Ripot Long Wok Blong Kingdom

Faenem Ol Man We i Had Blong Kasem

OL WITNES BLONG JEOVA oli wokhad blong kasem evri man wetem mesej blong Kingdom. Samtaem oli mas traehad blong kasem olgeta we oli no stap oltaem long haos. (Mak 13:10) Long saed ya, wan spesel paenia long kantri blong Saot Amerika i talem stori we i kam biaen.

“Wan dei mi harem nius se wan haeman blong gavman bambae i kam visitim teritori we mi mo waef blong mi, mitufala i stap wok long hem. Mi sua se man ya i wan long olgeta we i no stap oltaem long haos blong olgeta. Ale mi raetem wan leta long hem. Mi putum sam buk we i tokbaot Baebol wetem leta ya, olsem buklet ya ?Wanem Samting We God i Wantem Yumi Blong Mekem? mo ol buk ya Mankind’s Search for God mo Save Blong Lidim Yu Long Laef We i No Save Finis. Long leta ya, mi eksplenem wanwan wok blong ol buk ya.

“From we mi intres blong save wanem tingting blong hem long saed blong ol buk ya, mi askem sipos mitufala i save gat wan miting. Sam wik biaen, oli givim raet long mi blong gat wan miting wetem hem, nao mi karem wetem mi kaset video ya, Jehovah’s Witnesses—The Organization Behind the Name. Miting ya i gohed blong tu aoa. Taem we mi mo man blong gavman ya i lukluk video finis, mi askem wanem tingting blong hem. Hem i ansa se: ‘I no gat wan narafala ogenaesesen long wol we i olsem blong yufala. !Mi laekem tumas sipos mi wok wetem sam man olsem yufala blong givhan long mi blong finisim ol projek blong gavman!’ Nao hem i askem mi sipos mi bin go finis long wol hedkwota blong ogenaesesen blong yumi. Mi talem long hem se nating we hemia mak we mi bin putum taem mi gat 14 yia nomo, mi no gat janis yet blong go visitim wol hedkwota blong yumi long Brooklyn, New York. Hemia i wan long ol mak we i had tumas blong kasem. Hem i lukluk gud mi blong smoltaem. Nao i talem se hem i wantem we mi kasem janis ya. !Hem i wokem rod blong mitufala i kasem ol pepa blong go, mo hem i givim tu tikit blong plen long mitufala olsem wan presen!

“Naoia haeman blong gavman ya i stap kasem ol Wajtaoa mo Wekap! magasin evri manis. Mifala i hop se i no longtaem bambae mifala i statem wan Baebol stadi wetem hem.”