Bilif Ya We i Tru—?I Gat Rod Blong Kasem?

“Bilif i wan samting we i laef. Hem i wan strong tingting we i mekem man i sua fulwan se God bambae i givhan long olgeta long gladhat blong hem. Man we i gat bilif hem i rere blong ded wan taosen taem from bilif ya.”—MARTIN LUTHER, 1522.

“I luk olsem se, ol man long wol oli no moa folem Kristin bilif mo fasin.”—LUDOVIC KENNEDY, 1999.

OL MAN oli save gat plante defdefren kaen tingting long saed blong bilif. Bifo, klosap evri man oli bilif long God from we hemia wan samting we i stret blong mekem. Be, tede, fulap man oli stap safa mo fulap man oli no moa bilif. From samting ya, trufala bilif long God mo Baebol i stap godaon bigwan.

Bilif Ya We i Tru

Plante man oli tingting se “bilif” i minim we man i gat wan skul no i folem wan kaen wosip. Be, long Baebol tok ya “bilif” i minim fasin blong trastem fulwan. Hemia i min se yumi trastem God mo ol promes blong hem fulwan. Tras ya i strong mo i no save lus isi nomo. Hem i wan fasin we i makemaot ol disaepol blong Jisas Kraes.

Wan taem, Jisas Kraes i tokbaot se i impoten blong prea oltaem mo ‘no letem tingting i foldaon.’ Taem hem i tokbaot samting ya, hem i askem kwestin se bambae i gat man blong bilif long taem blong yumi. Hem i se: “?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif [no, “we oli gat bilif ya,” futnot long NW ] long mi, no nogat?” From wanem hem i askem kwestin ya.—Luk 18:1, 8.

Bilif i Lus

I gat plante samting we oli save mekem man i lusum bilif blong hem, nomata se bilif ya i olsem wanem. Sam long ol samting ya, i gat ol trabol mo problem we oli kasem yumi evri dei. Tingbaot eksampol blong tija ya Michael Goulder. Hem i mekem wok blong pris long Manchester, Inglan, long 1958. Long taem ya, wan bigfala plen i aksiden long Munich mo plante long olgeta we oli plei long futbol tim blong Manchester United, we oli stap long plen ya long taem ya, oli ded. Long program blong televisin ya BBC, Joan Bakewell i talem se Michael Goulder “i harem we hem i no gat paoa nating taem hem i luk bigfala namba blong man we oli harem nogud from aksiden ya.” Risal blong aksiden ya i mekem se hem i “lusum bilif long God ya we ol man oli talem se hem i bos long ol samting we i stap hapen long  laef.” Goulder i tokbaot bilif blong hem se “i no stret blong talem se Baebol i . . . tok blong God we i no gat mastik nating long hem.” Hem i se “[Baebol] i tok blong man nomo we i fulap long mastik, mo maet wanwan haf blong hem nomo oli kamaot long God.”

Samtaem, bilif i save ded sloslou. Hemia nao wanem we i hapen long Ludovic Kennedy, wan man blong raetem buk mo we i stap toktok long radio. Hem i talem se stat taem hem i pikinini yet, “ol tingting we oli hafhaf mo we oli no sua [long saed blong God] oli stap go kam, ale sloslou, bilif blong mi i stap ded.” Hem i no faenem wan man we i save givim stret ansa long ol kwestin blong hem. Biaen, taem hem i harem nius se papa blong hem i ded long dipsi, samting ya i mekem hem i harem nogud bigwan mo i karemaot bilif blong hem fulwan. Bigfala sip ya we papa blong Ludovic i stap long hem, i bosta mo i draon taem wan sip blong ol man Jemani i kam agensem olgeta long taem blong Seken Wol Wo. Long taem ya, God i no ansarem prea blong ol boskru we i talem se “blokem mifala long ol denja blong solwota mo long ol enemi we oli save mekem i nogud long mifala.”—All in the Mind—A Farewell to God.

Ol samting ya we oli save spolem bilif, oli hapen long laef blong plante man. Aposol Pol i talem se: “I no olgeta man evriwan we oli bilif.” (2 Tesalonaeka 3:2) ?Wanem tingting blong yu? ?Long wol ya we plante moa man oli gat tingting we i hafhaf long saed blong God mo Tok blong God, yumi save gat trufala bilif? Ridim wanem we nekis haf i talem long saed ya.