan strongfala bilif long promes blong Man ya we i Wokem olgeta samting se, i no longtaem, bambae hem i finisim olgeta rabis fasin mo putum pis mo seftaem long wol ya.”

Olsem AJOCAD i talem, ol buk blong ol Witnes blong Jeova oli gat bigfala paoa long hat blong plante man Kongo. Oli wokem ol buk ya long plante handred lanwis, mo ol nambawan tok blong olgeta long saed blong wan gudfala fiuja i save givhan long yu tu.

Plis lukluk long smol bokis daon, blong faenemaot olsem wanem yu save kasem olgeta.