Folem Fasin Blong Jeova Taem Yu Tijimgud Ol Pikinini Blong Yu
Folem Fasin Blong Jeova Taem Yu Tijimgud Ol Pikinini Blong Yu
?I gat wan papa we i no stretem pikinini blong hem samtaem?”—HIBRUS 12:7, Contemporary English Version.
1, 2. ?From wanem ol papa mama oli faenem i hadwok blong tijim gud pikinini blong olgeta tede?
WAN stadi we oli mekem long Japan sam yia bifo, i soemaot se klosap stret haf long olgeta man oli ting se ol papa mama mo ol pikinini oli no toktok gud tugeta. Mo tu oli ting se fasin we ol papa mama oli mekem long ol pikinini blong olgeta i no strong inaf. Long wan narafala stadi long sem kantri ya, klosap 25 pesen blong ol man oli talem se oli no save olsem wanem blong frengud wetem ol pikinini. Problem ya i no stap hapen long ol kantri blong Esia nomo. Niuspepa ya Toronto Star i talem se: “Plante papa mama long Kanada oli talem se oli no save olsem wanem blong kam ol gudfala papa mama.” Long evri ples long wol, ol papa mama oli faenem i hadwok blong tijim gud pikinini blong olgeta.
2 ?From wanem ol papa mama oli faenem se i hadwok blong tijim gud pikinini blong olgeta? Wan bigfala risen hemia se yumi stap laef long taem blong ‘lasdei,’ mo laef long wol ya “i kam strong tumas.” (2 Timoti 3:1) Antap long samting ya, Baebol i talem se “i stat taem olgeta oli smol pikinini nomo, be tingting blong olgeta i stap finis long ol rabis fasin.” (Jenesis 8:21) Mo tu, Setan i olsem “wan laeon we i stap singaot bigwan” i lukaot man blong i kakae. Taswe i isi moa blong ol yangfala oli foldaon long ol traem blong hem, from we olgeta oli no gat plante save. (1 Pita 5:8) Ol papa mama we oli wantem lukaot gud long ol pikinini blong olgeta ‘stretem olgeta, tijim olgeta, olsem we Masta blong yumi i stap stretem yumi, i stap tijim yumi,’ oli fesem plante traem. (Efesas 6:4) ?Wan papa mo mama i mas mekem wanem blong pikinini blong tufala i gruap i kam wan man blong wosip long Jeova we i bigman long tingting, i naf blong jusumaot “wanem fasin i gud mo wanem fasin i nogud”?—Hibrus 5:14.
3. ?From wanem i impoten tumas we ol papa mama oli tijim gud mo lidim gud pikinini blong olgeta?
3 Waes King Solomon i talem se “krangke fasin i stap long hat blong boe.” (Ol Proveb 13:1; 22:15, NW ) Blong karemaot krangke fasin ya, ol papa mama oli mas stretem ol yangfala wetem lav. Be, plante taem ol yangfala oli no glad long fasin stretem we papa mama i givim. Yes, plante taem oli sakemaot advaes, nomata hu i givim advaes ya long olgeta. Taswe, ol papa mama oli mas lanem blong ‘tijimgud ol pikinini blong olgeta long fasin we i stret blong oli folem.’ (Ol Proveb 22:6) Taem ol pikinini oli lesin long fasin stretem ya, samting ya i save givim laef long olgeta. (Ol Proveb 4:13) !Taswe i impoten tumas we ol papa mama oli save olsem wanem blong tijim gud pikinini blong olgeta!
?Fasin Stretem i Minim Wanem?
4. ?Wanem bigfala mining blong tok ya “stretem” we Baebol i yusum?
4 Sam papa mama oli fraet blong stretem pikinini blong olgeta. Oli no wantem we ol man oli tokbaot olgeta, se oli stap spolem pikinini blong olgeta, oli stap kilim hem nogud, toktok nogud long hem, mo spolem filing blong hem. Yumi no nid blong fraet long samting ya. Tok ya “stretem” we Baebol i yusum i no minim se yumi spolem no mekem i nogud long pikinini. Grik tok ya we oli tanem i kam “stretem,” bigfala mining blong hem i blong tijim, lanem, mo soem rod. Sam samtaem, i save karem mining tu se givim panis, be wetem lav.
5. ?From wanem i gud blong tingbaot olsem wanem Jeova i stretem ol man blong hem?
5 Jeova God i soem eksampol we i stretgud taem hem i stretem ol man. Aposol Pol i skelem fasin blong Jeova wetem fasin blong ol papa long wol ya, hem i se: “?I gat wan papa we i no stretem pikinini blong hem samtaem? . . . Ol papa blong yumi long wol ya oli stretem yumi blong smoltaem, mo oli mekem long fasin we oli ting se i gud. Be God i stap stretem yumi, blong mekem i gud long yumi, from we hem i wantem se yumi kam tabu.” (Hibrus 12:7-10, Contemporary English Version) Yes, Jeova i stap stretem ol man blong mekem se oli kam tabu, oli kam klin. Yumi save lanem plante samting long saed blong fasin blong stretem pikinini sipos yumi tingbaot olsem wanem Jeova i stap tijim ol man blong hem.—Dutronome 32:4; Matiu 7:11; Efesas 5:1.
Lav i Pusum Yumi
6. ?From wanem i no isi blong ol papa mama oli folem lav we Jeova i gat long ol man?
6 Aposol Jon i talem se: “God i stamba blong fasin ya blong lavem man.” Taswe, oltaem lav nao i pusum Jeova blong stretem ol man blong hem. (1 Jon 4:8; Ol Proveb 3:11, 12) ?Be, samting ya i minim se ol papa mama we oli lavem pikinini blong olgeta, oli faenem i isi blong folem fasin blong Jeova long saed ya? No, maet i no isi blong mekem olsem. Lav we Jeova i gat long ol man i stanap long ol stret rul. Wan man blong stadi long Grik lanwis i talem se lav olsem, “i no oltaem we i laenap wetem prapa filing blong yumi.” God i no letem ol filing oli blokem hem blong mekem ol samting we i stret. Oltaem hem i tingbaot wanem samting i gud long ol man blong hem.—Aesea 30:20; 48:17.
7, 8. (a) ?Olsem wanem Jeova i soemaot long ol man blong hem, lav ya we i stanap long ol stret rul? (b) ?Olsem wanem ol papa mama oli save mekem olsem Jeova taem oli givhan long ol pikinini blong olgeta blong kam naf blong folem ol rul blong Baebol?
7 Tingbaot lav we Jeova i soemaot long ol man Isrel. Moses i yusum wan naesfala pijatok blong soemaot lav we Jeova i gat long niufala nesen blong Isrel. Hem i talem se: “Olsem wan igel we i seksekem bed blong hem, i flae raon long ol pikinini blong hem, i openem wing blong hem, i leftemap olgeta mo i karem olgeta long en blong wing blong hem, long sem fasin Jeova nomo i stap lidim [Jekob].” (Dutronome 32:9, 11, 12, NW ) Wan mama igel we i wantem tijim ol pikinini blong hem blong oli flae, hem i “seksekem bed blong hem,” i mufmuvum ol wing blong hem blong pulum ol pikinini ya blong oli flae. Nao taem wan yangfala igel i jiamaot long bed blong hem, we plante taem hem i antap long wan klif, mama igel i stap “flae raon” long pikinini ya. Mo sipos i luk olsem se pikinini ya bambae i foldaon long graon, mama ya bambae i flae aninit long hem, i karem hem “long en blong wing blong hem.” Long sem fasin, Jeova i lukaotgud long niufala nesen blong Isrel wetem lav. Hem i givim Loa blong Moses long olgeta. (Ol Sam 78:5-7) Biaen tu, God i lukaotgud long nesen ya. Taem ol man blong hem oli kasem trabol, hem i rere blong sevem olgeta.
8 ?Olsem wanem ol Kristin papa mama oli save soemaot lav olsem Jeova i soemaot? Faswan samting, oli mas tijim pikinini blong olgeta long ol rul mo loa long Tok blong God. (Dutronome 6:4-9) Oli wantem nomo blong lanem pikinini blong mekem ol disisen we oli laenap wetem ol rul blong Baebol. Taem wan papa mama i mekem samting ya wetem lav, i olsem se tufala i flae raon long pikinini blong tufala, blong luk olsem wanem pikinini ya i folem ol rul we hem i lanem finis. Taem pikinini i gru i kam bigwan, sloslou papa mama i letem hem i fri blong mekem moa samting. Be sipos i gat denja, papa mama we i keagud long pikinini i rere blong ‘flae aninit long hem’ mo ‘karem hem long ol wing blong tufala.’ ?Wanem kaen denja?
9. ?Ol papa mama we oli gat lav oli mas wekapgud long wanem denja? Eksplenem.
9 Jeova God i givim woning long ol man Isrel long saed blong nogud frut we bambae i kamaot sipos oli joen wetem ol nogud fren. (Namba 25:1-18; Esra 10:10-14) Tede tu, i wan denja blong joen wetem ol nogud fren. (1 Korin 15:33) I gud sipos ol Kristin papa mama oli folem eksampol blong Jeova long saed ya. Gel ya Lisa we hem i gat 15 yia nomo, i laekem wan boe we i no gat sem fasin mo bilif olsem famle blong hem. Lisa i talem se: “Kwiktaem nomo, papa mama blong mi i luksave we fasin blong mi i jenis bigwan mo tufala i wari. Samtaem tufala i tok long mi blong stretem mi mo samtaem tufala i leftemap tingting blong mi wetem lav.” Papa mama blong Lisa i sidaon wetem hem mo wetem longfala tingting tufala i lesin long hem. Long rod ya tufala i halpem Lisa blong winim stamba blong problem ya—hemia se Lisa i wantem we ol fren blong hem oli laekem hem. *
Gohed Blong Toktokgud Tugeta
10. ?Long wanem rod Jeova i soemaot nambawan eksampol blong toktok oltaem wetem ol man Isrel?
10 Ol papa mama we oli wantem tijimgud pikinini blong olgeta, oli mas traehad blong toktokgud wetem olgeta. Nating se Jeova i save olgeta tingting blong yumi finis, be hem i pulum yumi blong toktok wetem hem. (1 Kronikel 28:9) Afta we Jeova i givim Loa long ol man Isrel, hem i stanemap ol Livaet blong tijim olgeta. Hem i sanem ol profet tu blong mekem ol man oli tingtinggud long ol loa ya mo blong stretem olgeta. Mo tu, Jeova i glad blong lesin long ol prea blong olgeta.—2 Kronikel 17:7-9; Ol Sam 65:2; Aesea 1:1-3, 18-20; Jeremaea 25:4; Galesia 3:22-24.
11. (a) ?Ol papa mama oli save mekem wanem blong wokem gudfala fasin blong toktok wetem pikinini blong olgeta? (b) ?From wanem i impoten tumas we ol papa mama oli lesingud long ol pikinini blong olgeta?
11 ?Olsem wanem ol papa mama oli save folem eksampol blong Jeova taem oli toktok wetem pikinini blong olgeta? Faswan samting we i impoten tumas, hemia se oli mas spenem taem wetem pikinini blong olgeta. Mo tu, i gud sipos ol papa mama oli no talem ol tok olbaot we i save stikim pikinini, olsem se, “?Hemia nomo yu wantem talem? Mi ting se yu stap tokbaot wan impoten samting,” “Hemia i krangke nomo,” “Be i mas olsem. Yu yu pikinini nomo.” (Ol Proveb 12:18) Blong pulum pikinini blong talemaot ol filing blong hem, papa mama we i waes i traehad blong lesingud. Sipos ol papa mama oli no lesingud long ol pikinini blong olgeta taem oli smol, bambae ol pikinini ya oli no save lesingud long papa mama taem oli kam bigwan. Oltaem Jeova i glad blong lesin long ol man blong hem. Hem i rere oltaem blong lesin long olgeta we oli prea long hem wetem tingting daon.—Ol Sam 91:15; Jeremaea 29:12; Luk 11:9-13.
12. ?Ol papa mama oli mas gat wanem fasin blong mekem i isi moa long ol pikinini blong toktok long olgeta?
12 Tingbaot tu ol nambawan fasin blong God we oli pulum ol man blong hem blong wantem toktok long hem. Olsem nao, King Deved blong Isrel bifo, i bin mekem bigfala sin taem hem i slip wetem Batseba, we i woman blong narafala man. From we Deved i sinman, hem i mekem sam narafala bigfala sin tu long laef blong hem. Be, evri taem hem i prea long Jeova mo i askem long hem blong i fogivim mo stretem hem. I klia se, lav, kaen fasin mo sore we Jeova i soemaot i mekem i moa isi long Deved blong kambak long hem. (Ol Sam 103:8) Sipos ol papa mama oli soemaot ol fasin blong God olsem sore mo kaen fasin, oli save toktokgud oltaem wetem pikinini blong olgeta, mo long taem we pikinini i mestem tu.—Ol Sam 103:13; Malakae 3:17
No Mekem i Strong Tumas
13. ?I minim wanem blong no mekem i strong tumas?
13 Taem ol papa mama oli lesin long ol pikinini blong olgeta, oli mas soemaot “waes we i kamaot long heven” mo no mekem i strong tumas. (Jemes 3:17) Aposol Pol i talem se: “Yufala i mas soemaot long olgeta man se yufala i no stap mekem i strong tumas long narafala.” (Filipae 4:5, NW ) ?I minim wanem blong no mekem i strong tumas? Wan mining blong Grik tok ya we oli tanem i kam “no mekem i strong tumas” hemia se “no fosem ol narafala blong obei long evri smosmol rul we oli no impoten tumas.” ?Olsem wanem ol papa mama oli save lukaot se oli no mekem i strong tumas, mo long semtaem, holemstrong long ol rul blong Baebol long saed blong fasin mo spirit?
14. ?Long taem blong Lot, olsem wanem Jeova i soem se fasin blong hem i no strong tumas?
14 Jeova i soem wan nambawan eksampol long saed blong fasin blong no mekem i strong tumas. (Ol Sam 10:17) Bifo we Jeova i spolem taon blong Sodom, hem i talem long Lot blong goaot long taon ya. Be Lot “i stap tektaem.” Biaen, taem enjel blong Jeova i askem long hem blong ronwe i go long ol hil, Lot i talem se: “Be ol hil ya oli longwe tumas. . . . ?Yu luk vilej ya [Joa] we i stap? Hem i klosap nomo, mi save go kasem. Plis yu letem mi mi go stap long hem. Yu luk, hem i wan smol vilej nomo, mo bambae mi save stap gud long hem.” ?Jeova i mekem wanem? Hem i talem se: “Ale, i gud nomo. Bambae mi no spolem vilej ya.” (Jenesis 19:16-21, 30) Jeova i glad blong mekem wanem we Lot i askem. I tru se, ol papa mama oli mas fasgud long ol rul blong Jeova God, we oli stap long Tok blong hem, Baebol. Be, maet samtaem i gud blong mekem olsem ol yangfala oli wantem, sipos samting ya i no agensem ol rul blong Baebol.
15, 16. ?Ol papa mama oli save lanem wanem long pijatok long Aesea 28:24, 25?
15 Ol papa mama we oli gat fasin blong no mekem i strong tumas, oli mekemrere hat blong ol pikinini, blong oli save akseptem fasin stretem. Long wan pijatok, Aesea i tokbaot Jeova olsem wan man blong wokem garen, mo i talem se: “I no gat man blong wokem garen, we i stap digim graon, digim graon, digim graon, be neva i planem wan samting. Taem hem i mekem graon i rere finis, fastaem, hem i planem sid blong ol smosmol samting olsem dil mo kamin, mo biaen, hem i planem sid blong wit mo bale, mo long saed blong garen ya, hem i planem ol narafala samting.”—Aesea 28:24, 25.
16 Jeova i “digim graon, digim graon, digim graon,” bifo we i planem sid. Taswe, hem i save mekemrere hat blong ol man blong hem, bifo we hem i stretem olgeta. ?Be olsem wanem ol papa mama oli save “digim graon” blong hat blong pikinini blong olgeta, taem oli stretem olgeta? Wan papa we i stretem pikinini blong hem we i gat fo yia nomo, i folem fasin blong Jeova. Taem pikinini ya i kilim wan narafala boe we i stap klosap long haos blong olgeta, fastaem papa i lesin wetem longfala tingting long ol eskius we boe blong hem i mekem. Biaen, olsem we hem i “digim graon” blong hat blong pikinini ya, papa i talem stori blong wan boe we i harem nogud tumas from we wan narafala boe i kilim hem oltaem. Taem pikinini ya i harem stori ya, hem i talem se boe ya we i kilim narafala i mas kasem panis from. Fasin ya, we papa i yusum blong “digim graon” blong hat blong boe blong hem, i mekemrere hat blong hem, mo i mekem i moa isi long hem blong luksave se fasin blong kilim narafala i rong.—2 Samuel 12:1-14.
17. ?Aesea 28:26-29 i tijim wanem long ol papa mama long saed blong fasin blong stretem pikinini?
17 Aesea i gohed blong tokbaot wan narafala wok long garen we i olsem fasin blong Jeova blong stretem man, hemia blong kilim hed blong kakae blong seraotem ol sid. Man blong wokem garen i yusum ol defren tul blong kilim kakae, i dipen long skin blong sid, se i strong olsem wanem. Maet hem i yusum wan stik blong kilim hed blong dil we i sofsof nomo, mo wan wud we i hevi lelebet blong kilim kamin. Be long saed blong sid we skin blong hem i strong, maet hem i yusum wan bigfala nalnal no maet hem i mekem kat i ron antap long sid ya blong wil i brekem. Be, nating sipos sid i strong, hem i no save kilim gogo i spolem kakae ya. No gat. Long sem fasin, taem Jeova i wantem karemaot wan nogud fasin long ol man blong hem, fasin blong stretem olgeta i no sem mak evri taem. I dipen long wanem we ol man ya oli nidim mo ol samting long laef blong olgeta. Neva Jeova i stretem ol man blong hem long fasin we i olbaot nomo, mo neva hem i strong tumas long ol man blong hem. (Aesea 28:26-29) Sam papa mama oli nidim nomo blong lukluk strong long pikinini blong stretem hem. Sam narafala pikinini, oli nidim we papa mama i tok long olgeta bakegen mo bakegen. Mo sam pikinini, oli nidim fasin stretem we i strong lelebet. Ol papa mama we oli no mekem i strong tumas bambae oli stretem wanwan pikinini long fasin we i stret long hem.
Mekem se Famle i Glad Blong Storian Tugeta
18. ?Olsem wanem ol papa mama oli save faenem wan stret taem blong mekem famle stadi oltaem?
18 Sipos famle i tokbaot wan vas blong Baebol evri dei mo mekem famle stadi oltaem, hemia i beswan rod blong tijim pikinini blong yu. Famle stadi bambae i karem gudfala frut sipos yu mekem oltaem. Sipos yu mekem stadi nomo taem i gat smoltaem i stap, no sipos sam samtaem nomo wan tingting i kasem yu se bambae yu stadi, ating bambae yu no save mekem stadi ya plante taem. Taswe ol papa mama oli mas “yusum evri janis” blong stadi. (Efesas 5:15-17) I no isi blong faenem wan taem we i stretgud long evriwan long famle. Wan papa i faenem se taem ol pikinini blong hem oli kam bigwan mo oli gat ol defren wok blong olgeta, i hadwok blong faenem wan stret taem we ful famle i save joen tugeta long famle stadi. Be, oltaem famle i stap tugeta long ol naet blong miting blong kongregesen. Taswe, papa i mekem plan blong famle stadi i stap long wan long olgeta naet ya. Plan ya i wok gud. Trifala pikinini long famle ya, naoia trifala i baptaes finis mo trifala i stap mekem wok blong Jeova.
19. ?Olsem wanem ol papa mama oli save folem fasin blong Jeova taem oli mekem famle stadi?
19 Be, taem yu mekem famle stadi, yu no mas stadi kwiktaem nomo long sam haf blong Baebol, we yu no tingting dip long hem. Jeova i yusum ol pris blong tijim ol man Isrel we oli wosip long hem bakegen. Ol pris ya, oli “oli stap talemaot mining” blong Loa ya, mo taem oli stap rid oli mekem “olgeta man oli save.” (Nehemaea 8:8) Wan papa i rerem stadi fastaem long rum blong hem, bifo we hem i mekem wetem famle blong hem. Hem i tingbaot ol wanwan pikinini blong hem, mo olsem wanem blong mekem se stadi bambae i givhan long olgeta. Hem i mekem se famle stadi i wan taem blong harem gud. Long rod ya nao papa ya i givhan long olgeta seven pikinini blong hem blong oli lavem Jeova. Wan bigfala boe blong hem i talem se: “Oltaem mifala i haremgud long stadi ya. Sipos mifala i stap plei bol afsaed, mo papa mama i singaot mifala blong kam mekem famle stadi, kwiktaem nomo mifala i lego pleplei ya. Long naet blong famle stadi, mifala i glad moa bitim olgeta narafala naet long wik.”
20. ?Bambae yumi tokbaot wanem problem we sam papa mama oli fesem taem oli tijim pikinini blong olgeta?
20 Man we i raetem Ol Sam i talem se: “Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi.” (Ol Sam 127:3) I nidim taem mo hadwok blong tijimgud pikinini blong yumi, be sipos yumi tijim olgeta long fasin we i stret, bambae oli save kasem laef we i no save finis. !Hemia bambae i wan nambawan blesing! Taswe, yumi mas traehad blong folem fasin blong Jeova taem yumi tijim pikinini blong yumi. Be, nating se ol papa mama oli gat wok ya blong ‘lukaot gud long [ol pikinini], stretem olgeta, mo tijim olgeta, olsem we Masta blong yumi i stap stretem yumi, i stap tijim yumi,’ samting ya i no minim se bambae oli sua blong kasem gudfala frut from. (Efesas 6:4) Wan pikinini i save kam wan rebel mo lego wosip blong Jeova, nating se papa mama i traehad blong tijimgud hem. ?Olsem wanem nao? Bambae yumi tokbaot samting ya long haf we i kam biaen.
[Futnot]
^ Maet ol eksampol we oli stap long haf ya mo haf we i kamaot biaen, oli kamaot long ol kantri we laef blong olgeta i defren long kantri blong yu. Traem luksave ol rul blong Baebol long ol stori ya, mo mekem oli wok long kantri blong yu.
?Wanem Ansa Blong Yu?
• ?Olsem wanem ol papa mama oli save folem fasin blong Jeova blong soemaot lav, olsem Dutronome 32:11, 12 i tokbaot?
• ?Yu yu lanem wanem long fasin we Jeova i gat blong toktok wetem ol man Isrel?
• ?Yumi lanem wanem long fasin blong Jeova we i lesin long Lot?
• ?Aesea 28:24-29 i tijim yumi long wanem samting long saed blong fasin blong stretem pikinini?
[Kwestin]
[Tok blong pija long pej 9]
Moses i talem se fasin ya we Jeova i tijimgud ol man blong hem i olsem fasin ya we wan igel i mekem long ol pikinini blong hem
[Tok blong pija long pej 10]
Ol papa mama oli mas spenem taem wetem pikinini blong olgeta
[Tok blong pija long pej 12]
“Long naet blong famle stadi, mifala i glad moa bitim olgeta narafala naet blong wik”