?Olsem Wanem Yu Save Mekem Ol Gudfala Disisen?

FASIN blong jusum rod blong yumi, i wan presen we God i givim. Sipos yumi no gat fasin ya, yumi sem mak long ol robot nomo, we yumi no save bos long ol samting we yumi mekem. Be, from we yumi gat fasin ya, yumi fesem plante traem. Mo tu, fasin ya i mekem se yumi mas tekem sam disisen long laef.

I tru se plante disisen we yumi mas mekem, oli smol nomo. Be i gat sam narafala disisen oli save gat paoa long laef blong yumi long fiuja, olsem, wanem wok yumi jusum, no sipos yumi mared no nogat. I gat sam narafala disisen tu, we oli gat paoa long ol narawan. Sam disisen we ol papa mama oli mekem, oli gat bigfala paoa long ol pikinini blong olgeta. Antap moa, long saed blong sam disisen, “bambae yumi mas talemaot long fes blong God” from wanem yumi tekem disisen olsem.—Rom 14:12.

Yumi Nidim Help

Ol samting we oli hapen long histri blong man oli soemaot se plante disisen we ol man oli bin mekem oli no karem gudfala frut. Wan long ol faswan disisen we man i mekem i karem nogud frut. Iv i mekem disisen blong tekem wan frut we God i putum tabu long hem. Jus blong hem blong tekem frut ya, i soem se hem i tingbaot hem wan nomo, mo samting ya i lidim man blong hem tu blong i no obei long God. Frut we i kamaot, hemia we ol man oli safa bigwan tede. Plante disisen we ol man oli tekem tede tu oli soemaot se oli tingbaot olgeta nomo, bitim we oli folem ol stret rul. (Jenesis 3:6-19; Jeremaea 17:9) Mo tu, taem yumi gat sam impoten disisen blong mekem, plante taem yumi harem se yumi no naf blong mekem.

Taswe, yumi no sapraes we plante man oli askem help long sam paoa we i bitim paoa blong olgeta, taem oli gat wan impoten disisen blong tekem. Baebol i tokbaot Nebukadnesa we hem i gat wan disisen blong mekem, long taem we hem i stap faet. Nating se hem i king, hem i harem se hem i nidim help, ale hem i singaot ol rabis spirit. Baebol i talem se: “Hem i stap holem ol ara blong bonara blong hem, i stap seksekem olgeta, mo i toktok long ol aedol blong hem blong faenemaot tingting blong olgeta, mo i luklukgud long leva blong anamol ya we hem i mekem sakrefaes blong hem.” (Esikel 21:21) I sem mak tede, plante man oli go luk ol kleva, mo ol man we oli traem faenemaot fiuja from ol sta, mo oli yusum sam narafala rod tu blong askem help long ol rabis spirit. Be, ol rod olsem oli trikim man, mo oli lidim olgeta oli go krangke.—Levitikas 19:31.

I gat wan Man we yumi save trastem fulwan, mo tru long histri, hem i bin givhan long ol man blong mekem ol waes disisen. Man ya i Jeova God nomo. Eksampol, long taem bifo, God i givim Yurim mo Tumim long nesen blong hem, Isrel. Ating hemia tu spesel ston we nesen blong Isrel i yusum taem i fesem ol traem we oli bigwan olgeta. Tru long Yurim mo Tumim, Jeova i stap ansa stret long ol kwestin, mo i givhan long ol elda blong Isrel blong mekem sua se ol disisen we oli tekem oli laenap wetem wil blong hem.—Eksodas 28:30; Levitikas 8:8; Namba 27:21.

Mo tu, tingbaot wan narafala eksampol. Taem oli jusum Gideon blong lidim ami blong Isrel blong faet agensem ol man Midian, hem i mas mekem disisen se bambae hem i akseptem nambawan wok ya no nogat. Gideon i askem wan saen, wan merikel long God, blong hem i save sua se Jeova bambae i sapotem hem. Hem i prea se wan skin blong sipsip we hem i putum long graon long naet, bambae i mas  wetwet long moning, be graon raonabaot long hem bambae i mas drae. Long nekis naet, hem i askem se skin blong sipsip ya bambae i stap drae gud, be graon raonabaot long hem bambae i wetwet. Long kaen fasin, Jeova i wokem ol saen ya we Gideon i askem. From samting ya, Gideon i mekem wan gudfala disisen, mo wetem help blong God, hem i winim ol enemi blong Isrel.—Jajes 6:33-40; 7:21, 22.

?Olsem Wanem Tede?

Tede, Jeova i gohed blong halpem ol man blong hem, taem oli gat ol impoten disisen blong mekem. ?Olsem wanem hem i givhan? ?Yumi mas mekem olsem Gideon, we i testem Jeova wetem wan skin blong sipsip? ?Yumi mas askem long Jeova blong givim wan saen blong soem rod long yumi? Wan hasban mo waef tufala i stap tingbaot sipos tufala i mas muf i go long wan ples we oli nidim moa man blong talemaot Kingdom. Blong givhan long tufala blong mekem disisen ya, tufala i traem God. Tufala i putum wan praes long haos blong tufala blong traem salem. Sipos tufala i salem haos blong tufala bifo long dei we tufala i putum, mo long praes we tufala i putum, no i bitim praes ya, bambae tufala ya i tekem samting ya olsem wan saen blong soem se God i wantem we tufala i muf i go long narafala ples. Sipos tufala i no salem haos, bambae i olsem wan saen se God i no wantem tufala blong muvaot.

Be, i no gat man i pemaot haos blong tufala. ?Samting ya i wan saen se Jeova i no wantem tufala ya blong muf i go long ples we i gat moa nid? I tru se, yumi gat flas tingting sipos yumi ting se yumi save talem stret ol samting we Jeova i stap mekem mo i no stap mekem blong givhan long ol man blong hem. Yumi no save talem se Jeova bambae i neva mekem wan samting tede blong soem rod we hem i wantem blong yumi mas folem. (Aesea 59:1) Nomata se i olsem wanem, yumi no mas wet se Jeova bambae i wokem wan saen blong soemaot rod long yumi long ol impoten disisen we yumi mas mekem. Hemia i olsem we yumi wantem God blong mekem olgeta disisen blong yumi. Gideon tu, klosap ful laef blong hem, hem i tekem ol disisen we Jeova i no givim wan saen long hem.

Nating se i olsem, Baebol i talem se God i save givhan long yumi. Hem i tokbaot taem blong yumi se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ” (Aesea 30:21) Taem yumi gat sam impoten disisen blong mekem, i stret blong traem meksua se oli laenap wetem wil blong God mo oli folem bigfala waes blong Hem. ?Olsem wanem blong mekem samting ya? Yumi mas lukluk long Tok blong God mo letem Tok ya i kam ‘olsem laet we i stap soemaot rod long yumi, mo i stap lidim yumi.’ (Ol Sam 119:105; Ol Proveb 2:1-6) Blong mekem olsem, yumi nidim blong wokem fasin ya blong stadi Baebol mo kasem ol stret save blong hem. (Kolosi 1:9, 10) Mo tu, taem yumi mekem wan disisen, yumi nidim blong stadi gud long olgeta rul blong Baebol we oli laenap wetem disisen ya we yumi mas mekem. Taem yumi stadi dip olsem, yumi naf blong “jusumaot ol samting we oli impoten moa.”—Filipae 1:9, 10, NW.

Mo tu, yumi mas prea long Jeova, mo gat strong bilif se bambae hem i lesin long yumi. Yumi haremgud tumas blong talemaot long God blong yumi, we i laekem yumi tumas, disisen we yumi mas mekem, mo wanem ol defren jus we yumi stap tingting long olgeta. Nao, yumi save askem God blong i lidim yumi blong mekem disisen we i stret. Plante taem, tabu spirit bambae i givhan long yumi blong rimemba ol rul blong Baebol we oli joen wetem disisen ya, no maet hem i save halpem yumi blong kasem save moa long wan vas blong Baebol, we i laenap wetem disisen blong yumi.—Jemes 1:5, 6.

 Insaed long kongregesen tu, i gat ol bigman long saed blong spirit we Jeova i givim long yumi, blong yumi save toktok wetem olgeta long ol disisen blong yumi. (Efesas 4:11, 12) Be, taem yumi askem advaes long narafala man, yumi no mas folem fasin blong sam man. Olgeta oli go luk wan afta narawan, go kasem we oli faenem wan man we i talem samting we i laenap wetem tingting blong olgeta nomo, nao oli folem advaes blong hem. Mo tu, yumi mas tingbaot woning long stori blong Rehoboam. Taem hem i mas mekem wan impoten disisen, hem i kasem gudfala advaes long ol olfala man we oli bin wok wetem papa blong hem. Be, hem i no folem advaes blong olgeta, hem i go askem advaes long ol yangfala man we oli gruap wetem hem. From we hem i lesin long ol advaes blong ol yangfala ya, hem i mekem wan nogud disisen mo bighaf long ol man long teritori blong hem oli agens long hem.—1 King 12:1-17.

Taem yu askem advaes, yu mas askem long olgeta we oli fesem plante trabol finis long laef blong olgeta, mo we oli gat plante save blong Baebol, mo we oli tinghae long ol stret rul blong Baebol. (Ol Proveb 1:5; 11:14; 13:20) Sipos yu gat janis, yu mas tektaem blong tingting dip long ol rul we oli joen wetem disisen ya mo olgeta save we yu bin kasem long saed ya. Taem ol samting oli kam klia long tingting blong yu folem Tok blong Jeova, ating bambae yu luksave stret disisen blong mekem.—Filipae 4:6, 7.

Ol Disisen We Yumi Mekem

Samfala disisen oli isi blong mekem. Taem oli talem long ol aposol blong oli no moa prij, olgeta oli save se oli mas gohed blong prij long saed blong Jisas. Taswe, oli talemaot disisen blong olgeta kwiktaem long ol memba blong Kaonsel, se bambae oli obei long God i bitim we oli obei long man. (Ol Wok 5:28, 29) Sam narafala disisen, maet yumi nidim blong tingting moa long olgeta, from we Baebol i no talem wan stret rul we i laenap wetem disisen ya. Nating se i olsem, ol rul blong Baebol oli save givhan oltaem blong mekem wan gudfala disisen. Eksampol, plante pleplei blong tede, oli no bin stap long taem blong Jisas. Be i gat sam stret rul long Baebol we oli soem klia, wanem God i laekem mo wanem hem i no laekem. Taswe, eni Kristin we i joen long ol pleplei we oli leftemap raf fasin, rabis fasin long saed blong seks, no stronghed fasin, hem i mekem wan nogud disisen.—Ol Sam 97:10; Jon 3:19-21; Galesia 5:19-23; Efesas 5:3-5.

Samtaem, maet tufala disisen tugeta i gud nomo. Wok long wan ples we i gat bigfala nid long hem, i wan nambawan janis mo i save karem plante blesing. Be sipos wan man i mekem disisen blong no muvaot from sam defren risen, hem i save gohed blong mekem wan gudfala wok long kongregesen we hem i stap joen long hem. Sam disisen, oli givim janis long yumi blong soemaot se lav we yumi gat long Jeova i dip olsem wanem, mo wanem i moa impoten long laef blong yumi. Taswe, Jeova i letem yumi blong yusum fasin ya we yumi fri blong jusum rod blong yumi, nao yumi save soemaot wanem i stap long hat blong yumi.

Plante taem, ol disisen we yumi mekem oli gat paoa long ol narafala man. Eksampol, long faswan handred yia, ol Kristin oli glad blong no moa stap aninit long ol strong rul blong Loa. Samting ya i minim se, oli save jus blong akseptem no sakemaot ol kakae we i mekem man i doti folem Loa we God i givim long Moses. Nating se i olsem, ol Kristin ya oli kasem advaes blong tingbaot sipos jus we oli mekem bambae i spolem tingting blong ol narafala man. Ating ol tok blong Pol i stret long plante disisen we yumi mas mekem: “Yufala i no mas mekem we bambae . . . oli save trabol long fasin blong yufala.” (1 Korin 10:32) Maet tingting ya blong no wantem mekem narafala i foldaon i save halpem yumi long ol  disisen we yumi mekem. Tingbaot se, lav we yumi gat long ol man raonabaot long yumi, hem i namba tu loa we i hae moa long ol narafala loa.—Matiu 22:36, 39.

Frut Blong Ol Disisen Blong Yumi

Ol disisen we yumi mekem, we tingting blong yumi i no jajem yumi from, mo we oli stanap long ol rul blong Baebol, bambae oli karem gudfala frut, nating se maet i tekem longtaem lelebet blong luk frut ya. I tru se, fastaem, maet i nidim we yumi lego sam samting we yumi nomo i wantem. Taem ol aposol oli talem disisen blong olgeta long ol memba blong Kaonsel, se bambae oli gohed nomo blong talemaot gud nius blong Jisas, Kaonsel i talem long ol soldia blong oli wipim olgeta bifo we oli letem olgeta oli go fri. (Ol Wok 5:40) Taem trifala man Hibru—Sadrak, Mesak mo Abednego—oli mekem disisen blong no bodaon long aedol blong gol we Nebukadnesa i wokem, trifala ya oli putum laef blong olgeta long denja. Trifala i save se gudfala disisen ya we oli mekem i save minim ded blong olgeta. Be trifala i save tu se God i agri long disisen ya mo bambae i blesem olgeta from.—Daniel 3:16-19.

Sipos yumi fesem hadtaem afta we yumi mekem wan gudfala disisen, hemia i no minim se disisen we yumi mekem i no stret. “Ol samting we man i no tingbaot nating, oli save kamaot long yumi evriwan.” Samting ya tu i save spolem ol gudfala disisen we yumi mekem. (Prija 9:11, NW ) Mo tu, samtaem Jeova i save letem trabol i kamaot blong luk sipos yumi rili tinghae long disisen we yumi mekem. Long wan ful naet, Jekob i faet agensem wan enjel bifo we hem i kasem blesing. (Jenesis 32:24-26) Yumi tu, yumi mas faet agensem ol hadtaem, nating se yumi stap mekem ol samting we oli stret. Be, taem ol disisen blong yumi oli laenap wetem wil blong God, yumi save bilif se hem bambae i halpem yumi blong stanap strong, mo biaen bambae hem i blesem yumi.—2 Korin 4:7.

Taswe, taem yu mekem wan impoten disisen, yu no mas trastem prapa save blong yu. Yu mas faenemaot ol rul blong Baebol we oli joen wetem disisen ya. Tokbaot disisen ya long Jeova. Sipos yu gat janis, askem advaes long ol Kristin we oli bigman long saed blong spirit. Biaen, yu mas gat strong tingting. Yu mas yusum fasin blong jus ya we God i givim, long wan rod we i soemaot se yu yu bigman finis. Yes, mekem wan gudfala disisen mo soem long Jeova se hat blong yu i klin long fored blong hem.

[Tok blong pija long pej 28]

Lukluk i go long Tok blong God bifo we yu mekem ol impoten disisen

[Tok blong pija long pej 29]

Toktok long Jeova long saed blong ol disisen we yu mas mekem

[Tok blong pija long pej 30]

Yu save tokbaot ol bigfala disisen blong yu wetem ol Kristin we oli bigman long saed blong spirit