Stanap Strong Olsem Bigman Mo Bilif Fulwan

Ol Asembli Oli Rili Pruvum We Yumi Wan Famle Blong Ol Brata

TAEM Joseph F. Rutherford i gat fifti yia blong hem, helt blong hem i nogud afta klosap wan yia we hem i stap long presin from wan giaman toktok we oli sakem agensem hem. Nating se i olsem, hem i glad blong wok long hotel olsem man blong karem bokis blong ol visita. Wetem strong paoa, hem i karem ol bokis mo i halpem ol narafala Kristin fren blong oli go long rum blong olgeta. Tu man we i bin stap kalabus wetem hem—ol Baebol Studen—oli mekem wok ya blong givimaot rum long wan bigfala hip blong man we i wet blong gat wan ples blong slip. Oli stap bisi gogo afta medel naet. Bigfala glad i kasem olgeta evriwan kwiktaem nomo. ?Hemia i taem blong wanem?

Hemia yia 1919, mo ol Baebol Studen (we tede ol man oli save olgeta olsem ol Witnes blong Jeova) oli stap haremgud bakegen afta long ol strong taem blong fasin agens. Blong mekem grup blong ol brata oli kam strong bakegen, oli holem wan asembli long Cedar Point, Ohio, Yunaeted Stet. Asembli ya i stat long Septemba 1 go kasem 8, 1919. Long laswan dei blong asembli, bigfala namba blong 7,000 man oli lesin gud taem Brata Rutherford i pulum evriwan we i stap wetem toktok ya se: “Yufala i ambasada blong King blong ol king mo Masta blong ol masta, yufala i talemaot long ol man . . . nambawan glori blong kingdom blong Masta blong yumi.”

Ol man blong Jeova oli stat mekem ol asembli long taem blong ol man Isrel bifo. (Eksodas 23:14-17; Luk 2:41-43) Fasin joen olsem i wan taem blong glad, mo i halpem olgeta man we i stap blong oli putum tingting blong olgeta long Tok blong God. Long sem fasin, ol asembli blong ol Witnes blong Jeova long taem blong yumi, oli pulum tingting i go long ol samting long saed blong spirit nomo. Ol man long taem ya we hat blong olgeta i stret, oli luk ol gladtaem ya olsem klia pruf se ol Witnes oli joengud long wan strong famle blong ol Kristin brata.

Oli Traehad Blong Stap

Ol Kristin blong tede oli luksave se ol asembli blong olgeta oli ol taem blong haremgud long saed blong spirit mo blong kasem tijing long tok blong God. Oli luk ol bigfala miting ya olsem wan rod we oli nidim blong givhan long olgeta blong “stanap strong olsem bigman mo . . . bilif fulwan long wil blong God.” (Kolosi 4:12, NW ) Taswe, ol Witnes oli sapotem ol miting ya wetem fulhat blong olgeta, mo oli mekem ol bigfala traehad blong stap long ol miting ya.

Samfala oli mas wokem strong bilif mo winim ol traem we i bigwan olsem ol hil blong oli save stap long ol asembli olsem. Eksampol, tingbaot wan olfala Witnes long Ostria. Nating we hem i gat sik blong suga mo we i nidim blong hem i stikim hem evridei long meresin ya insulin, hem i mekem sua se hem i stap long olgeta dei blong wan distrik asembli long kantri blong hem. Long India, wan bigfala famle blong Witnes we oli pua tumas i faenem i had we i had blong go long wan asembli. Be wan memba blong famle ya i mekem wan samting blong halpem olgeta. Woman ya i talem se: “Mi no wantem mestem taem ya, taswe mi salem ol iaring blong mi we oli wokem long gol blong mi save pem trip ya. Mi glad blong mekem samting ya from we bilif blong mifala i kam strong taem mifala i joen wetem ol narafala mo taem mifala i harem ol ekspiriens.”

Long Papua Niugini, wan grup blong man we i intres, be oli no baptaes yet, oli gat strong tingting blong go long wan asembli we i stap long taon. Oli go luk wan man long vilej blong olgeta we i gat wan pablik transpot, nao oli askem long hem se hamas bambae oli pem sipos hem i karem olgeta i go long asembli. From se praes blong trak i bigwan bitim mane we oli gat, oli mekem plan blong wok long haos blong man ya, blong wokem kijin blong hem bakegen. Hemia i mekem se oli save go long distrik asembli mo haremgud blong stap long ful program.

 Ol Witnes blong Jeova we oli gat strong tingting blong stap long ol asembli, oli no luk we i wan bigfala trabol tumas sipos ol asembli ya i stap longwe long olgeta. Long 1978, wan yangfala man blong Polan i ron sikis dei long baskel blong stap long wan asembli long Lille, Franis, we hem i 1,200 kilometa longwe. Long hot taem blong 1997, tu Witnes blong Mongolia oli mekem wan trip blong 1,200 kilometa i go long wan Kristin miting long Irkutsk, long Rasia.

Trufala Famle Blong Ol Brata i Wok

Ol man we oli no gat fasin blong jajem ol narafala wetem rong tingting, oli luksave klia nomo se ol Witnes oli gat fasin joengud long ol asembli blong olgeta mo oli olsem wan trufala famle blong ol brata. Plante man oli sapraes blong luk we long medel blong ol man we i stap long asembli, i no gat fasin seraot mo ol man oli soemaot trufala filing blong lav long olgeta, nating se samfala oli luk olgeta blong faswan taem.

I no longtaem we i pas, long wan intenasnal asembli long Ostrelia, wan man we i stap tekem ol grup blong man blong visitim ol ples, i bin spenem wan wik wetem olgeta visita we oli kam from asembli ya. Hem i wantem stap wetem olgeta smoltaem moa blong haremgud wetem olgeta. Lav mo fasin joengud blong olgeta i mekem we hem i sapraes, hem i no save bilivim se, nating se bighaf blong olgeta i no save olgeta, be oli frengud. Taem hem i mas lego olgeta, hem i singaot olgeta blong oli lesin hem. Hem i kolem olgeta se “ol brata mo sista,” nao i stat blong talem tangkiu long olgeta be, from we filing blong hem i bigwan tumas, hem i no save finisim toktok blong hem, ale i stat blong krae.

Long 1997, hem i faswan taem we Sri Lanka i holem wan distrik asembli long tri lanwis long wan bigfala stad. Ful program i kamaot semtaem nomo long lanwis Inglis, Singalis, mo Tamil. Long wan wol we fasin blong agensem narafala from laen blong hem i kam antap bigwan, miting ya we i tekem ol man blong tri defren lanwis oli kam wanples i pulum ae blong ol man. Wan polisman i askem long wan brata i se: “?Hu ya i lidim asembli ya, ol Inglis man, ol man Singalis, no ol man Tamil?” Brata ya i ansa se: “I no wan long ol grup ya we i lidim asembli ya. Mifala evriwan i joen wanples blong lidim.” Polisman ya i no save bilivim samting ya. Taem trifala grup ya i joen long laswan prea finis, mo voes blong evriwan i joen tugeta blong talem “Amen,” wantaem nomo oli klaphan. Wota i ronaot long ae blong klosap evri man long ples ya. Yes, i tru nomo, ol asembli oli rili pruvum se yumi wan famle blong ol brata.—Ol Sam 133:1. *

[Futnot]