Wan Lesen Long Saed Blong Pam Tri

“WAN nambawan samting we i naes tumas blong luk wetem ae, mo i spesel long kaen blong hem.” Hemia nao ol tok we wan insaeklopedia blong Baebol i yusum blong tokbaot detpam. Long taem blong Baebol mo tede tu, ol detpam oli flasemgud ol levelples blong Ijip, mo oli mekem gudfala sado olbaot long Draeples ya Negeb.

Olsem ol defdefren kaen pamtri, ol detpam oli gru stret. Sam long ol pamtri ya oli longfala olsem 30 mita mo oli save karem frut go kasem 150 yia. Yes, ol detpam ya oli naes blong lukluk wetem ae, mo oli stap karem frut we i plante we plante. Evri yia, ol wanwan pamtri oli karem plante bandel blong frut. Wan bandel i save holem bitim 1,000 smosmol det. Wan man blong raetem buk i tokbaot ol frut blong pamtri i se: “Ol man we . . . oli kakae nomo ol det ya we oli drae finis mo we oli salem long ol paket long stoa, oli no save gudfala tes blong frut ya taem man i jes tekemaot long tri.”

I stret nomo we Baebol i yusum pamtri olsem wan pijatok blong tokbaot man. Ol man we oli wantem se God i glad long olgeta, oli mas mekem stret fasin mo oli mas gohed blong karem gudfala frut long wok blong olgeta, olsem pamtri we i karem plante frut. (Matiu 7:17-20) From risen ya, i gat ol pija blong pamtri blong flasem stonwol blong tempel blong Solomon mo tempel ya we Esikel i luk long wan vison. (1 King 6:29, 32, 35; Esikel 40:14-16, 20, 22) Taswe, God i save glad long wosip blong man we fasin blong hem i gud, olsem ol detpam we oli naes tumas blong lukluk. Tok blong God i eksplenem se: “Ol man we fasin blong olgeta i stret, bambae oli gru gud olsem ol pamtri.”—Ol Sam 92:12, NW.