?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Long taem blong yumi, from wanem i stret blong tingbaot ol kwestin long Job japta 38?

Yumi evriwan, wetem ol sayentis tu, i no kasemsave fulwan long saed blong plante long ol nambawan wok we God i mekem. Yumi no kasemsave fulwan se, olsem wanem graviti i mekem wol ya i stap long stret ples blong hem, wanem ya laet, from wanem ol smosmol pis blong sno oli defdefren evriwan, olsem wanem ren i kamaot, mo wanem paoa i stap biaen long ol strongfala laetning mo tanda.—4/15, pej 4-11.

• ?Wanem eksampol long Baebol we i save givhan blong winim ol filing we oli trabol?

Asaf, Baruk, mo Nomi oli bin pastru long sam taem long laef we tingting blong olgeta i foldaon no i trabol. Baebol i tokbaot stori blong olgeta ya, mo i soemaot olsem wanem oli winim ol traem ya. Stori blong olgeta i save givhan long yumi.—4/15, pej 22-24.

• ?Yumi save mekem wanem blong givhan long ol Kristin wido?

Ol fren blong wan wido oli save talem klia mo wetem kaen fasin se oli wantem givhan. Maet ol memba blong famle mo ol narafala oli save givhan taem oli rere blong givim mane no sam narafala samting we hem i rili nidim. Ol narafala Kristin oli save givhan taem oli soem lav mo frengud wetem ol wido, mo taem oli sapotem olgeta long saed blong spirit mo long saed blong filing.—5/1, pej 5-7.

• ?From wanem i impoten blong mared wetem wan “man blong Masta” nomo, olsem 1 Korin 7:39 i talem?

Plante taem, sipos wan man no woman we i gat bilif i mared wetem narafala we i no gat sem bilif, bigfala problem i save kamaot. Antap long samting ya, fasin blong folem ol advaes we oli kamaot long God, i soemaot we yumi stap tru long Jeova God. Taem yumi folem Tok blong God, hat blong yumi bambae i no harem se yumi mekem samting we i rong. (1 Jon 3:21, 22)—5/15, pej 20-21.

• ?Sipos Jeova i fogivim ol sin blong yumi, from wanem ol Kristin oli mas talemaot ol bigfala sin blong olgeta long ol elda blong kongregesen?

I tru, ol Kristin oli mas askem Jeova blong fogivim ol bigfala sin blong olgeta. (2 Samuel 12:13) Be, olsem we profet Natan i givhan long Deved, olgeta long kongregesen we oli bigman long saed blong spirit oli save halpem man ya we i sore from sin blong hem. Fasin blong go luk ol elda i laenap wetem advaes blong Jemes 5:14, 15.—6/1, pej 31.

• ?Wanem i soemaot se yumi mas lukaot long ol pikinini we oli no gat papa mo ol wido we oli nidim help?

Ol samting we i hapen bifo, we Baebol i tokbaot, i soemaot se fasin blong lukaot long olgeta ya i wan mak blong trufala wosip blong ol man Hibru bifo, mo ol faswan Kristin tu. (Eksodas 22:22, 23; Galesia 2:9, 10; Jemes 1:27) Long Baebol, aposol Pol i givim klia advaes se ol Kristin oli mas givhan long ol wido we oli gat nid. (1 Timoti 5:3-16)—6/15, pej 9-11.

• ?Wanem rod blong gat wan laef we i hapi mo we i gat mining?

Yumi mas wokem mo holem wan gudfala fasin fren wetem Jeova, we hem i Papa blong yumi long heven. Fasin blong stadi Baebol i impoten samting we i save givhan blong yumi mekem olsem.—7/1, pej 4-5.

• ?Ol man wanwan oli gat wan spirit we i gohed blong laef afta we bodi i ded?

Sam man oli bilif se taem man i ded, wan spirit—be i no sol—i gohed blong laef samples. Be, Baebol i no sapotem tingting ya. Baebol i soem se taem man i ded, hem i gobak long graon, mo hem i no moa laef i stap samples. God nomo i gat paoa blong mekem hem i laef bakegen. Taswe, hop blong girap bakegen, mo laef long fiuja i stap long God nomo. (Prija 12:7)—7/15, pej 3-6.

• ?Daniel i stap wea taem trifala Hibru oli kasem traem long levelples blong Dura?

Baebol i no talem se Daniel i stap wea long taem ya. Maet Daniel i no nid blong stap from hae posisen blong hem, no maet hem i no stap from we hem i go long narafala ples blong mekem wan spesel wok. Be, yumi save sua se Daniel i no lego fasin blong stap tru long Jeova.—8/1, pej 31.