?Olsem Wanem Pis We Kraes i Givim i Save Bos Long Hat Blong Yumi?
?Olsem Wanem Pis We Kraes i Givim i Save Bos Long Hat Blong Yumi?
“Yufala i mas letem pis ya we Kraes i stap givim i bos long hat blong yufala, from we yufala i joen olsem ol haf blong wan bodi nomo.”—KOLOSI 3:15, NW.
1, 2. ?Long wanem rod, “pis we Kraes i stap givim” i save bos long hat blong wan Kristin?
PLANTE taem, tok ya “bos” i wan tok we man i no laekem from we i givim tingting ya se narafala i gat paoa long olgeta mo i lidim olgeta. Taswe, maet samfala oli tingting se Pol i bitim mak lelebet taem hem i givim advaes long ol Kristin brata blong Kolosi se, “Letem pis ya we Kraes i stap givim i bos long hat blong yufala.” (Kolosi 3:15, NW ) ?Yumi no fri blong jusum wanem we yumi wantem? ?From wanem yumi mas letem wan samting no wan man i bos long tingting blong yumi?
2 Pol i no stap talem long ol Kristin long Kolosi se oli mas lego fasin fri we oli gat blong jusum samting we oli wantem. Be, Grik tok ya we oli tanem long Kolosi 3:15 se “bos” i laenap wetem wan narafala tok we ol man long taem bifo oli stap yusum blong tokbaot rafri we i givim praes long ol man we oli winim resis. Ol man we oli joen long wan resis oli fri blong mekem wanem we oli wantem be oli no mas bitim ol rul blong gem. Nao taem gem i finis, rafri nao bambae i tekem disisen se hu nao man we i bin folem ol rul mo i stret blong kasem praes. Long sem fasin, yumi fri blong mekem eni disisen we yumi wantem long laef blong yumi. Be, taem yumi mekem ol disisen ya, pis ya we Kraes i stap givim hem i mas stap olsem “rafri” blong yumi—no “paoa we i kontrolem” hat blong yumi, olsem we Edgar J. Goodspeed, wan man blong tanem ol lanwis i go long narafala lanwis, i bin talem.
3. ?Wanem ya “pis we Kraes i stap givim”?
3 ?Wanem ya “pis ya we Kraes i stap givim”? Hemia wan tingting we i no trabol, i kwaet. Yumi kasem tingting we i kwaet taem yumi kam disaepol blong Jisas mo yumi lanem se Jeova God mo Pikinini blong hem, tufala i lavem mo agri long yumi. Taem Jisas i rere blong lego ol disaepol blong hem, hem i talem long olgeta se: “Mi mi putum pis blong mi i stap wetem yufala. . . . Yufala i no letem tingting blong yufala i trabol, yufala i no fraet.” (Jon 14:27) Pis ya i stap klosap 2,000 yia wetem ol tabu man blong bilif, we oli joen long bodi blong Kraes. Mo tede, “ol narafala sipsip” we oli ol fren blong ol tabu brata ya, olgeta tu oli stap harem gud from pis ya. (Jon 10:16) Pis ya i mas gat paoa long hat blong yumi mo i mas lidim hem. Taem yumi kasem ol strong traem, pis ya i save halpem yumi blong yumi no letem fraet i holemtaet yumi mo no letem tingting blong yumi i trabol bitim mak. Bambae yumi luk olsem wanem samting ya i save kamtru taem ol man oli mekem i no stret long yumi, taem yumi gat ol wari, mo taem yumi ting nogud long yumi wan.
Taem Ol Man Oli Mekem i No Stret Long Yumi
4. (a) ?Olsem wanem Jisas i save mining blong fasin ya blong mekem i no stret long narafala? (b) ?Ol Kristin oli mekem wanem, taem ol man oli mekem i no stret long olgeta?
4 King Solomon i luksave se: “Man i rulum ol man blong spolem olgeta nomo.” (Prija 8:9, NW ) Jisas i savegud mining blong ol tok ya. Taem hem i stap long heven, hem i luk olsem wanem we ol man oli stap mekem i no stret long narafala man. Biaen, taem hem i kam long wol, ol man oli mekem hem i safa bigwan from sam samting we i no stret nating. Hem i no gat sin nating, be ol man oli jajem hem se hem i tok nogud long nem blong God mo oli kilim hem i ded olsem wan man blong brekem loa. (Matiu 26:63-66; Mak 15:27) Tede, fasin blong mekem i no stret long narafala, i gohed bigwan yet. Ol trufala Kristin oli bin safa bigwan tumas from we ol ‘man oli no laekem olgeta nating, oli agens long olgeta.’ (Matiu 24:9) Oli bin safa bigwan long ol kamp blong ol Nasi mo long ol kamp blong wok we oli kolem Soviet Gulag. Ol grup blong man oli kamap agensem olgeta, mo oli sakem ol giaman tok blong spolem olgeta. Nomata long olgeta trabol ya, pis ya we Kraes i stap givim, i mekem ol Kristin ya oli stanap strong. Oli folem fasin blong Jisas we Baebol i tokbaot hem se: “Taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta. Hem i putum tingting blong hem i stap strong long God, we i stap jajem ol man long stret fasin.”—1 Pita 2:23.
5. ?Taem yumi harem se wan memba blong kongregesen i mekem i no stret long wan narawan, i gud blong mekem wanem fastaem?
5 Be fasin ya blong mekem i no stret long narafala, i save kamaot smosmol tu insaed long Kristin kongregesen. Sipos i olsem, maet yumi harem olsem Pol we i talem se: “Taem wan man i foldaon long sin be mi tu mi harem nogud tumas.” (2 Korin 11:29) ?Bambae yumi mekem wanem long taem olsem? Yumi mas askem long yumi wan se: ‘?I tru se narafala ya i mekem i no stret?’ Plante taem, yumi no gat save long evri samting biaen long bisnes ya. Maet yumi kam kros from we yumi harem stori long maot blong wan man we i talem se hem i save gud bisnes ya. Be, Baebol i talem stret se: “Man we i no gat hed, hem i save bilif long evri samting.” (Ol Proveb 14:15) Taswe yumi mas waesgud.
6. ?Yumi mekem wanem taem i tru se wan insaed long kongregesen i mekem i no stret long narafala?
6 ?Be olsem wanem sipos yumi wan i stap harem nogud from we narafala i mekem i no stret long yumi? ?Wan man we pis blong Kraes i stap long hat blong hem, bambae i mekem wanem? Maet i nidim blong toktok wetem man no woman ya we yumi ting se hem i mekem i rong long yumi. Be, afta we yumi mekem olsem, i nogud blong go tokbaot bisnes ya long ol narafala. I gud blong putum bisnes ya long han blong Jeova, mo prea se bambae hem i mekem stret fasin i kamaot. (Ol Sam 9:10; Ol Proveb 3:5) Taem yumi mekem samting ya finis, maet yumi save stretem bisnes ya long hat blong yumi, we yumi no tokbaot, yumi “stap kwaet.” (Ol Sam 4:4) Klosap oltaem, advaes ya blong Pol i stret blong folem, we i se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.”—Kolosi 3:13.
7. ?Yumi mas rimemba wanem taem yumi joen wetem ol brata blong yumi?
7 Long evri samting we yumi mekem, yumi mas rimemba se, yumi no save bos long samting we i hapen, be yumi save bos long wanem we bambae yumi mekem folem bisnes ya. Sipos yumi no skelem gud wanem fasin we yumi tekem, taem narafala i mekem i no stret long yumi, bambae yumi spolem pis we i stap long tingting blong yumi. Maet fasin ya i mekem yumi harem nogud moa i winim rong we narafala i mekem long yumi. (Ol Proveb 18:14) Maet tingting blong yumi i foldaon mo yumi no moa joen long kongregesen go kasem taem we yumi ting se oli stretem bisnes ya. Man blong raetem Sam i talem se olgeta we oli laekem ol loa blong Jeova “i no gat wan samting we i save mekem olgeta oli foldaon.” (Ol Sam 119:165) I gud blong tingbaot se, olgeta man evriwan oli harem nogud samtaem from we narafala i mekem i no stret long olgeta. Be yu neva mas letem wan trabol olsem i blokem yu blong mekem wok blong Jeova. I moagud blong letem pis blong Kraes i bos long hat blong yu.
Taem Yumi Gat Ol Wari
8. ?Wanem samting i save mekem man i wari, mo wanem i save kamaot from wari?
8 Wari i wan haf blong laef we yumi gat long ol ‘las dei’ ya. (2 Timoti 3:1) Tru ya, Jisas i talem se: “I nogud yufala i stap tingting tumas long laef blong yufala se, ‘?Bambae mifala i kakae wanem?’ Mo i nogud yufala i stap tingting tumas long bodi blong yufala se, ‘?Bambae mifala i kasem klos blong mifala olsem wanem?’ ” (Luk 12:22) I tru, ol man oli wari from ol samting long saed blong bodi, be i no hemia nomo. Lot i “harem nogud tumas” from ol fasin nogud we hem i luk long Sodom. (2 Pita 2:7) Pol i trabol tumas from we hem i stap “tingting tumas long ol man blong [“kongregesen,” NW ] long olgeta ples.” (2 Korin 11:28) Jisas i harem nogud tumas long naet bifo we hem i ded, mekem se “swet blong hem i stap folfoldaon long graon olsem blad nomo.” (Luk 22:44) I klia se, wari i no kamaot from we wan man i slak long bilif. Be, nomata wanem stamba blong wari, i sua se taem hem i bigwan mo i stap longtaem tumas, hem i save karemaot pis long tingting blong yumi. Samfala oli letem wari i winim olgeta nao oli harem se oli no moa naf blong stap mekem sam long ol wok we Jeova i askem yumi blong mekem. Baebol i talem se: “Taem man i stap wari, fasin ya i stap mekem tingting blong hem i hevi.” (Ol Proveb 12:25) ?Ale, yumi save mekem wanem sipos wari i stap mekem yumi harem nogud tumas?
9. ?Wanem sam gudfala rod we yumi save folem blong karemaot wari? ?Wanem sam wari we yumi no save karemaot?
9 I gat sam wari we yumi save winim. Sipos wari blong yumi i kamaot from wan sik, i waes blong tekem taem blong lukaot long helt blong yu, be hemia bisnes blong yumi wanwan. * (Matiu 9:12) Sipos yumi gat tumas wok blong mekem nao ol wok ya oli kam hevi tumas long yumi, maet i gat rod blong givim sam long ol wok ya long ol narafala blong oli mekem. (Eksodas 18:13-23) ?Be, olsem wanem long olgeta ya, olsem ol papa mama, we oli gat fulap wok be oli no save givim ol wok ya long narafala? ?Olsem wanem long ol Kristin we oli laef wetem wan hasban no waef we i no bilif? ?Olsem wanem long ol famle we oli no gat mane nating no we oli laef long ples we i gat faet long hem? I klia se long laef blong naoia, yumi no save karemaot evri samting we oli stamba blong ol wari. Be nating se i olsem, yumi save holemtaet pis ya we Kraes i stap givim long hat blong yumi. ?Olsem wanem blong mekem samting ya?
10. ?Long wanem tufala rod, wan Kristin i save mekem wari i godaon?
10 Wan rod blong mekem olsem, hemia blong lukluk i go long Tok blong God. King Deved i raetem se: “Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.” (Ol Sam 94:19) Jeova i mekem tingting blong yumi i “kam gud bakegen” tru long Baebol. Sipos yumi ridim Tabu Buk ya evri dei, bambae hem i halpem yumi blong holem pis blong Kraes long hat blong yumi. Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Pol i raetem wan samting we i klosap sem mak, i se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:6, 7) Fasin blong prea oltaem wetem fulhat blong yumi i save halpem yumi tu blong no lusum pis blong yumi.
11. (a) ?Olsem wanem Jisas i soem gudfala eksampol long fasin blong prea? (b) ?Wanem tingting we yumi mas gat long saed blong prea?
11 Jisas i soemaot wan nambawan eksampol long saed ya. Samtaem, hem i prea long Papa blong hem long heven mo i toktok wetem hem long plante aoa. (Matiu 14: 23; Luk 6:12) Prea i halpem hem blong stanap strong tru long ol traem we oli nogud bitim mak. Long naet ya bifo we hem i ded, tingting blong hem i harem nogud bigwan. ?Hem i mekem wanem? Hem i prea “strong moa.” (Luk 22:44) Yes, Pikinini blong God, we i stret gud olgeta, hem i wan man blong prea. !Hemia i min se yumi, ol man blong hem we yumi gat sin, yumi mas traehad blong prea oltaem! Jisas i tijim ol disaepol blong hem se “oli mas prea oltaem, we oli no letem tingting blong olgeta i foldaon.” (Luk 18:1) Prea i wan samting we i gat paoa. Hem i wan impoten tul blong toktok wetem Man ya we i savegud yumi moa i bitim we yumi save yumi. (Ol Sam 103:14) Sipos yumi wantem holem pis ya we Kraes i stap givim long hat blong yumi, yumi mas ‘prea oltaem.’—1 Tesalonaeka 5:17.
Winim Filing Ya Se Yumi No Naf
12. ?From wanem maet samfala oli ting se wok blong olgeta i no naf?
12 Jeova i tingbaot olgeta man blong hem wanwan olsem we oli sas tumas. (Hagae 2:7, futnot long NW ) Be plante oli faenem i had blong bilif long samting ya. Tingting blong samfala maet i foldaon from we oli kam olfala, oli gat tumas wok blong mekem long famle, no oli sik. Sam narafala oli gruap long wan laef we i mekem se naoia oli trabol tumas long sam samting. Sam narafala bakegen maet oli gat tingting we i stap stikim olgeta from sam mastik we oli mekem bifo, mo maet oli ting se Jeova i no save fogivim olgeta. (Ol Sam 51:3) ?Yumi save mekem wanem sipos yumi gat ol filing olsem?
13. ?Wanem vas blong Baebol i leftemap tingting blong olgeta we oli ting se oli no naf?
13 Pis ya we Kraes i stap givim, hem i mekem yumi sua we Jeova i lavem yumi. Yumi save putum pis ya i gobak long hat blong yumi sipos yumi tingting dip long wanem we Jisas i bin talem. Hem i no talem se blong faenemaot sipos yumi sas long ae blong God yumi mas skelem wok blong yumi wetem wok we narafala i mekem. Nogat. (Matiu 25:14, 15; Mak 12:41-44) Jisas i talem se fasin blong stap tru long God, hemia nao i impoten. Hem i talem long ol disaepol blong hem se: “Man we i stanap strong gogo olgeta samting ya i finis, bambae God i sevem hem.” (Matiu 24:13) Jisas tu, ol man oli bin “lukluk nogud long hem.” Be hem i sua fulwan se Papa blong hem i lavem hem tumas. (Aesea 53:3; Jon 10:17) Mo hem i talem long ol disaepol blong hem se God i lavem olgeta tu. (Jon 14:21) Blong mekem oli sua gud long samting ya, Jisas i talem se: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.” (Matiu 10:29-31) !Hemia wan naesfala tok tumas, blong soemaot se Jeova i rili lavem ol man blong hem!
14. ?From wanem yumi sua we Jeova i lavem yumi wanwan?
14 Mo tu, Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Sipos Jeova i pulum yumi i kam blong folem Jisas, i sua se hem i wantem we yumi sef. Jisas i talem long ol disaepol blong hem se: “Mo long sem fasin, Papa blong yufala long heven, hem i no wantem we bambae wan long ol pikinini ya i lus.” (Matiu 18:14) Taswe, sipos yu stap mekem wok blong God wetem fulhat blong yu, yu save glad long wok blong yu. (Galesia 6:4) Sipos tingting blong yu i stap stikim yu from sam mastik we yu mekem bifo, yu mas tingbaot se Jeova i stap fogivim “olgeta” sin blong man we i rili tanem tingting blong hem. (Aesea 43:25; 55:7) Sipos wan samting i mekem tingting blong yu i foldaon, rimemba se Jeova “i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”—Ol Sam 34:18.
15. (a) ?Olsem wanem Setan i traem karemaot pis blong yumi? (b) ?Yumi save trastem Jeova long wanem samting?
15 Setan i wantem tumas blong karemaot pis blong yu. Hem i gat fol from sin ya we yumi evriwan i bon wetem mo we yumi stap faet agensem. (Rom 7:21-24) Hem i wantem tumas blong mekem yu yu harem se God i no save glad long wok we yu mekem from we yu sinman. !Neva letem Devel Setan i spolem tingting blong yu! Luksave ol trik blong hem, mo yusum fasin luksave ya blong mekem tingting blong yu i strong moa blong stanap strong longtaem. (2 Korin 2:11; Efesas 6:11-13) Rimemba se, “God i hae moa long tingting blong yumi, mo hem i save evri samting.” (1 Jon 3:20) Jeova i no lukluk ol mastik nomo. Hem i stap lukluk tu, wanem we i pusum yumi blong mekem wok blong hem mo wanem we yumi wantem mekem blong hem. Taswe, yu mas harem gud long tok ya blong Sam, we i se: “Hae God bambae i no save lego yumi ya we yumi ol man blong hem, hem bambae i no save gowe long yumi ya we nem blong hem i stap finis long yumi.”—Ol Sam 94:14.
Yumi Joengud From Pis We Kraes i Stap Givim
16. ?From wanem i no yumi nomo we i stap traehad blong stanap strong?
16 Pol i raetem se yumi mas letem pis ya we Kraes i stap givim, i bos long hat blong yumi from we yumi “olsem ol haf blong wan bodi nomo.” Ol tabu Kristin ya we Pol i raetem tok ya i go long olgeta, oli ol haf blong wan bodi nomo, hemia bodi blong Kraes. Smol grup blong ol tabu Kristin long taem blong yumi, olgeta tu oli joen long bodi ya. Ol fren blong olgeta, hemia “ol narafala sipsip,” oli joen wetem olgeta ya, nao oli olsem “wan kampani nomo” aninit long “wan man nomo blong lukaot long olgeta,” hemia Jisas Kraes. (Jon 10:16) Olgeta ya oli joen tugeta olsem wan kampani nomo long fulwol mo oli letem pis ya we Kraes i givim i bos long hat blong olgeta. Taem yumi save se yumi no stap yumi wan nomo, samting ya i save halpem yumi blong stanap strong. Pita i raetem se: “Yufala i mas stanap strong long bilif blong yufala, blong blokem [Setan]. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.”—1 Pita 5:9.
17. ?From wanem i stret nomo blong letem pis blong Kraes i bos long hat blong yumi?
17 Taswe, i gud yumi evriwan i gohed blong wokem pis. Hemia wan impoten frut blong tabu spirit blong God. (Galesia 5:22, 23) Olgeta we Jeova i faenem se laef blong olgeta i klin gud, i no gat rong long hem mo oli stap long pis, bambae oli kasem blesing blong hem, hemia laef we i no save finis long paradaes long wol, we stret fasin nomo bambae i stap long hem. (2 Pita 3:13, 14) Yes, i stret nomo blong letem pis blong Kraes i bos long hat blong yumi.
[Futnot]
^ Long sam man, wari i save kamaot no kam strong moa, from wan sik, we oli kolem clinical depression.
?Yu Yu Tingbaot?
• ?Wanem ya pis we Kraes i stap givim?
• ?Olsem wanem pis we Kraes i givim i save bos long hat blong yumi taem ol man oli mekem i no stret long yumi?
• ?Olsem wanem pis we Kraes i givim hem i save halpem yumi blong bos long wari?
• ?Olsem wanem pis we Kraes i givim hem i save leftemap tingting blong yumi taem yumi ting nogud long yumi wan?
[Kwestin]
[Tok blong pija long pej 15]
Jisas i putum tingting blong hem i stap strong long Jeova, nating se ol man oli jajem hem long rong fasin
[Tok blong pija long pej 16]
Jeova i mekem tingting blong yumi i haremgud bakegen, olsem wan papa we i gat lav
[Tok blong pija long pej 18]
God i tinghae long man we i stanap strong