Wan Buk We Plante Yangfala Oli No Tingbaot

“?OLSEM wanem mi save sua se Baebol hem i rili Tok blong God? Mi no intres nating blong ridim wan buk olsem.” Hemia toktok blong wan yangfala woman we nem blong hem Beate.

Long Jemani, ples we Beate i stap long hem, bighaf blong ol yangfala oli gat sem tingting olsem hem. Taswe, oli no ting se i impoten blong ridim Baebol. Long wan stadi we sam man oli mekem i no longtaem, oli askem kwestin long ol yangfala se hu long olgeta i stap ridim Baebol. Samwe long 1 pesen blong ol yangfala oli talem se oli ridim Baebol oltaem, 2 pesen oli talem se samtaem, 19 pesen oli talem se wanwan taem, mo klosap 80 pesen oli talem se oli neva ridim. Ating ol namba ya oli sem mak long narafala kantri tu, mo maet i olsem long ples blong yu. I klia se, Baebol i wan buk we plante yangfala oli no tingbaot.

!Taswe yumi no sapraes we bighaf blong ol yangfala oli no save plante samting long saed blong Baebol! Long stat blong yia 2000, niuspepa ya, Lausitzer Rundschau i tokbaot wan stadi we sam man oli mekem blong faenemaot hamas man oli save ol Tenkomanmen mo folem long laef blong olgeta. Oli faenemaot se 67 pesen blong olgeta we yia blong olgeta i bitim 60 oli save ol komanmen mo oli folem. Be olgeta we oli no kasem 30 yia yet, i gat 28 pesen nomo we oli save ol komanmen ya. Tru ya, Tok blong God i wan buk we plante yangfala oli no gat save long hem.

Sam Oli Gat Defren Tingting

Be yet, i gat plante milian yangfala long olgeta ples blong wol we oli tingbaot Tok blong God olsem wan samting we i sas. Tingbaot eksampol blong Alexander. Hem i gat 19 yia mo hem i stap ridim Baebol evri moning bifo we hem i go long wok. Hem i talem se: “Long tingting blong mi, hemia beswan rod blong statem dei.” Sandra tu, i makemaot taem blong ridim wan haf blong Baebol evri naet. Hem i talem se: “Fasin ya i kam wan haf blong laef blong mi evri dei.” Mo Julia, we hem i gat 13 yia nomo, i stap ridim wan japta blong Baebol evri naet bifo we hem i slip. Hem i talem se: “Mi rili glad blong mekem olsem, mo mi wantem gohed blong mekem olsem long fiuja.”

?Weswan long olgeta tingting ya i stret mo i waes? ?Fasin blong ridim Baebol i save karem frut? ?Baebol i wan buk we i impoten mo i save halpem ol yangfala? ?Wanem tingting blong yu?