?Olsem Wanem Blong Givhan Long “Pikinini We i Lusum Rod”?
?Olsem Wanem Blong Givhan Long “Pikinini We i Lusum Rod”?
“Yumi glad, from we . . . hem i lus, be naoia yumi faenem hem bakegen.”—LUK 15:32.
1, 2. (a) ?Sam yangfala we oli save Kristin trutok oli mekem wanem? (b) ?Ol papa mama mo ol pikinini we oli kasem trabol ya oli harem olsem wanem?
“!MI mi finis long trutok!” !Ol papa mama we oli onagud long God mo we oli traehad blong tijim Kristin fasin long ol pikinini blong olgeta, oli mas harem nogud bitim mak sipos pikinini blong olgeta i talem toktok ya! Sam narafala yangfala we oli lego trutok, oli no talem toktok olsem. Olgeta ya oli jes “lusum rod” sloslou nomo. (Hibrus 2:1) Plante long olgeta oli olsem pikinini we i lusum rod long parabol blong Jisas. Pikinini ya i lego haos blong papa, i go long wan kantri farawe, mo i lusum evri mane we hem i kasem long ol rabis fasin we hem i stap mekem.—Luk 15:11-16.
2 Nomata we bighaf blong ol papa mama we oli Witnes blong Jeova oli no gat problem olsemia, be ol papa mama we pikinini blong olgeta i lego trutok oli mas harem nogud tumas. I no gat tok blong leftemap tingting we i naf blong karemaot fulwan soa blong olgeta. Mo yangfala ya we i stronghed, hem tu i mas harem nogud. Ating dip insaed long hat blong hem tingting blong hem i stap jajem hem. Long parabol blong Jisas, “gudfala tingting i kambak” long pikinini ya, mekem se papa blong hem i glad tumas. ?Ol papa mama mo ol narafala long kongregesen oli save mekem wanem blong givhan long ol yangfala we oli lusum rod, blong ‘gudfala tingting i kambak long olgeta?’—Luk 15:17.
From Wanem Sam Oli Lego Trutok
3. Talem sam risen from wanem wan yangfala i save lego Kristin kongregesen.
3 Plante handred taosen yangfala oli glad blong mekem wok blong Jeova long Kristin kongregesen. ?Taswe, wanem nao i mekem se sam oli lego kongregesen? Maet sam oli harem se oli mestem sam gudfala samting, from we oli no stap joen long wol. (2 Timoti 4:10) No maet oli ting se kongregesen we i olsem sefples blong yumi, i stap blokem olgeta bitim mak. Mo tu, yangfala i save lego kongregesen blong Jeova sloslou, sipos tingting blong hem i stap jajem hem from wan bigfala sin we hem i bin mekem, sipos hem i laekem wan gel no boe we i no stap long trutok, no sipos hem i fraet blong stap defren long ol narafala yangfala long wol. Mo tu, maet wan yangfala i no moa mekem wok blong God from we hem i ting se papa mama no sam narafala Kristin oli gat tu fes.
4. ?Wanem i stamba blong problem ya se plante yangfala oli lusum rod?
4 Plante taem wan pikinini i stronghed mo i gat fasin rebel from we hem i slak long saed blong spirit. Fasin blong hem i soemaot wanem i stap long hat blong hem. (Ol Proveb 15:13; Matiu 12:34) Nomata wanem samting i mekem wan yangfala i lusum rod, plante taem stamba blong problem hemia se hem i no gat “stret save long trutok.” (2 Timoti 3:7, NW ) Wosip we ol yangfala oli mekem i go long Jeova i no mas kam olsem wan kastom nomo. I impoten tumas we oli wokem wan gudfala fasin fren wetem Jeova. ?Wanem i save halpem olgeta blong mekem samting ya?
Kam Klosap Long God
5. ?Wan yangfala i mas mekem wanem blong frengud wetem God?
5 Disaepol Jemes i raetem se: “Yufala i mas stap klosap long God, nao hem bambae i kam stap klosap long yufala.” (Jemes 4:8) Blong wan yangfala i save kam klosap long God, hem i mas lanem blong laekem Tok blong God. (Ol Sam 34:8) Fastaem, hem i nidim “melek nomo”—hemia ol stamba tijing blong Baebol. Be taem hem i stat blong kasem glad long Tok blong God mo laekem ol “strong kakae”—hemia ol dip save—bambae i no longtaem biaen hem i kam bigman long saed blong spirit. (Hibrus 5:11-14; Ol Sam 1:2) Wan yangfala we i bin joen fulwan long ol fasin blong wol, i stat blong laekem ol sas samting long saed blong spirit bakegen. ?Wanem i mekem hem i tanem tingting blong hem? Afta we hem i kasem advaes ya blong ridim fulwan Baebol, hem i folem wan program blong ridim Baebol oltaem. Yes, blong frengud wetem Jeova, i impoten tumas we yumi ridim Tok blong God oltaem.
6, 7. ?Olsem wanem ol papa mama oli save halpem ol pikinini blong olgeta blong laekem Tok blong God?
6 !I impoten tumas we ol papa mama oli halpem ol pikinini blong olgeta blong laekem Tok blong God! Nating se wan yangfala gel i joen long famle stadi oltaem, hem i stap joen wetem ol nogud fren. Long saed blong famle stadi, hem i talem se: “Taem Papa i askem ol kwestin, mi no leftemap hed blong mi, mi jes ridimaot ol ansa nomo.” Ol papa mama we oli waes oli no jes kavremap ol haf we oli stadi long hem kwiktaem, be oli yusum stadi ya blong tijimgud pikinini blong olgeta. (2 Timoti 4:2) Blong wan yangfala i laekem famle stadi, hem i mas harem se stadi ya i stap givhan long hem wan. I gud blong askem ol kwestin we oli pulum yangfala blong talemaot prapa tingting blong hem. Mo tu, leftemap tingting blong hem blong mekem samting we hem i lanem long stadi ya i wok long laef blong hem. *
7 Mo tu, mekem famle Baebol stadi long wan fasin we i pulum intres blong ol pikinini. Maet ol pikinini oli save mekem wan plei blong soemaot wan stori long Baebol. Taem yu tokbaot ol ples no kantri we ol stori oli bin hapen, traem halpem ol pikinini blong mekem wan pija long tingting blong olgeta. Maet yu save yusum ol map mo pija. Yes, sipos yumi yusum tingting blong yumi, yumi save mekem famle stadi i pulum intres mo i no sem mak oltaem. I gud tu we ol papa mama oli tingbaot prapa fasin fren blong olgeta wetem Jeova. Taem olgeta oli kam klosap moa long Jeova, oli save givhan long ol pikinini blong olgeta blong mekem samting ya tu.—Dutronome 6:5- 7.
8. ?Olsem wanem prea i save givhan long yumi blong kam klosap moa long God?
8 Mo tu, prea i save givhan blong kam klosap long God. Wan yangfala gel i harem nogud, from we hem i no save jusum sipos hem i wantem folem fasin blong laef blong wan Kristin no joen wetem ol fren blong hem we oli no gat sem bilif. (Jemes 4:4) ?Hem i mekem wanem? Hem i talem se: “Mi prea long Jeova, mo hemia fastaem, we mi talemaot olgeta filing blong mi long hem.” Hem i luk se Jeova i ansa long prea blong hem, taem hem i faenem wan gel long kongregesen we i save talemaot olgeta tingting blong hem long hem. Hem i harem se Jeova i stap lidim hem, mo hem i stat blong wokem wan gudfala fasin fren wetem God. Sipos ol papa mama oli mekem ol prea blong olgeta oli kam gud moa, oli save givhan long ol pikinini blong olgeta. Taem oli prea olsem wan famle, oli mas talemaot olgeta samting we i stap long hat blong olgeta. Olsem nao, ol pikinini bambae oli luksave gudfala fasin fren we papa mama i gat wetem Jeova.
Nidim Wan Strong, Be Longfala Tingting
9, 10. ?Olsem wanem Jeova i givim eksampol long yumi taem hem i soemaot longfala tingting long ol stronghed man Isrel?
9 Taem wan yangfala i stat blong lusum rod, samtaem hem i wantem stap hem wan. Maet hem i no wantem we papa mama i tokbaot Baebol wetem hem. ?Ol papa mama we oli kasem traem ya oli save mekem wanem? Tingbaot wanem we Jeova i mekem long ol man Isrel bifo. Bitim 900 yia, ol “stronghed” man Isrel oli spolem Jeova, be hem i gat longfala tingting. Biaen nomo, hem i lego olgeta oli gohed long ol nogud fasin blong olgeta. (Eksodas 34:9; 2 Kronikel 36:17-21; Rom 10:21) Nating se ‘plante taem olgeta ya oli stap traem hem,’ Jeova i “gat sore” long olgeta. “Plante taem hem i holem kros blong hem. Hem i kros tumas long olgeta be i no letem i kamaot.” (Ol Sam 78:38-42) Oltaem Jeova i mekem i stret long olgeta. Ol papa mama we oli lavem pikinini blong olgeta oli folem fasin blong Jeova mo soem longfala tingting nating se pikinini i no kwik blong lesin taem oli traem halpem hem.
10 Wan man we tingting blong hem i longfala i neva lusum hop se fasin fren we i brok i save kamgud bakegen. Jeova i soem nambawan eksampol long saed blong longfala tingting. “Oltaem” hem i stap sanem ol profet blong hem long ol man Isrel. Jeova “i gat sore long olgeta,” nating se “oli stap jikim ol profet ya, oli stap tanem baksaed long ol tok blong olgeta.” (2 Kronikel 36:15, 16) Hem i singaot long ol man Isrel, i se: “Yufala evriwan, kambak plis, mo livim rabis rod blong yufala.” (Jeremaea 25:4, 5, NW ) Be, neva Jeova i lego ol stret rul blong hem. Ol man Isrel oli kasem advaes se oli mas “kambak” long God mo folem ol rod blong hem.
11. ?Olsem wanem ol papa mama oli save soem longfala tingting, be strong tingting taem oli stap givhan long pikinini we i lusum rod?
11 Ol papa mama oli save folem fasin blong Jeova mo soem longfala tingting, taem oli no kwik blong lego pikinini blong olgeta we i lusum rod. Oli no mas kam slak blong halpem pikinini ya. Oli save gohed blong toktok long hem oltaem no oli save tekem fas step blong toktok long hem bakegen sipos oli bin stap olsem badfren. Oli holemstrong long ol stret rul blong God, be oli gohed tu blong toktok “oltaem” long pikinini blong pulum hem blong kambak long rod blong trutok.
Taem Kongregesen i Sakemaot Wan Yangfala
12. ?Papa mama i gat wanem wok blong mekem, sipos kongregesen i sakemaot pikinini blong tufala we i stap yet long haos?
12 ?Olsem wanem sipos wan yangfala we i stap yet wetem papa mama blong hem i mekem wan bigfala sin? ?Mo olsem wanem nao sipos yangfala ya i no tanem tingting blong hem mo kongregesen i sakemaot hem? From we pikinini ya i stap yet wetem papa mama, hem i wok blong tufala nao blong tijim mo stretem hem folem Tok blong God. ?Olsem wanem tufala i save mekem samting ya?—Ol Proveb 6:20-22; 29:17.
13. Olsem wanem papa mama i save kasem hat blong pikinini we i mekem sin?
13 I gud sipos papa mama i save stadi Baebol wetem pikinini ya hem wan. Maet long rod ya tufala i save tijim mo stretem hem. Papa mama i no mas letem stronghed fasin blong pikinini ya i blokem tufala blong traem luksave wanem i stap long hat blong hem. Tufala i mas traehad blong luksave olgeta samting we i mekem pikinini ya i slak long saed blong spirit. (Ol Proveb 20:5) Maet hat blong pikinini i sofsof yet. ?Wanem ol vas blong Baebol we papa mama i save yusum blong tajem hat blong hem? Aposol Pol i talem stret se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” (Hibrus 4:12) Ol papa mama oli no jes talem nomo long ol pikinini blong no moa joen long rabis fasin bakegen. Oli save mekem moa. Yes, oli save traehad blong statem pikinini long rod blong kamgud bakegen, mo halpem hem blong gohed long rod ya.
14. ?Wanem faswan samting we wan yangfala we i mekem bigfala sin i mas mekem blong frengud bakegen wetem Jeova, mo olsem wanem papa mama i save givhan long hem?
14 Wan yangfala we i mekem bigfala sin i mas frengud bakegen wetem Jeova. Blong mekem samting ya, faswan samting hem i ‘mas tanem tingting blong hem from ol sin blong hem.’ (Ol Wok 3:19; Aesea 55:6, 7) Blong givhan long wan yangfala we i stap yet long haos, blong hem i tanem tingting blong hem, ol papa mama oli mas gat tingting we ‘i longfala. Oli mas man we i save stretem ol man we oli agens long olgeta, long fasin we i kwaet nomo.’ (2 Tim. 2:24-26) Oli mas “tok strong” long hem folem mining blong tok ya we Baebol i givim. Grik tok we oli tanem i kam “tok strong” i save minim tu se ‘soemaot we hem i rong.’ (Revelesen 3:19; Jon 16:8) Taswe, blong stretem pikinini, papa mama i mas givim naf pruf blong mekem hem i luksave se rod we hem i stap folem i rong. I tru se, samting ya i no isi blong mekem. Be, ol papa mama oli save kasem hat blong pikinini ya, taem oli yusum evri rod we Baebol i agri long hem blong mekem hem i luksave. Oli mas halpem hem blong luksave se ‘hem i mas no laekem nating samting we i nogud, be hem i mas laekem samting we i gud.’ (Amos 5:15, NW ) Maet ‘hem i save kasem stret tingting blong hem bakegen. Nao bambae hem i save ronwe long trap blong Setan.’
15. ?Olsem wanem prea i save halpem yangfala we i mekem sin blong i frengud bakegen wetem Jeova?
15 Blong fren gud bakegen wetem Jeova, i impoten tumas blong prea. Be, i no stret we yumi “prea from” wan man we i joen long Kristin kongregesen bifo, we i stap gohed nomo blong mekem bigfala sin mo i klia se hem i no tanem tingting blong hem nating. (1 Jon 5:16, 17; Jeremaea 7:16-20; Hibrus 10:26, 27) Ol papa mama oli save askem Jeova blong givim waes long olgeta blong oli save stret rod blong folem. (Jemes 1:5) Sipos wan yangfala we kongregesen i sakemaot hem i soemaot se hem i tanem tingting blong hem, be hem i harem se hem i no ‘save stanap strong long fes blong God we hem i no fraet,’ maet papa mama i save prea long God from hem. Oli save askem se sipos God i wantem, hem i save fogivim sin blong pikinini ya. (1 Jon 3:21) Taem yangfala ya i harem prea blong papa mama, samting ya i save halpem hem blong luk se Jeova i wan God we i gat sore. *—Eksodas 34:6, 7; Jemes 5:16.
16. ?Taem kongregesen i sakemaot wan yangfala, yumi save mekem wanem blong givhan long famle blong hem?
16 Sipos kongregesen i sakemaot wan yangfala we i baptaes, ol memba blong kongregesen ‘oli no mas go joen’ wetem hem. (1 Korin 5:11; 2 Jon 10, 11) Maet fasin ya i mekem “gudfala tingting i kambak long hem” mo hem i kambak long sefples long kongregesen blong God. (Luk 15:17) Nating se hem i kambak no nogat, ol memba blong kongregesen oli save leftemap tingting blong famle blong hem. Yumi save lukaot rod blong soem se ‘yumi gat sore long olgeta’ mo ‘mekem i gud long olgeta.’—1 Pita 3:8, 9.
?Ol Narafala Oli Save Givhan Olsem Wanem?
17. ?Ol memba blong kongregesen oli mas tingbaot wanem, taem oli traem givhan long wan pikinini we i lusum rod?
17 ?Olsem wanem long wan yangfala we Kristin kongregesen i no sakemaot hem, be we i kam slak long bilif? Aposol Pol i raetem se: ‘Sipos wan haf blong bodi i harem nogud, be bambae olgeta bodi i mas harem nogud.’ (1 Korin 12:26) Ol narafala long kongregesen oli save soem intres long yangfala ya. I tru se, oli mas lukaotgud. Wan yangfala we i slak long saed blong spirit i save spolem gudfala fasin blong ol narafala yangfala. (Galesia 5:7-9) Long wan kongregesen, sam bigman oli bin wantem blong givhan long sam yangfala we oli kam slak long saed blong spirit. Ale, oli singaot ol yangfala ya blong hivap tugeta blong plei miusik. Nating se ol yangfala ya oli glad blong kam mo oli haremgud taem oli stap plei tugeta, be fasin blong olgeta wanwan i gat paoa long ol narawan, mekem se olgeta evriwan oli lego kongregesen. (1 Korin 15:33; Jud 22, 23) I gud blong hivap tugeta wetem wan yangfala we i slak long saed blong spirit. Be fasin ya i no save givhan sipos i no soem rod long hem long saed blong spirit. Yangfala ya i nidim blong joen wetem olgeta we oli leftemap tingting blong hem blong laekem ol samting long saed blong spirit. *
18. ?Yumi save mekem wanem we i folem fasin blong papa long parabol blong Jisas?
18 Taem wan yangfala we i lego kongregesen i kambak bakegen long Haos Kingdom no long wan asembli, traem tingbaot filing blong hem. !I gud yumi welkamem hem olsem papa blong pikinini we i lusum rod long parabol blong Jisas! (Luk 15:18-20; 25-32) Wan yangfala we i lego Kristin kongregesen be biaen i joen bakegen long wan distrik asembli, i talem se: “Mi mi ting se bambae ol brata mo sista oli no wantem save long mi, be oli kam talem halo mo oli mekem welkam long mi. Samting ya i rili tajem hat blong mi.” Hem i stat blong stadi Baebol bakegen mo biaen i tekem baptaes.
Yumi No Mas Lego
19, 20. ?From wanem yumi mas holem wan gudfala tingting long saed blong wan pikinini we i lusum rod?
19 I nidim longfala tingting blong givhan long wan pikinini “we i lusum rod,” blong mekem se “gudfala tingting i kambak” long hem. Hem i wan bigfala traem long ol papa mama mo ol narafala we oli stap givhan. Be yumi no mas lego. “Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Olsem Baebol i talem, Jeova i wantem se ol man oli tanem tingting blong olgeta mo oli kasem laef. Yes, God i wokem rod blong man i save frengud wetem hem bakegen. (2 Korin 5:18, 19) From longfala tingting blong God, gudfala tingting i kambak finis long plante milian man.—Aesea 2:2, 3.
20 Taswe, ol papa mama oli mas yusum evri rod we i laenap wetem Baebol, blong givhan long ol pikinini we oli lusum rod, blong gudfala tingting i kambak bakegen long olgeta. Taem yu mekem ol samting blong givhan long pikinini blong yu blong kambak long Jeova, folem eksampol blong Hem mo soem longfala tingting. Holemstrong long ol stret rul blong Baebol. Traehad blong soemaot ol fasin blong Jeova olsem lav, stret fasin, mo waes, mo prea blong Jeova i givhan long yu. Jeova i singaot wetem lav long ol stronghed rebel blong oli kambak long hem. Plante oli kambak finis. Maet boe no gel blong yu we i lusum rod, i kambak long sefples long kongregesen blong God.—Luk 15:6, 7.
[Ol futnot]
^ Blong kasem moa advaes long saed blong fasin blong tijimgud ol yangfala, lukluk Wajtaoa blong Julae 1, 1999, pej 13 kasem 17.
^ Long ol miting blong kongregesen, yumi no prea from wan yangfala we kongregesen i sakemaot, from we maet ol narafala oli no save sipos yangfala ya i tanem tingting blong hem no nogat.—Lukluk Wajtaoa blong Oktoba 15, 1979, (Inglis), pej 31.
^ Blong kasem moa advaes, lukluk Wekap! blong Jun 22, 1972 (Inglis), pej 13 kasem 16; Septemba 22, 1996, (Inglis), pej 21 kasem 23.
?Yu Yu Tingbaot?
• ?Maet wanem samting i stamba blong problem we i mekem yangfala i lego kongregesen?
• ?Olsem wanem yumi save givhan long ol yangfala blong frengud wetem Jeova?
• ?From wanem papa mama i nidim wan strong be longfala tingting tu, blong givhan long wan pikinini we i lusum rod?
• ?Olsem wanem ol memba blong kongregesen oli save givhan long wan yangfala blong hem i kambak?
[Kwestin]
[Tok blong pija long pej 15]
Blong wokem wan gudfala fasin fren wetem Jeova yumi mas ridim Tok blong hem
[Tok blong pija long pej 15]
Ol prea blong papa mama we oli kamaot long ful hat blong tufala oli save soemaot long pikinini we tufala i frengud wetem Jeova
[Tok blong pija long pej 17]
Taem ‘gudfala tingting i kambak’ long pikinini we i lusum rod yumi mas mekem hem i welkam
[Tok blong pija long pej 18]
Mekem ol gudfala samting we oli save halpem pikinini blong yu blong kambak long Jeova