!Bifo Mitufala i Olsem Wael Dog—Naoia Mitufala i Olsem Sipsip!

Taem mi mo Sakina mitufala i smol gel yet, haos blong mifala i stap klosap long haos blong hem. Sakina i wan bigfala gel we i strong, be mi mi smol mo bunbun. Oltaem mitufala i stap rao, be wan dei i gat wan bigfala faet i kamaot bitwin mitufala. Stat long taem ya, mitufala i no moa toktok long mitufala no talem halo long mitufala. Biaen, mitufala i muvaot mo mitufala i no moa luk mitufala bakegen.

Long 1994, mi stat blong stadi wetem ol Witnes blong Jeova, mo sloslou, fasin blong mi i stap jenis. Fo yia biaen, mi joen long spesel dei asembli blong mifala long Bujumbura, long Burundi, mo mi sek long Sakina long ples ya. Mi mi glad se hem i stap, be mitufala i no rili talem halo wetem glad. Biaen, mi mi no save bilivim taem mi luk we hem i stanap wetem sam narafala blong tekem baptaes. Hem tu i jenis bigwan. Hem i no moa strong gel ya blong faet we oltaem mi bin agiu wetem hem. I nambawan tumas blong luk we hem i soemaot long ol man long taem ya, se hem i givim laef blong hem long God mo tekem baptaes.

Taem hem i kamaot long wota, kwiktaem mi go putum han blong mi i goraon long hem, mo mi toktok smol long sora blong hem se : “?Yu yu rimemba olsem wanem yumitu i bin stap faet?” Hem i talem se : “Yes, mi rimemba, be hemia i bifo finis. Mi mi wan niufala woman naoia.”

Mitufala tugeta i glad blong faenem trutok blong Baebol. Trutok ya i joenem gud mitufala mo i jenisim fasin blong mitufala we fastaem i olsem wael dog i kam olsem fasin blong sipsip we i folem Bigfala Man blong lukaot long Sipsip, Jeova God. I tru se, trutok blong Baebol i save jenisim laef blong man.