Wan Kwestin

?Wanem “spel” ya we Hibrus 4:9-11 i tokbaot, mo olsem wanem wan man i save “go insaed long spel ya”?

Aposol Pol i raet long ol Hibru Kristin blong faswan handred yia i se: “I gat janis i stap yet blong ol man blong God i spel long wan sabat dei. From we olgeta we oli joen wetem God blong spel, oli spel long ol prapa wok blong olgeta, long sem fasin we God i spel long ol wok blong hem fastaem. Taswe yumi mas traehad blong go insaed long spel ya.”—Hibrus 4:9-11, NW.

Taem Pol i tokbaot God we i spel long wok blong Hem, i klia se hem i stap tingbaot ol tok we i stap long Jenesis 2:2. Vas ya i talem se: “Wok ya blong God i finis, nao long namba seven dei, hem i spel.” ?From wanem Jeova i ‘spel long namba seven dei’? Yumi sua se i no from we hem i wantem kasem paoa bakegen afta we olgeta ‘wok ya i finis.’ Nekis vas i halpem yumi blong faenem ansa, i se: “Hem i blesem namba seven dei ya, mo i makemaot se namba seven dei blong wik i tabu, from we long dei ya, hem i no moa wok, hem i spel, from we wok ya blong hem blong mekem olgeta samting we i stap, i finis.”—Jenesis 2:3; Aesea 40:26, 28.

“Namba seven dei” ya i defren long olgeta narafala sikis dei blong fastaem from we hem i wan dei we God i blesem mo i mekem i tabu. Hem i wan dei we God i makem se hem i defren long ol narawan from we hem i gat wan spesel tingting long saed blong dei ya. ?Wanem tingting ya? Samtaem bifo, God i bin talemaot stamba tingting blong hem long saed blong ol man mo wol. God i talem long faswan man mo woman se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Taem God i wokem man mo wol ya fastaem, evri samting i stret gud olgeta. Be bambae i tektaem blong fulumap wol mo mekem hem i kam wan paradaes we wan famle blong ol stret man nomo i stap long hem, olsem we God i wantem. Taswe, blong letem se olgeta samting we hem i wokem finis i save kasem mak ya we i stret long tingting blong hem, God i spel long “namba seven dei,” we i min se hem i no moa wokem eni niufala samting long wol. Nao taem “dei” ya bambae i finis, olgeta samting we God i wantem bambae oli kamtru fulwan. ?Spel ya bambae i longfala olsem wanem?

Sipos yumi gobak long toktok blong Pol long Hibrus, yumi makem we hem i poenemaot se “i gat janis i stap yet blong ol man blong God oli spel long wan sabat dei,” mo hem i pulum ol Kristin brata blong hem blong oli mas “traehad blong go insaed long spel ya.” Hemia i soem se taem Pol i raetem ol toktok ya, “seven dei” ya blong spel blong God, we i bin stat samwe 4,000 yia bifo, i stap gohed yet. Dei ya bambae i finis taem stamba tingting blong God long saed blong ol man mo wol i kamtru fulwan. Hemia long en blong Wan Taosen Yia Rul blong Jisas Kraes, we i “Masta blong Sabat dei.”—Matiu 12:8; Revelesen 20:1-6; 21:1-4.

Wetem naesfala hop ya, Pol i eksplenem olsem wanem wan man i save go insaed long spel blong God. Hem i raetem se: “Olgeta we oli joen wetem God blong spel, oli spel long prapa wok blong olgeta.” Hemia i soem long yumi se nating se fastaem ol man oli stret gud olgeta, be ful kampani blong ol man long wol oli no stap insaed long spel blong God. Samting ya i kamaot from we longtaem finis Adam mo Iv tufala i no bin spel long “namba seven dei” blong God, we i minim se tufala i no bin akseptem rod we Jeova i mekem rere blong tufala. Defren olgeta, tufala i rebel mo tufala i wantem kam independen long God. Tufala i biaen long plan blong Setan i bitim we tufala i letem God i lidim tufala wetem lav. (Jenesis 2:15-17) Risal we i kamaot se tufala i lusum janis blong laef foreva long wan wol we i kam paradaes. Stat long taem ya, olgeta man long wol oli kam slef blong sin mo ded.—Rom 5:12, 14.

Fasin rebel blong ol man i no blokem stamba tingting blong God. Dei blong spel blong hem i gohed. Be, wetem lav, Jeova i wokem wan rod—hemia ransom—tru long Pikinini boe blong hem, Jisas Kraes, nao olgeta we oli agri long rod ya wetem bilif, oli save gat hop blong kam fri mo spel long baden blong sin mo ded. (Rom 6:23) From samting ya nao, Pol i pulum ol Kristin brata blong hem blong ‘oli spel long prapa wok blong olgeta.’ Oli mas akseptem rod we God i rerem blong sevem olgeta mo oli no mas traem blong wokem prapa fiuja blong olgeta, olsem we Adam mo Iv i bin mekem. Mo tu, oli no mas lukaotem prapa rod blong olgeta blong mekem eskius.

Taem yumi putumaot ol samting we yumi nomo i wantem, mo yumi no ronem ol samting blong wol, blong bambae yumi save mekem wil blong God, samting ya i mekem yumi haremgud mo tingting blong  yumi i spel. Jisas i singaot yumi se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”—Matiu 11:28-30.

Toktok we Pol i mekem long saed blong spel blong God mo olsem wanem wan man i save go insaed long spel ya, i mas rili leftemap tingting blong ol Hibru Kristin blong Jerusalem. Olgeta ya oli bin fesem plante hadtaem long ol man we oli agensem olgeta mo jikim olgeta from bilif blong olgeta. (Ol Wok 8:1; 12:1-5) Long sem fasin, ol tok blong Pol oli save leftemap tingting blong ol Kristin tede. Taem yumi kasem save se i no longtaem promes blong God blong mekem wol i kam wan paradaes aninit long stretfala Kingdom blong hem, bambae i kamtru, yumi tu yumi mas spel long ol wok blong yumi mo traehad blong go insaed long spel blong God.—Matiu 6:10, 33; 2 Pita 3:13.

[Tok blong pija long pej 31]

Promes blong God long saed blong wan paradaes long wol bambae i kamtru long en blong spel blong hem